སྒྲ་དབྱངས་སྲས་མོ་ནས།
རང་ཁོངས་དབུས་གཙང་དམ་པ་ཆོས་ཀྱི་ཆོལ་ཁ་ནི་སྔར་ནས་ད་བར་སྐྱིད་སྡུག་གང་ལ་ཐུག་ཀྱང་༧རྒྱལ་དབང་ཐམས་ཅད་མཁྱེན་པ་ཆོས་ཀྱི་ལྷ་དང་སྲིད་ཀྱི་དབུ་འཁྲིར་ངོས་འཛིན་གཏིང་ཟབ་ཀྱིས་༧མགོན་པོ་གང་གི་ཐུགས་དགོངས་ཇི་བཞིན་ནེམ་ནུར་མེད་པར་ཤར་སྐྱོད་བྱེད་མཁན་ཤིག་ཡིན་པ་ནི། བྱུང་རབས་མེད་ལོང་ནས་གསལ་པོར་མངོན་བཞིན་ཡོད་ལ།ད་ལྟའི་དུས་སུའང་ང་ཚོ་ཕྱི་རབས་པ་རྣམས་ཀྱིས་འདས་པའི་ལོ་རྒྱུས་ཀྱི་མེ་ལོང་ལས་གསལ་བའི་མེས་པོ་དམ་པའི་ཞབས་རྗེས་བཟུང་ནས་༧རྒྱལ་བའི་དབང་པོའི་དགོངས་པ་བདུད་རྩི་ལྟར་འཛིན་མཁན་གྱི་སྤྱི་འཐུས་ཤིག་འོས་འདེམས་བྱ་རྒྱུ་ནི་ཉག་ཕྲའི་དུས་སྐབས་འདིར་ལོ་རྒྱུས་ཀྱིས་ང་ཚོར་སྤྲད་པའི་འོས་འགན་ཞིག་ཡིན་ལ་མང་གཙོའི་སྤྱི་ཚོགས་ཀྱི་གཟི་བརྗིད་ལྡན་པའི་ཐོབ་ཐང་ཞིག་ཀྱང་ཡིན། འོ་ན། ཁྱེད་ཀྱིས་༧རྒྱལ་བའི་བཀའ་དྲིན་དྲན་ཞིང་བསམ་ཤེས་ཐུབ་མཁན་གྱི་རང་ཚུགས་ལྡན་པའི་དབུས་གཙང་དམ་པ་ཆོས་ཀྱི་ཆོལ་ཁའི་སྤྱི་འཐུས་སུ་འོས་ཤིང་འཚམ་པའི་མི་དེ་སུ་རེད་གསུངས་
ན། ཁོང་ནི་༧གོང་ས་ཏཱ་ལའི་མ་མཐོ་རིམ་སློབ་གཉེར་ཁང་དུ་སློབ་དཔོན་གྱི་ཕྱག་ལས་གནང་བཞིན་པའི་འབུམ་རམས་པ་རིག་འཛིན་ལྷུན་གྲུབ་ལགས་ཡིན། དེ་ཡང་ད་ལྟའི་དུས་རབས་འདིར་གཞོན་སྐྱེས་མང་པོ་ཞིག་ཕྱིའི་རྣམ་པ་ཟང་ཟིང་གི་འགྱུར་ལྡོག་དང་ལྷན་དུ་རང་སྣང་ཡང་འཁྲུལ་དེ་མི་ལོ་སྟོང་ཕྲག་བརྒྱུད་པའི་རིན་ཐང་བྲལ་བའི་རང་གི་སྐད་ཡིག་དང་རིག་གཞུང་དག་ཀྱང་སྣང་མེད་དུ་བསྐྱུར་རྐྱེན་རང་རེའི་སྐད་དང་རིག་གཞུང་རྣམས་སྣུམ་ཟད་ཀྱི་མར་མེ་བཞིན་ཉམས་རྒུད་དུ་འགྲོ་དང་འགྲོ་མུས་ཀྱི་སྐབས་འདིར། སྤྱི་འཐུས་མི་སྣའི་ཁྲོད་དུ་རང་རེའི་རིག་གཞུང་གི་རིན་ཐང་རྟོགས་ཅིང་དེ་དག་ལ་དོ་ཁུར་ལྷག་པར་འཁྱེར་མཁན་ཇེ་མང་དགོས་པ་དེ་མི་རིགས་འཐབ་རྩོད་དང་འཚོ་གནས་རང་བཞིན་ཐད་ཧ་ཅང་གི་གལ་ཆེན་ཡིན་པར་བརྟེན། འབུམ་རམས་པ་རིག་འཛིན་ལྷུན་གྲུབ་ལ་མཚོན་ན། རང་མི་རིགས་ཀྱི་སྐད་ཡིག་ལ་དད་ཅིང་རིག་གཞུང་ལ་དུང་ཞེན་ཟབ་པ་མ་ཟད། རང་ཉིད་ལ་དེའི་ཐོག་ནུས་པ་སྤུང་རྒྱུའི་ཆུ་ཚད་ལྡན་པའི་ཁར་ལྷག་བསམ་རི་ལྟར་ཕྱུག་པ་ཞིག་ཡིན་པས་ན། ཐེངས་འདིའི་དབུས་གཙང་དམ་པ་ཆོས་ཀྱི་ཆོལ་ཁའི་སྤྱི་འཐུས་སུ་ཁོང་ཕེབས་ཐུབ་ན་ཉི་མ་མེ་གྲོགས་སུ་འགྱུར་ངེས།། སྤྱི་འཐུས་ནི་མང་ཚོའི་རྒྱལ་ཁབ་ཀྱི་ཀ་ཆེན་ཞིག་དང་ཆབ་དཔལ་རིག་སོགས་མ་འོངས་རྒྱལ་ཁབ་ཀྱི་ཁ་ཕྱོགས་གང་དུ་བསྐྱོད་རྒྱུའི་ཕུགས་བསམ་འཚོལ་མཁན་བཅས་མདོར་ན་བསམ་ཚོད་ལས་འདས་པའི་འགན་འཁྲི་ཡོད་སྟབས། སྤྱི་འཐུས་ར་བའི་ནང་བཤད་ཕོད་པ་དང་འབྲི་ཕོད་པ་བྱེད་ཐུབ་པའི་ཤེས་ལྡན་ལྷག་བསམ་ཟུང་འདྲེས་ཤིག་དགོས་པ་ལས་གཞོག་གཅིག་ལྡན་པ་ཁོ་ན་ཡིན་ཚེ། གཤོག་པ་ཡ་ཅན་གྱི་བྱ་ཞིག་བར་སྣང་མཁའ་ལ་ནམ་ཡང་འཕུར་ཐབས་བྲལ་བ་བཞིན་ཡིན། རིག་འཛིན་ལྷུན་གྲུབ་ལ་མཚོན་ན།གཞི་རིམ་དང་འབྲིང་རིམ། མཐོ་སློབ། རབ་འབྱམས་པ་དང་་སློབ་དཔོན། ཁྱད་འཕགས་སློབ་དཔོན་དང་འབུམ་རམས་པ་བཅས་ཤེས་ཡོན་གྱི་བརྒྱུད་རིམ་ཆ་ཚང་འགྲིམས་ཚར་བས་མནའ་དེང་རིག་གནས་ཀྱིས་ཕྱུག་པའི་འདབ་ཤོག་གཉིས་ལྡན་གྱི་སྤྱི་འཐུས་འོས་མི་ཚད་ལྡན་ཞིག་ཡིན། ཕྱོགས་གཞན་ཞིག་ནས་སྤྱི་འཐུས་ནི། མི་མང་གི་སྐུ་ཚབ་ཡིན་པས་མི་མང་གི་མངོན་འདོད་སྒྲུབ་ཅིང་། མི་མང་གི་བདེ་སྡུག་སེལ་བའི་ཐབས་ཇུས་དང་སྙིང་སྟོབས་ལྡན་པ། བློས་གཏོང་ཐུབ་མཁན་ཞིག་ཡིན་དགོས་པ་ནི། མི་མང་གི་རེ་འདོད་ཡིན། ཆ་རྐྱེན་འདིའི་འོག་ནས་བལྟས་ཀྱང་། ཁོང་ནི་སྐབས་འདིའི་དབུས་གཙང་སྤྱི་འཐུས་སུ་འོས་པར་མཐོང་། གང་ཡིན་ཟེར་ན།ཁོང་ལ་ཞུམ་པ་མེད་པའི་སྙིང་སྟོབས་ལྡན་ཞིང་སྤྱི་སེམས་ཀྱི་ལྷག་བསམ་དཀར་པོ་དང་བདེན་འཚོལ་གྱི་དཔྱད་ཞིབ་རང་གཤིས་ལྡན་པས་སོ། ཁོང་གི་སྤྱི་ཚོགས་ཉམས་མྱོང་གི་ཐོག་ནས་བརྗོད་ན།སྤྱིར་ཁོང་བོད་མིའི་སྒྲིག་འཛུགས་ནང་ད་བར་ཕྱག་ལས་གནང་མྱོང་མེད་ནའང་ཆུང་ནས་ད་བར་ཚོགས་པ་ཆེ་ཆུང་འདྲ་མིན་ནང་འགན་འཁུར་བ་དང་མཉམ་ཞུགས་བྱས་མྱོང་བས་ཁོང་ལ་སྤྱི་ཚོགས་འདྲ་མིན་གྱི་ཉམས་མྱོང་ཡོད་ཟེར་ཡང་རབ་བཏགས་ལ་ནམ་ཡང་འགྱུར་མི་སྲིད།
དོན་བསྡུས་ནས་བརྗོད་ན།གུས་མོར་བརྗོད་པ་མང་པོ་མེད་ལ་མང་པོ་ཤེས་མཁན་ཞིག་ཀྱང་མིན།ཡིན་ཡང་རང་ཉིད་དབུས་གཙང་ས་སྐྱེས་རྡོ་སྐྱེས་ཤིག་གི་ངོས་ནས་བརྗོད་ན་སྤྱི་འཐུས་མི་བཅུ་ལ་འོས་འཕེན་རྒྱུའི་གོ་སྐབས་ཐོབ་པ་འདི་ནི། མང་གཙོའི་ཐོབ་ཐང་ཆེ་ལ་འགན་འཁྲི་ཡང་ཆེ་བ་ཞིག་ཡིན་པར་ངོས་འཛིན་ཞུ་གི་ཡོད།གང་ཡིན་ཟེར་ན།བདག་གི་འོས་ཤོག་འདི་རང་ཉིད་ཙམ་མིན་པར་་གཞིས་ལུས་མི་མང་གི་སྐུ་ཚབ་ཀྱང་མཚོན་དགོས་པས་རང་ནུས་ཀྱི་རྣམ་དཔྱོད་གང་ཡོད་བེད་དུ་སྤྱད་ནས་ཀླད་པ་དཀྲུགས་དགོས་སར་བཀྲུགས།རིག་པ་དྭངས་དགོས་སར་དྭངས།གཏི་མུག་ལས་གསལ་དགོས་སར་གསལ་ཏེ་གཡུ་དང་དོ་ལོ་མ་ནོར།གསེརདང་རགས་་མ་འཁྲུལ་བར་བྱས་ཏེ་སྤྱི་མི་ཚད་ལྡན་འོས་འདེམས་བྱ་རྒྱུ་ནི་ཧ་ཅང་གི་གལ་གནད་ཆེན་པོ་ཡིན།
དེར་བརྟེན་བདག་གི་རྣམ་པ་དཔྱད་པའི་ལམ་དུ་བསྐྱོད་པའི་འཇུག་འབྲས་སུ་འབུམ་རམས་པ་རིག་འཛིན་ལྷུན་གྲུབ་ལགས་ནི་མཚན་ཉིད་ཡོངས་སུ་ཚང་བའི་སྐབས་༡༧པའི་དབུས་གཙང་དམ་པ་ཆོས་ཀྱི་ཆོལ་ཁའི་སྤྱི་འཐུས་འོས་ཤིང་འཚམ་པ་ཞིག་ཏུ་སེམས།དེ་བཞིན་དབུས་གཙང་སྤུན་གྲོགས་རྣམས་ནས་ཀྱང་བློ་དང་རིག་པའི་དཔྱད་པ་ལེགས་པར་བྱས་ཏེ་ས་རྡོ་མ་འཁྲུགཆུ་ཆར་མ་ནོར།མངོན་སུམ་དང་རྗེས་དཔག་མ་འདྲེས་བར་རང་གི་རིག་པས་དབྱེ་སྟེ་གཞིས་ལུས་རྒྱ་ཆེའི་མི་མང་གི་ཚབ་མཚོན་དྲི་མེད་ཅིག་བྱ་རྒྱུ་ནི་ང་ཚོའི་ལས་འགན་ཡིན་པས་ན། སྐབས་བཅུ་བདུན་པའི་རང་ཁོངས་སྤྱི་འཐུས་སུ་འབུམ་རམས་པ་རིག་འཛིན་ལྷུན་གྲུབ་ལགས་་འདྲ་བ་ཞིག་སླེབས་དགོས་འདུག
མཐའ་བསྡོམས།གུས་མོས་ཁྱེད་རྣམ་པར་ཁོང་ལ་འོས་གནང་རོགས་ཞུ་ཡི་མེད་ཀྱང་།གོང་དུ་གང་བཤད་རྣམས་རང་ཉིད་རྒྱུས་ངོ་ཡོད་མཁན་ཞིག་གི་བསམ་འཆར་ཡིན་པས་དབུས་གཙང་མི་མང་ནས་ཐུགས་བསམ་ལེགས་པར་བཞེས་རོགས།