སྣང་རྒྱལ་ཤེས་དགེ། (ཝ་ར་ཎ་སི)
ཆེད་དུ་སྒུལ་བ་འདྲ་བའི།།
ས་ཡོམ་འགུལ་ཤུགས་ཆེ་བ།།
སུ་ཡིས་བཟློག་ཐབས་མེད་པ།།
འབྱུང་བའི་འཇིགས་པ་འདིའོ།།
མི་ཚེ་གཅིག་གི་རྔུལ་ཆུ།།
སྐད་ཅིག་གཅིག་ལ་བརླག་སོང་།།
ས་ཡིས་གནག་སེམས་འདི་འདྲ།།
གནམ་གྱིས་ཚོར་བ་ཨེ་བྱུང་།།
འབྱུང་བའི་འཇིགས་པ་སེལ་བར།།
ང་ཡི་མཚན་སྔགས་བགྲོངས་ཟེར།།
ཟད་ལ་ཉེ་བའི་འཕྲེང་བ།།
ས་རུད་འོག་ཏུ་ལྷག་སོང་།།
གསོན་པོའི་མིག་ཆུ་རེ་རེ།།
ཁྲག་དང་རྣག་གིས་འཕྱང་ཡོད།།
གཤིན་པོའི་ཞེན་ཆགས་རེ་རེ།།
འཁྲང་སེམས་དམར་པོས་སྦག་ཡོད།།
འཚོ་བ་བདེ་ཞིང་སྐྱིད་དུས།།
སངས་རྒྱས་གསེར་གྱིས་བཞེངས་ཡོད།།
འཇིགས་པ་མདུན་དུ་ལྷག་དུས།།
མི་ལས་རེ་ས་མི་འདུག །
སྐྱབས་འགྲོ་ཁྲི་ཕྲག་བགྲང་ནས།།
ཕྱི་ཡི་འཇིགས་པ་མ་སེལ།།
བརྐྱངས་ཕྱག་འབུམ་ཕྲག་བཙལ་བ།།
དཔྲལ་གོག་ན་རོགས་ཡིན་འགྲོ།།
ལས་འབྲས་མིག་ལྟར་བརྩི་བ།།
མཆོད་པའི་ཡང་རྩེ་ཡིན་ན།།
ཁྱོད་ཀྱི་བརྩེ་བའི་ཕྱག་ཟུང་།།
སུ་ཡི་ཕྱོགས་སུ་བསྲིང་ངམ།།
གསེར་གྱི་མཆོད་རྐོང་ཆག་སོང་།།
དངུལ་གྱི་ཏིང་ཕོར་བརླག་སོང་།།
མར་དང་ཆུ་ཡི་མཆོད་པ།།
མིག་ཀོང་ནང་དུ་བཤམས་ཡོད།།
ལྷ་ཁང་འབྱུང་བས་བཤིགས་ནས།།
ཁྱོད་ཀྱི་སྐུ་བརྙན་བསྣད་སོང་།།
ང་ཡིས་མཆོད་པ་འབུལ་ས།།
ཐལ་བའི་ཕུང་པོར་གྱུར་སོང་།།
རྔ་རྡུང་སྦུབ་དཀྲོལ་གསེང་ན།།
བརྗིད་ཉམས་ཀུན་ལས་ཆེ་རུང་།།
འབྱུང་བ་དགྲ་རུ་ལང་དུས།།
ཁྱེད་རང་གང་དུ་བྲོས་སམ།།
ལུང་བསྟན་ཙག་ཙིག་བཤད་དུས།།
ཁ་ལྕེ་ཤིན་ཏུ་བདེ་མོད།།
འཇིགས་པ་ཆེན་པོ་འབྱུང་དུས།།
ལྕེ་ལ་མདུད་པ་ཐེབས་སམ།།
བསང་དང་གསེར་སྐྱེམས་ཕུལ་ནས།།
བསྐལ་པ་བརྒྱ་ལ་གསོས་ཡོད།།
ཆང་ཕུད་བཞེས་རྒྱུ་མང་ནས།།
སྐུ་ར་བེར་བ་འདྲ་འདུག །
ཁང་པ་ཞིག་རོའི་འོག་ན།།
བུ་ཆུང་ངུ་སྐད་ལྷང་ལྷང་།།
གཟིགས་མཁན་ལྷ་ཚོགས་ཡིན་རུང་།།
སྐྱོབས་མཁན་ཕ་མ་ཡིན་འདུག །
དེ་རིང་ལས་སྐལ་ཟད་ནས།།
མཆོད་པའི་ཡོན་ཆབ་མི་འདུག
མིག་ཆུ་མཆོར་བ་གང་འདི།།
གནས་སྐབས་བཞེས་རོགས་གནོངས་དང་།།
27/04/2015
བཀྲ་ཤིས་བདེ་ལེགས།
ཨ་ལ་ལ་་་
ས་འགུལ་ས་གཞིའི་གཤིས་རེད།
ལས་འགུལ་མི་ཡི་ཆོས་རེད།
སྲོག་ཆད་རྒྱུ་ནོར་བརླག་པ།
ཚེ་སྔོན་རང་གི་ལས་རེད།
རང་ཉེ་སྲོག་ཤོར་བྱུང་དང་།
རང་ནོར་ཐལ་ཕུར་གྱུར་ཡང་།
རང་དད་དཀོན་མཆོག་གསུམ་དང་།
ལས་འབྲས་དད་པ་མ་བརླག
བླ་སྤྲུལ་ཚོའི་མཁྱེན་པ་འགག་འདུག
གྲུབ་ཐོབ་ཚོའི་རྫུ་འཕྲུལ་འགག་འདུག
ཆོས་སྐྱོང་ཚོའི་ལུང་བསྟན་འགག་འདུག
སེམས་ཅན་ཚོའི་ཡི་ག་འགག་འདུག
ཧ་ཧ་ཧ
ཡུལ་ལྷ་བཙན་པོ་ཁོས་གངས་བྲག་དབྲིལ་ནས་མི་བསད་སོང་།
དཀོན་མཆོག་གསུམ་པ་ཁོས་ལྷ་ཁང་བཤིག་ནས་མི་བསད་སོང།
བྲམ་ཟེ་ཟ་འདྲེ་ཁོས་རོགས་རམས་བཀག་ནས་མི་བསད་སོང་།
རྒྱལ་ཁབ་ཁྲེལ་མེད་ཁོས་ཁང་གོག་གཏོར་ནས་མི་བསད་སོང་། །