རོང་པོ་བློ་བཟང་རིན་ཆེན།
མདུན་གློག་བབ་ཆགས་ཤིག་གི་གཤམ་ནས། ཁོ་བོས་མཚན་མོའི་ལྷིང་འཇགས་ལ་རོལ་བཞིན་<<ཡབ་ཀྱིས་བུ་མོར་སྤྲིངས་པའི་འཕྲིན་>>གྱི་ཁ་རྩང་གི་འཕྲོ་ནས་ཀློག་འགོ་བརྩམས། དེ་རིང་གི་ཚན་པ་འདིའི་ཁ་བྱང་ལ་<<མིའི་རིགས་ཀྱི་སྐད་ཡིག་དང་རིགས་རྒྱུད་>>ཅེས་བཏགས་འདུག
ལེ་ཚན་སྔོན་མ་དག་གི་ནང་དུ་བཤད་པ་བཞིན་ས་སྒང་ཧྲིལ་པོ་འདིར་སྲོག་ཆགས་རྣམས་ཀྱི་ཐོག་མར་རྣག་ཉ་ལྟ་བུའི་ཉ་སོབ་ཀྱི་རིགས་བྱུང་ཞིང་། དེ་ནས་རིམ་གྱིས་ཕྱི་ཤིན་མཁྲེགས་པའི་དུད་འགྲོ་དང་འདབ་ཆགས་ཀྱི་རིགས་འཕེལ་འགྲིབ་ལ་བརྟེན་ནས་འགྲོ་བ་མི་བྱུང་། དེའང་གནམ་གཤིས་དང་ཁོར་ཡུག་གི་རྐྱེན་པས་རིགས་རྒྱུད་མི་འདྲ་བ་དུ་མར་གྱུར་ཅིང་།
འཚོ་གནས་དང་གོམས་གཤིས་སོགས་རྦད་དེ་ཁ་ཁར་གྱུར་བ་རེད་འདུག
རིགས་རྒྱུད་དེ་དག་ལས་ཆེས་སྔ་བའི་རིགས་རྒྱུད་གང་ཡིན་བཤད་དཀའ་ན་ཡང་། རྒྱ་གར་ནང་ལ་མཚོན་ན་ཆེས་སྔ་བའི་རིགས་རྒྱུད་ནི་ཌྷི་རཱ་ཝེ་ཌྷིན་མི་རིགས་ཁོ་ན་ཡིན་འདུག དེའི་རྗེས་སུ་ཨཱརྱ་མི་རིགས་དང་སོག་པོ། ནེག་རཱོའོ་སོགས་ཀྱི་རིགས་རྒྱུད་བྱུང་བ་རེད། དེ་ལས་ཨཱརྱ་མི་རིགས་ནི་“ཡ་གླིང་བྱང་ཕྱོགས་དང་ཨོ་གླིང་གི་མཐའ་ཡས་པའི་སྤང་ཐང་ཆེན་མོ་ཡོངས་ལ་འཁྱམས་ཉུལ་བྱས་ནས་བསྡད་མྱོང་བ་རེད། འོན་ཀྱང་ཁོང་ཚོའི་མི་འབོར་གྱི་གྲངས་ཇེ་མང་ལ་སོང་བ་དང་བསྟུན་ནས་གནམ་གཤིས་འགྱུར་ཏེ་ཆར་ཆུ་མེད་ལ་རྩྭ་ཡང་མི་སྐྱེ་བའི་ས་སྐམ་རྡོ་གྱོང་དུ་གྱུར་སོང་བའི་དབང་གིས། མི་ཚང་མར་ཁ་ཟས་ཀྱིས་མི་འདང་བའི་དཀའ་ཁག་བྱུང་བ་རེད། དེ་འདྲ་ཡིན་ཙང་། ཁོང་ཚོ་ཟས་འཚོལ་བར་འཛམ་གླིང་འདིའི་ས་ཆ་གཞན་དག་ལ་གནས་སྤོར་བའི་ལུགས་སྲོལ་ཤུགས་ཆེན་དར་”ཏེ་ས་ཆ་གང་ཡིན་དུ་ཁྱབ། དེ་ནས་ལོ་ཟླའི་འཕེལ་རིམ་དང་བསྟུན་ནས་རིགས་རྒྱུད་བསྲེས་སླད་སྣ་ཚོགས་ཤིག་བགྱིས་ནས། ད་ཆ་ཨཱརྱ་མི་རིགས་ནི་གོ་ལ་འདིའི་མིའི་རིགས་ཀྱི་མེས་པོའི་མཆེད་ཁུངས་ཆེན་པོ་ཞིག་ཡིན་པར་ངོས་འཛིན་བྱེད་བཞིན་ཡོད་པ་འདྲ།
རིགས་རྒྱུད་མི་འདྲ་བ་སྣ་ཚོགས་པ་ཞིག་ཡོད་པ་བཞིན། དེ་དག་རེ་རེར་ཕན་ཚུན་བརྡ་སྤྲོད་པའི་རང་གི་གཉུག་མའི་སྐད་ཡིག་གྲངས་ལས་འདས་པ་ཞིག་ཡོད་ནའང་། དུས་ཚོད་ཀྱི་འགྱུར་འགྲོས་དང་། བེད་སྤྱོད་དང་དགོས་དབང་གི་རྐྱེན་པས་འཕེལ་འགྲིབ་རིམ་པར་བརྒྱུད་དེ། ད་ཆ་སྐད་ཡིག་གི་ཁྱིམ་རྒྱུད་ཆེན་པོ་གསུམ་དང་དེ་དག་གི་ཁྱིམ་རྒྱུད་དུ་གཏོགས་པའི་སྤུན་མཆེད་ལྟ་བུའི་སྐད་ཡིག་བཅུ་ཕྲག་འགའ་ད་དུང་འཛམ་གླིང་འདིར་གཅེས་ནོར་དུ་ལྷག་ཡོད་པའི་སྡོམ་ཚིག་བཀོད་འདུག
ཁོང་གིས་ཀྲུང་གོ་བའི་སྐད་ཡིག་ནི་སྐད་ཡིག་གི་ཁྱིམ་རྒྱུད་ཆེན་མོ་གཅིག་ཏུ་བརྩིས་ཤིང་། དེར་གཏོགས་པ་འབར་མ་དང་། བོད། ཐེ་ལན་དྷིའི་སྐད་ཡིག་བཅས་བགྲངས་ཡོད། ཁོ་བོར་མཚོན་ན་སྐད་ཡིག་གཞན་དག་ལ་ཆ་རྒྱུས་གང་ཡང་མེད་པས་གང་ཞིག་སྐད་ཡིག་གི་ཕ་མ་དང་། ཅི་ཞིག་དེ་དག་གི་ཁྱིམ་རྒྱུད་གཏོགས་མིན་བཤད་པའི་རྔོ་མི་ཐོགས། འོན་ཀྱང་ཀྲུང་གོ་བ་དང་བོད་ཀྱི་སྐད་ཡིག་ལ་ཅུང་ཙམ་ཆ་རྒྱུས་ཡོད། རེད་དེ་ཀྲུང་གོ་བའི་སྐད་ཡིག་ནི་སྐད་ཡིག་གི་ཁྱིམ་རྒྱུད་ཆེན་མོ་ཞིག་དང་། བོད་ཀྱི་སྐད་ཡིག་ནི་དེར་གཏོགས་པའི་སྐད་ཡིག་ཏུ་བགྲངས་པའི་རྒྱུ་མཚན་ཁྱོན་ནས་ཤེས་མ་སོང་། མ་ཟད་སྒྲ་གདངས་དང་ཡིག་གཟུགས་གང་གི་ཆ་ནས་ཀྲུང་གོ་བའི་སྐད་ཡིག་གི་ཁུངས་སུ་གཏོགས་པའི་རྒྱུ་མཚན་ཞིག་ལར་ནས་མེད་པར་སེམས།
ཡང་སྐད་ཡིག་གི་ཁྱབ་ཚད་ཀྱི་སྟེང་ནས་ཁྱིམ་རྒྱུད་ཆེན་མོ་དང་། དེ་ལས་བྱུང་བའི་སྤུན་མཆེད་ཀྱི་ཐ་སྙད་སྦྱོར་བཞིན་ཡོད་ན། དབྱིན་ཇིའི་སྐད་ཡིག་དེ་ཉིད་ཨཱརྱ་སྐད་ཡིག་གི་ཁྱིམ་རྒྱུད་དུ་གཏོགས་ཚུལ་ཇི་ལྟར་ཡིན་ནམ། གང་ལྟར་སྐད་ཡིག་གི་ཁྱིམ་རྒྱུད་ཆེན་མོ་དང་། དེ་ལས་བྱུང་བའི་སྤུན་མཆེད་ཀྱི་ཐ་སྙད་སྦྱོར་ཚུར་སོགས་ཁོ་བོར་མཚོན་ན་ཤེས་བྱ་གསར་པ་ཞིག་རེད་དོ།།
2019/2/11ཉིན་རང་ཤག་ཏུ་བྲིས།