གསར་འགྱུར་མཁོ་སྤྲོད་པ། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པ།
དེ་ཡང་སྤྱི་ལོ་༢༠༢༢ ཟླ་བ ༡༡ པའི་ཚེས་༦ ཉིན། ཐའེ་སྡོད་བོད་རིགས་ཚོགས་པ་དང་། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པ་ཐུན་མོང་གིས་གསོལ་བ་བཏབ་པ་བཞིན། སྒྲུབ་བརྒྱུད་བསྟན་པའི་མངའ་བདག་༧འབྲི་གུང་སྐྱབས་མགོན་འཕྲིན་ལས་ལྷུན་གྲུབ་མཆོག་གིས་ཐའེ་ཝན་གནས་བཞུགས་བོད་བརྒྱུད་ནང་བསྟན་གྱི་ཆོས་བརྒྱུད་རིས་མེད་ཀྱི་མཁན་སྤྲུལ་དགེ་བཤེས་བཙུན་མ་སོགས་དགེ་འདུན་པ་བདུན་ཅུར་ཉེ་བ་དང་། ས་གནས་བོད་རིགས། དེ་བཞིན་ཐའེ་ཝན་གྱི་རྒྱ་བརྒྱུད་ནང་པའི་དགེ་འདུན་པ་དང་དད་ལྡན་བཅས་སྐྱ་སེར་གཅིག་སྟོང་ལྷག་ལ་གཏེར་ཆེན་པདྨ་གླིང་པའི་ཟབ་གཏེར་གུ་རུ་ཞི་བའི་སྨིན་དབང་གནང་ཡོད།
དེ་ཡང་ཞིབ་འཇུག་ཚོགས་པའི་ཚོགས་གཙོ་མཁན་པོ་འཇིགས་མེད་རྣམ་རྒྱལ་མཆོག་གིས་ཐོག་མར་ཞིབ་འཇུག་ཚོགས་དང་། ས་གནས་བོད་རིགས་མཐུན་ཚོགས་ཐུན་མོང་གིས་མཛད་རིམ་འདི་བཞིན་གོ་སྒྲིག་དགོས་པའི་རྒྱུ་མཚན་དང་འབྲེལ་ཕུན་སུམ་ཚོགས་པ་ལྔའི་སྒོ་ནས་བཀའ་དབང་དང་འབྲེལ་བའི་གཏམ་བཤད་དང་། ༧སྐྱབས་མགོན་མཆོག་གིས་ཐུགས་བརྩེ་ཆེན་པོས་བཀའ་དབང་སྩོལ་གནང་མཛད་རྒྱུའི་ཞལ་བཞེས་ལ་དམིགས་བསལ་བཀའ་དྲིན་ཆེ་ཞུའི་འཚམས་འདྲི་གྲུབ་རྗེས། བཀའ་དབང་ལ་དངོས་སུ་ངོ་བཅར་ཞུས་ཡོད་པའི་ཞིབ་འཇུག་ཚོགས་པའི་འགན་འཛིན་ལྷན་ཚོགས་ཀྱི་ཚོགས་གཙོ་མཁན་པོ་འཇིགས་མེད་རྣམ་རྒྱལ། ལྷ་རམས་པ་ཧ་ཤེན་རིན་པོ་ཆེ། དབང་སྟོད་སྤྲུལ་སྐུ་ཐུབ་བསྟན་ནོར་བུ། བཀྲ་ཤིས་རིན་པོ་ཆེ། སྒྲུབ་དཔོན་བསོད་ནམས་ཉི་མ། དགེ་བཤེས་ཐུབ་བསྟན་ནོར་བུ། མཁན་པོ་ཚེ་དབང་རིག་འཛིན། བླ་མ་ཡོན་ཏན་རིན་པོ་ཆེ། སློབ་དཔོན་ཡེ་ཤེས་རབ་རྒྱས་བཅས་འགན་འཛིན་ཐུན་མོང་ནས་མཎྚལ་དང་སྐུ་གསུང་ཐུགས་རྟེན་འདེགས་འབུལ་ཞུས།
དེ་ནས་རིན་པོ་ཆེས་བཀའ་དབང་དངོས་སུ་དབུ་འཛུགས་གནང་ཞིང་། བཀའ་དབང་གི་མཇུག་ཏུ་ཐའེ་ཝན་སྐུ་ཚབ་དོན་གཅོད་སྐུ་ངོ་འབའ་བ་བསྐལ་བཟང་རྒྱལ་མཚན་དང་། བོད་རིགས་ཚོགས་པའི་ཚོགས་གཞོན་བསྟན་འཛིན་རྣམ་དག་སོགས་དང་། ཞིབ་འཇུག་ཚོགས་པའི་ལས་བྱེད་པ་བཅས་ཀྱིས་ཐའེ་ཝན་གནས་བཞུགས་བོད་རིགས་མི་མང་དང་འབྲེལ་ཡོད་ཚོགས་པ་བཅས་ཀྱི་ཚབ་ཞུས་ནས་གཏང་རག་གི་མཎྚར་འདེགས་འབུལ་ཞུས།
མཐར་༧སྐྱབས་མགོན་མཆོག་གིས་ཀྱང་འདུས་མང་ཡོངས་ལ་དབང་འགྲིམ་བྱིན་རླབས་དང་བཀའ་སློབ་བཀའ་དྲིན་བསྐྱངས་རྗེས་ཐེངས་འདིའི་བཀའ་དབང་ལེགས་པར་མཇུག་དྲིལ་བར་མ་ཟད། བདུན་ཕྲག་རྗེས་མར་ཡང་བསྐྱར་༧འབྲི་གུང་སྐྱབས་མགོན་རིན་པོ་ཆེ་མཆོག་གིས་དངོས་སུ་དབུ་བཞུགས་ཀྱིས་ཐེངས་གཉིས་པའི་མ་ཧཱ་གུ་རུའི་ཚོགས་འབུམ་ཆེན་མོ་ཐའེ་ཝན་གྱི་རྒྱལ་ས་ཐའེ་པེར་དངོས་སུ་འཚོགས་རྒྱུ་ཡིན་པ་རེད།
དེ་ཡང་ཐེངས་འདིར་དམིགས་བསལ་གྱི་གུ་རུའི་བཀའ་དབང་ཞིག་གོ་སྒྲིག་ཞུ་དོན་གཙོ་བོ་ནི། ལོ་སྔ་མ་ནས་རྒྱ་བལ་འབྲུག་གསུམ་དང་ཕྱི་རྒྱལ་ཡུལ་གྲུ་ཕལ་མོ་ཆེ་ནང་བཞིན། ཐའེ་ཝན་གྱི་ས་གནས་འདིར་མ་ཧཱ་གུ་རུའི་འབུམ་ཚོགས་ཆེན་མོ་དེ་ཉིད་ཞིབ་འཇུག་ཚོགས་པ་དང་བོད་རིགས་མཐུན་ཚོགས་ཐུན་མོང་གི་འབད་བརྩོན་བཞིན་དབུ་འཛུགས་ཞུས་ཟིན་ན་ཡང་། གོ་སྒྲིག་ཚོགས་པའི་ངོས་ནས་འབུམ་ཚོགས་འདི་ཉིད་གསང་སྔགས་བླ་མེད་ཀྱི་དཀྱིལ་འཁོར་དང་འབྲེལ་བའི་དམིགས་བསལ་གྱི་ཆོ་ག་ཞིག་ཡིན་པའི་ཆ་ནས་ཚོགས་ཞུགས་གནང་མཁན་རྣམ་པར་དམིགས་བསལ་གུ་རུའི་སྨིན་དབང་ཐོབ་དགོས་རྒྱུ་གལ་ཆེན་དུ་གཟིགས་ཐོག །དེ་ཡང་ཆོས་བརྒྱུད་རིས་སུ་མ་ཆད་པས་ཚད་མཐོའི་ངོས་ལེན་དང་གུས་བཀུར་ཞུ་ཡུལ་དང་། དེ་ཡང་ཆོས་ཕྱོགས་ནས་དམིགས་བསལ་གསང་སྔགས་ཀྱི་དབང་ཞུ་ཡུལ་དུ་ཐུན་མོང་གིས་ངོས་ལེན་དང་དད་གུས་ཞུ་ཡུལ་ཞིག་ལས་དབང་ཞུ་ཐབས་དགོས་རྒྱུར་བསམ་ཚུལ་གཅིག་མཐུན་གྱིས་༧འབྲི་གུང་སྐྱབས་མགོན་རིན་པོ་ཆེར་གསོལ་བ་འདེབས་རྒྱུར་མོས་མཐུན་གཅིག་གྱུར་བྱུང་བ་ལྟར་གསོལ་བ་བཏབ་པ་ཞིག་ཡིན།
དེ་བཞིན་ཐེངས་འདིར་བཀའ་དབང་ལ་དམིགས་བསལ་ཐོ་འགོད་ཀྱི་བརྒྱུད་རིམ་ཁྲོད་དུའང་ས་གནས་ཀྱི་བོད་རིགས་བརྒྱ་ཆ་དགུ་བཅུ་ཙམ་གྱིས་དངོས་སུ་ཐོ་འགོད་ཞུས་ཡོད་པས་མཉམ་ཞུགས་ཞུ་མཁན་ཚད་མཐོ་ཤོས་ཆགས་པར་མ་ཟད། ཐའེ་བཞུགས་ཆོས་བརྒྱུད་རིས་མེད་ཀྱི་དགེ་འདུན་པ་དང་མཁན་སྤྲུལ་དགེ་བཤེས་ཧ་ཅང་མང་པོ་ཞིག་གིས་དགའ་དད་སྤྲོ་གསུམ་གྱིས་བཀའ་དབང་ལ་ཆེད་བཅར་ཞུས་ཡོད་པ་ནི་ངེད་ཅག་གོ་སྒྲིག་ཚོགས་པའི་ངོས་ནས།
གཅིག་ཏུ། བླ་མ་མཚན་ཉིད་དང་ལྡན་པ་ཞིག་ཡིན་ཕྱིན། རང་རེའི་ཆོས་བརྒྱུད་རིས་མེད་ཀྱི་དགེ་འདུན་པ་དག་ནི་ཆོས་ཀྱི་རྗེས་སུ་འབྲངས་པའི་དད་གུས་ཀྱི་བློ་མིག་སྤྱད་དེ་ཕྱོགས་རིས་མེད་པའི་མཛད་བཟང་སྐྱོང་མཁན་ཡིན་པའི་ཚོར་སྣང་ཤུགས་ཆེར་བསྐྲུན་ཡོད་པ་དང་།
གཉིས་སུ། ༧གོང་ས་༧སྐྱབས་མགོན་རྒྱལ་བའི་དབང་པོ་སོགས་རྩ་བའི་བླ་མ་རྣམས་ཀྱི་བཀའ་དྲིན་ལས་རང་རེའི་ཆོས་བརྒྱུད་བར་གྱི་དད་པ་དང་དག་སྣང་། ཁྱད་པར་ཐའེ་ཝན་གྱི་བོད་བརྒྱུད་ནང་བསྟན་གྱི་དགེ་འདུན་པ་དག་གི་མཐུན་ལམ་དང་དམ་ཚིག་ལ་མིག་དཔེ་གལ་ཆེན་ཞིག་གཏོད་གནང་མཛད་ཡོད་པ་དང་།
གསུམ་དུ། ༧འབྲི་གུང་སྐྱབས་མགོན་རིན་པོ་མཆོག་ལ་ཆོས་བརྒྱུད་བྱེ་བྲག་པ་ཙམ་མིན་པར་བོད་ཀྱི་ཆོས་བརྒྱུད་རིས་མེད་དང་མི་མང་སྤྱི་ཡོངས་ནས་དད་བཀུར་ཆེན་པོ་ཞུ་བཞིན་ཡོད་པ་མཚོན་ཡོད་པར་ངོས་འཛིན་ཀྱང་ཞུ་བཞིན་ཡོད།
ད་དུང་ས་གནས་ཀྱི་རྒྱ་བརྒྱུད་ནང་པའི་དགེ་འདུན་པ་ཁོ་ནའང་ལྔ་བཅུ་ལྷག་ཅིག་སྐབས་འདིའི་བཀའ་དབང་ལ་ཆེད་བཅར་ཞུས་ཡོད་འདུག །
བཀོད་སྒྲིག་པ་ཚོར་ཞུ་རྒྱུར།
རིན་པོ་ཆེའི་གསོལ་ཅོག་སྟེང་དུ་ཅོག་ཙེ་ཟུར་བ་དེང་རབས་གསར་བཟོ་འཇོག་བདེ་ལྗིད་ཚད་ཡང་བ་དེ་འདྲ་མཐོ་ཙམ་ཞིག་འཇོག་རོགས། དེ་ལྟར་བྱས་ཚེ་ཁོང་གི་སྐུ་གཟུགས་ཐུར་དུ་དེ་ཙམ་སྒུར་མི་དགོས་པར། སྤྱན་གྱིས་ཐད་ཀར་ཕྱག་དཔེ་ལ་གཟིགས་ཆོག་པ་ཞིག་འདུག གཞན་བཀོད་སྒྲིག་ཚང་མ་ཧ་ཅང་འཐུས་ཚང་དུ་མཐོང་། ངོ་སོ་དགུང་དུ་བསྟོད།