བསྟན་འཛིན་ཡེ་ཤེས།
གངས་ལྗོངས་ཀྱི་ལ་རྒྱའི་སྤྲིན་སྔོན་ཡང་ལྷོ་ནས་ལྡིང་ངེས་ཡིན།
དོན་གྲུབ་རྒྱལ་གྱི་སྤྲིན་དཀར་གྱི་འདབ་མའི་ཚིག་ཅིག
སྟོང་ཁམས་ཆེན་པོ་འདིའི་ནང་དུ་རྒྱུ་སྐར་དང་བརྟན་སྐར་ས་ཡ་དུ་མ་ཞིག་སྦང་སྒྲ་ཆེན་མོའམ་སྟོང་ཁམས་གས་གཏོར་ཆེན་མོའི་རྗེས་སུ་བྱུང་བ་དང་། གས་གཏོར་དེའི་ཀླུང་དུ་ང་ཚོ་འཚོ་སྡོད་བྱེད་འོས་པའི་རྒྱུ་སྐར་ཡང་གྲངས་ལས་འདས་པ་ཞིག་བྱུང་ཞིང་ང་ཚོའི་དེ་རིང་གི་སའི་གོ་ལ་འདི་ཡང་དེ་ལས་མ་འདས། ཕྱི་དངོས་པོའི་གས་གཏོར་རེ་རེ་ཡིས་ནང་བཅུད་ཀྱི་སེམས་ཅན་དག་གི་བློ་སྒོ་ཡང་རིམ་པར་ཕྱེས་དང་ཕྱེ་བཞིན་པ་སྟེ། བྱ་དངོས་གང་ཞིག་གིས་མི་སྒེར་དང་སྤྱི་ཚོགས་ཤིག་གི་འདོད་པ་མ་ཁེངས་ཚེ་རྐང་པ་འགུལ་ནས་གོམ་བགྲོད་བྱེད་པ་དང་ལག་པ་འགུལ་ནས་འཕྲེད་དར་འཕྱར་བ། ཁ་ལྕེ་འགུལ་ནས་འབོད་ཚིག་སྒྲོག་པ་སོགས་བརྒྱུད་ནས་རང་གི་མགོ་ཐོག་ནས་དུས་རྟག་པར་ལྗིད་ཏིག་གེར་དང་འཇིགས་ཡེར་རེར་ཡོད་པའི་དབང་འཛིན་པ་དང་གཉའ་གནོན་མཁན་ལ་གསལ་ཞིང་རྣོ་བའི་བརྡ་ལན་ཞིག་དང་ཕྲ་ཞིང་ཞིབ་པའི་འདྲི་ཚིག་ཅིག་འདོན་བཞིན་ཡོད།
གཟའ་འཁོར་གཉིས་ཀྱི་སྔོན་ཏག་ཏག་ལ་བོད་མདོ་སྨད་རེབ་གོང་གི་སློབ་མ་ཚོས་སྐད་རིགས་རང་དབང་དང་མི་རིགས་འདྲ་མཉམ་གྱི་འཕྲེད་དར་འཕྱར་ཞིང་འབོད་ཚིག་སྒྲོག་བཞིན་རྒྱ་ནག་གཞུང་དང་མཚོ་སྔོན་ཞིང་ཆེན་གྱི་སྐད་ཡིག་གཏན་འབེབ་ཁྲིམས་གཞིར་ངོ་རྒོལ་དྲག་པོ་ཞིག་བྱས་མ་ཐག མཚོ་ལྷོ་ཆབ་ཆ་དང་མགོ་ལོག མཚོ་སྔོན་གསོ་རིག་སློབ་གླིང་དང་ཀྲུང་དབྱང་མི་རིགས་སློབ་གྲྭ་ཆེན་མོ་སོགས་ནས་ཀྱང་སྔ་རྗེས་སུ་གོང་གི་འབོད་ཚིག་གི་སྒྲ་རླབས་རེ་རེ་བཞིན་མཆེད་ཡོང་བ་དང་། གོང་གི་འཕྲེད་དར་གྱི་ཡིག་ཕྲེང་རེ་རེ་བཞིན་མེ་ལྕེ་བཞིན་འབར་ཡོང་བ་དེ་ལ་མཐོང་ཞིང་ཐོས་པའི་སྐད་ཅིག་མ་རེ་རེ་བཞིན། སྔོན་ཆད་མི་མཁྲེགས་པོ་རྡོ་ལྟ་བུ་ཞིག་ཡིན་པར་བསམ་བཞིན་པའི་རང་ཉིད་ལ་མཚོན་སེམས་པ་བློང་བློང་བོར་གྱུར་ཅིང་མིག་ཟུང་ལས་མཆི་མའི་ཆར་རྒྱུན་ནི་རང་དབང་མེད་པར་ཟགས་པར་གྱུར།
ལོ་ངོ་དྲུག་བདུན་ལས་སོན་མེད་པའི་བྱིས་པ་དར་མ་ཁྱུ་གཅིག་གིས་སྣེ་ཁྲིད་པའི་སློབ་མ་སྟོང་ཕྲག་ཁ་ཤས་ཀྱིས་འཛམ་གླིང་འདིའི་སྟེང་དུ་དྲག་ཤུགས་ཀྱིས་རྫིག་རྫིག་རྔམ་རྔམ་བྱེད་བཞིན་ཡར་ལ་དཔལ་འབྱོར་གྱི་འགྲན་རྩོད་དང་མར་ལ་དཔལ་འབྱོར་གྱིས་གནོན་ཤུགས་ཆེ་ཐག་ཆོད་རེ་སྤྲད་དང་སྤྲོད་བཞིན་པའི་སྟོབས་ཆེན་རྒྱ་ནག་རྒྱལ་ཁབ་འདིའི་སྲིད་བྱུས་གཏིང་ནག་ཅིང་ཕྱི་རྩུབ་པ་འདིའི་ཁ་གཏད་དུ་ལངས་ནས་རང་སྲོག་བློས་བཏང་གིས་གསེར་མདོག་གི་དབྱངས་གསལ་སོ་བཞིའི་སྲུང་སྐྱོབ་བྱེད་བཞིན་པ་འདི་ནི་རྨི་ལམ་ཡིན་ནམ་མངོན་སུམ་ཡིན།
འདི་ནི་ཉིས་སྟོང་བརྒྱད་ལོའི་ངོ་རྒོལ་གྱེན་ལངས་ཀྱི་རྗེས་སུ་བོད་རིགས་ཤེས་ལྡན་པ་ཞིག་གིས་ལྷ་སའི་མཁའ་དབྱིངས་སུ་འཐིབས་པའི་དུད་སྤྲིན་དེ་ནི་མི་རིགས་འདིས་ལོ་ངོ་ལྔ་བཅུར་ཁོག་ཏུ་བཅུག་པའི་སྡུག་བསྔལ་གྱི་དུད་སྤྲིན་ཞིག་ཡིན་ཞེས་རང་གི་དྲ་རྩོམ་ནང་བྲིས་པ་ཇི་བཞིན། དེ་རིང་གི་བོད་ཀྱི་སློབ་གྲྭ་ཆུང་འབྲིང་ཆེ་གསུམ་གྱི་སློབ་མའི་སྐད་རིགས་རང་དབང་དང་མི་རིགས་འདྲ་མཉམ་གྱི་འབོད་སྒྲ་འདི་ཡང་མི་རིགས་འདིས་ལོ་ངོ་ལྔ་བཅུར་ཁོག་ཏུ་ཉར་བའི་སྡུག་བསྔལ་གྱི་འབོད་སྒྲ་དེ་གས་གཏོར་དུ་ཕྱིན་པའི་སྒྲ་སྐད་ཅིག་ལོས་ཡིན།
དེ་རིང་ངས་དོན་གྲུབ་རྒྱལ་གྱིས་ལོ་ངོ་ཉི་ཤུའི་སྔོན་དུ་བྲིས་པའི་གངས་ལྗོངས་ཀྱི་ལ་རྒྱའི་སྤྲིན་སྔོན་ལྷོ་ནས་ལྡང་ངེས་ཞེས་པའི་ཚིག་ཕྲེང་འདི་དག་ཀློག་ཐེངས་རེ་རེར། རྨ་ལྷོ་དང་མཚོ་ལྷོ་ནས་ལྡང་བའི་ལ་རྒྱའི་སྤྲིན་སྔོན་འདི་ཁོང་གིས་མཐོང་མ་ཐུབ་པ་དེར་སེམས་པ་སྐྱོ་བ་དང་ཆབས་ཅིག ཁོང་གིས་འདི་ལྟར་མི་རིགས་འདིའི་ལས་དབང་ལ་མ་འོངས་ལུང་བསྟན་ཞིག་བརྒྱབ་ཡོད་པར་དགའ་གུས་ཀྱི་མཆི་མ་ཡང་འཐོར་བར་བྱེད་དོ། །
གསར་འགྱུར་བརྒྱུད་ལམ་ནས་མཐོང་བ་ལྟར་ན། ཐེངས་འདིའི་བོད་ཀྱི་སློབ་མའི་ངོ་རྒོལ་གྱེན་ལངས་ཀྱི་གནས་ཚུལ་འདི་རྒྱ་ནག་སྐམ་ས་ཧྲིལ་བོ་དང་རྒྱལ་སྤྱིའི་སྟེང་དུ་ཁྱབ་མ་ཐག ཡུ་གུར་མི་རིགས་ཀྱི་དགེ་སློབ་དུ་མས་མཐའ་གཅིག་ཏུ་རྒྱབ་སྐྱོར་གྱི་གཏམ་བཤད་དང་རྩོམ་ཡིག་གང་མང་ཞིག་སྤེལ་བཞིན་ཡོད་པ་དང་། ལས་དབང་གཅིག་པའི་མི་རིགས་འདི་གཉིས་ཀྱིས་ལོ་ངོ་སྟོང་ཕྲག་སྔོན་ནས་ཡོད་པའི་ཁྱིམ་མཚེས་ཀྱི་འབྲེལ་ལམ་བཟང་པོ་དང་། དུས་རབས་ཕྱེད་ཀའི་རིང་ལ་མྱངས་པའི་གདུག་རྩུབ་ཀྱི་གཉའ་གནོན་ལས་རྟོག་པ་དུས་གཅིག་ཏུ་སད་པ་ཡིན་ནོ།།
སྤྱིར་གཏང་བཤད་ན་སྒེར་གཅོད་པ་ཚོའི་ལས་ཀ་ལྟེ་བ་དེ་ནི་གཉའ་གནོན་དང་བཤུ་གཞོག་བྱེད་རྒྱུ་དེ་ཡིན་ཞིང་། ལས་ཀ་གདུག་རྩུབ་ཅན་དེ་ནི་ཁོ་པ་ཚོའི་ཆེད་ལས་ཡིན་པས་དེ་ལ་དམིགས་པའི་ཇུས་འགོད་མཁན་དང་དེ་ལག་ལེན་དུ་མི་བསྟར་མཁན་ལ་རྡུང་རྡེག་གཏོང་བ་སོགས་ལ་ཆེས་སྐྱི་གཡའ་བའི་རྒྱབ་རྟེན་འབོར་ཆེན་ཞིག་ཡོད་པས། སྒེར་གཅོད་པ་དག་གིས་ནམ་རྒྱུན་ཁ་གཡར་ས་དེ་གཞན་ཞིག་དང་ལག་ལེན་དངོས་དེ་དྲག་ཅིང་རྩུབ་པའི་སྦྱོར་བ་ཞིག་ཡིན་པ་ནི་སྨྲ་མི་དགོས་པ་ཞིག་རེད།
རྒྱ་ནག་དམར་ཕྱོགས་རིང་ལུགས་དེ་སྐམ་ས་ཆེན་པོར་རྒྱ་སྐྱེད་དུ་འགྲོ་བཞིན་པའི་དུས་ཏེ། ད་ལྟའི་རྒྱ་ནག་གཞུང་འདི་མ་བཙུགས་གོང་གི་ལོ་ངོ་ཉི་ཤུའི་རིང་ལ། མའོ་ཙེ་ཏུང་དང་ཀྲུའུ་ཨེན་ལི་སོགས་དམར་པོའི་གསར་བརྗེ་བ་རྒན་རབས་དག་གིས་ཅང་ཅེ་ཧྲིའི་སྲིད་གཞུང་ལ་རྡུང་རྡེག་གཏོང་བའི་ལག་ཆ་གཙོ་བོ་ཞིག་ནི་སློབ་གྲྭ་ཆེ་འབྲིང་གི་སློབ་མ་དང་བཟོ་གྲྭ་ཁག་གི་ལས་བཟོ་བ་རྣམས་ཡིན་ཞིང་། སློབ་མས་སློབ་མཚམས་འཇོག་ཏུ་འཇུག་པ་དང་བཟོ་བར་བཟོ་གྲྭ་སྒོ་རྒྱག་ཏུ་འཇུག་རྒྱུ་དེ་ནི་ཁོ་ཚོས་ལས་སླ་བོའི་ངང་སྐུལ་སློང་བྱེད་ཐུབ་པ་ཞིག་དང་ཅང་ཚང་ལ་མཚོན་ན་གདོང་ལེན་བྱེད་སྟངས་མི་ཤེས་པའི་ཧ་ཅང་བྱ་དཀའ་འུ་ཐུག་གི་ལས་འགུལ་ཞིག་ཡིན་པ་བཞིན། ཐེངས་འདིའི་སློབ་མའི་ངོ་རྒོལ་གྱི་ལས་འགུལ་འདི་དང་དེའི་རྗེས་སུ་འབྱུང་ངེས་ཡིན་པའི་སློབ་མཚམས་འཇོག་པའི་ལས་འགུལ་རླབས་པོ་ཆེ་དག་གིས་རྒྱ་ནག་དམར་གཞུང་དང་དེའི་སྒེར་གཅོད་པ་དག་གི་སྙིང་ལ་མི་འདོད་པའི་ཟུག་རྔུ་ཞིག་བསྐྱེད་ཟིན་དང་བསྐྱེད་རྒྱུ་ཡིན་པས། བོད་མི་རིགས་ཀྱི་ས་བོན་དུ་གྱུར་པའི་སློབ་མའི་ལས་འགུལ་ཏེ་རང་དབང་འབོད་སྒྲའི་གས་གཏོེར་ཆེན་མོ་འདིའི་ཟིལ་ཤུགས་ཀྱིས། གཉའ་གནོན་མྱོང་བཞིན་པའི་མི་རིགས་གཞན་དག་དང་མི་དམངས་གཞན་དག་གི་སྙིང་ལ་ཡང་རང་དབང་རྩོད་ལེན་དང་རིག་གཞུང་སྲུང་སྐྱོབ་སོགས་ཀྱི་སྤོབས་པ་དང་གདེང་ཚོད་ཆེན་པོ་ཞིག་སྦྱིན་ཡོད་དོ།།
ཡིན་ན་ཡང་བཙན་བྱོལ་བའི་ཁྲོད་དུ་སྦས་སྐུང་བྱས་ནས་ཡོད་པའི་དཀར་པོའི་འཇིགས་སྐུལ་རིང་ལུགས་པ་སྟེ། དབྱིན་ཡིག་དབྱིན་སྐད་མ་གཏོགས་བོད་ཡིག་བོད་སྐད་ཀྱིས་བོད་མི་རིགས་དང་མི་སྒེར་དག་ལ་ཁེ་ཕན་ཅི་ཡང་སྤྲོད་མི་ཐུབ་པར་འདོད་པ་དག་གིས་ད་ནི་བག་ཡོད་བསྟེན་ན་ལེགས་ཀྱི། བོད་མི་རིགས་ལ་མཚོན་གཞན་རིགས་དམར་ཕྱོགས་དང་རང་རིགས་དཀར་ཕྱོགས་པ་གཉིས་ཀ་ཆོས་དང་རིག་གཞུང་གི་དགྲ་བོ་ཡིན་པ་ནི་སྒོ་ཀུན་མཚུངས་ཆོས་སུ་གྱུར་པ་དང་། དཀར་པོའི་འཇིགས་སྐུལ་བ་དག་ནི་བོད་གཞུང་གི་ལས་ཁུངས་ཁག་གི་ཁོག་པ་རུལ་བའི་གཞུང་ཞབས་པ་དང་སློབ་གྲྭ་ཁག་གི་ཀླད་པ་རུལ་བའི་དགེ་རྒན་དབྱིན་ཡིག་གི་རྐུབ་ལྡག་རྒྱུ་མ་གཏོགས་རང་གི་ཆོས་དང་རིག་གཞུང་ལ་རིན་ཐང་ཅི་ཡང་མི་སྤྲོད་པ་དག་ལ་བརྗོད་པ་ཡིན་པས། ཕྱིའི་དམར་ཕྱོགས་འཇིགས་སྐུལ་རིང་ལུགས་དང་ནང་གི་དཀར་ཕྱོགས་འཇིགས་སྐུལ་རིང་ལུགས་པ་གཉིས་ཀར་གདོང་ལེན་བྱེད་རྒྱུ་དེ་ནི་ང་ཚོའི་མི་རབས་འདིའི་འདོར་དུ་མེད་པའི་འོས་འགན་ཞིག་ཡིན་པ་ཤེས་པར་གྱིས།
བསྟན་འཛིན་ཡེ་ཤེས་ལགས་ཐུགས་རྗེ་ཆེ།
ཁྱེད་ཀྱིས་གསུང་བ་དེར་རྒྱབ་སྐྱོར་ཆ་ཚང་ཡོད། སྤྱིར་རྒྱ་ནག་གཞུང་གིས་བཙན་གྱིས་བཀག་འགོག་བྱེད་ཀྱི་ཡོད་པའི་བོད་ཀྱི་སྐད་ཡིག་གི་གནས་སྟངས་དང་། བཙན་བྱོལ་གཞུང་གིས་ལྷོད་གཡེང་གི་ཐོག་ནས་ཉམས་དམས་སུ་འགྲོ་བཞིན་པ་གཉིས་ངོ་བོ་ཞི་དྲག་གི་ཁྱད་པར་ཙམ་ལས་བོད་ཀྱི་སྐད་ཡིག་ཉམས་བཞིན་པ་གཅིག་མཚུངས་རེད།
ཉེ་ཆར་བོད་ནང་ནས་སློབ་གྲྭ་ཁག་གིས་རྒྱ་གཞུང་ལ་ངོ་རྒོལ་ཁྲོམ་སྐོར་བྱེད་བཞིན་པའི་སྐབས་ཀྱི་བོད་ནང་གི་སློབ་མ་ཚོའི་དགོས་འདུན་ལ་རྒྱབ་སྐྱོར་མཚོན་ཆེད་བཙན་བྱོལ་ཁྲོད་ཀྱི་སློབ་གྲྭ་རེ་ཟུང་གིས་ཀྱང་སྐད་འབོད་བྱས་པ་དེ་ཡག་པོ་རེད་དེ་ཡིན་ན་ཡང་རང་དབང་གི་ལུང་པར་སྐད་ཡིག་སྲུང་སྐྱོབ་བྱེད་རྒྱུའི་ཆ་རྐྱེན་ཡོངས་སུ་རྫོགས་པ་ཚང་ནའང་སྐད་ཡིག་སྲུང་སྐྱོབ་བྱེད་རྒྱུ་ཕར་བཞག་ནས་སྐད་འབོད་ངོ་རྒོལ་གཅིག་བུའི་གཞིས་ལུས་རྒྱ་ཆེའི་མི་མང་གི་རེ་བ་བསྐོང་མི་ཐུབ་པ་ཐག་གིས་ཆོད། དེ་བས་རྒྱབ་སྐྱོར་དང་སེམས་ཤུགས་ཡོད་ན་ཆད་ལ་ཉེ་བའི་སྐད་ཡིག་འདི་སླར་གསོ་བྱེད་རྒྱུར་འབད་བརྩོན་བྱ་གལ་ཆེ་བས་མི་རིགས་ལ་ཤ་ཚ་མེད་ལ་ལྟ་བ་མཁྲེགས་འཛིན་བྱེད་མཁན་གྱི་དགེ་རྒན་དང་། རང་རིགས་ལ་དུང་བ་མེད་པའི་སློབ་མ་མགོ་སྟོང་ཚོས་བསམ་བློ་གཏོང་རན་རེད།