ཀོ་ལི་གྷ་གཞུང་པ་ཚེ་དབང་བསོད་ནམས།
ཀ་དག་ཕྱག་རྒྱ་འབྱུང་བའི་ལྷ་མོ་ལ།།
ཁ་ཙམ་མིན་པའི་སྒོ་གསུམ་གུས་པས་འདུད།།
ག་དུས་ཡིན་ཀྱང་འབྱུང་བའི་འཕོ་འགྱུར་འོག།
ང་ཚོ་མི་དང་འགྲོ་བ་སེམས་ཅན་འཚོ།།
ཅ་ཅོ་ཆར་རླུང་ཟེར་བའི་ཟིལ་རྔམས་འདིས།།
ཆ་རྒྱུས་མེད་ནས་ཞིང་པའི་ཡོང་འབབ་བཅོམ།།
ཇ་རྩམ་ཞིམ་པོའི་ལོ་ཐོག་ཐན་པས་འཕྲོག།
ཉ་ཟླ་འདྲ་བའི་འབྱུང་ལྷ་གང་ན་ཡོད།།
ཏ་ར་སྒྲོལ་མའི་འཕྲིན་ལས་མྱུར་བ་ནས།།
ཐ་མ་ཞིང་པའི་སྟོན་འབྲས་ལག་ཏུ་སྨིན།།
ད་ཆ་མི་དང་སེམས་ཅན་འཚོ་བ་བཟང་།།
ན་ཆུང་འབྱུང་བའི་ལྷ་མོར་ཕྱག་འཚལ་ལོ།།
པ་སངས་བྱ་བ་ལེགས་པས་ཞིང་ལས་བརྩོམ།།
ཕ་བཟང་འདྲ་བའི་འབྱུང་བའི་མཐུན་འགྱུར་འོག།
བ་ཕྱུགས་སེམས་ཅན་འཚོ་བ་རྩ་ཡིས་ངོམས།།
མ་དད་ལོག་རྟོག་འབྱུང་བའི་གནོད་པར་ཚུད།།
རྩ་བ་བརྟན་པོའི་ཞིང་ལས་བྱེད་པ་ལ།།
ཚ་བའི་ཡུལ་དུ་ཆུ་ཡི་མཐུན་རྐྱེན་དཀོན།།
མཛའ་བརྩེ་ཅན་གྱི་ཞིང་པ་ཕོ་མོ་རྣམས།།
ཝ་ལེར་སོམས་དང་དཀའ་སྡུག་ཚད་ལས་བརྒལ།།
ཞྭ་མོ་འཐོམ་ཞྭ་གྱོན་ནས་སྲོལ་རྒྱུན་ལས།།
འ་འུར་ཆེ་བའི་སོ་ནམ་མཁས་པའི་མིས།།
ཡ་མཚན་ཆེ་བར་སློབ་སྟོན་དངུལ་གྱིས་བསླུས།།
ར་བ་མེད་ན་ཞིང་ནང་རྐང་བཞི་འཛུལ།།
ལ་ལར་རི་དྭགས་གླང་ཕག་གནོད་འཚེ་མང་།།
ཤ་ཚ་ཆེ་བའི་ཞིང་པ་ཉམ་ཆུང་ཚོ།།
ས་ཆ་འདི་རུ་ཞིང་པའི་འགྲོ་དོན་ཉུང་།།
ཧ་ཧ་ཞིང་པའི་དཀའ་ངལ་མཐོང་མི་དཀོན།།
ཨ་གསར་གཏམ་གྱི་ཞིང་པའི་མགོ་བོ་བསླུས།།