འཚོ་བའི་སློབ་གསོ་བཅུ།

ཟླ་སྨུག་པོས་བསྒྱུར།
 

སྐུ་ཞབས་སི་ཊེབ་ཇོབ་སི་(Steve Jobs) ནས་བསླབ་བྱར་ལེན་འོས་པའི་འཚོ་བའི་སློབ་གསོ་བཅུ།

ཐུགས་དོགས་ཁྱོན་ནས་མེད་པ་ཞིག་ནི་སྐུ་ཞབས་སི་ཊེབ་ཇོབ་སི་ནང་བཞིན་གྱི་མི་ཞིག་ནམ་ཡང་མི་འབྱུང་བས། ང་ཚོས་ཁོང་ལ་རམ་འདེགས་བྱེད་པའི་ཡུལ་མེད་པ་ཞིག་རེད། འོན་ཀྱང་ཁོང་གིས་ང་ཚོར་ཆེས་ངོ་མཚར་ལྡན་པའི་ཀུ་ཤུ་རྟགས་ཅན་གྱི་ཐོན་སྐྱེད་གནངས་པའི་བཀའ་དྲིན་དེ་ང་ཚོས་ནམ་ཡང་བརྗེད་ཐབས་མེད་པ་ཞིག་རེད། སྔོན་ཆད་སྐུ་ཞབས་སི་ཊེབ་འཛུལ་ཞུགས་བྱེད་སའི་ཁེ་ལས་མཉམ་འདུས་ཀྱི་ཚོགས་པ་དེ་མ་རྩ་རྡིབ་པའི་གནས་སྟངས་བྱུང་སྟེ་ཕྱིས་སུ་ཡང་བསྐྱར་ཁེ་སྤོབས་ཅན་ཏུ་གྱུར་སྟབས། སྔོན་མའི་ཀུ་ཤུ་སེ་ཨི་ཨོ(CEO)ལ་མཚོན་ན་དེ་ནི་འཚོ་བའི་ཁྲོད་ཀྱི་སློབ་གསོ་ཞིག་ཡིན་པ་མ་ཟད། ཁེ་ལས་མི་རྣ་ཚོར་མཚོན་ན་དེ་བས་ཀྱང་སློབ་གསོ་གལ་ཆེན་ཞིག་ཆགས་ཡོད།

ཁོང་ལ་དམིགས་བསལ་གྱི་ཁྱད་ཆོས་ཤིག་ཡོད་པ་ནི་ཁོང་གི་གཏམ་བཤད་དང་འཆར་སྣང་སོགས་ལ་མི་སུ་དང་མི་འདྲ་བའི་དམིགས་བསལ་ཡིད་འགུགས་ཀྱི་ཁྱད་ཆོས་ལྡན་ཡོད་ལ། དེ་མཚུངས་ཁོང་གིས་སྣེ་ཁྲིད་པའི་ཚོགས་པ་དེས་གཞན་དང་མི་འདྲ་བའི་ཐོན་སྐྱེད་ཀྱི་དངོས་ཆས་མཁོ་བསྒྲུབས་བྱས་ཡོད། དཔེར་ན། ཨ་མེཀ་(iMac) ཨ་ཊོན་(iTunes) ཀུ་ཤུ་མཁོ་ཆས།(Apple Stores) ཨ་པོ་ཊི།(ipod) ཨ་ཊོན་མཁོ་ཆས།(iTunes Store) ཨ་སྤོན།(iPhone) མཉེན་ཆས།(App Store) ལྟ་བུ་རེད། དེ་རིང་ Lifehacker india ཡིས་དམ་པ་ཁོང་དགོངས་ལོ་རེ་གཅིག་ལོན་པའི་ལོ་འཁོར་དུས་དྲན་སྲུང་རྩི་ཞུས་པ་དང་བསྟུན། ཁོང་གི་མི་ཚེའི་བརྒྱུད་རིམ་ཁྲོད་ནས་འུ་ཅག་གིས་བསླབ་བྱར་ལེན་འོས་པའི་གནད་དོན་འགའ་གཤམ་དུ་ཐོ་འགོད་བྱས་ཡོད།

༡༽ ཚོང་འབྲེལ་ལ་འཆར་སྣང་གསལ་འདོན་གྱི་ནུས་པ་ལྡན་དགོས། གལ་སྲིད་ཁྱེད་ཀྱིས་རང་གི་ཐོན་སྐྱེད་འཚོང་འདོད་པ་དང་། མི་གཞན་ལ་ཞབས་ཞུ་སྒྲུབ་འདོད་ཚེ། གང་ཟག་གཞན་གྱི་བསམ་ཕྱོགས་ལ་རྒྱས་ལོན་དགོས་ལ། དེ་བཞིན་དུ་ཁྱེད་ཀྱི་ཐོན་སྐྱེད་དེ་ཁྱད་འཕགས་ཤིག་འཆགས་འདོད་ན་ཡང་། ཚོང་ཡུལ་གྱི་བསམ་ཕྱོགས་ལ་རྒྱས་ལོན་ཡོད་དགོས་པས། འདི་ལ་གཞན་གྱི་བསམ་ཕྱོགས་མངོན་འདོན་གྱི་འཆར་སྣང་ཞེས་ཀྱང་ཟེར།

༢ ༽ ལས་ཀ་དེ་རང་གིས་བྱེད་འདོད་པའི་བྱ་བ་དེ་ཡིན་དགོས། སྐུ་ཞབས་སི་ཊེབ་ཇོབ་སི་རང་གི་ལས་ཀ་དེར་ཧ་ཅིང་དགྱེས་པས། ཁོང་གིས་བྱ་བ་གཞན་མ་བརྩམས་པར་ཁེ་ལས་མཉམ་འདུས་ཀྱི་ཚོགས་པའི་སྣེ་ཁྲིད་བྱས་ནས་བསྡད་པ་རེད། མི་སུ་དང་སུ་ཡིན་ཡང་ལས་ཀ་ལ་ཡག་སྡུག་ཡོད་མོད། གཙོ་བོ་ལས་ཀ་དེ་རང་ལ་འོས་འཚམས་ཡོད་མེད་ཐད་རང་གིས་རང་ཉིད་ལ་འདྲི་རྩོད་བྱེད་དགོས་ལ། ལས་ཀ་དེ་བྱེད་པར་རང་ཉིད་སྤྲོ་བོ་ཡོད་མེད་ཀྱང་འདྲི་རྩོད་བྱེད་དགོས།

༣༽ སྤས་ཚད་བཟང་ཤོས་ཡིན་དགོས་ཀྱི་ཐམས་ཅད་ནས་ཁྱད་འཕགས་ཤིག་ཡིན་མི་དགོས། རིང་གི་ཐོན་སྐྱེད་དེ་རྒྱུ་ཆ་བཟང་ཤོས་ཤིག་ཡོང་ཐབས་གནང་དགོས་ཀྱང་། མང་ཕྱོགས་ཀྱི་བློ་ཡུལ་ ལ་འཆར་མི་བཏུབ་པའི་ཆེས་དམིགས་བསལ་བ་ཞིག་བྱེད་མི་དགོས། རིན་གོང་ལ་མཚོན་ན་ཡང་འགྲོ་གྲོན་གཏོང་ཐུབ་པ་ཞིག་སྟེ་གོང་ཚད་འཚམས་པའི་གསོག་དངུལ་གྱི་ལམ་ཁ་ཡོད་པ་ཞིག་ཆགས་པས་ཆོག

༤༽ གཡས་གཡོན་གྱི་གླེན་རྟགས་ཅན་ཚོ་ནམ་ཡང་བཏང་སྙོམས་སུ་འཇོག་མི་རུང་། སྐུ་ཞབས་སི་ཊེབ་ཇོབ་སི་ལགས་ཀྱིས་འདི་ལྟ་བུའི་མི་ཚོ་ཁོང་གི་ཚོགས་པར་ཁྱབ་སྤེལ་བྱེད་བཅུག་གི་མེད། རྒྱུ་མཚན་མི་དེ་འདྲའི་རིགས་ཀྱིས་གླེན་རྟགས་ཀྱི་ཐག་གཅོད་བྱེད་པས་མ་ཚད། མི་གཞན་གྱི་ནུས་པ་ཉམས་དམས་གཏང་བས། དེའི་རིགས་ལ་ཁྱེད་ཀྱི་ཚོགས་པའི་རྩ་བའི་འགན་ལེན་བྱེད་འཇུག་མི་རུང་།

༥༽ སྣེ་ཁྲིད་ཇི་ལྟར་བྱེད་མིན་ལ་སློབ་སྦྱོང་བྱེད་དགོས། གལ་སྲིད་རང་གི་ཁེ་ལས་མཉམ་མདུས་ཀྱི་ཚོགས་པ་ལམ་ལྷོང་ཡོང་འདོད་ན། ཁྱེད་རང་གཅིག་པོས་བྱ་བ་ཚང་མ་བསྒྲུབ་མི་ཐུབ་པས། ཁྱེད་ལ་འགན་ཁུར་ཅན་དང་རྣམ་དཔྱོད་ལྡན་པའི་ལས་ཀ་བ་དགོས་པ་མ་ཟད་རང་གི་བློ་རིག་དེ་མཐོང་འདོད་ན་དེ་བས་ཀྱང་རང་ཉིད་དབུ་ཁྲིད་དང་འགན་འཛིན་བཟང་པོ་ཞིག་ཆགས་ཐབས་བྱེད་དགོས།

༦༽ རང་གི་བདེ་ཐང་གིས་རྩེ་སྐྱེད་མ་བྱེད། ལས་ཀ་ཡག་པོ་རེད་དེ་སོ་སོའི་བདེ་ཐང་གི་རིན་ཐང་ དང་སྦྱར་ས་ཁྱོན་ནས་མེད། ལྷག་པར་དུ་སྨན་པས་ལམ་སྟོན་བྱེད་དུས་སོ་སོའི་བདེ་ཐང་གིས་རྩེ་ སྐྱེད་བྱེད་མི་ཉན། གལ་སྲིད་སྐུ་ཞབས་སི་ཊེབ་ཇོབ་སི་ལགས་ཀྱིས་སྨན་པའི་ལམ་སྟོན་ཅི་བཞིན་ཁོང་གི་སྐྲན་ནད་ལ་སྨན་བཅོས་བྱས་ཡོད་ཚེ། ཕལ་ཆར་ཁོང་ད་ལྟ་སྐུ་འཚོ་བཞེས་གནང་ཡོད་རྒྱུ་རེད།

༧༽ གཞི་རྩའི་ལས་ཀའི་གནས་བབ་ལ་ཐུགས་བཞེས་གནང་དགོས། རང་གིས་བྱེད་བཞིན་པའི་ལས་ཀའི་ཆེ་ཆུང་ལ་མ་ལྟོས་པར་ལས་ཀ་དེ་རང་ཉིད་ཀྱི་གཟི་བརྗིད་དུ་བརྩི་དགོས་ལ། རང་གི་ལས་མི་རྣམས་ནམ་ཡང་སོ་སོའི་འཕྲག་ཏུ་བབ་པའི་འགན་འཁུར་ལས་གཡོལ་ཏུ་འཇུག་མི་ཉན། དེ་བས་ཀྱང་ཚོང་དོན་གྱི་ཁྲོད་ནས་གཞི་རྩའི་ལས་ཀའི་གནས་བབ་ལ་གནད་དོན་ག་རེ་བྱུང་ནའང་འབྲེལ་མཚམས་རྩ་བ་ནས་གཅོད་མི་རུང་།

༨༽ འགྲན་རྩོད་ཀྱི་འཐབ་འཛིང་བྱེད་པ་ལས་རྩེད་མོ་དེར་གསལ་བཤད་བྱེད་དགོས། སྐབས་དེར་ཁྱབ་རྒྱ་ཆེ་བའི་རྩེད་འགྲན་པ་ཞིག་ཡོད་ཀྱང་། ཀུ་ཤུས་སྒྲེལ་(Dell)ལ་འགྲན་བསྡུར་ བྱེད་རྒྱུའི་ཚབ་ཏུ་ཀུ་ཤུའི་མཁོ་ཆས་མང་པོ་ཞིག་གསར་བཟོ་གནངས་པ་རེད། དེའི་ཕྱིར་ན་རང་གི་འགྲན་ཡུལ་ལ་གཞུས་ཐབས་བྱེད་རྒྱུས་ལས། ཕྱོགས་ཡོངས་ནས་མི་འདྲ་བའི་བྱ་དངོས་ཤིག་གསར་བཟོ་ཡོང་ཐབས་ལ་འབད་དགོས།

༩༽ དམིགས་ཡུལ་གཅིག་རྗེས་ཉིས་མཐུད་ཀྱིས་ཡོད་དགོས། དམིགས་ཡུལ་གཅིག་གྲུབ་རྗེས་དམིགས་ཡུལ་གསར་པ་དེ་འགྲུབ་ཐབས་ལ་འབད་དགོས། ནམ་རྒྱུན་སི་ཨི་ཨོའི་(CEO)་མཐོ་རིམ་འགན་འཛིན་རྣམས་ཀྱིས་ལས་ཀ་གཏིང་ཟབ་པོ་དང་དམིགས་ཡུལ་གསར་པ་སྒྲིག་པའི་ཚབ་ཏུ། སོ་སོའི་དངུལ་ཁུག་ནས་སྒོར་མོ་བཏོན་ཏེ་དུས་དེབ་ཀྱི་རྒྱབ་ཤ་དག་ཏུ་ཐོན་ཐབས་དེ་ཙམ་གནང་གི་མེད།

༡༠༽ཡིད་འགུགས་ཀྱི་ནུས་པ་ལྡན་རྒྱུ་ཆེས་གལ་ཆེ་བ་ཡིན། བྱ་བའི་བཟང་ངན་ལ་མ་ལྟོས་པར་གླང་ཤ་སྲེག་མ་ཡག་པོ་ཞིག་གིས་ཀྱང་ཚོང་དོན་གྱི་བྱ་བ་གཉེར་ཆོག་སྟེ། དེའི་ཚིར་སྒྲ་ཙམ་གྱིས་མི་རྣམས་ཀྱི་ཡིད་སེམས་གཏིང་ནས་རྒུལ་ནུས་པས་སོ།།

ཟུར་མཆན།
སྐུ་ཞབས་སི་ཊེབ་ཇོབ་སི་ལགས་ལ་མཚོན་ན་དང་ཐོག་ནས་ཕྱུག་བདག་ཅིག་དང་། བྱ་བའི་མགོ་རྩོམ་པ་དང་བཀྲ་ཤིས་ལོ་ལེགས་ཀྱི་ངང་ནས་ཐམས་ཅད་ལམ་ལྷོང་བྱུང་བསྡད་པའི་ཁེ་ལས་པ་ཞིག་ཡིན་རབས་མི་འདུག་མོད། འོན་ཀྱང་འགྱེལ་ས་ནས་བསྐྱར་དུ་ལངས་འདོད་པའི་འཚོལ་སྙེག་གི་བསམ་བློ་བརྟན་པོ་ཡོད་ཙང་། རེ་བའི་རྨི་ལམ་གྱི་ཉི་གཞོན་རེ་ཞིག་འཇིག་རྟེན་འདིར་ཡོངས་སུ་འཚེར་བར་སྐད། འདི་ནི་བོད་རྣམས་ལ་མཚོན་ན་བསམ་གཞིགས་བྱེད་རིན་ཡོད་པའི་གནད་དོན་གལ་ཆེན་ཞིག་ཏུ་གྱུར་འདུག་སྙམ་སྟེ། རྩོམ་ཐུང་འདི་བོད་བསྒྱུར་ཞུས་པ་ཡིན།

གོང་དུ་ཁ་པར་དང་འབྲེལ་བའི་བརྡ་ཆད་ཁག་གི་སྒྲ་སོར་བཞག་བྱས་ཏེ་བྲིས་ཡོད་པས། གལ་སྲིད་ཁྱེད་ཀྱིས་གོང་གི་བརྡ་ཆད་ཁག་ལ་སྔར་ནས་བཏགས་ཟིན་པའི་ཐ་སྙད་ཡོད་པ་གོ་ཐོས་བྱུང་བའམ། ཡང་ན་ཁྱེད་ཉིད་ལ་འོས་འཚམས་ཀྱི་མཚན་སྣེ་རེ་གསུང་རྒྱུ་ཡོད་ཚེ་སེམས་གཏིང་ནས་དགའ་བསུ་ཞུ།།