འཛམ་གླིང་རྟ་རྒྱུགས་རགས་བཤད་མ།

རྔ་རྒོད།

མཁས་བཤད་དམ་ཡང་ན་ལྟ་གྲུབ་ཆེ་བཤད་ཚན་རིག་གྱི་སྒོ་ནས་བསྙད་ན། རྟའི་ལོ་རྒྱུས་དེ་ལོ་བྱེ་བ་ལྔ་ཙམ་འགོར་ཡོད་ལ། ང་ཚོ་མི་རིགས་འདིས་རྟ་དེ་དག་བེད་སྤྱོད་བཏང་སྟེ་ལོ་༨༠༠༠ ཡས་མས་ཤིག་འགོར་འདུག་ལ། གདོན་མའི་རྟ་རིགས་དག་ཀྱང་ཐོག་མར་ཝ་དང་ཁྱིའི་དབྱིབས་ལྟ་བུ་ལས་མེད་པ་དང་རིམ་གྱིས་ཇེ་ཆེར་དང་ཇེ་མགྱོག་གམ་ཡང་ན་ཇེ་བཟང་སོགས་སོང་སྟེ་མཐར་ང་ཚོའི་མིག་མདུན་གྱི་ད་ལྟའི་རྟ་མཆོག་འདི་ཚོ་གླེང་གཞི་གཙོ་བོ་ཡིན།

སྤྱིར་ན་རྟ་རྒྱུགས་ལ་ཡོངས་གྲགས་ལྟར་བྱས་ན། རྒྱུགས་སྟངས་ཁག་མི་འདྲ་བ་བཞི་ཡོད།  གཅིག༼ཐད་རྒྱུགས ༽    གཉིས།༼མཆོང་རྒྱུགས༽     གསུམ།༼དཀྱོག་རྒྱུགས༽   བཞི༼ཧ་ཅང་རིང་རྒྱུགས༽ སོགས་རེད། དམིགས་བསལ་རྟ་རྒྱུགས་ཧ་ཅང་རིང་བའི་ཚད་ནི་ 25-100 miles(40-161KM) རེད། འོན་ཀྱང་སོག་པོའི་རྟ་རྒྱུགས་ཆེན་མོ་ལྟ་བུར་མཚོན་ན་རྒྱུགས་ཐག་གི་རིང་ཚད་ནི་833.2KM ( 517.7 miles) དེའི་ཕྱིར། མདོ་ཁམས་གླིང་གེ་སར་རྟ་རྒྱུགས་ཆེན་མོ་འདི་དང་སོག་པོའི་རྟ་རྒྱུགས་ཆེན་མོ་གཉིས་ཕལ་ཆེར་མཚུངས་པར་སྙམ། དེའི་ཟློག་ཕྱོགས་རྟ་རྒྱུགས་ཐུང་ངུ་ལ་ཚད་མཐའ་གཅིག་ཏུ་འདི་རེད་ཅེས་ངེས་བཟུང་མེད།

གང་ལྟར་ཤེས་དགོས་པ་ནི། སྤྱི་ལོའི་སྔོན་དུ་646 ནང་མང་གཙོ་དབུ་བརྙས་སའི་སྒི་རི་སེ་རྒྱལ་ཁབ་ནས་འཛམ་གླིང་རྩེད་འགྲན་རང་བཞིན་ཅན་གྱི་རྟ་རྒྱུགས་དེ་འགོ་བརྩམས་ཤིང་དར་བ་ཞིག་རེད་འདུག དེའི་ཕྱིར། དེང་སང་རྒྱལ་ཁབ་ཤར་ནུབ་ལ་ཁྱད་པར་དེ་ཙམ་མེད་པར་རྟ་རྒྱུགས་ནི་ཕྱུག་བདག་རྣམ་པ་ཚོའི་ཁྲོད་ཀྱི་རྒྱན་འཇོག་དང་རྩེད་མོ་ཡ་མཚན་ཞིག་ཏུ་གྱུར་འདུག རྒྱུ་མཚན་དེའི་དབང་གིས་དཔེར་ན། ཐོར་མོ་སྤེ་ལེས་ལ་ཨ་སྒོར་ས་ཡ་བརྒྱད་ལྷག་སྤྲད་པས་མཚོན་ནོ།།

ཁ་ཤས་ཀྱིས་ཧང་སངས་པའི་ཉམས་ཀྱིས་ད་ལྟའི་བོད་ནང་ལ་མཚོན་ན་ནི་རྨ་ཆུའི་རྟ་རྒྱུགས་དེ་རྒྱུགས་ཐག་དང་རྒྱན་ཐོབ་གང་ལ་བལྟས་ཀྱང་འདི་ནི་ཆེན་པོ་རེད་ཅེས་བསྙད་མོད། དོན་ལ་བོད་ཀྱི་ལོ་རྒྱུས་ལ་བརྟགས་ཚེ་ན། གནའ་རབས་བོད་མི་ཚོས་རྟ་རྒྱུགས་ཀྱི་རྒྱན་འཇོག་དེ་ལ་མཐའ་ན་རྒྱལ་ཕྲན་ཕན་ཚུན་རེ་རྒྱན་ལ་བཞག་མྱོང་ཡོད་ལ། ད་དུང་ཡིད་འཕྲོག་མཛེས་མ་འབྲུག་མོ་མཆོག་ཀྱང་གླིང་གི་རྟ་རྒྱུགས་ཆེན་མོའི་དགའ་རྟགས་ལ་བཞག་པའི་ལོ་རྒྱུས་སོགས་ཡོད།

དམིགས་བསལ་ཞིག་ཏུ། བོད་ཀྱི་གཏམ་དཔེར། མྱི་བཟང་ན་མིང་ཅི་བཏགས་དང་རྟ་བཟང་ན་སྤུ་ཅི་སྐྱེས་ཟེར་ཞིང་། འོན་ཏེ་གནའ་དེང་གང་ལ་མཚོན་ན། ང་ཚོའི་མྱི་མིང་དག་ནི་བླ་མས་བཏགས་ཡོད་ལ་རྟ་མིང་དེ་ཚོ་ནི་སྤུ་མདོག་གིས་བཏགས་སྲོལ་ཡོད་པ་གཉིས་པོ་འདི་ད་དུང་རྒྱུན་ཆད་མི་འདུག འོན་ཀྱང་འདི་ནི་ང་ཚོའི་ཐུན་མིན་གྱི་རང་རེའི་རིག་གནས་ཤིག་ཀྱང་རེད་འདོད། འོན་ཀྱང་ནུབ་ཕྱོགས་འདིར་རང་གི་མིང་དེ་སོ་སོའི་ཕ་མ་གང་རུང་ངམ་རང་ཉིད་ཀྱིས་མིང་དེ་ངེས་པར་དུ་བཏགས་ཡོད་ལ། རྟ་མིང་དེ་ཡང་སྤུ་མདོག་གིས་ཁྱད་པར་གྱི་འདོགས་ཀྱིན་མེད།
གལ་སྲིད་ཁྱོད་ལ་ང་ཚོར་འཚམས་པའི་རྟ་བདག་གི་མིང་དང་རྟ་མིང་ཞིག་ངས་བཏག་དགོས་ན། དཔེར་ན། རྟ་བདག་གི་མིང་ལ་རེ་བ་ཅན་དང་ཁོའི་རྟ་མིང་ལ་བླ་མ་སྐྱབས། ཞེས་བཏགས་ན་མིང་དོན་མཚུངས་པ་ཞིག་མ་རེད་དམ།

ཞེས་རྔ་རྒོད་ཀྱིས་དབྱིན་ཡུལ་ནས༢༠༡༤/༡༡/༠༤ ལ།