གཙང་མེ་ལྕེ།
མིག་གི་མ་མཐོང་ཡིད་ཀྱིས་རིག་སྟེ་ཁང་ཆུང་ཕུགས་ཀྱི་ཁ་སྟབས་བྱས།།
མཛའ་མོས་མ་བཤད་འདྲེ་མོས་བསྟན་པས་མཛུབ་མོ་གཉིས་ཀྱིས་ཁྱུག་ཙམ་སྒུལ།།
གླང་ཤ་མ་བཟས་བྱ་ཤས་རྒྱགས་ཏེ་སྦི་རག་མངར་མོའི་རོ་ལ་གཡེང་།།
འདི་ཡང་མི་ལུགས་དངོས་མ་ཞིག་གིས་རྒྱུན་གཏན་འཚོ་བའི་ཟུར་དུ་ཕབ།།
རྣ་ལ་བཤད་པའི་གསང་གཏམ་དེ་ཡིས་ཡིད་ཀྱི་མཚོ་མོ་རབ་ཏུ་སྐྱོམ།།
འདྲེས་པའི་མིག་ཆུ་རྡོག་ཏུ་མ་བཞུར་རྫི་མ་ནག་པོའི་གསེང་ལ་སིམ།།
ཕྲ་བའི་སེམས་འགྱུ་ནན་གྱིས་བཀུག་ཚེཡོད་ཚད་བསམ་བློའི་བཟང་སར་འཁོར།།
འདི་ཡང་མི་ལུགས་དངོས་མ་ཞིག་གིས་རྒྱུན་གཏན་འཚོ་བའི་ཟུར་དུ་ཕབ།།
སྣ་ཡིས་བསྣམས་ཀྱང་ཡིད་ལ་མ་ངེས་སྐྱུར་དྲི་དབང་པོ་གཞན་གྱིས་ཚོར།།
འཛིན་པས་མ་ཟིན་ཡིད་ཀྱི་དུངས་བ་རྒྱང་རིང་ཁོ་མོའི་བརྩེ་བར་འཁྱུད།།
བསྒོམ་པས་མ་གོམས་གསུང་རབ་ཅིག་གི་རྫུན་ཁུངས་སེམས་ཀྱི་ཁོང་དུ་བགད།།
འདི་ཡང་མི་ལུགས་དངོས་མ་ཞིག་གིས་རྒྱུན་གཏན་འཚོ་བའི་ཟུར་དུ་ཕབ།།
ལྕེ་འདིས་མ་ལྡག་ལག་པས་ཕྱིས་པའི་ཀུ་ཤུ་དམར་པོའི་སྙིང་ལ་འཁེན།།
མཛུབ་མོས་མ་འདྲུས་སེན་མོས་མ་བཏབས་སིན་སྒྲ་མལ་ཁྲིའི་དབྱིངས་སུ་གྱེར།།
ཁ་དང་ལྕེ་ཡི་དབར་དབར་དག་ཏུ་གཡའ་ཆུ་འདྲེས་མའི་དྲི་ངན་ཐུལ།།
འདི་ཡང་མི་ལུགས་དངོས་མ་ཞིག་གིས་རྒྱུན་གཏན་འཚོ་བའི་ཟུར་དུ་ཕབ།
ལུས་པོ་གཅུས་པའི་གནས་མལ་དག་ཏུ་སེམས་ཀྱི་འགྱུ་བ་ཇེ་རྒོད་སོང་།།
རིགས་ཤེས་ཟབ་པའི་སྨྱ་གུ་དེ་ཡང་རྒྱུན་གཏན་འཚོ་བའི་ཕྱོགས་སུ་འཁོར།།
སྟོད་ཀྱི་ཆ་རྣམས་་སྨད་ན་གསལ་བའི་མེས་པོའི་ཚེ་སྲོག་རྫུན་གྱིས་བརྐུས།།
འདི་ཡང་མི་ལུགས་དངོས་མ་ཞིག་གིས་རྒྱུན་གཏན་འཚོ་བའི་ཟུར་དུ་ཕབ།།
ཡིད་ལ་མ་དྲན་དྲན་དུ་བཅུག་སོང་སྲང་ལམ་སྒོ་ཁྱིའི་ཟུག་རྔུ་རེད།།
རྟོགས་པར་མ་འཆར་འཆར་དུ་བཅུག་སོང་ནམ་མཁའི་དབྱིངས་ཀྱི་འཇའ་རིས་རེད།།
རྣ་བས་མ་ཚོར་ཚོར་དུ་བཅུག་སོང་གཅམ་པོའི་ཚིག་གི་དབྱངས་རྟ་རེད།།
ཡིད་ལ་མ་དྲན་དྲན་དུ་བཅུག་སོང་མི་ཡི་ཡུལ་གྱི་ངོ་གདོང་རེད།།
༢༠༡༥ ༢ ༢༣ ཉིན་གྱི་དགོང་མོར།
གཙང་མེ་ལྕེ་ལགས་ཀྱིས་བྲིས་པའི་སྙན་རྩོམ་ཧ་ཅང་སྙན་པོ་འདུག་པས། ཐེངས་མ་གཉིས་བཀླགས་ཡིན།
ང་བོད་བོད་ས་ཀ་ཁ་གསུམ། །
ག་ས་ག་རུ་སྐྱེས་ས་གཅིག །
ཁ་བ་གངས་ཅན་པ་་ཡི་ནོར། །
ཀ་ཡེ་བོད་རིགས་ཡོངས་ཀྱིས་སྦྱོངས། །