ཆུ་རླངས་འབྲུག་བྱམས།
སྤྱི་ལོ ༢༠༢༠ ལོའི་ཨ་རིའི་སྲིད་འཛིན་གྱི་འོས་བསྡུའི་བརྒྱུད་རིམ་ཁྲོད་ནས་རང་གིས་མཐོང་ཐོས་མྱོང་གསུམ་གཞིར་བཞག་ནས་བསམ་ཚུལ་ཁ་ཤས་ཤིག་བཤད་འདོད་བྱུང་སོང་། མ་གཞི་ནས་འོས་བསྡུའི་འགྲན་རྩོད་ཁྲོད་གཅིག་ཐོབ་དགོས་པ་དང། གཅིག་ཕམ་དགོས་པ་ནི་ལྡོག་ཏུ་མེད་པའི་འགྲོ་སྟངས་ཤིག་རེད། འོས་ཐོབ་མཁན་དང་ཁོང་གི་རྒྱབ་སྐྱོར་བ་ཚོས་སྤྲོ་སྐྱིད་གཏོང་བ་དང་སྲང་ལམ་ཀུན་ཏུ་ཡོང་ནས་དགའ་བའི་བྲོ་འཁྲབ་པ་དང་། སྐྱིད་པའི་གླུ་ལེན་པ་ཡང་རྒྱུན་ལྡན་ཞིག་རེད། དེ་བཞིན་དུ་འོས་ཤོར་མཁན་དང་དེའི་རྒྱབ་སྐྱོར་ཚོ་ལྡོག་སྟེ་བློ་ཕམ་པ་དང་སེམས་སྐྱོ་ངེས་པ་ཡང་དེ་བཞིན་རྒྱུན་ལྡན་རེད་ལ། འོས་ཤོར་མཁན་གྱི་ངོས་ནས་ཀྱང་འོས་བསྡུ་དྲང་པོ་བྱུང་ཡོད་མེད་ཀྱི་བསམ་ཚུལ་བཏོན་ཆོག་ལ། དེ་ལྟར་དོགས་པ་བྱུང་ཚེ་ཁྲིམས་གཏུག་བྱས་ཆོག་པའང་ཨ་རི་ལྟ་བུའི་དམངས་གཙོའི་རྒྱལ་ཁབ་ཅིག་གི་ནང་དུ་འགྲོ་བ་མིའི་མ་མཐའི་ཐོབ་ཐང་རེད་ལ། འདི་ཨ་རིའི་དམངས་གཙོའི་ལམ་ལུགས་ལས་བྱུང་བའི་ཧ་ཅང་རྒྱུན་ལྡན་ཅན་གྱི་འགྲོ་སྟངས་ཤིག་རེད།
ཡིན་ནའང། ད་ལོར་འོས་བསྡུའི་ཁྲོད་ནས་འོས་བསྡུའི་རྒྱལ་ཁ་སུ་ལ་ཐོབ་དང་མ་ཐོབ་དེ་གལ་ཆེན་མིན་པར། ང་ཚོས་ངེས་པར་དུ་ཤེས་དགོས་པ་ནི་སྒྲིག་འཛུགས་འདིའི་ལམ་ལུགས་དང། སྒྲིག་འཛུགས་འདིའི་ནང་དུ་ཡོད་པའི་རིན་ཐང་བྲལ་བའི་ཐོབ་ཐང་འདྲ་མཉམ་ཟེར་བ་འདི་དག་རེད། བོད་མི་ཚོ་ཡང་འདི་ལྟར་དམངས་གཙོ་ཚད་ལྡན་ཞིག་གི་ལམ་ཏུ་བསྐྱོད་འདོད་ཡོད་ཚེ། ང་ཚོས་ངེས་པར་དུ་ཤེས་དགོས་པ་ནི་དམངས་གཙོའི་ལམ་ལུགས་ཀྱི་འོག་ཏུ་ཐོབ་ཐང་འདྲ་མཉམ་དང་ཁྲིམས་སྐྱོང་གི་སྒྲིག་འཛུགས་ཤིག་གི་ཐོག་ཏུ་བསྐྱོད་རྒྱུ་དེ་རེད་ལ། དེ་ནི་དམངས་གཙོ་ལུང་པ་ཞིག་ལ་མཚོན་ན་ཧ་ཅང་གི་མེད་དུ་མི་རུང་བ་ཞིག་ཀྱང་རེད། ཨ་རིའི་སྲིད་གཞུང་བཙུགས་པ་ནས་བཟུང་མང་གཙོའི་ལམ་དུ་བསྐྱོད་ཡོད། སྒྲིག་འཛུགས་འདི་མི་དམངས་ཀྱི་ཆེད་དུ་བཙུགས་པ་ཞིག་ཡིན་པ་ལས་སྒྲིག་འཛུགས་ཀྱི་ཆེད་དུ་བཙུགས་པ་ཞིག་རྩ་བ་ནས་མ་རེད། དེ་བས་མི་དམངས་ཀྱི་ཁེ་ཕན་ལ་སྲུང་སྐྱོབ་དང། མི་དམངས་ཀྱི་མངོན་འདོད་ལ་བརྩི་བཀུར་གྱིས་མི་དམངས་ལ་ཞབས་ཞུ་སྒྲུབ་རྒྱུ་ནི་སྒྲིག་འཛུགས་འདིའི་དམིགས་ཡུལ་དང་ལས་འགན་དང་པོ་དེ་ཆགས་ཡོད། སྒྲིག་འཛུགས་འདིའི་སྒལ་ཚིགས་ལྟ་བུར་གྱུར་ཡོད་པ་ནི་ཁྲིམས་ཀྱིས་སྐྱོང་བཞིན་པའི་ལམ་ལུགས་འདི་རེད། ཁྲིམས་ཀྱིས་སྐྱོང་བཞིན་པའི་ལམ་ལུགས་འདིའི་ནང་དུ་རིགས་རུས་དང། ཆོས་ལུགས། ཕོ་མོ། རྒན་དར་གཞོན་གསུམ་སོགས་དབྱེར་མེད་ཀྱིས་ཁྲིམས་ཀྱི་ཐོག་ནས་འདྲ་མཉམ་ཡིན་ཟེར་བ་འདི་རེད། འདི་དག་ནི་ཁ་ཙམ་མ་ཡིན་པར་ཁྲིམས་ཀྱི་ཐོག་ནས་དངོས་སུ་ལག་ལེན་ཏུ་བསྟར་གྱི་ཡོད། ད་ལོའི་འོས་བསྡུའི་སྐབས་སུ་ཡིན་ནའང། མི་མང་གིས་འོས་མི་སུ་ལ་རྒྱབ་སྐྱོར་བྱེད་དང་མི་བྱེད་དེ་མི་སྒེར་བ་སོ་སོའི་འདོད་མོས་ལྟར་རང་དབང་རེད། འོན་ཀྱང། རིགས་རུས། ཕོ་མོ། རྒན་དར་གཞོན་གསུམ་ལ་སོགས་པའི་དབྱེ་འབྱེད་གང་ཡང་བྱེད་མི་ཆོག་ལ། མི་རེ་ལ་འོས་ཤོག་གཅིག་གི་ཐོབ་ཐང་ཡོད་པ་དེ་མི་ཚང་མར་འདྲ་མཉམ་བྱས་ནས་ཡོད།
ང་ཚོའི་བཙན་བྱོལ་ནང་དུ་འོས་བསྡུའི་ཐོབ་ཐང་འདྲ་མཉམ་ཟེར་བ་དེ་དོན་དངོས་ཐོག་ཉིན་མོའི་སྐར་མ་ལྟ་བུར་གྱུར་ཡོད། དཔེར་ན། ཨོ་སི་ཀྲོ་ལི་ཡ། ཉི་ཧོང། ཐེ་ཝན་བཅས་ཀྱི་བོད་མི་ཚོས་བོད་མི་མང་སྤྱི་འཐུས་ཀྱི་འོས་མི་གཅིག་ལ་མ་གཏོགས་འོས་ཤོག་འཕེན་རྒྱུའི་ཐོབ་ཐང་མེད། ཡོ་རོབ་ནང་དུ་གནས་སྡོད་བོད་མི་ཚོས་སྤྱི་འཐུས་འོས་མི་གཉིས་དང། དེ་བཞིན་བྱང་ཨ་རིའི་ནང་གི་བོད་མི་ཚོས་སྤྱི་འཐུས་འོས་མི་གཉིས་ལ་མ་གཏོགས་འོས་ཤོག་འཕེན་རྒྱུའི་ཐོབ་ཐང་མེད་མོད། ཡིན་ནའང་རྒྱ་བལ་འབྲུག་གསུམ་ནང་གནས་སྡོད་བྱེད་མཁན་བོད་མི་ཚོས་སྤྱི་འཐུས་འོས་མི་བཅུ་ལ་འོས་ཤོག་འཕངས་ཆོག་པ་དང། ད་དུང་དམིགས་བསལ་གྱིས་སེར་མོ་བའམ་དགེ་འདུན་པ་ཚོས་བོད་མི་མང་སྤྱི་འཐུས་བཅུ་གཉིས་ལ་འོས་ཤོག་འཕངས་ཆོག འདི་འདྲའི་དམངས་གཙོའི་ལམ་ལུགས་ཤིག་འཛམ་གླིང་རྒྱལ་ཁབ་སུ་གང་ལ་ཡང་མེད། དེ་བས་ལམ་ལུགས་འདི་དམངས་གཙོའི་ལམ་ལུགས་ཤིག་མ་རེད་ལ། སེར་མོ་བས་སྒེར་སྤྱོད་བྱེད་བཞིན་པའི་འོས་བསྡུའི་ལམ་ལུགས་ཤིག་རེད་ཅེས་ལབ་ན་ཡང་མི་ཆོག་པ་མེད། ཁྱིམ་ནས་ཁྱིམ་མེད་པར་རབ་ཏུ་བྱུང་བའི་དགེ་འདུན་པ་དག་ལ་ཆབ་སྲིད་གྱི་རྩེད་རའི་ནང་དུ་འདི་འདྲའི་དམིགས་བསལ་གྱི་ཁེ་དབང་ཞིག་ག་འདྲ་བྱས་ནས་དགོས་ཀྱི་ཡོད་དམ། ལམ་ལུགས་འདི་ལ་ང་ཚོས་ངེས་པར་དུ་འགྱུར་བ་གཏོང་དགོས།
ཨ་རི་བ་ཚོས་ཁྲིམས་ནི་སོ་སོའི་སྲོག་ལས་ཀྱང་གལ་ཆེན་པོར་བརྩི་བཞིན་ཡོད་ལ། དེ་བཞིན་དུ་ཁྲིམས་དེ་ཡང་དག་པ་ཞིག་ཡིན་མིན་ལ་དོགས་སློང་དང་གླེང་སློང་བྱས་ཆོག་པ་ཡང་རྒྱུན་ལྡན་ཞིག་རེད། ཡིན་ནའང། ང་ཚོ་བོད་མི་ཚོས་ཁྲིམས་ལ་བཅའ་ཁྲིམས་རིན་པོ་ཆེ་ཞེས་འབོད། རིན་པོ་ཆེ་ཟེར་བའི་འགྱུར་མེད་གཏན་ཆགས་ཀྱི་ཁྲིམས་ཤིག་དམངས་གཙོའི་ལུང་པའི་ནང་དུ་ཡོད་མི་འོས། གལ་སྲིད་ཁྲིམས་དེ་འགྱུར་མེད་གཏན་ཆགས་ཤིག་ཡིན་ཚེ་དོགས་སློང་བྱེད་ཆོག་པའི་གནས་སྟངས་ཤིག་རྩ་བ་རང་ནས་ཡོང་མི་སྲིད། ཁྲིམས་ནི་མི་ཡིས་བཟོས་པ་ཞིག་ཡིན་པས་མི་དམངས་ཀྱི་མངོན་འདོད་དང་དགོས་མཁོ་ལྟར་དེ་ལ་མི་ཡིས་འགྱུར་བ་གཏོང་ཆོག་པ་ཞིག་ཡིན་དགོས། ཁྲིམས་སམ་སྒྲིག་གཞི་དེ་མི་ཡི་འཚོ་བའི་ནང་དུ་འོས་ཤིང་འཚམ་པ་ཞིག་དང་ལག་ལེན་ཏུ་འགྲོ་ཐུབ་པ་ཞིག་ཡིན་ལ་ཞིབ་ཏུ་དཔྱད་དགོས། ཁྲིམས་སམ་སྒྲིག་གཞི་གང་རུང་དུས་དང་མ་འཚམ་པ་ཞིག་ཡིན་ཚེ་ངེས་པར་དུ་འགྱུར་བ་གཏོང་དགོས། དུས་དང་མི་འཚམ་པའི་ཁྲིམས་ལ་འགྱུར་བ་གཏོང་མ་ཐུབ་ཚེ། སྤྱི་ཚོགས་དེ་ལ་མི་མང་གིས་འགན་འཁྱེེར་གྱི་མེད་པའི་རྟགས་མཚན་ཞིག་ཡིན། གོང་དུ་བཤད་པ་བཞིན། མང་གཙོ་ལུང་པའི་ནང་དུ་ཁྲིམས་ལས་གལ་ཆེན་ཞིག་མེད་མོད། ཡིན་ནའང། ང་རང་གིས་དུས་རྒྱུན་དུ་ཁྲིམས་གྱི་ཐད་ལ་བལྟ་སྟངས་འདི་འདྲ་ཞིག་འཛིན་གྱི་ཡོད། ཁྲིམས་ཀྱི་སྒང་ན་མི་སུ་ཞིག་མེད་ལ། དེ་བཞིན་དུ་ཁྲིམས་ཀྱི་འོག་ན་ཡང་མི་སུ་ཡང་ཡོད་མི་འོས་པར། མི་དང་ཁྲིམས་གཉིས་འདྲ་མཉམ་རེད་བསམ་གྱིན་ཡོད། གལ་ཏེ་མི་ཚང་མ་ཁྲིམས་ཀྱི་འོག་ཏུ་ཡོད་ཚེ། ཁྲིམས་དེ་ལ་འགྱུར་བ་གཏོང་བའམ་དོགས་སློང་བྱེད་པའི་དབང་ཚད་མི་སུ་ལ་ཡང་མེད་དོ།
ཉེ་ཆར་ང་ཚོའི་སྤྱི་ཚོགས་ནང་དུ་བྱུང་པའི་བོད་མི་མང་སྤྱི་འཐུས་ཚོགས་དུས་དགུ་པ་འཕར་འགྱངས་དང་འབྲེལ་ནས་སྤྱི་འཐུས་སྒེར་པ་ཞིག་གིས་རྩོམ་ཡིག་ཞིག་སྤེལ་ཅིང་། དེའི་ཐད་ཆེས་མཐོའི་ཁྲིམས་ཞིབ་ཁང་གིས་ཉན་ཞིབ་ཚོགས་འདུ་འཚོགས་པ་རེད། མི་མང་པོ་ཞིག་གིས་གནད་དོན་དེའི་ཐད་ལ་སྤྱི་འཐུས་སྒེར་པ་དེ་ཡག་པོ་མེད་པ་དང་ཁྲིམས་དང་སྒྲིག་གཞི་མི་ཤེས་མཁན་ཞིག་ལ་ངོས་འཛིན་བྱས་ཡོད། བསམ་ཚུལ་འདོན་མཁན་དེ་དག་གིས་སོ་སོའི་བསམ་ཚུལ་འདོན་རྒྱུ་ནི་མི་སྒེར་བ་སོ་སོའི་རང་དབང་རེད། ཡིན་ནའང་། མི་དེ་དག་གིས་སྤྱི་ཚོགས་ལ་འགན་འཁྱེར་བའི་ཐོག་ནས་བསམ་ཚུལ་བཤད་པ་དང། དམངས་གཙོའི་གོ་དོན་དང་འགྲོ་ལུགས་ཤེས་པའི་ཐོག་ནས་བསམ་ཚུལ་བཤད་པ་རེད་དམ་ཟེར་ན་དེ་འདྲ་ཞིག་མ་རེད། དམངས་གཙོ་ཡང་དག་པ་ཞིག་དང་ཁྲིམས་ཀྱིས་སྐྱོང་བའི་སྒྲིག་འཛུགས་ཤིག་གི་ཐོག་ཏུ་བསྐྱོད་འདོད་ཡོད་ཚེ། མི་མང་གིས་སྒྲིག་འཛུགས་དེའི་ཁྲིམས་སམ་སྒྲིག་གཞི་དེ་གའི་ཐད་ལ་དོགས་སློང་དང་བསམ་ཚུལ་འདོན་དགོས་པ་ནི་དམངས་གཙོའི་ལམ་ལུགས་འཐུས་ཚང་དང་འཕེལ་རྒྱས་ཡོང་རྒྱུའི་ཐད་ཧ་ཅང་གལ་ཆེན་པོ་རེད། གལ་ཏེ་དམངས་གཙོ་ལུང་པའི་ནང་དུ་དོགས་སློང་དང་བསལ་ཚུལ་བཏོན་མ་ཆོག་ཚེ། དམངས་གཙོའི་སྒྲིག་འཛུགས་དེ་མིང་ཙམ་ལས་དོན་ལ་ནུས་པ་མེད་པ་ལྟ་བུ་ཆགས་ཟིན་པ་རེད།
ད་ལོར་ཨ་རིའི་སྲིད་འཛིན་གྱི་འོས་བསྡུའི་ཁྲོད་ཆ་ཤས་ལེན་མཁན་གྱི་གྲངས་འབོར་ནི་ལོ་རྒྱུས་ནང་དུ་ཆ་ཤས་ལེན་མཁན་གྱི་མི་མང་ཤོས་ཆགས་ཡོད་ལ། སྲིད་འཛིན་རིམ་པའི་ལོ་རྒྱུས་ནང་དུ་ཟིན་ཐོ་གསར་པ་ཞིག་ཀྱང་བཀོད་ཡོད། མི་ས་ཡ་བརྒྱ་དང་དྲུག་བཅུ་རེ་གཅིག་གིས་འོས་བསྡུའི་ཁྲོད་ཆ་ཤས་བླངས་ཡོད། མི་དེ་དག་གིས་རང་དབང་གི་སྒོ་ནས་སོ་སོའི་འོས་མི་ལ་རྒྱབ་སྐྱོར་བྱས་པ་ཞིག་ལས། མི་གཞན་གྱིས་སྐུལ་སློང་བྱེད་ཐུབ་མེད། ཡིན་ནའང། ང་ཚོའི་སྤྱི་ཚོགས་ནང་དུ་འོས་བསྡུའི་སྐབས་སུ་རང་དབང་གི་སྒོ་ནས་མི་སོ་སོའི་རྣམ་དཔྱོད་རྩལ་དུ་བཏོན་ནས་འོས་མི་དེ་དག་གི་འཆར་གཞི་དང་མ་འོངས་པའི་ལས་འཆར་བཅས་ཀྱི་ཐད་ལ་བསམ་བློ་གཏོང་མཁན་ཧ་ལམ་མེད། ད་ལྟ་འགྲོ་བཞིན་པའི་ཉིས་སྟོང་ཉེར་གཅིག་ལོའི་སྲིད་སྤྱི་གཉིས་ཀྱི་འོས་མི་དེ་དག་གི་འཆར་བཞི་དང་མ་འོངས་པའི་དམིགས་ཡུལ་གང་ཡིན་ལ་ཡང་བལྟ་མི་ཤེས། ཤེས་འདོད་ཀྱང་མེད། བོད་མི་ཚོས་ཤེས་འདོད་པ་ནི། སྲིད་སྐྱོང་གི་འོས་མི་དེ་དག་གི་ཕ་ཡུལ་གང་ནས་ཡིན་པ་དེ་རེད། ཕ་ཡུལ་གཅིག་པའམ་ཆོལ་ཁ་གཅིག་པ་ཡིན་ཚེ་འོས་མི་དེ་དག་ལ་ཤེས་ཡོན་དང་འཇོན་ཐང་གང་ཡང་མེད་ན་ཆོག། ལྟ་བ་འདི་ལ ༼regionalism༽ཕ་ཡུལ་གཅིག་པའམ་ཕ་ཡུལ་གཅིག་པའི་ཞེན་ཁོག་ཟེར། ལྟ་བ་འདི་ནི་ཐ་ཤལ་བ་ཞིག་རེད། དམངས་གཙོ་ལུང་པའི་ནང་ལྟ་བ་འདི་འདྲ་ཡོང་མི་འོས།
ཉེ་ཆར་ཨ་རིའི་སྲིད་འཛིན་གྱི་འོས་བསྡུ་དང་འབྲེལ་བའི་བོད་ཀྱི་སྤྱི་ཚོགས་ནང་དུ་བསམ་ཚུལ་ག་རེ་སླེབས་ཀྱི་འདུག་ཟེར་ན། རྒྱ་གར་དང། བལ་ཡུལ། ཨ་རི། ཡུལ་ལུང་གཞན་གྱི་ནང་དུ་ཡོད་པའི་བོད་མི་ཁག་གཅིག་གིས་ད་ལྟའི་ཨ་རིའི་སྲིད་འཛིན་ལས་ཐོག་༼Trump༽ ལགས་ལ་རྒྱབ་སྐྱོར་བྱེད་དགོས་ཅེས་ཨ་རིའི་ནང་དུ་ཡོད་པའི་བོད་མི་ཚོ་ལ་སྐུལ་སློང་བྱས་ཡོད། སྐུལ་སློང་བྱེད་མཁན་དེ་དག་གིས་མང་གཙོའི་ཁེ་དབང་དང་བཟང་སྤྱོད་བཅས་ཀྱི་ཐད་ལ་ཡོངས་སུ་རྒྱབ་འགལ་བྱས་འདུག། ཡིན་ནའང། ང་ཚོའི་སྤྱི་ཚོགས་ནང་དུ་འདས་ཟིན་པའི་ལོ་ངོ་དྲུག་བཅུའི་རིང་དེ་འདྲ་རྐྱང་རྐྱང་བྱས་ཡོད། ད་ལྟ་ཡང་བྱེད་དང་བྱེད་བཞིན་པ་ཞིག་རེད། ང་ཚོ་འདས་པའི་ལོ་ངོ་དྲུག་བཅུའི་རིང་དམངས་གཙོའི་ལམ་དུ་བསྐྱོད་ཡོད་ཀྱང། མང་གཙོ་ཡང་དག་པ་ཞིག་གི་སྒང་དུ་བསྐྱོད་ཐུབ་མེད། དེ་ནི་ང་ཚོའི་མི་དམངས་ཀྱི་ངོས་ནས་མང་གཙོའི་གོ་དོན་མ་རྟོགས་པས་རེད། དཔེར་ན། བོད་ནང་ནས་ཤེས་ལྡན་མི་སྣ་ཞིག་གིས་བཙན་བྱོལ་བོད་མིའི་དམངས་གཙོའི་ལམ་ལུགས་ལ་དཔེར་མཚོན་འདི་འདྲ་ཞིག་བཞག་ཡོད། བཙན་བྱོལ་བོད་མིའི་དམངས་གཙོའི་ལམ་ལུགས་ནི་དགུན་གྱི་འཁྱགས་རམ་སྟེང་ཏུ་ཁང་པ་བརྒྱབས་ཡོད་པ་ཞིག་ལ་ངོས་འཛིན་བྱས་ཡོད། དཔེ་མཚོན་འདི་ནི་ཧ་ཅང་འོས་ཤིང་འཚམས་པ་ཞིག་རེད་འདོད། ང་ཚོ་བཙན་བྱོལ་ལ་ཡོང་ནས་ལོ་ངོ་དྲུག་བཅུ་ལྷག་འགོར་ཡོད། སྐབས་དེའི་རིང་བོད་མི་མང་སྤྱི་འཐུས་དང། བཀའ་ཁྲི། སྲིད་སྐྱོང་བཅས་ལ་འོས་བླུགས་ནས་མི་དམངས་ལ་ཉམས་མྱོང་གང་ལ་གང་འཚམ་ཤིག་བསགས་ཡོད་པ་རེད། ཡར་རྒྱས་ཀྱི་རྣམ་པ་གང་འཚམ་ཤིག་ཐོན་དགོས་པ་རེད་དེ། འོན་ཀྱང། དེ་འདྲ་མ་རེད། བཟང་ཕྱོགས་དང་ངན་ཕྱོགས་གཉིས་ཀྱི་ནང་ནས་ངན་ཕྱོགས་ཀྱི་ཆ་ཧ་ཅང་མང། ང་ཚོ་མུ་མཐུད་ནས་ཆོལ་ཁའི་ཞེན་ཁོག་སྐམ་པོའི་ནང་དུ་འཛུལ་ནས་འདི་ལྟར་སོང་ཚེ། བཙན་བྱོལ་བོད་མི་དང་སྒྲིག་འཛུགས་འདི་གཉིས་རྒྱ་ནག་གཞུང་གིས་རྩེད་མོ་རྩེད་ས་ལྟ་བུ་ཞིག་ཏུ་འགྱུར་ངེས་རེད།
ད་དུང་ཉེན་ཁ་ཆེན་པོ་ཞིག་ལ། སྲིད་སྐྱོང་གི་འོས་མི་ཁག་གཅིག་གིས། ང་ཚོའི་སྤྱི་ཚོགས་ནང་དུ་ན་གཞོན་གལ་ཆེན་པོ་རེད་ཅེས་གཞོན་པ་དང་རྒན་པའི་བར་ལ་དབྱེ་བ་འབྱེད་སྟངས་འདི་ནི་རང་ཉིད་གྱི་ཁེ་ཕན་གཅིག་པོ་མ་གཏོགས་སྤྱི་ཚོགས་ཁྱོན་ཡོངས་ཀྱི་བདེ་འཇགས་ལ་བསམ་བློ་གཏོང་གི་མེད་པའི་རྟགས་རེད། བཙན་བྱོལ་སྤྱི་ཚོགས་ནང་དུ་དབྱེ་འབྱེད་གྱི་ལེའུ་གཉིས་པ་ཞིག་གི་མགོ་བརྩམས་ཀྱིན་འདུག་བསམ། མི་མང་གྱི་ངོས་ནས་བྱེད་སྟངས་འདི་དག་ལ་ངེས་པར་དུ་གཟབ་དགོས།
ད་ལོར་ཨ་རིའི་སྲིད་འཛིན་འོས་བསྡུའི་ཁྲོད་རྒྱལ་ཁ་ཐོབ་མཁན་( Biden) ནི་འདས་པའི་ཨ་རིའི་སྲིད་འཛིན་གྱི་ལོ་རྒྱུས་ནང་ལོ་ན་རྒན་ཤོས་དེ་རེད། ད་དུང་འདེམས་ཐོན་བྱུང་བའི་སྲིན་འཛིན་གཞོན་པ་བུད་མེད་ཅིག་རེད། ཕ་མི་རིགས་ནག་པོ་དང་མ་རྒྱ་གར་བ་གཉིས་ཀྱི་བུ་མོ་ཁ་མ་ལ་༼ Kamala) ལོ་རྒྱུས་ནང་བུད་མེད་ཅིག་ཨ་རིའི་སྲིད་འཛིན་གཞོན་པར་འདེམས་ཐེངས་དང་པོ་ཆགས་ཡོད། ལོ་ན་བདུན་བཅུ་དོན་བརྒྱད་ལ་སླེབས་པའི་རྒད་པོ་ཞིག་དང། ལོ་ལྔ་བཅུ་ལྔ་ང་ཡིན་པའི་མི་རིགས་ནག་པོའི་བུད་མེད་བཅས་སྲིད་འཛིན་དང་སྲིད་འཛིན་གཞོན་པར་འདེམས་པ་འདི་ནི་ཨ་རིའི་མི་མང་དང་མང་གཙོའི་གཟི་བརྗིད་རེད། གནད་དོན་འདིའི་སྒང་ལ་ང་ཚོས་ངེས་པར་དུ་བསམ་བློ་གཏོང་དགོས། ང་ཚོ་དམངས་གཙོ་ཚད་ལྡན་ཞིག་དང། ང་ཚོའི་སྒྲིག་འཛུགས་འདི་ཡར་རྒྱས་དང་སྲ་བརྟན་ཞིག་གི་ཐོག་ཏུ་བསྐྱོད་འདོད་ཡོད་ཚེ། ང་ཚོར་ཆེས་མ་མཐར་ཡོད་དགོས་པ་ནི་འོས་བསྡུ་ཁྲོད་མི་ཚང་མ་ཐོབ་ཐང་འདྲ་མཉམ་དང། སྐམ་རུལ་དུ་གྱུར་ཟིན་པའི་ཆོལ་ཞེན་འདི་ངེས་པར་དུ་གཏོར་དགོས།
་་་་་་་་་ བཙན་བྱོལ་བོད་མིའི་དམངས་གཙོའི་ལམ་ལུགས་ནི་དགུན་གྱི་འཁྱགས་རམ་སྟེང་ཏུ་ཁང་པ་བརྒྱབས་ཡོད་པ་ཞིག་ལ་ངོས་འཛིན་བྱས་ཡོད། ་་་་་་་་་
་་་་་་་་་་ ལོ་ན་བདུན་བཅུ་དོན་བརྒྱད་ལ་སླེབས་པའི་རྒད་པོ་ཞིག་དང། ལོ་ལྔ་བཅུ་ལྔ་ང་ཡིན་པའི་མི་རིགས་ནག་པོའི་བུད་མེད་བཅས་སྲིད་འཛིན་དང་སྲིད་འཛིན་གཞོན་པར་འདེམས་པ་འདི་ནི་ཨ་རིའི་མི་མང་དང་མང་གཙོའི་གཟི་བརྗིད་རེད། ་་་་་་་་་་་་ ཟེར།
ཆེད་རྩོམ་འདི་ཡི་མིང་ཚིག་གསར་པ་དག་གི་དག་ཆག་ལ་དཔྱད་ན། མི་དམངས་ཞེས་བྲིས་འདུག་ཀྱང་། མི་མང་དང་མི་མངས་ཞེས་བྲིས་མི་འདུག དམངས་གཙོ་དང་། མང་གཙོ་གཉིས་ཀ་བྲིས་འདུག མངས་གཙོ་ཞེས་བྲིས་མི་འདུག