བློ་བཟང་རིན་ཆེན།
ང་རང་བྱིས་པ་ཡིན་པའི་སྐབས་ལ།
ཇོ་ཇོ་ཞིག་གིས་ང་ལ་འཚིག་ཇ་ཕོར་གང་གནང་བྱུང་།
སྐབས་དེར་ཞིམ་སྣང་མེད་ཀྱང་མཚར་སྣང་ཞིག་གིས་ཚང་མ་འཐུང་།
དེ་ནི་ངས་འཚིག་ཇ་ལ་རོལ་མྱོང་བྱས་པའི་ཐོག་མའི་ཐོག་མ་དེ་ཡིན་ངེས།
དེ་ནས་བཟུང་ལག་ལ་སྒོར་མོ་ཡོད་དུས་དང་།
འཚིག་ཇ་ཉོ་རྒྱུ་ཡོད་པའི་སྐབས་སུ།
འཚིག་ཇ་ཁུག་མ་གཅིག་རེའམ་གཉིས་རེ་ཉོས།
ཡང་སྒོར་མོ་ཅུང་ཙམ་ཡོད་སྐབས་ཡིན་ན་སྒམ་རེ་ཉོས།
དེ་ལྟ་དེ་ལྟར་འཚིག་ཇ་ནི་ངའི་ཕ་ཡུལ་གྱི་འོ་ཇ་མངར་མོའི་དོ་ཟླ་མི་ཡོང་ནའང་།
ང་རང་ཆེས་དགའ་མོས་ཡོད་སའི་ཇ་ལ་གྱུར།
ང་རང་ཕ་ཡུལ་ན་ཡོད་སྐབས་སུ་ངས་རྒྱུན་དུ་འཚིག་ཇ་འཐུང་ཞིང་།
འཐུང་རྒྱུ་མང་དྲགས་ནས་ང་ལ་གདོང་སྲིན་ན་བ་མ་ཟད་ཕོ་ཁ་ཡང་ནད་པར་གྱུར།
རྒྱུ་མཚན་དེ་ལ་བརྟེན་ནས།
ནང་མིས་ང་ལ་འཚིག་ཇ་འཐུང་རྒྱུར་རྒྱུན་དུ་བཀག་འགོག་བྱེད་མྱོང་།
མ་ཟད་འདིའི་ཐད་ལ་ངའི་རྨོ་རྨོ་ལགས་ཀྱིས་ང་ལ་དམ་དྲགས་ནན་པོ་བྱེད་མྱོང་།
འོན་ཀྱང་ང་ནི་ང་སྟེ་ཀུ་རེ་དང་རྒོད་གཏམ་ཁྲོད་ནས་དགོངས་པ་ཞུས་ཏེ་འཐུང་།
ལེན་རེ་ལྐོག་ནས་འཐུང་།
ལྐོག་ནས་འཐུང་པའང་ཉུང་ཉུང་ག་ལ་ཡིན།
གང་ལྟར་གནས་འདི་ནས།
འཚིག་ཇ་འཐུང་སྐབས་ནང་མིར་ཡིབ་ནས་འཐུང་མི་དགོས་ཀྱང་།
འཚིག་ཇ་འཐུང་ཐེངས་རེ་ལ་ནང་མིའི་ཤ་ཚ་དང་། རྣམ་དག་གི་བརྩེ་བ།
དྭངས་གཙང་གི་སེམས་པ། ལྷད་མེད་ཀྱི་ཁ་ཏ་སོགས་ཡང་ཡང་དྲན་ཡོང་།I
ལྷག་པར་རྨོ་རྨོ་ལགས་ཀྱི་ཞལ་རིས་ཡིད་ལ་འཁོར་ཡོང་།
རྨོ་རྨོ་ནི་རང་ཉིད་ལ་ཁ་གཉིས་མེད་ཀྱི་སེམས་ཁུར་བྱེད་མཁན།
ལོ་ན་མཐོ་ཤོས་དེ་ཡིན་པས་ཡིན་ནམ། ཡང་ན་ཅི་ཞིག་ཡིན།
རྨོ་རྨོ་ལགས། ཁྱེད་ནི་ངའི་སློབ་སྦྱོང་ལ་སྐུལ་ལྕག་ཐེབས་ཤོས་ཀྱི་སློབ་དཔོན་དེའོ།།
2019/6/ 20བློ་བཟང་རིན་ཆེན་གྱིས་རང་ཤག་ཏུ་བྲིས།