བོང་སྟག་རི་ལུ།
ཨ་མས་འུ་ཚང་དབུལ་པོ་ཡིན་ཞེས་ཁ་ནས་སྡུག་སྨེ་ཡང་ཡང་འདོན།།
སྲིང་མོས་འུ་ཚང་དབུལ་པོ་ཡིན་ཞེས་སེར་ག་གས་པའི་མཛུབ་མོ་སྟོན།།
ཚ་མོས་འུ་ཚང་དབུལ་པོ་ཡིན་ཞེས་དབུལ་སྐྱོར་སློབ་མའི་གྲལ་ལ་འཚང༌།།
ང་ཡིས་འུ་ཚང་ཕྱུག་པོ་ཡིན་ཞེས་ཀ་མད་སུམ་ཅུའི་རྩོམ་ཞིག་བྲིས།།
ཨ་མས་སྙན་ངག་བྲིས་ན་མི་ཕན་རང་གི་བྱ་བ་འཁྱོངས་དགོས་ཟེར།།
ཆུང་མས་ཁྱེད་ཀྱིས་སྙན་ངག་འབྲི་ན་ང་རང་ཁྱིམ་ནས་མི་འདུག་ཟེར།།
ཚ་བོས་ཁྱེད་ཀྱིས་སྙན་ངག་བྲིས་ན་ཁེར་ལབ་བྱེད་དོན་ཅི་ཡིན་ཟེར།།
ཚང་མས་ཁྱེད་ལ་ཟླ་ཕོགས་ཡོད་པས་རང་ཉིད་ཁ་རོག་འདུག་དགོས་ཟེར།།
མགོ་ཡི་སྦྲ་རྒན་དུད་པ་ཅན་དེ་མེད་པར་གྱུར་ཀྱང་འུ་ཚང་རེད།།
ལུས་ཀྱི་བོད་ལྭ་བཀྲག་མདངས་ཅན་དེ་མེད་པར་གྱུར་ཀྱང་འུ་ཚང་རེད།།
སེམས་ཀྱི་ཀ་ཁ་གཟི་འོད་ཅན་དེ་སྣང་མེད་བསྐྱུར་ཀྱང་འུ་ཚང་རེད།།
འུ་ཚང་ནམ་ཞིག་ཉམས་དམས་སོང་ན་ཕམ་ཁ་ཉོ་མཁན་འུ་ཚང་རེད།།
འུ་ཚང་སྲིང་མོས་བོད་ལྭ་བསྐྱུར་ཏེ་ལུས་ལ་ཆ་ལུགས་འདྲ་མིན་སྤྱད།།
འུ་ཚང་ཚ་བོ་སློབ་གྲྭར་མ་འགྲིམ་མི་དང་ཚོང་འདུས་ཁྲོམ་ལ་འཁྱམས།།
འུ་ཚང་ཕུ་བོ་སྙན་ངག་པ་ཚོར་ལྟ་ལོག་སྤྱོད་པའི་སྨྱོ་ནད་འཕར།།
འུ་ཚང་ས་སྒང་མཐོ་ས་དེ་ན་ཁད་ཀྱིས་འགྱུར་བ་སེམས་ངལ་ཞིག།