གཅན་དཔལ་ལྡན།
ཧྥ་རན་སིའི་སྲིད་འཛིན་སིར་ཀོ་སི་མཆོག་གིས་དེང་དུས་འཛམ་གླིང་གི་དགོས་མཁོར་ངེས་པར་དུ་རྒྱ་ནག་གི་གདོང་ལན་དགོས་པར་མ་ཟད། ད་ཆ་རྒྱ་ནག་ནི་རྒྱལ་སྤྱིའི་ཐོག་མེད་དུ་མི་རུང་བའི་གྲུབ་ཆ་གལ་ཆེན་ཞིག་ཆགས་ཡོད་ཅེས་གྱིས་གསུངས་འདུགཕྱི་ཚེས་ ༢༨ ཉིན་བྷེ་བྷེ་སེ་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་ཞོགས་པར་ཧྥ་རན་སི་སྲིད་འཛིན་སིར་ཀོ་སི་མཆོག་དང་ཁོང་གི་སྐུ་ཟླ་གཉིས་རྒྱ་ནག་ཧྲན་ཞི་ཞིང་ཆེན་གྱི་ཞི་ཨན་དུ་འབྱོར་ཡོད་པ་དང་། ཕྱི་དྲོར་པེ་ཅིན་དུ་ཕེབས་ཏེ་སྲིད་འཛིན་ཧུའུ་ཅིན་ཐོ་དང་སྲིད་བློན་ཝུན་ཅ་པོ་གཉིས་དང་ཐུགས་འཕྲད་གནང་རྒྱུ་རེད་འདུག
འདི་ནི་སིར་ཀོ་སིས་སྲིད་འཛིན་གྱི་ཁུར་བླངས་རྗེས་རྒྱ་ནག་ཏུ་རྒྱལ་དོན་འཚམས་གཟིགས་སུ་བསྐྱོད་ཡོད་པ་ཐེངས་གཉིས་པ་དེ་ཆགས་ཡོད་པ་རེད། སྲིད་དོན་དབྱེ་ཞིབ་པས་བརྗོད་ན། ཐེངས་འདིའི་འཚམས་གཟིགས་ནི་འདས་པའི་ལོ་གཉིས་ཀྱི་རྗེས་སུ་སྲིད་འཛིན་མཆོག་ཕྱོགས་སྐྱོད་བྱས་པ་ཐོག་མ་དེ་ཆགས་ཡོད་ལ། དེ་ནི་འགལ་འཛོལ་བྱུང་བའི་རྒྱ་ནག་དང་ཧྥ་རན་སིའི་ཡུལ་གཉིས་བར་གྱི་འབྲེལ་ལམ་སླར་གསོ་བྱ་ཆེད་རེད་ཟེར། སྐབས་དེར་སྲིད་འཛིན་མཆོག་རྒྱ་ནག་ཧྲང་ཧེ་གྲོང་ཁྱེར་དུ་འཚོགས་འཆར་ཡོད་པའི་འཛམ་གླིང་འགྲེམས་སྟོན་གྱི་དབུ་འབྱེད་མཛད་སྒོའི་ཐོག་ཕེབས་ཏེ་གཏམ་བཤད་ཀྱང་སྤེལ་རྒྱུ་ཡིན་པ་རེད། སྲིད་འཛིན་མཆོག་རྒྱ་ནག་ཏུ་འཚམས་གཟིགས་སུ་མ་ཕེབས་གོང་ལ་ཁོང་གིས་རྒྱ་ནག་གཞུང་འབྲེལ་ཞིན་ཧྭ་གསར་ཁང་གི་གསར་འགོད་པའི་དྲི་བ་དང་ལེན་བྱས་ཡོད་ལ། སྐབས་དེར་ཁོང་གིས་ལན་འདེབས་བྱས་དོན། དེང་སྐབས་འཛམ་གླིང་གི་དགོས་མཁོར་ངེས་པར་དུ་རྒྱ་ནག་གི་གདོང་ལེན་དགོས་རྒྱུར་མ་ཟད། ད་ཆ་རྒྱ་ནག་ནི་རྒྱལ་སྤྱིའི་ཐོག་མེད་དུ་མི་རུང་བའི་གྲུབ་ཆ་ཞིག་ཆགས་ཡོད་ཅེས་གྱིས་གསུངས་འདུག་ལ། ཡང་ཁོང་གིས་མུ་མཐུད་དོན། དེང་སང་འཛམ་གླིང་དུ་འབྱུང་བཞིན་པའི་གནད་དོན་གང་ཞིག་ཡིན་རུང་། གལ་སྲིད་རྒྱ་ནག་འཛུལ་གིས་ཞུགས་མ་བྱས་པ་ཡིན་ན་གནད་དོན་དེ་ཐོག་གཅོད་བྱ་ཐབས་ཡོད་མ་རེད། ང་ཚོས་གནམ་གཤིས་འགྱུར་ལྡོག་དང་རྒྱལ་སྤྱིའི་དཔལ་འབྱོར་ཉེན་ཚབས། དེ་བཞིན་གོ་ལ་ཧྲིིལ་པོར་སྟངས་འཛིན་སྒྱུར་བཅོས་ཀྱིས་མཚོན་པའི་གནས་སྟངས་མང་པོ་ཞིག་ལ་ངེས་པར་དུ་རྒྱ་ནག་དང་མཉམ་དུ་དུས་རབས་ ༢༡ པར་གདོང་ལེན་བྱ་དགོས་ཀྱི་ཡོད། ཧྥ་རན་སིའི་ངོས་ནས་ལོ་ངོ་ ༤༦ གོང་ནས་རྒྱ་ནག་མི་མང་སྤྱི་མཐུན་རྒྱལ་ཁབ་ངེས་ལེན་བྱེད་སྐབས་རྒྱ་ནག་གི་མ་འོངས་པའི་གནས་སྟངས་ལ་ཚོད་དཔག་བྱེད་ཐུབ་པ་བྱུང་ཡོད། དེ་སྔོན་རྒྱ་ནག་ལ་ཡིད་ཆེས་བྱས་པ་དེ་ད་ལྟའི་རྒྱ་ནག་གི་འབྱུང་འགྱུར་ལ་ཡིད་ཆེས་བྱས་པ་ལས་གལ་ཆེའི་དོན་སྙིང་ལྡན་ཡོད། ཧྥ་རྒྱ་གཉིས་བར་མཉམ་འབྲེལ་ལས་རོགས་བྱ་རྒྱུ་དེ་ཧྥ་རན་སིའི་ཕྱི་འབྲེལ་གྱི་སྲིད་བྱུས་གལ་ཆེན་ཞིག་ཏུ་བརྩི་བཞིན་ཡོད་ཅེས་དང་། ཡང་མུ་མཐུད་དོན ། རྒྱལ་ཁབ་གཉིས་བར་ལ་སྐབས་འགར་གོ་ནོར་ཐེབས་ཏེ་འགལ་རྐྱེན་སོགས་བྱུང་བྱུང་ཡོད་ནའང་། དེ་ཚོ་ཚང་མ་འདས་ཟིན་པ་ཞིག་ཡིན་ཞེས་གསུངས་ཡོད་འདུག ༢༠༠༨ ལོར་བོད་ཀྱི་ལྷ་སའི་ ༤༌༡༤ དོན་རྐྱེན་དེ་བྱུང་རྗེས་ཡུལ་གཉིས་བར་གྱི་འབྲེལ་ལམ་དེ་ཇེ་སྡུག་ཏུ་སོང་ཡོད་པས། ཐེངས་འདིར་སིར་ཀོ་སིས་ཕྱོགས་གཉིས་ཀྱི་འབྲེལ་ལམ་སླར་གསོ་བྱ་རྒྱུར་ཤུགས་སྣོན་རྒྱག་རྒྱུ་ལས་གཞན། ད་དུང་ཧྥ་རན་སི་དང་དབྱིན་ཇི། ཨ་རི་གསུམ་གྱི་སྣེ་ཁྲིད་པའི་གནས་སྟངས་ཐད་རྒྱ་ནག་གིས་རོགས་རམ་འཚོལ་རྒྱུ་དང་། དེ་མིན་རྒྱལ་ཚོགས་ཀྱིས་ཨི་རན་ལ་ཉེས་ཆད་གཅོད་རྒྱུའི་སྲིད་བྱུས་སོགས་ལ་རྒྱབ་སྐྱོར་འཚོལ་རྒྱུའི་རེ་འདུན་སོགས་ཞུ་དགོས་ཀྱི་ཡོད་འདུག བྷེ་བྷེ་སི་གསར་འགོད་པས་ཧྲང་ཧེ་ནས་གནས་ཚུལ་བ་ལྟར་ན། ཡུལ་གཉིས་ཀྱི་ཚོང་འབྲེལ་དེ་ན་ནིང་ལོའི་དཔལ་འབྱོད་ཉེན་ཚབས་དེའི་རྐྱེན་པས་ཉམས་རྒུད་དུ་སོང་ཡོད་ཀྱང་། ཕྱོགས་གཉིས་ཀྱིས་འབྲེལ་ལམ་སླར་གསོ་བྱ་བར་རེ་བ་རྒྱག་བཞིན་ཡོད་པར་མ་ཟད། ཚོང་འབྲེལ་མཉམ་ལས་ཕྱོགས་སུ་ཤུགས་སྣོན་རྒྱག་འདོད་ཀྱང་ཡོད་འདུག ཧྥ་རན་སིའི་དཔོན་རིགས་ཤིག་གིས་བརྗོད་དོན་ལྟར་ན། སྲིད་འཛིན་སིར་ཀོ་སིར་གལ་ཆེའི་ཚོང་དོན་སྐོར་ལ་གྲོས་ཆོད་འཇོག་རྒྱུའི་འཆར་གཞི་གང་མེད་ཀྱང་། ཐེངས་འདིར་ཉིང་ནུས་དང་མཁའ་ལམ། དེ་བཞིན་ཁོར་ཡུག་དང་འབྲེལ་བའི་ལས་དོན་ཁག་ཅིག་གི་ཐད་གྲོས་བསྔུར་བྱ་རྒྱུ་རེད་འདུག ཡིན་ནའང་འགྲོ་བ་མིའི་ཐོབ་ཐང་ཚོགས་པ་ཁག་གིས་ཐེངས་འདིའི་སྲིད་འཛིན་གྱི་གཟིགས་སྐོར་སྐབས་རྒྱ་ནག་གི་དབུ་ཁྲིད་ཚོར་འགྲོ་བ་མིའི་ཐོབ་ཐང་སྐོར་གླེང་སློང་དགོས་པའི་འབོད་སྐུལ་སོགས་ཞུས་ཡོད་འདུག སྲིད་དོན་དབྱེ་ཞིབ་པས་བཤད་ན། ཐེངས་འདིར་སྲིད་འཛིན་སིར་ཀོ་སིས་འགལ་འཛོལ་བྱུང་བའི་ཡུལ་གཉིས་ཀྱི་འབྲེལ་ལམ་སླར་གསོ་བྱ་རྒྱུར་འབད་བརྩོན་གནང་རྒྱུ་ལས་འགྲོ་བ་མིའི་ཐོབ་ཐང་སྐོར་གླེང་སློང་བྱེད་རྒྱུ་མིན་པའི་འགྲེལ་བརྗོད་སོགས་བྱས་ཡོད་པ་རེད།