ཨེ་མ་ཧོ།
ན་མོ་གུ་རུ་པདྨ་ཀ་ར་ཡེ།
ཀ་དག་སྤྲོས་བྲལ་ཀློང་ཆེན་ཀུན་བཟང་གི་ནམ་མཁར།།
ལྷུན་གྲུབ་འོད་གསལ་མཁྱེན་བརྩེ་ཉི་ཟླ་ཡི་རང་མདངས།།
ཟུང་འཇུག་རྒྱལ་བའི་མྱུ་གུའི་བྱང་ཆུབ་ཀྱི་ཕྲིན་ལས།།
རིག་འཛིན་བརྒྱུད་གསུམ་བླ་མའི་བཀའ་དྲིན་ལ་འདུད་དོ།།
སྣྲོན་ཟླའི་ཉ་གང་ཟླ་བའི་བཞིན་རས་ཉིད་ངོམས་ཚེ།།
མ་ཧཱ་གུ་རུས་ལྷ་འདྲེ་དམ་བཏགས་ཀྱི་དུས་ཆེན།།
བསམ་ཡས་ཧས་པོ་རི་རྩེར་རྒྱགས་བརྔན་གྱི་ལྷ་མཆོད།།
འཛམ་གླིང་སྤྱི་བསང་ཚེས་པའི་དགའ་སྟོན་དེ་དྲན་བྱུང་།།
མཚོ་སྐྱེས་རྡོ་རྗེས་རྗེ་འབངས་གྲོགས་མཆོག་ཀུན་འཛོམས་ཞིང་།།
བཀའ་བརྒྱད་བདེ་གཤེགས་འདུས་པའི་སྨིན་གྲོལ་ལ་བཀོད་ནས།།
མདོ་སྔགས་བསྟན་པའི་རྩ་བའི་སྡེ་གཉིས་ཀྱི་མཛད་བཟང་།།
གངས་ལྗོངས་མུན་པ་བསལ་བའི་ཆོས་རྒྱལ་གྱི་དུས་ཆེན།།
མུ་ནེ་བཙན་པོས་ཆོས་འཁོར་རྣམ་གསུམ་ལ་མཆོད་ཅིང་།།
(ལྷ་ས། ཁྲ་འབྲུག བསམ་ཡས)
དགེ་འདུན་སྡེ་གཉིས་དབྱར་སྟོན་དུས་བཟང་གི་མཆོད་རྒྱུན།།
སྡེ་སྣོད་གསུམ་གྱི་སྲོལ་རྒྱུན་བཙུགས་པ་ཡི་ཉིན་མོ།།
གནས་ཆུང་ཆོས་རྒྱལ་ཆེན་པོའི་མངའ་གསོལ་དེ་དྲན་བྱུང་།།
རྩ་གསུམ་རྒྱལ་བ་མཆོད་པའི་དུས་ཆེན་དེ་དྲན་བྱུང་།།
བསྟན་སྲུང་ཆོས་སྐྱོང་སྙན་དར་སྒྲོན་པ་དག་དྲན་བྱུང་།།
ཇ་ཆང་ཚོགས་འཁོར་རོལ་བའི་སྤྲོ་ཚོགས་དེ་དྲན་བྱུང་།།
ཕ་མེས་བརྒྱུད་པའི་སྲོལ་བཟང་ལོངས་སྤྱོད་རྣམས་དྲན་སོང་།།
དབྱར་སྟོན་བསིལ་དྲོད་མཉམ་པའི་དགའ་ཚལ་དེ་སྐྱིད་པ།།
རྩི་ཤིང་མེ་ཏོག་རྒྱས་པའི་ཆར་རྒྱུན་དེ་བཟང་བ།།
ལྷ་བྱ་ཁུ་བྱུག་སྔོན་མོའི་གྲེ་འགྱུར་དེ་སྙན་པ།།
རིགས་མཐུན་སྤྲོ་གསེང་གནང་བའི་གླིང་ཁ་དེ་དྲན་སོང་།།
སྦྲ་གུར་དཀྱིལ་འཁོར་མཛེས་པའི་ཚོམ་བུ་ཡི་དབུས་ནས།།
ཞིམ་མངར་བཟའ་བཏུང་རོལ་བཞིན་གཉེན་ཉེ་ཡི་ཚོགས་བཅས།།
སྙན་འཇེབས་ལྡན་པའི་གླིང་བྲོ་བདེ་ཆེན་ལ་རོལ་བའི།།
གླིང་དཀར་དཔའ་བོ་དགྱེས་པའི་འདུ་ར་དེ་དྲན་བྱུང་།།
སྟག་ཤར་དཔའ་བོས་རྟ་རྒྱུག་མདའ་འཕེན་གྱི་ཀི་བསྭོ།།
གྲྭ་བཙུན་སྡེ་དགོན་འཛོམས་པའི་རི་བསྟོད་ཀྱི་སྤྱི་བསངས།།
སྒྱུ་རྩལ་དྲུག་བཅུ་འགྲན་པའི་འཛམ་གླིང་གི་རྩེད་མོ།།
རྨ་རྫ་འབྲི་གསུམ་མཆོད་པའི་སྐྱེན་པོའི་ཚོགས་དྲན་བྱུང་།།
གོ་ལ་འཇིག་རྟེན་མཛེས་པའི་ཡང་རྩེ་ཡི་ལྟེ་བར།།
སྟོབས་ཆེན་རྒྱལ་ཁབ་ཆེན་པོ་དབྱིན་ཡུལ་གྱི་རི་རྩེར།།
གསེར་མདོགས་ལྕང་མོ་མཛེས་པའི་རྣལ་འབྱོར་གྱི་ཚོགས་དང་།།
དགའ་སྟོན་མཉམ་འཛོམས་བྱུང་བ་དགའ་སྐྱོ་འདི་ཟབ་པ།།
རྒྱལ་ཀུན་མཉེས་ཕྱིར་བསངས་མཆོད་དམ་པ་འདི་འབུལ་ཞིང་།།
མགྲོན་ཀུན་ཚིམས་པའི་དགའ་སྟོན་དུས་ཆེན་ཞིག་ཚེས་པས།།
འགྲོ་ཁམས་བདེ་ཞིང་རྒྱལ་བསྟན་དར་རྒྱས་སུ་བསྔོས་ཕྱིར།།
དགེ་ལེགས་ས་གསུམ་ཁྱབ་པའི་རྟེན་འབྲེལ་ཞིག་འགྲིགས་སོང་།།
ཞེས་པ་རབ་རྒྱན་སྣྲོན་ཟླའི་ཉ་གང་ངམ་འཛམ་གླིང་སྤྱི་བསང་གི་ཉིན་མོ་དབྱིན་ཡུལ་ཆེ་མཐོའི་རི་བོ་གངས་ལྡན་Snowdoiaནས་བདག་ལ་སྙིང་ནས་དད་གུས་ཅན་དབྱིན་ཇི་བ་སྔགས་པ་ཕོ་མོ་རྒན་གཞོན་བྱིས་པ་དུ་མ་བཅས་བསང་མཆོད་བདུད་རྩིའི་སྤྲིན་ཕུང་བཞིན་འབུལ་སྐབས་སུ་གང་དྲན་དུ་རིག་འཛིན་དཔལ་དགྱེས་པ་རྡོ་རྗེ་འམ་སྨྱུག་མིང་ལ་ཨེ་མ་ཧོ་འབོད་པས་དེ་ཉིད་དུ་སྦྱར་དགེའོ།། །།
ཡང་གྲུབ་རྫུ་ཆོས་ཚོང་རྒྱག་མཁན་ཞིག་ཡིན་པ་ཐེ་ཚོམ་མི་འདུག འདི་ཚོ་ངན་ལང་ལ་ཤོར་ནས་བྱེད་རྒྱུ་དྲན་རྒྱུ་མང་པོ་འདུག བསྟན་པར་རྨ་འབྱིན་མཁན་ངོ་མ་འདི་འདྲའི་བླ་རྫུན་གྲུབ་རྫུན་སྤྲུལ་རྫུན་དེ་དག་རེད།