ཁྲོ་གཏུམ།
མཚན་མོས་ཉིན་མོ་འབོད་པ
ཉིད་འོད་ཤར་བའི་བརྡ་ལན་རི་བོའི་རྩེ་དང་རྒྱ་མཚོའི་མཐར་རུ་མི་འདུག
ཉིན་མོས་མཚན་མོ་འབོད་པ
ཟླ་འོད་འཕྲོས་པའི་བློ་གྲོས་ཤར་ནུབ་གང་དུ་ཡང་ནི་མི་འདུག
ས་གཞིས་རྒྱ་མཚོ་འབོད་པ
རླབས་ཀྱི་རང་སྒྲར་གྱུར་བའི་སྤོབས་པའི་ལ་རྒྱ་གང་སར་མི་འདུག
རྒྱ་མཚོས་ས་གཞི་འབོད་པ
སྐྱེས་འགྲོ་སྟོང་གི་མདུན་བསྐྱོད་རྨི་ལམ་དཀྲོགས་པའི་སྒྲ་ཞིག་ག་ནས་མ་ཐོས
མི་ཡིས་དུད་འགྲོ་འབོད་པ
འབྲོང་གཡག་རྐྱང་གི་ཁ་རྔོགས་གྱི་ལེར་ཡོད་པ་རྒན་པའི་ཁ་དཔེ་ཞིག་རེད
དུད་འགྲོས་མི་རྣམས་འབོད་པ
བློ་གྲོས་རྩལ་གྱི་གླེགས་བམ་མཐུག་པོ་རྡུལ་གྱིས་མནན་པའི་ཤོབ་ཏུ་གྱུར
༢༠༢༡།༠༤།༢༩ཉིན་ཕུལ།