ཐུབ་བསྟན་འོད་ལྡན།
བོད་མི་སྐྱབས་བཅོལ་བ་གཞན་ཡུལ་དུ་གྱར་ནས་ལོ་དྲུག་ཅུར་ཉེ་བ་འགྲོ་བཞིན་པའི་དེ་རིང་མིའི་ལུང་པར་རང་གི་འགོ་ཁྲིད་འོས་འདེམས་ལ་བྲེལ་བཞིན་ཡོད། བོད་མིའི་བརྒྱ་ཆ་མང་ཤོས་རང་ཡུལ་དུ་རྒྱ་དམར་གྱི་བཙན་གནོན་འོག་མནར་གཅོད་མྱོང་བཞིན་ཡོད་པ་རེད། འོན་ཀྱང་བོད་ཀྱི་ལུགས་གཉིས་མངའ་བདག་༸གོང་ས་སྐྱབས་མགོན་ཆེན་པོ་མཆོག་གིས་དབུས་གཞུང་ས་ལྷན་རྒྱས་རྒྱ་གར་འཕགས་པའི་ཡུལ་དུ་ཕེབས་འབྱོང་བྱུང་བའི་དྲིན་ལས་ང་ཚོའི་འཐབ་རྩོད་ཀྱི་སྒྲིག་འཛུགས་འདི་བཞིན་གཞན་ཡུལ་དུ་མི་ལོ་དྲུག་ཅུར་ཉེ་བའི་རིང་ས་བརྟན་ཕུགས་འཕེར་གྱིས་གནས་ཐུབ་པ་བྱུང་ཡོད་པ་རེད། སྐྱབས་བཅོལ་བའི་དུས་ཡུན་དེའི་ནང་༸གོང་ས་༸སྐྱབས་མགོན་ཆེན་པོ་མཆོག་ནས་དུས་རབས་དང་མཐུན་པའི་ལེགས་བཅོས་ཁ་བསྒྱུར་མང་དག་ཅིག་གནང་བ་དང། མཐར་གང་ཉིད་ཀྱི་ལོ་རྒྱུས་རང་བཞིན་གྱི་སྐུ་དབང་ཡོངས་རྫོགས་བོད་མིའི་བདེན་དོན་འཐབ་རྩོད་ཀྱི་མ་འོངས་པའི་རེ་བཅོལ་ཞུ་ཡུལ་དུ་གྱུར་པའི་མི་རབས་གསར་པ་ཚོའི་ཕྱག་ཏུ་གསོལ་སྩལ་གནང་ཡོད་པ་རེད།
སྲིད་དབང་རྩིས་སྤྲོད་ཀྱི་བརྒྱུད་རིམ་ཁྲོད་འོས་བསྡུའི་ལས་རིམ་ལ་མང་ཚོགས་ནས་དོ་སྣང་ཧ་ཅང་ཆེན་པོ་བྱས་པའི་གོ་སྐབས་དམ་འཛིན་གྱིས་བཀའ་སྤྱིའི་འོས་མི་དང་བླངས་པ་མང་དག་གཅིག་ཐོན་པ་དང་སྟབས་མཚུངས་སུ་བཙན་བྱོལ་བོད་མིའི་སྲིད་སྤྱིའི་འོས་བསྡུ་དེ་ཡང་རང་ཡུལ་རང་ལག་ཏུ་ཡོད་འདྲའི་སྣང་བ་སྐྱིད་པའི་སྲིད་དོན་དབང་ཆའི་འཐབ་རྩོད་དུ་ཁ་བསྒྱུར་བྱས་སོང་སྙམ།
མང་ཚོགས་ནང་མང་གཙོའི་ཁེ་དབང་སློབ་གསོ་ཚད་མཐོ་པོ་ཡོད་པའི་རྒྱལ་ཁབ་ནང་གཞུང་སྲིད་དབང་འཛིན་འཕོ་འགྱུར་གྱི་བརྒྱུད་རིམ་ནང་ཁ་གཏད་ཕྱོགས་ཁག་དང་ཁྱོད་ཤི་ང་སོན་གྱི་འཐབ་རྩོད་རྣོ་ངར་ལྡན་པ་བྱེད་ཀྱི་ཡོད་ཀྱང་། སྲིད་དོན་དབང་ཆའི་རྒྱལ་ཕམ་ལ་དང་ལེན་དང་གུས་ཞབས་བྱེད་དགོས་པ་དེ་མ་བརྗེད་པ་བྱེད་ཀྱི་ཡོད་པ་རེད། སང་ཉིན་ནས་མང་ཚོགས་ཀྱིས་གཞུང་འཛིན་གསར་པའི་དབུ་ཁྲིད་ལ་དང་ལེན་བྱེད་པ་དང་། གཞུང་འཛིན་པས་ཕམ་ཁ་ཤོར་པའི་རང་གི་ཁ་གཏད་ལ་གུས་ཞབས་བྱེད་པའི་སྲོལ་བཟང་ཡོད་པ་རེད།
བོད་ཀྱི་ཁ་དཔེར། ཐེའུ་རང་ལ་དབང་བྱུང་ན། གོལ་ཁ་ཐལ་འཚུབ་ཀྱིས་ཁེངས། ཞེས་པ་ལྟར། བཙན་བྱོལ་བོད་མིའི་སྤྱི་ཚོགས་ནང་སྲིད་དབང་དམངས་ལ་དབང་བའི་ཉིན་དེ་ནས་བཟུང་འོས་བསྡུའི་ལས་རིམ་ཁྲོད་ཁྱོད་ཤི་ང་གསོན་གྱི་འཐབ་རྩོད་བྱས་པ་ཙམ་དུ་མ་ཟད། འཐབ་རྩོད་ཀྱི་ཞེ་ཁོན་དེ་དག་གཞུང་འཛིན་ལས་རིམ་ནང་མཉམ་འཁྱེར་བྱས་ཏེ་རང་གི་རྒྱབ་སྐྱོར་བར་གཞུང་མཛོད་ནས་རྒྱུ་དངོས་སོགས་གང་དགོས་ཀྱིས་རོགས་རམ་བྱེད་པ་དང་། ཁ་གཏད་པ་སྐྱེ་བོ་སྒེར་ཡན་ལ་འཁོན་འཛིན་སེམས་བཅངས་ཀྱིས་ཐུབ་ཚོད་བྱེད་པ་སོགས་ཡ་རབས་བཟང་སྤྱོད་ཀྱི་དྲི་ཙམ་ཡང་མེད་པའི་སྣང་བརྙན་གསལ་བསྐྲུན་བྱས་ཏེ་༸རྒྱལ་བའི་ཐུགས་རེ་ཆུད་ཟོས་བཏང་བའི་མཇུག་འབྲས་ལ་བསམ་ན། མཁས་དབང་ཟམ་གདོང་རིན་པོ་ཆེས། ༸གོང་ས་ཆེནཔོས་སྐུ་དབང་མི་མང་ལ་སྩལ་བ་དེ་ང་ཚོས་བེད་ལོག་ཏུ་སྤྱད་ན་དེའི་མཇུག་འབྲས་ཇི་ཐོན་ཚོད་ཐིག་དཀའ་བ་ཞིག་ཡིན་པ་གསུངས་པ་བཞིན་ཕ་བཟང་པོའི་དངུལ་ཁུག་དེ་བུ་ངན་པས་ཇ་ཁུག་བྱས་པའི་དཔེ་ལྟར་འགྱུར་ཉེན་ཤིན་ཏུ་ཆེ།
འདི་ལོའི་སྲིད་སྤྱིའི་འོས་བསྡུའི་ལས་དོན་འགོ་འཛུགས་ལ་ཉེ་བ་དང་ཆབས་ཅིག་དང་བླངས་འོས་མི་སྔར་ལས་མང་བ་ཐོན་བཞིན་པ་འདི་སྲིད་དོན་ཕྱི་ཚུལ་རྣམ་པའི་ཐོག་ནས་དགའ་འོས་སུ་མཆིས་ཀྱང་ཞིབ་དཔྱད་བསམ་གཞིགས་བྱེད་སྐབས་འཇིགས་སྣང་ཡང་སྐྱེ་འོང་བ་ཞིག་ཏུ་མཐོང་། སྤྱི་འཐུས་འོས་མིའི་འཁྲབ་སྟོན་ལ་མང་ཚོགས་ངོས་ནས་དོ་འཁུར་དེ་ཙམ་མི་བྱེད་པ་ནི་ཕལ་ཆེར་འཐུས་མིའི་སྣང་བརྙན་མང་ཚོགས་ཀྱི་སེམས་སུ་གསལ་པོ་ཡིན་པས་ཉོབ་སྣང་བྱུང་བ་མིན་ནམ་སྙམ།
གལ་སྲིད་འོས་མི་རེ་འགའི་བྱེད་བབས་ཀྱིས་གྲོས་ཚོགས་འཐུས་མིའི་འོས་འདེམས་ལ་དོ་འཁུར་མ་བྱས་པར་བཞག་ན་དེ་ནི་མང་གཙོའི་ཁེ་དབང་ལོངས་སུ་སྤྱོད་པའི་ཐབས་ཤེས་ཡག་པོ་ཞིག་ག་ལ་ཡིན། ད་ལྟའི་ཆར་འཁྲུག་ཆ་དོད་ཤོས་ནི་སྲིད་སྐྱོང་གི་འོས་མི་དང་འབྲེལ་བའི་རྣམ་པ་དེ་རེད། སྲིད་སྐྱོང་འོས་མིར་ཁྱོན་བསྡོམས་མི་གྲངས་ལྔ་བྱུང་བ་ནི་སྐབས་སྔོན་མ་ལས་ཉུང་བ་ཡོད་ཀྱང་འགྲན་རྩོད་ཀྱི་འཁྲུག་ཆ་དང་གཏིང་རིམ་ནི་སྔ་ལོ་ལས་བྱང་ཆ་དོད་དུ་ཕྱིན་ཡོད་པ་ཧ་ལས་དགོས་པ་ལྟ་བུ་ཡོད་པ་གསལ་པོ་རེད།
སྲིད་སྐྱོང་འོས་མི་དང་རྒྱབ་སྐྱོར་བ་སོ་སོས་ཕན་ཚུན་སྐྱོན་བརྗོད་བྱེད་རེས་བྱེད་པ་དང་། སྤྱི་ཚོགས་དྲ་བ་སོགས་སུ་ཁ་རྩོད་ཤུགས་ཆེན་བྱེད་པ་དེ་མི་མང་གི་མིག་ལ་གཟན་པོ་ཡོད་སྲིད་ཀྱང་དེ་ཚོ་གནས་ཚུལ་ལམ་འཐབ་རྩོད་ཧ་ཅང་ཆུང་ཆུང་དེ་འདྲ་རེད། དེ་ལས་ཀྱང་གཏིང་རིང་བ་དང་ཚབས་ཆེ་བ་ནི་དད་པ་ལོག་སྤྱོད་བྱེད་རྩིས་བྱས་པ་དེ་རེད། དུས་འཁོར་དབང་ཆེན་ཐོག་མར་ཞུས་པ་མི་མང་གི་ཆེད་དུ་ཡིན་པ་དང་། མཐའ་མ་དུས་འགྱངས་༸རྒྱལ་བ་རིན་པོ་ཆེའི་ཆེད་དུ་ཡིན་པ་སོགས་སྦྱོར་དངོས་རྗེས་གསུམ་ཚང་མ་ཆབ་སྲིད་ཀྱི་ལག་ཆར་བེད་སྤྱོད་བཏང་བ་དང་། བལ་ཡུལ་ས་ཡོམ་གོད་ཆག་ཁྲོད་རང་རིགས་ཀྱི་ས་ཁང་ཟོག་གསུམ་ལ་གྱོང་གུད་བྱུང་བའི་མིང་ཐོག་ནས་ཕྱི་རྒྱལ་རོགས་ཚོགས་ཁག་ནས་རོགས་རམ་ཕོན་ཆེ་བྱུང་ཡང་། ད་བར་མང་ཚོགས་ནས་རོགས་རམ་དགོས་པའི་རེ་ཞུ་ག་ཚོད་བྱས་ཀྱང་བགོས་འགྲེམས་མ་བྱས་པར་གསང་ཉར་བྱས་ཏེ་འོས་བསྡུ་བསླེབ་ཉེའི་མཚམས་སུ་སྤྲོད་རྒྱུའི་ཇུས་ངན་བཤམས་པ། ཚོགས་པ་སྐྱིད་སྡུག་མང་ཆེ་བར་རོགས་དངུལ་གྱི་མིང་ཐོག་ནས་ལྐོག་དངུལ་སྤྲོད་པ་དང་ཚོགས་པ་འགའ་ཤས་ལ་མ་སྤྲད་པས་ཁོང་ཚོར་སྤྲད་འདུག་ང་ཚོར་སྤྲད་མ་བྱུང་ཞེས་སྐད་ཆ་མང་པོ་བྱུང་དང་འབྱུང་བཞིན་པ་སོགས་ནི་འཇིགས་སྣང་སྐྱེ་གཞིའི་གནས་སུ་ཁུམས།
འདི་ལྟར་བྱས་དང་བྱེད་བཞིན་གྱི་ལས་ཀ་རྫབ་ཆེན་དེ་ཚོར་བསམ་ཚེ་མི་རིགས་ཤིག་གི་འཆི་གསོན་ཉག་ཕྲའི་དུས་འདི་འདྲར་རང་ཁེ་དབང་རྩོད་འབའ་ཞིག་དོན་དུ་གཉེར་ནའང་མང་ཚོགས་ནས་ད་དུང་གོ་ཤེས་མེད་པར་བཞུགས་བདེ་ཨེ་ཡོད་སྙམ་པས་ཚང་མས་དགོངས་དཔྱད་ཞུ།།
ད་དངོས་གནས་གནས་ཚུལ་ཚབས་ཆེན་དེ་འདྲ་ཐོན་གྱི་འདུག བལ་ཡུལ་གོད་ཆག་རོགས་དངུལ་ད་བར་མ་སྤྲད་པར་ཉར་ཡོད་ན། སེམས་པ་སྐྱོ་དགོས་པ་ཞིག་རེད་འདུག མི་གཅིག་གི་འོས་ཤོག་དོན་དུ་དེ་འདྲ་བྱས་ན་ཐབས་སྡུག་རེད། བལ་ཡུལ་མི་མང་ཚོས་བཀའ་ཤག་མདུན་ངོ་ལོག་རྒྱག་དགོས་རེད།
བཀའ་ཤག་གིས་ཡར་ཞུས་ནས་ཕྱིར་འགྱངས་གནང་མེད་པ་དགའ་ལྡན་ཕོ་བྲང་ཡིག་ཚང་གི་སྐུ་ངོ་བློ་བཟང་སྦྱིན་པར་མི་མང་པོ་བཅར་ནས་ནན་འདྲི་ཞུས་སྟབས་སྲིད་སྐྱོང་གི་གསུངས་པ་དེ་བདེན་པ་མ་རེད་ཅེས་གསུངས་འདུག ད་ལྟོས་དང། བདེན་པ་ཟེར་བ་དེ་རྒྱལ་རྟགས་ངོས་སུ་དབུས་བོད་མིའི་སྒྲིག་འཛུགས་ཀྱིས་བྲིས་པ་མ་རེད་དམ། ད་དུང་བལ་ཡུལ་གྱི་པེད་ཤག་ངོ་ནས་ངོ་ཚ་བོ་རེད། བོད་ཀྱི་རྩ་དོན་སྒེར་གྱི་གཏམ་གྲགས་ལ་མ་བརྗེ་རོགས། སྐུ་མཁྱེན།
དེ་རིང་ཡང་ཨ་མཚན་ཅན་གྱི་སྲིད་སྒྲུང་ཞིག་གོ་སོང་། བདེན་པ་ཨེ་ཡིན་ནམ།
བཙན་བྱོལ་སྤྱི་ཚོགས་ནང་གི་དུས་བབ་གསར་ཁང་མ་གཏོགས་འདི་རིགས་གསར་ཁང་དང་རླུང་འཕྲིན་ཁང་གཞན་དག་གིས་ཁ་ཡ་བྱེད་ཀྱི་མེད། ད་ནི་དུས་བབ་གསར་ཁང་གིས་གསར་འགོད་པ་ཞིག་བལ་ཡུལ་དུ་ཆེད་མངགས་བྱས་ཏེ་རོགས་དངུལ་འབོར་ཆེན་གང་ལ་སྤྲོད་དགོས་པ། ག་ཚོད་སྤྲད་ཡོད་པ། སྤྲོད་མ་ཐུབ་པའི་རྒྱུ་མཚན་སོགས་ཀྱི་གནས་ཚུལ་གང་ཡིན་མི་མང་ལ་གསལ་བོ་བཟོ་དགོས་པ་གལ་ཆེན་རེད།