སྣང་རྒྱལ་ཤེས་དགེ། ༼ཝར་ཎ༽
སློབ་མ་ནས་དགེ་རྒན་དུ་གྱུར་བའི་བརྒྱུད་རིམ་འདིས་ཡིག་རྒྱུགས་སྤྲོད་མཁན་ནས་ཡིག་རྒྱུགས་ལེན་མཁན་ཞིག་ཏུ་གྱུར་སོང་། དེ་རིང་གི་རྒྱུགས་རའི་རྣམ་པ་མང་པོ་ཞིག་གིས་ང་ཕྱིར་དྲན་གྱི་ཀློང་དུ་འདྲེན་པར་བྱས་ཤིང་། ཕྱིར་དྲན་གྱི་ཀློང་ནས་འགྱུར་ལྡོག་གི་དཀྱོག་མཚམས་རེ་རེའང་ཡིད་ངོར་གཟུགས་ཅན་བཞིན་དུ་ཤར་བར་བྱས། རྒྱུན་དུ་སློབ་སྦྱོང་ལ་སྤྲོ་སྣང་མེད་པའི་སློབ་མ་མང་པོ་ཞིག་གིས་ཁྱིམ་མཚེས་ཀྱི་རོགས་སྐྱོར་དང་རང་ཉིད་ཀྱི་གཡོ་འཕྲུལ་ལ་རེ་ལྟོས་བྱེད་བཞིན་འདུག་ཅིང་། ཁོ་ཚོས་བཙན་ཚུགས་ཀྱིས་བཏོད་པའི་སྒམ་ཉམས་དང་དྲང་མདོག་དེས་རང་ཉིད་དཀའ་ཁག་ལ་ཐུག་ཡོད་པ་གསལ་སྟོན་བྱས་པ་ལྟ་བུར་འདུག་ཅིང་། རྐུབ་ལ་ཚེར་མ་ཟུག་པ་ལྟ་བུའི་འགུལ་སྐྱོད་དེས་དེ་བས་ཀྱང་ངས་ཁྲིམས་འགལ་བྱེད་བཞིན་ཡོད་ཅེས་སྒྲོག་པ་དང་ཀུན་ནས་མཚུངས། སྣང་ཚུལ་དེ་དག་གིས་ང་ལ་རང་ཉིད་ཀྱི་ལོ་རྒྱུས་མངར་མོ་དང་སྐྱུར་མོ་དེ་དག་དྲན་པར་བྱས་བྱུང་།
གྲོང་ཚོའི་སློབ་ཆུང་འགྲིམ་སྐབས་ང་ནི་ང་ཚོའི་འཛིན་གྲྭ་ཙམ་མ་ཟད་སློབ་གྲྭ་ཡོངས་ཀྱི་སློབ་སྦྱོང་ཡག་ཤོས་དེ་ཡིན་ཞིང་ལོ་རེར་གསུམ་བཟང་སློབ་མའི་བྱ་དགའ་སོགས་བྱ་དགའ་རིགས་འདྲ་མིན་སྣ་ཚོགས་བླངས་ནས་ངེད་ཚང་གི་ཁྱིམ་གྱི་རྩིག་ངོས་སུ་ཕྲེང་དང་ཕྲེང་བྱས་ནས་སྦྱར་ཡོད། སྐབས་དེར་ང་ནི་ཡིག་རྒྱུགས་གཏོང་སྐབས་སློབ་གྲོགས་མང་པོ་ཞིག་གི་སྲོག་སྐྱོབ་མཁན་༼དོན་དངོས་སུ་ཁོང་ཚོ་ངན་ལང་དུ་གཏོང་མཁན་ཡིན་ན་ཡང་སྐབས་དེར་དེ་འདྲའི་ལྟ་ཚུལ་ཞིག་ཡོད་པ་རེད།༽དེ་ཡིན་པས་ངའི་གཡས་གཡོན་དུ་འདུག་མཁན་ཚོས་རྒྱུན་དུ་ང་ལ་བྱི་རིལ་སོགས་སྤྲོད་པར་བྱེད་ཅིང་འབྲེལ་ལམ་གང་ལེགས་འཛིན་ངེས། ཡིན་ན་ཡང་ངའི་གཟི་བརྗེད་དེ་གྲོང་གསེབ་ཀྱི་སློབ་གླིང་ཙམ་ལས་གནས་མ་ཐུབ་ཅིང་། རྫོང་སློབ་ཆུང་དང་པོར་ཞུགས་པ་ནས་ཅུང་མ་འགོར་བར་ང་ནི་ཡིག་རྒྱུགས་གཏོང་སྐབས་སྲོག་སྐྱོབས་མཁན་ཞིག་ལས་སྐྱོབས་རྒྱུ་ཞིག་ཏུ་གྱུར་སོང་། འོན་ཀྱང་རང་ཉིད་ཀྱི་མ་སྐད་དེ་བོད་ཀྱི་སྐད་ཡིག་གི་གྲུབ་འབྲས་རྒྱུན་འཁྱོང་བྱ་ཐུབ་པ་བྱུང་བ་དེ་ནི་སྐྱོ་བའི་སྐབས་ཀྱི་སེམས་གསོ་ལྟ་བུ་ཞིག་ཀྱང་ཡིན།
ཨང་རྩིས་ཀྱི་གྲུབ་འབྲས་ཉིན་བཞིན་ཇེ་ངན་དུ་གྱུར་ཅིང་རིམ་བཞིན་ཨང་རྩིས་ཀྱི་གྲུབ་འབྲས་ནི་དེ་བས་ཀྱང་བཤད་རིན་མེད་པ་ཞིག་ཏུ་གྱུར་སོང་། གློ་བུར་བའི་ལྷུང་བབས་ཆེན་པོའི་དེའི་འབྱུང་རྐྱེན་གཙོ་བོ་ནི་ཨང་རྩིས་དགེ་རྒན་ལ་རགས་ལུས་པ་ཞིག་ཡིན་ཏེ། ང་ཙམ་མ་ཟད་ངེད་ཀྱི་འཛིན་གྲྭའི་སློབ་གྲོགས་མང་པོ་ཞིག་ལའང་ཤུགས་རྐྱེན་ཆེན་པོ་བྱུང་སོང་། ཨང་རྩིས་དགེ་རྒན་དེ་རྒྱ་རིགས་ཤིག་ཡིན་ཞིང་ཆང་རགས་དང་ཐ་མག་ལ་ཧ་ཅང་དགའ། དེའི་རྐྱེན་གྱིས་ཁོའི་སྐྱེས་དམན་དང་བཟའ་འཁོན་བྱེད་པའི་སྣང་ཚུལ་ཡང་ཡང་མཐོང་རྒྱུ་ཡོད། སྐབས་མང་པོར་ར་བཟི་སྟེ་སྐེ་དང་ངོ་གདོང་དམར་རྐྱང་དུ་གྱུར་ནས་འཛིན་གྲྭར་ཡོང་གི་ཡོད་ཅིང་། ཁམས་མི་དྭངས་བའི་སྐབས་ཡིན་ན་ནམ་རྒྱུན་ང་དང་འདྲ་བའི་ཨང་རྩིས་ལ་མི་དགའ་བའི་སློབ་མ་རྣམས་ཀྱི་ལག་པ་དང་འོང་ཤ་གཉིས་ལ་མནར་གཅོད་གཏོང་ངེས་ཡིན།
བཤད་འོས་མིན་གང་ལྟར་ཡང་སློབ་མ་བུ་མོ་རྣམས་ལ་ནམ་ཡང་གུ་ཡངས་དང་དམིགས་བསལ་གྱི་ལྟ་སྟངས་ཤིག་འཛིན་པའི་མ་ཚད་སྐབས་རེར་སློབ་མ་སྐྱེས་འབྲས་ཅུང་མཚར་བ་རྣམས་ལ་འུད་སྒྲོག་རང་བཞིན་གྱི་བསྟོད་ར་གཏོང་བའང་རྒྱུན་ལྡན་ཡིན། ཁོ་ར་བཟི་བའི་སྐབས་མང་ཤོས་ནི་དགུང་མོའི་ཆུ་ཚོད་དྲུག་པ་ནས་བརྒྱད་པའི་བར་གྱི་རང་སྦྱོང་གི་སྐབས་ཡིན་ཞིང་། རང་སྦྱོང་གི་སྐབས་སུ་འཛིན་གྲྭའི་དགེ་རྒན་རྣམས་བདུན་ཕྲག་རེར་རེས་མོས་ཀྱི་སློབ་ཁང་དུ་ངེད་ཚོར་ལྟ་རྟོགས་བྱེད་དུ་ཡོང་གི་ཡོད།
ངའི་མིག་ལམ་ན་ད་དུང་གསལ་ལྷང་ངེར་འཆར་ཐུབ་པ་ཞིག་ནི་ཁོ་ནང་པང་གི་མདུན་དུ་རྐུབ་སྟེགས་ཤིག་ལ་ཟུར་འདུག་བྱས་ཏེ་ཁ་ལ་ཐ་མག་ཅིག་བཟུང་ནས་འདུག་པའི་ཚུགས་ཀ་དེ་ཡིན། དེ་འདྲའི་སྐབས་སུ་གློ་བུར་གློ་བུར་ལ་སློབ་མ་འགའ་རེའི་མིང་ནས་འབོད་པར་བྱེད་ཅིང་། ནག་པང་སྒང་ལ་བྲིས་པའི་ཨང་རྩིས་ཀྱི་དྲི་གཞི་དག་ལ་ལན་སློག་ཏུ་འཇུག སྐབས་རེར་ངེད་ཅག་ལ་བསླབ་མ་མྱོང་བའི་དྲི་བ་རེའང་ཡོང་གི་ཡོད་མོད་དེ་ནི་ཁོང་གིས་བདུད་རྩི་མཆོད་རྒྱུ་མང་དྲགས་པས་མངོན་རྟགས་ཡིན། དེ་ལྟ་ནའང་ལན་སློག་མ་ཐུབ་ཚེ་ལག་པ་དང་འཕོང་འཚོས་ལ་ཉེས་ཆད་གཅོད་ངེས་ཡིན།
ཆེས་བཟོད་དཀའ་བ་ཞིག་ནི། ཡིག་རྒྱུགས་ཀྱི་གྲུབ་འབྲས་དང་ལས་བྱའི་ཐོབ་སྐལ་སོགས་ལ་བརྒྱ་ཆ་བརྒྱ་ངེས་པར་དུ་ལོན་དགོས་པ་ཡིན་ཞིང་། གལ་སྲིད་མ་ལོན་ལ་ཆད་གྲངས་དང་མཉམ་པའི་གྲངས་ཚད་ལག་ངོར་དབྱུག་པས་གཞུ་བ་རེད། དེ་འདྲའི་སྐབས་སུ་ང་དང་ངའི་རིགས་མཐུན་ཚོའི་ལག་ངོ་སྐྲང་ནས་སྨྱུ་གུའང་འཛིན་མི་ཐུབ་པའི་ཚད་དུ་ལྷུང་ངེས་ཡིན།
འདིར་གསལ་བཤད་བྱེད་དགོས་པ་ཞིག་ལ། ང་དང་ངའི་རིགས་མཐུན་ཚོས་རང་ལ་ཉེས་ཆད་གཅོད་བྱེད་ཀྱི་དབྱུག་པ་རང་གིས་གྲ་སྒྲིག་བྱེད་དགོས་ཤིང་། གལ་སྲིད་དབྱུག་པ་ཕྲ་མོ་དང་ཐུང་ཐུང་ལས་གྲ་སྒྲིག་བྱས་མེད་པ་ཡིན་ན་གྲངས་ཀ་ལྔའམ་བཅུ་རེ་སྤར་ནས་ཉེས་ཆད་ལྷག་མ་གཅོད་པ་རེད།
ཟླ་དྲུག་དང་ལོ་འཁོར་ཡིག་ཚད་ཀྱི་གྲུབ་འབྲས་ཁྱབ་བསྒྲག་བྱེད་པའི་དུས་ཚོད་དེ་ནི་འདི་འདྲའི་དུས་ཚོད་ཛ་དྲག་ཆེ་ཤོས་དེ་ཡིན་ཞིང་། སྐབས་དེར་དགེ་རྒན་ཁོས་ཀྱང་གོ་བའི་ལག་ཤུབ་ནག་པོ་ཞིག་གྱོན་ནས་འོང་། དེ་ནི་ཁོང་ལ་ཉམས་མྱོང་ཞིག་བསགས་པའི་རྐྱེན་གྱིས་བྱུང་བ་ཞིག་ཡིན་འདུག་སྟེ། ཁོས་བཤད་པ་ལྟར་ན་སྔོན་མ་འདི་འདྲའི་དུས་སྐབས་ཤིག་ཏུ་སློབ་མ་ཚོའི་ལག་ངོར་འབྲབ་རྒྱུ་མང་དྲགས་པས་ཁོ་རང་གི་ལག་ངོར་ཡང་ཆ་སྒང་བསགས་སྟེ་ཉི་མ་མང་པོའི་རིང་ལས་ཀར་ཤུགས་རྐྱེན་ཆེན་པོ་ཐེབས་མྱོང་ཟེར།
ང་དང་རྐུབ་སྟེགས་གཅིག་ཏུ་སྡོད་མཁན་བུ་མོ་ཞིག་ཡོད་པ་དེ་ཡང་ང་དང་འདྲ་བར་མནར་གཅོད་འདི་མྱང་མཁན་ཞིག་ཡིན་པས་དེའི་ཕྱོགས་ནས་ཉམས་མྱོང་ཡང་གང་འཚམས་ཡོད་པ་སྟེ། ལག་པར་ཉེས་ཆད་བཟད་ཚར་མ་ཐག་ཅ་ངོས་གྲང་མོ་ཞིག་ལག་ངོས་གཉིས་ཀྱི་བར་དུ་བཙིར་ནས་ཅུང་ཙམ་བསྡད་ན་ཟུག་གཟེར་འཇམ་པར་ཕན་ཐོག་ཆེན་པོ་ཡོད། དེར་བརྟེན་ཁོ་མོས་རྒྱུན་དུ་ངས་ཉེས་ཆད་བཟད་ནས་ཡོང་སྐབས་སྨྱུག་སྒམ་(文具盒）གྲྭ་སྒྲིག་བྱས་ནས་ངའི་ལག་བར་དུ་འཇོག་པར་བྱེད།
གཏམ་རྒྱུད་ཐུང་ཐུང་ཞིག་བཤད་ཀྱིན་བཤད་ཀྱིན་གཏམ་རྒྱུད་གཞན་མང་པོ་ཞིག་ཀྱང་དྲན་འོང་གིན་འདུག་མོད། དེ་རིང་ལྷོད་ལ་ཕབས་ནས་བཤད་ཐུབ་ཀྱི་མི་འདུག་པས་ཁོམ་སྐབས་ཤིག་ལ་མུ་མཐུད་ནས་བཤད་ཆོག