རོང་པོ་བློ་བཟང་རིན་ཆེན།
དེ་རིང་རེས་གཟའ་ཟླ་བའི་ངལ་གསོ་དང་བསྟུན་ནས་དཔེ་ཀློག་ཕྲན་བུ་ཞིག་བྱེད་འདོད་བྱུང་སྟེ། རང་ཤག་དབེན་པའི་གྲོང་ནས་ཁ་ཁུ་སིམ་པོར་དེབ་ཆུང་ཞིག་གི་རྒྱབ་ཤ་ནས་འཇུས་ཏེ་ཀློག་འགོ་བརྩམས། དེབ་ཆུང་འདི་ཉིད་འུ་ཅག་ལ་ཅུང་ཙམ་རྒྱུས་ཡོད་དུ་གྱུར་བའི་<<ཡབ་ཀྱིས་བུ་མོར་སྤྲིངས་པའི་འཕྲིན་>>ཞེས་པ་དེ་རེད། དེ་ལས་མང་པོ་ཞིག་བཀླགས་ཟིན་པ་མ་ཟད་བཀླགས་བྱང་ཡང་ནུས་ཚོད་ཅིག་འབྲི་ཁུལ་བྱས་པ་ལྟར་རེད། དེ་རིང་<<གཙོ་བདག་ལམ་ལུགས་འཕེལ་རྒྱས་ལ་སོང་ཚུལ་>>ཞེས་པའི་ཚན་པ་ཐུང་ངུ་འདི་བཀླགས་པ་ཡིན།
གཙོ་བདག་ལམ་ལུགས་བྱུང་མ་ཐག་གཙོ་བདག་གིས་ཚོ་ཁག་གམ། མི་དམངས་ཀྱི་མངོན་འདོད་བསྒྲུབས་པ་ལས། སྒེར་དོན་འབའ་ཞིག་སྒྲུབ་པ་ནི་མི་སྲིད་པ་ལྟ་བུ་རེད། འོན་ཏེ་རིམ་བཞིན་གཙོ་བདག་ལ་སྒེར་སེམས་ཇེ་ཆེར་སོང་སྟེ་ཚོ་ཁག་ལ་ཡོད་པའི་བཅའ་དངོས་དག་རང་གི་ཡིན་པའི་བསམ་བློ་གཏོང་འགོ་བརྩམས་པ་རེད། མ་ཟད་རང་ཉིད་ནི་ཚོ་ཁག་གང་དེའི་དཔོན་པོའམ་ངོ་ཚབ་ལྟ་བུ་ཡིན་པའི་འདུ་ཤེས་ཆེ་རུ་ཕྱིན་ཏེ་རང་གི་བུ་ཕྲུག་དང་། སྤུན་མཆེད། གཉེན་ཉེ་རྣམས་ལ་གཙོ་བདག་ཏུ་ཆགས་པའི་སྦྱོང་བརྡར་སྤྲད་དེ། རང་ཉིད་ཤི་བའི་སྐབས་ཤུལ་འཛིན་དུ་ནང་མི་རེ་བདམས་པ་རེད། རྗེས་སུ་འོས་བསྡུ་དང་གདམ་ཀ་གང་ཡང་མེད་པར་གཙོ་བདག་གང་དེས་སུ་ཞིག་གཙོ་བདག་ཏུ་ཐག་བཅད་ན་དེ་ཉིད་གཙོ་བདག་ཏུ་གྱུར་བའི་ལུགས་སྲོལ་བྱུང་བ་རེད། དེ་ནས་མཁར་དང་མཚོན་ཆ། བཅའ་དངོས་སོགས་གང་ཡོད་གཙོ་བདག་གིས་བདག་འཛིན་བྱས་ཤིང་ལོངས་སུ་སྤྱད་པ་རེད། དེ་ལྟ་དེ་ལྟར་གོ་ལ་ཧྲིལ་པོ་འདི་ལ་དབུལ་ཕྱུག་དང་མཐོ་དམན་གྱི་ཧེ་བག་གནམ་ས་ལྟ་བུ་གྱུར་བ་རེད།
རྩོམ་ཡིག་འདི་ལ་བརྟེན་ནས་བྲན་གཡོག་ལམ་ལུགས་དང་། མི་ཞིག་གི་སྒེར་སེམས་ཇི་ལྟར་མངོན་དུ་གྱུར་བ་སོགས་ཀྱི་གསང་བ་གཏོར་ཐུབ་པ་ཟད་། ད་ལྟའི་སྤྱི་ཚོགས་ཁྲོད་ཀྱི་ལམ་ལུགས་མང་པོ་ཞིག་གི་རྒྱབ་ལྗོངས་དཔོག་ཐུབ་བོ།།
2019/3/4ཉིན་རང་ཤག་ཏུ་བྲིས།