ཡིད་ཐང་ཆད།

གྲགས་པ་ནས།
 
ཕྱོགས་རིས་འཐེན་འཁྱེར་རྦ་རླབས་བཞིན་དུ་འཁྱིལ།།
མགོ་བདེ་དྲན་འཁྲུལ་ཐེའུ་རང་བཞིན་དུ་མྱུར།།
ངོ་དགའ་སྤྲེལ་ལད་བྱི་ལའི་རང་གཤིས་ཅན།།
ད་ལྟའི་སྤྱི་ཚོགས་འདི་ལ་ཡིད་ཐང་ཆད།།

རང་མཐོང་ང་རྒྱལ་རི་བོ་ལས་ཀྱང་མཐོ།།
གནས་ལུགས་དྲང་བདེན་ཉིན་མོའི་སྐར་མ་བཞིན།།
ཐོབ་དང་གོ་གནས་མིག་འབྲས་བཞིན་དུ་བསྲུང་།།
ད་ལྟའི་སྲིད་སྐྱོང་འདི་ལ་ཡིད་ཐང་ཆད།།

ཆིག་བསྒྲིལ་གསར་གཏོད་རང་ཁ་རང་གསོ་ཡི།།
རྩ་དོན་གསུམ་པོ་དབྱངས་སུ་གྱེར་ན་ཡང་།།
དོན་གྱི་འབྲས་བུ་ལྷན་འཇགས་ཙམ་ལས་མེད།།
ད་ལྟའི་སྲིད་སྐྱོང་འདི་ལ་ཡིད་ཐང་ཆད།།

དགེ་བཤེས་མ་ལ་ཕྱག་འཁྱེར་བསྩལ་བ་དང་།།
པོ་ཏཱ་ལ་ཡི་གཞུང་ལམ་གསར་བཟོ་གཉིས།།
རང་གི་བྱས་རྗེས་ཕྱོགས་སུ་བཙན་གྱིས་འཐེན།།
ད་ལྟའི་སྲིད་སྐྱོང་འདི་ལ་ཡིད་ཐང་ཆད།།

མདོ་སྨད་གཞིས་བྱེས་གཉིས་ཀྱི་དད་པའི་སྟོབས།།
གཅིག་ཏུ་སྤུངས་པའི་༧སྐུ་ཡི་གྱ་སྟོན་ཡང་།།
བཀའ་ཤག་གསར་པའི་མཛད་རྗེས་ནང་ལ་བགྲངས།།
ད་ལྟའི་སྲིད་སྐྱོང་འདི་ལ་ཡིད་ཐང་ཆད།།

ཨ་རིའི་བུད་མེད་ཅིག་གི་རྩོམ་ཡིག་ནང་།།
སྲིད་སྐྱོང་ཁང་རིན་ཡོང་ཁུངས་མི་གཙང་ཞེས།།
ཅི་ཙམ་བསྒྲགས་ཀྱང་མི་སྨྲའི་བརྟུལ་ཞུགས་འཛིན།།
ད་ལྟའི་སྲིད་སྐྱོང་འདི་ལ་ཡིད་ཐང་ཆད།།

རྒྱལ་བ་དོན་གྱི་བདག་པོ་བཞུགས་བཞིན་དུ།།
ཁོང་གི་སྐུ་པར་མཐོང་གྲོལ་རིན་པོ་ཆེ།།
གནས་སྤོ་བྱེད་པའི་བྱ་སྤྱོད་འདི་མཐོང་དུས།།
ད་ལྟའི་སྲིད་སྐྱོང་འདི་ལ་ཡིད་ཐང་ཆད།།

རྒྱལ་བའི་སྐུ་ཕྱར་བཟློ་བའི་དོལ་ཚོགས་ཀྱིས།།
རྒྱལ་བའི་ཕེབས་ལམ་བཀག་པའི་ངོ་རྒོལ་གྱིས།།
རྒྱལ་བའི་མདུན་དུ་བསླེབས་ཀྱང་སྣང་མེད་བཞག།
ད་ལྟའི་སྲིད་སྐྱོང་འདི་ལ་ཡིད་ཐང་ཆད།།

ཟམ་གདོང་བླ་མའི་ཐུགས་ཀྱི་བཅུད་ཕྱུང་བའི།།
ཤེས་ཡོན་སྲིད་བྱུས་ཉི་མ་ལྟ་བུ་ཡང་།།
གཞི་རྩ་མེད་པ་བྱེ་མའི་འཆང་བུར་བསྒྱུར།།
ད་ལྟའི་སྲིད་སྐྱོང་འདི་ལ་ཡིད་ཐང་ཆད།།

བོད་རྒྱ་འབྲེལ་མོལ་སྐུད་ལམ་ཆད་པ་དང་།།
རྒྱ་བོད་འབྲེལ་མཐུད་མི་སྣ་མེད་པ་བཟོས།།
ཐད་བསྐོས་སྐུ་ཚབ་རྣམས་ཀྱང་རྩ་དགོངས་བཏང་།།
ད་ལྟའི་སྲིད་སྐྱོང་འདི་ལ་ཡིད་ཐང་ཆད།།

མི་རིགས་ལྟ་གྲུབ་སྨྲ་ལ་གན་དྷེ་བཞིན།།
རྒྱལ་ཁམས་ཚད་མས་སྐྱོང་བར་ནེ་རོ་བཞིན།།
སྲིད་སྐྱོང་འོས་མི་སྤེན་ཚེ་མཆོག་ལ་ཡང་།།
ནག་མེད་ཉེས་འཛུགས་བྱས་པས་ཡིད་ཐང་ཆད།།

གཞིས་བྱེས་དད་པའི་སྤུ་ལོང་གཡོ་བ་ཡི།།
དུས་འཁོར་དབང་ཆེན་མར་ཁུ་འདྲ་བོ་ཡང་།།
སྲིད་སྐྱོང་མཆོག་གི་སྲིད་ཀྱིས་མེད་པར་བཏང་།།
ད་ལྟའི་སྲིད་སྐྱོང་འདི་ལ་ཡིད་ཐང་ཆད།།

འཛིན་སྐྱོང་ནང་ཁུལ་མཐུན་པའི་གཏམ་བསྒྲགས་ཏེ།།
འཛམ་གླིང་ཤར་ནུབ་ཉུལ་ནས་ཕྱིར་འཁོར་དུས།།
མཛངས་མ་བདེ་སྐྱིད་ཆོས་དབྱིངས་རྩ་དགོངས་ཞུས།།
ད་ལྟའི་སྲིད་སྐྱོང་འདི་ལ་གད་མོ་འཆོར།།

རང་གི་སྐྱོན་ལ་ཅུང་ཙམ་རག་པ་ན།།
དེ་མི་དགའ་ཁྲོ་བོའི་སྐུར་བཞེངས་ཏེ།།
ཉེན་རྟོག་པ་ལ་རྩིས་སྤྲོད་བྱེད་ངེས་ཞེས།།
འཇིགས་སྐུལ་བྱེད་པ་འདི་ལ་ཡིད་ཐང་ཆད།།

གནས་ལུགས་དྲང་བདེན་ཚངས་པའི་ཐིག་འདེབས་པའི།།
སྲིད་སྐྱོང་འོས་མི་སྤེན་ཚེར་རྒོལ་མཁན་རྣམས།།
བརྙན་དང་འདྲ་གཟུགས་རྫུན་མ་བཟོས་བཟོས་ན།།
ནམ་ཞིག་རྗེས་ངན་གསལ་བའི་རང་མཚང་སྟོན།།

ཨོ་རྒྱན་སྟོབས་རྒྱལ་བསྟན་པ་ཡར་འཕེལ་སོགས།།
སྒེར་གྱི་ན་ཚ་ཞིག་གི་འཁོན་སེམས་ཀྱིས།།
སྤེན་ཚེའི་ཕྱོགས་ལ་སྡང་ཟུག་བྱས་པ་ལས།།
སྲིད་སྐྱོང་མཆོག་ལ་ལྷག་བསམ་བྱས་པ་མིན།།

བོད་དོན་བདེན་མཐའི་ཉི་མ་ཤར་བ་ལ།།
ཡོད་ཚད་བློས་བཏང་བྱས་པའི་བཙོན་ཟུར་བ།།
ད་ལྟ་ཆོལ་ཁའི་ཕྱོགས་སུ་ལངས་པ་ཡང་།།
རྐང་རྗེས་ལག་གསུབ་བྱས་པའི་བྱ་སྤྱོད་རེད།།

བཀྲས་མཐོང་བ་དང་བཀྲ་ཤིས་དབང་འདུས་སོགས།།
ལོ་མང་ཉམས་མྱོང་ཅན་གྱི་སྐྱེས་བུ་དག།
ཟུར་དུ་བཞག་ནས་བློ་སེང་བདམས་ན་ཡང་།།
ད་ལྟ་འགྱོད་པ་སྐྱེས་པའི་དུས་སུ་བསླེབས།།

མདོར་ན་དྲང་པོའི་སྤྱན་དཀྱུས་རིང་བ་ཚོས།།
རང་གི་འོས་དེ་མང་གཙོའི་ཁེ་བཟང་དུ།།
ལོངས་སུ་སྤྱོད་པའི་བློ་མིག་རབ་བགྲད་དེ།།
བསྲེག་བཅད་བརྡར་བའི་མི་བུ་ཚད་ལྡན་འདོམས།།

༢༠༡༦/༣/༡༥ ཉིན།