ནགས་ཤོད་རིག་རལ།
སྐྱིད་ཆུའི་འགྲམ་གྱི་ཁང་ཆེན་དེའི་གྱང་ཟུར་ཞིག་ཏུ་རྡོ་རྗེ་གཉིད་ལ་ཤོར་འདུག ལག་གཡས་པའི་ཟུར་གྱི་ས་ཐོག་ན་ཁོ་ཁི་ཁོ་ལེ་འགྱིག་དམ་རྙིང་པ་ཞིག་གི་མཐིལ་དུ་ཆང་སྙིགས་ཅུང་ཟད་ཞིག་ལྷག་ཡོད་པ་མ་ཟད། རྩབ་ཧྲལ་དུ་གྱུར་པའི་ནུབ་ལྭ་སྐྱ་བོ་དེའི་ཁུག་མའི་ཟུར་ནས་དངུལ་སིལ་མ་མང་པོ་ཞིག་ཕྱི་ལ་ཐོན་པར་བལྟས་ན་ཁ་ས་བར་སྐོར་ནང་ནས་སློང་ཡག་པོ་བྱུང་བ་འདྲ། གདོང་ནི་མ་བཀྲུས་པར་དྲེག་པ་ནག་ཆིལ་ལེར་ཡོད་མོད། དཔྲལ་བ་དང་སྣ་མགོ་དག་ནས་སྣུམ་ཚིལ་ཚིལ་བྱེད་པ་དེ་ཉི་གཞོན་ཤར་རིའི་རྩེ་ནས་འཕྲོས་མ་ཐག་པ་དེའི་དྲིན་ཡང་ཡིན་སྲིད། ཁོའི་ལུས་པོའི་འོག་ཏུ་སྟན་ཤོག་བུའི་སྲབ་མཐུག་ཙམ་ཞིག་ཀྱང་མི་འདུག གྲོག་མ་འགའ་ཞིག་བྲེལ་བྲེལ་འཚུབ་འཚུབ་ངང་ཁོའི་ལུས་པོའི་ཐོག་དང་གཡས་གཡོན་གང་སར་རྒྱུགས་བཞིན་འདུག གྲོག་མ་དེ་དག་ཡང་ཁག་མི་འདུག ཁོང་ཚོས་ཁྱིམ་གཞི་སྐྱིད་པོ་དེར་ཉི་གཞོན་གྱི་མཛེས་པ་ལོངས་སུ་སྤྱོད་པར་གོམས་ནས་བསྡད་ཡོད་མོད། དེ་རིང་མི་བོ་ཆེ་ཞིག་འདི་རུ་འགྱེལ་ནས་སྡོད་པ་ཡིད་ལ་ག་པར་འཁོར་སྲིད། ལུས་ཆུང་ན་ཡང་མཉམ་རུབ་ཀྱི་སྙིང་སྟོབས་དེ་ནི་གྲོག་མ་ལ་ཡོད་ངེས་རེད། འགའ་ཤས་ཀྱིས་འོག་ནས་འགྱོགས་པ་དང་། འགའ་ཤས་ཀྱིས་ཐོག་ནས་འཐེན་པ། བློ་ཁོག་ཆེ་བ་དེ་ཚོས་རྡོ་རྗེའི་སྣ་ཁུང་ནང་དུ་འཛུལ་ནས་ཀི་སྒྲ་གནམ་ས་འགུལ་བ་རེ་བཏབ་ཀྱང་མི་བོ་ཆེ་ནི་སྔར་བཞིན་ཨ་ལོག་འདྲ་རྒྱག་པ་ལས་གོ་ཚོར་འདི་ཚོར་མི་འདུག གློ་བུར་དུ་སྦྲང་ནོར་བུ་ཞིག་གི་སྐད་འུང་འུང་དུ་གྲགས་བྱུང་། རྡོ་རྗེ་ཡི་མགོ་སྐྲ་ཟང་ངེ་ཟིང་ངེ་དེ་གྱང་འདབས་ན་ཡོད་པའི་སྦྲང་ཚང་ཞིག་གི་མཁའ་རུ་ཤིང་གླང་མ་སྐྱེས་པ་ལྟར་གྲམ་འདུག ཡིན་ནའང་སྦྲང་ནོར་བུ་འདི་དག་གཤིས་ཀ་གཏུམ་པོ་ཡོད་པས་སྐྲ་ལོའི་གསེབ་ནས་ཐོན་པ་དང་བཙན་འཛུལ་བ་ལ་ཕར་རྒོལ་བྱེད་འགོ་ཚུགས་སོང་། དབྱར་རྔ་ལྡིར་བ་ལྟར་གྱི་རྡོ་རྗེའི་ངུར་སྒྲ་དང་ལྷན་དུ་ཆང་དྲི་འཐུལ་བའི་ཁ་རླངས་སྨུག་པ་ལྟར་འཚུབ་ཡོང་མོད། སྦྲང་ནོར་བུ་དེ་ནི་ཨ་རིའི་འཇབ་རྒོལ་གནམ་གྲུ་འཕུར་བ་ལྟར་ཐད་ཀར་རྡོ་རྗེའི་སྣ་ལ་གདོང་གཏད་ནས་ཤོར་སོང་། སྨུག་པ་བཤགས་ནས་སྣ་ཡི་འཁྲིས་སུ་མ་སླེབས་གོང་དུ་ལྷན་སྐྱེས་ཀྱི་མདུང་མོ་དེ་ཕྱི་ལ་བཏོན་པ་དང་། སྙིང་རྗེ་ཙམ་ཡང་མེད་པར་རྡོ་རྗེའི་སྣ་ལ་ལན་འགར་བཙུགས། རྡོ་རྗེ་ནི་བདེ་ལྡན་གྱི་ཞིང་དུ་ཞེན་དྲག་པས་ལག་པས་སྣ་མགོ་འཕུར་ཙམ་འཕུར་ཙམ་བྱེད་པ་ལས་ད་དུང་གོ་ཚོར་འདི་ཚོར་མི་འདུག ཅུང་ཟད་འགོར་རྗེས་གླིང་སྐོར་དུ་འགྲོ་མཁན་སྟོབས་རྒྱལ་རྒན་པོ་ལག་སྐོར་ཞིག་བསྐོར་བཞིན་ཤོར་འགྲོ་བ་དང་། ཁོང་རང་གི་ཁྱི་ཕྲུག་སྣ་རྒྱགས་པ་དེ་ཡང་རྒད་པོའི་རྒྱབ་ནས་ས་ལ་དྲི་མ་སྣུམ་བཞིན་རྒྱུགས་ཡོང་གི་འདུག ཨ་ཧོ། ཁྱི་ཕྲུག་སྣ་རྒྱགས་པའི་གཅིན་ཁང་དེ་ཏག་ཏག་རྡོ་རྗེའི་མགོ་འོག་དུ་ཚུད་འདུག ཁོས་ངུ་ཟུག་འགའ་བྱེད་བཞིན་རྡོ་རྗེ་ཕར་འབུད་པར་འདོད་མོད། རྡོ་རྗེ་ནི་ཕ་བོང་ཞིག་ལྟར་འགུལ་ཙམ་ཡང་མེད་པ་དང་། བདག་པོ་ཡང་རྒྱང་རིང་ནས་རིང་དུ་འགྲོ་བ་མཐོང་རྗེས་ཐབས་མེད་པར་ལམ་དུ་ཆས་སོང་། ཁྱི་ཕྲུག་རྒྱུགས་ཕྱིན་ནས་སྐར་མ་འགའ་ཤས་ལས་མ་འགོར་བར་ཁང་ཆེན་དེའི་རྒྱལ་སྒོ་ཤག་སྒྲ་དང་བཅས་ཕྱེ་སོང་། རྒྱ་མི་བཟའ་ཚོ་གཉིས་ཕྱི་ལ་ཐོན་ཡོང་བ་དང་ཁྱོ་ག་དེས་གྱང་ཟུར་ན་ཉལ་བསྡད་པའི་རྡོ་རྗེ་མཐོང་རྗེས། “ཁྱིས་བཞོན་དགོས་རྒྱུ། ཕར་རྒྱུགས་”ཟེར་བཞིན་དུ་རྡོ་རྗེ་ལ་རྡོག་རྒྱག་གཅིག་བཞུས་སོང་། རྡོ་རྗེ་ད་གཟོད་གཞི་ནས་གཉིད་ལས་སད་པ་དང་དངངས་མ་སྐྲག་གི་ངང་དུ་ཆང་དམ་དེ་ས་ནས་བསྒྲུགས་རྗེས་དཔྱི་རུས་འཕུར་བཞིན་དུ་སྐོར་ལམ་དེད་ནས་རྒྱུགས་འགོ་ཚུགས།
ཁོའི་མིག་ལམ་དུ་ཤོག་སྒམ་རྙིང་པའི་སྟན་འགའ་ད་དུང་འཆར་བཞིན་འདུག