འཛམ་གླིང་གེ་སར་རྒྱལ་པོའི་བླ་མ་རླངས་བྱང་ཆུབ་འདྲེ་བཀོལ།

ཨེ་མ་ཧོ།

 
རླངས་ཨ་མི་་བྱང་ཆུབ་འདྲེ་བཀོལ་ནི། 《རླངས་ཀྱི་པོ་ཏི་བསེ་རུ》ལས། ……“དེ་འོག་སེ་ཁུང་（བསེ་ཁྱུང）དབྲ། དབྲ་ལ་དཀར་ནག་ཁྲ་གསུམ་ཡོད། དབྲ་དང་པོ་རྒྱུད་ཀྱི་ཆེ་དགུ ལྷ་དབྲ་སྨུག་པོ་མཆེད་བཅུ། དགུ་འབུམ་དབྲ་ཡི་མཆེད་དྲུག་ཡོད”ཅེས་པ་ལྟར་བོད་མིའུ་གདོང་དྲུག་གི་ནང་ཕྱེས་བསེ་ཁྱུང་དབྲ་ཡི་རིགས་རྒྱུད་རིམ་པར་བྱུང་བ་ལས། ལྷ་རིགས་རླངས་ཀྱི་གདུང་རྒྱུད་བྱུང་བ་སྟེ། 《ལྷ་རིགས་རླངས་ཀྱི་རྣམ་ཐར་ ཆིག་རྒྱུད》ཅེས་པ་ལས། “ལྷ་རིགས་རླངས་ཀྱི་ཕྱུགས་ཕུགས་དབྲ་ལ་ཐུགས་པས། དང་པོར་སེ་(བསེ)ཁྱུང་དབྲས་བཙན་ཟ་གེལ་ལྡན་མ་ཁབ་ཏུ་བཞེས་པའི་སྲས། དབྲ་ཁྲ་བོ། དེའི་སྲས་ཁྱུང་རུ་དཀར་པོ། དེའི་སྲས་འབུམ་རྗེ་ཤེལ་མིག དེའི་སྲས་ཨ་རྗེ་གཙུག་གསུམ། དེའི་སྲས་མང་ལྡོམ་སྟག་བཙན། དེའི་སྲས་ལྷ་རིགས་འཕན་པོ་ཆེ་རླངས”ཞེས་སོགས་འབྱུང་བ་ལྟར་རིགས་འཕན་པོ་ཆེ་རླངས་ཀྱི་གདུང་རྒྱུད་དེ་དག་བསེ་ཁྱུང་དབྲ་ལས་མཆེད་དེ། མདོ་སྟོད་སོགས་བོད་ཡུལ་སོ་སོར་དར་བ《རླངས་ཀྱི་པོ་ཏི་བསེ་རུ》ལས་བཤད་འདུག་སྟེ། “དེ་ལྟར་རླངས་སྟོང་ལྷོ་རྒྱུད་ནི། བོད་ཀྱི་གཡས་རུའི་རླངས་སུ་འཕེལ། འབྲིང་པོ་ཆེ་རྗེའི་རླངས་ནི། བོད་ཀྱི་གཡོན་རུ་རླངས་སུ་འཕེལ།

ཆུང་བ་སྟོང་གླིང་རྒྱུད་ནི། བོད་ཡུལ་དབུས་ཀྱི་རླངས་སུ་འཕེལ། རྗེ་སྟོང་ཐོག་གི་རྒྱུད་ནི་གཡར་མོ་ཐང་གི་རླངས་སུ་འཕེལ། རླངས་རྗེ་སྟོང་སྲས་ཀྱི་རྒྱུད་ནི་ཙོང་ཁ་བདེ་ཡངས་ཀྱི་རླངས་སུ་འཕེལ། ཆུང་བ་སྟོང་དགེའི་རྒྱུད་ནི་མདོ་ཁམས་ཀྱི་རླངས་སུ་འཕེལ”ཞེས་སོགས་འབྱུང་བ་ལྟར་རླངས་ཀྱི་གདུང་རྒྱུད་དེ་དག་མདོ་སྟོད་ཕྱོགས་སུ་འཕེལ་ཞིང་། མདོ་སྟོད་རླངས་ཀྱི་གདུང་རབས་དང་། བོད་དབུས་ཕྱོགས་སྣེ་གདོང་གི་རྒྱལ་རབས་དག་རུས་རྒྱུད་འདི་ནས་མཆེད་པར་བཤད། གདུང་རབས་ཀྱི་གདན་ས་དང་། རྒྱལ་ས་གཙོ་བོའང་མདོ་སྟོད་ནང་ཆེན་རྨེ་གཞུང་གཡུ་ཀུ་སྟེང་ཞེས་པ་འདི་ཡིན་པ《 ལྷོ་རོང་ཆོས་འབྱུང་》 སོགས་སུ་གསལ་ལ། བོད་སིལ་བུའི་དུས་སྐབས་ཡས་མས་སུ་མདོ་སྟོད་འདིར་དབང་བསྒྱུར་མཁན་གཙོ་བོའང་རླངས་ཀྱི་གདུང་རྒྱུད་ཡིན།

མདོ་ཁམས་སུ་འཕེལ་བའི་སྟོང་དགེའི་རྒྱུད་ལྷ་གཟིགས་རླངས་ཀྱི་གདུང་རྒྱུད་རིམ་པར་བྱུང་བ་ལས། ཨ་མི་བྱང་ཆུབ་འདྲེ་བཀོལ་ནི་ཡབ་མཚོ་བཟང་ལྷ་གཟིགས་ཀྱི་སྲས་སུ་བོད་རབ་བྱུང་དང་པོའི་སྔོན་གྱི་ས་འབྲུག་སྟེ་སྤྱི་ལོ268ལ་སྐུ་འཁྲུངས། མིང་གཞན་བྱང་ཆུབ་རྡོ་རྗེ་ཡང་ཟེར། དགུང་ལོ་བཞིའི་ཐོགས་ནས་བཟུང་གསང་སྔགས་རྙིང་མའི་ཆོས་སྒོར་ཞུགས་ཏེ་ཟབ་ཆོས་ཉམས་བཞེས་མཛད། དགུང་ལོ་བརྒྱད་ཀྱི་ཐོག་ནས་སློབ་དཔོན་པདྨར་དངོས་སུ་སྤྲུལ་ནས་ནུབ་ཕྱོགས་ཨོ་རྒྱན་གྱི་ཡུལ་དུ་བྱོན་པ་སོགས་བལ་པོའི་ཡུལ་དང་བོད་ཡུལ་སྟོད་སྨད་ཀུན་ཏུ་སྐུ་དངོས་ཀྱི་ཞབས་ཀྱིས་བཅག་ཅིང་ལྷ་སྲིན་སྡེ་བརྒྱད་ཐམས་ཅད་དམ་ཏུ་སྐུ་དངོས་ཀྱི་ཞབས་ཀྱིས་བཅག་ཅིང་ལྷ་སྲིན་སྡེ་བརྒྱད་ཐབས་ཅད་དམ་ལ་བཏགས་བསྟན་སྲུང་དུ་བསྐོས་པ་སོགས་རྫུ་འཕྲུལ་མཐའ་ཡས་པས་ལྷ་འདྲེ་ཐམས་ཅད་དྲན་དུ་བཀོལ་བས་སྔར་བྱང་ཆུབ་རྒྱལ་པོའི་མཚན་དེ། བྱང་ཆུང་འདྲེ་བཀོལ་དུ་གྱུར་བས་ཀུན་གྱིས་ཨ་མེས་བྱང་ཆུབ་འདྲེ་བཀོལ་དུ་འབོད།

ཡང་། 《རླངས་ཀྱི་པོ་ཏི་བསེ་རུ》ལས། “དེ་ནས་ཁོང་གིས་ཤར་དུ་བྱོན། གེར་འཚོའི་མགུལ་དུ་བྱོན་པ་ལ། གླིང་རྗེ་གེ་སར་གྱིས། སྲིན་གྱི་བེར་ནག་པོ་ཐོག་གདུགས། སྲིན་རལ་ཁྲའོ། སྲིན་རྟ་ནག་པོ་གསུམ་ཕུལ་ནས། མི་འཆི་ཚེ་དབང་ཞིག་ཞུས། ངས་གདུག་པའི་ལྷ་འདྲེ་འདུལ་བ་ལ། ཁྱེད་ཀྱིས་བདག་གྱི་ལུས་སྐྱོབ་མཛོད། ”ཅེས་གསལ་བ་བཞིན། གེར་མཚོའི་མགུལ་སྟེ། མདོ་སྟོད་ནང་ཆེན་རྨེ་གཞུང་གི་རི་བོ་གེ་མཛོ་ཀླུ་རྒྱལ་གྱི་མགུལ་དུ་ཡོད་པའི་གེ་མཛོ་མཚེའུ་ཡོད་ས་དེར་གླིང་རྗེ་གེ་སར་དང་། བྱང་ཆུབ་འདྲེ་བཀོལ་བླ་སློབ་གཉིས་ཐོག་མར་མཇལ་ཕྲད་གནང་ཞིང་། ལྕིའི་ལུང་པ་ཕུ་དྲུག་དང་། ར་ཛཱའི་བྲག་མགོ་དང་། ལྕི་དཔལ་ཆམ་གསུམ་སོགས་ཕུལ་བར་བཤད། དེ་ནས་ཁོང་རྣམ་གཉིས་མཆོད་ཡོན་གྱི་འབྲེལ་བ་ཇེ་ཟབ་ཏུ་གྱུར་ཏེ་ཟང་ཟིང་གི་འབུལ་བ་དཔག་མེད་ཕུལ། ཁོང་གི་ཞལ་ནས། “ཁྱེད་འཆི་བའི་དུས་ལ་བབ་པ་ལ། རང་རེས་འབད་ཀྱང་ག་ལ་བརྟེན། བདུད་ཀྱི་བར་ཆད་མི་འབྱུང་བ། རྣལ་འབྱོར་བདག་གིས་སྲུང་མ་བྱེད། ལོ་ནི་བརྒྱད་ཅུ་རྩ་བརྒྱད་བར། སྐྱེ་བུ་ཁྱེད་ཀྱི་ཚེ་ཚད་ཡིན།” ཞེས་པའི་ལུང་བསྟན་མཛད།

དེ་ནས་གླིང་རྗེ་གེ་སར་གྱིས་རྒྱ་ལ་བྱོལ་རྟ་བསྐྱལ་ནས། གྲུབ་ཐོབ་གདན་འདྲེན་དུ་ཕྱིན། གླིང་ཡུལ་དུ་ཕེབས་ནས་ཟང་ཟིང་གི་འབུལ་བ་རྒྱ་ནོམས་པ་ཕུལ་ཏེ་སྤྱིར་བོད་ཡུལ་དང་། བྱེ་བྲག་གླིང་ཡུལ་གྱི་མི་ནོར་འཕེལ་བ་དང་། མི་ཕྱུགས་ཀྱི་ནད་ཡམ་མི་འབྱུང་བའི་ཐུགས་བསྐྱེད་དང་སྨོན་ལམ་ཞུས། བོད་ཡུལ་ཀུན་དུ་མཛད་འཕྲིན་གྱི་གདུལ་བྱ་ལེགས་པར་བསྐྱངས་ནས། དགུང་གྲངས་བརྒྱ་དང་བརྒྱད་སྤྱི་ལོ356མེ་ཕོ་འབྲུག་གི་ལོ་ཟླ་བ་བཅུ་གཅིག་པའི་ཚེས་བཅུ་ལ་སྐུ་གཤེགས། དེ་ལྟར་རླངས་བྱང་ཆུབ་འདྲེ་བཀོལ་གྱི་བྱུང་བ་ཉུང་བསྡུས་འདི་ལོ་རྒྱུས་ཁག་ལས་འབྱུང་བ་ལྟར་བཏུས་པ་ཡིན་ནོ། །