ཡུལ་གྱར་བའི་གདུང་དབྱངས་ཐུན་ཅིག

ཁང་སྨིན་གྲོལ་རྒྱ་མཚོ།

རྣམ་དཀར་ཕྲེང་བའི་རྐང་ལམ་བརྒྱུད་ནས།།
ངུ་སྐད་ཐོག་མ་བྲག་ཆར་འདེབས་དུས།།
ལྟེ་ཁྲག་དམར་པོ་འཕྱུར་ཐེངས་ཤིག་གིས།།
ཨ་མའི་གདོང་ན་འཛུམ་རིས་བརྐོས་སོང༌།།

ལོ་བརྒྱད་བྱིས་པའི་ན་ཚོད་སྟེང་ནས།།
ཀ་ཁའི་དབྱངས་རྟ་སྐྱོར་བར་ཆས་རུང༌།།
རྣམ་གཡེང་མཛའ་མོའི་བསླུ་བྲིད་འཇམ་པོས།།
མུན་པའི་དོང་དུ་ཤར་མར་འཕངས་བྱུང༌།།

དྲིན་ཅན་མ་ལོའི་བརྩེ་ཞེན་དྲོད་མོས།།
ཆུང་ནས་དབེན་པའི་རི་ལ་བཏང་ཡང༌།།
གཟན་ཤམ་དམར་པོའི་ཕྱི་རྟགས་ཙམ་ལས།།
སེམས་ཁམས་སྟོང་བའི་ཚུལ་འདིས་སྐྱོ་བ།།

བཅུ་དྲུག་ལང་ཚོའི་ནམ་ཟླ་ཞིག་ལ།།
ཡིད་དབང་ནུབ་མཐའི་ཉི་མར་ཕྱོགས་པས།།
ལར་ཞེན་དྭངས་མའི་གོམ་ཁ་བྲེལ་མོ།།
ཧི་མ་ལ་ཡི་རི་ལ་ཤོར་སོང༌།།

གངས་རླུང་འཚུབ་མའི་རྦ་རླབས་ཁྲོད་ནས།།
ཡུལ་གྱར་སྤུན་ཟླའི་རྐང་རྗེས་འཚོལ་དུས།།
བརྩེ་མེད་གྲང་རླུང་དུག་མཚོན་ངར་མས།།
སྤུན་ཟླ་མང་པོའི་ཚེ་སྲོག་ཁྱེར་སོང༌།།

གྲང་ངར་རླུང་བུས་རྒྱབ་ནས་དེད་ཅིང༌།།
དྲག་ཆར་རྒོད་པོས་གདོང་ནས་གཙེས་ཏེ།།
ཀྱག་ཀྱོག་བཞུད་ལམ་སྨུག་པས་ཟོས་ཚེ།།
ཡུལ་གྱར་བུ་ངའི་བགྲོད་ལམ་དོག་པ།།

ཉི་འོད་ནུབ་རིའི་གྲོང་དུ་ཆས་ཤིང༌།།
དུང་ཟླ་སྨག་རུམ་གཤེད་མས་བཟུང་སྟེ།།
སེམས་དང་ལུས་པོ་འདྲེས་པའི་ཕ་མ།།
གང་དུ་སོང་ཀྱང་ཉེ་ཉེ་འདྲ་ཡང༌།།
དྲན་གདུང་མཆི་མ་འཐོར་ཐེངས་རེ་རེས།།
སེམས་པའི་ཟབ་སར་གྲང་ཟུག་རྒྱས་བྱུང༌།།

ལྷན་འཛོམས་གྲོགས་ཀྱི་སྤྲོ་སྐྱིད་ཁྲོད་ནས།།
ཞལ་རས་འཛུམ་པའི་མདངས་ཀྱིས་ཕྱུག་རུང༌།།
ཕྲག་དོག་གདོན་གྱི་གཡོ་འཕྲུལ་རྣོན་པོས།།
སེམས་འདི་སྡུག་གི་ཞིང་སར་བསྐྱལ་སོང༌།།

འདོད་ཡོན་བདུད་ཀྱི་གཡབ་མོས་ཁྲིད་དེ།།
དམ་ཆོས་བསྒྲུབ་པར་ཕྱི་བཤོལ་བྱས་ཀྱང༌།།
ཐོལ་བྱུང་ན་རྒའི་འཐོར་རླུང་ཁྲོད་ནས།།
དགེ་བའི་ལས་ལ་ཞེ་ནས་འཁྲེང་བྱུང༌།།

རིགས་གཟུགས་འབྱོར་བ་ཐང་གི་མེ་ཏོག།
དབྱར་ཟླ་གསུམ་ལ་ཡིད་དུ་འོང་ཡང༌།།
ལང་ཚོའི་འདབ་ཕྲེང་དུས་ཀྱིས་རྒུད་པ།།
སྙིང་རླུང་ལྡང་བའི་རྒྱུ་ལས་མི་འདུག།

སྐུ་དྲག་བཙན་པོའི་སྒོ་འགྲམ་ཞིག་ནས།།
སྙིང་གི་འདུན་པ་དབྱིངས་སུ་གྱེར་དུས།།
སྡང་མིག་དྲག་པོ་འཁྱུག་ཐེངས་ཤིག་གིས།།
རེ་བའི་འདབ་མ་རླུང་ལ་བསྐུར་སོང༌།།

འཇིགས་རུང་མུན་པས་ས་གཞི་མནན་དུས།།
སྡུག་གི་ཁུར་བོ་ཇེ་ལྗིར་བུད་སོང༌།།
ཡུན་རིང་གཤིབ་པའི་གྲོགས་ཀྱི་དྭངས་མ།།
དེ་རིང་ཐོལ་བྱུང་དགྲ་རུ་གྱུར་བས།།
འདི་སྣང་དགྲ་གཉེན་སྒྱུ་མའི་ཕྲེང་བར།།
སྙིང་ཁུང་གཏིང་ནས་ཡིད་ཆེས་བརླགས་སོང༌།།

ལས་དབང་བཙན་པོའི་འཁོར་འགྲོས་ཤིག་གིས།།
ལུས་པོ་གངྒཱའི་གྲོང་དུ་འཚོ་ཡང༌།།
བསླད་མེད་སེམས་ཀྱི་དུངས་ཞེན་རིང་མོ།།
ཡར་ཀླུང་གཙང་པོའི་འགྲམ་དུ་ཆས་སོང༌།།

དེ་ལྟའི་ཡུལ་གྱར་འཚོ་བ་སྐྱུར་མོ།།
ཀུན་རྟོག་ཡིད་ཀྱི་འདབ་རྩེར་འཁྲིལ་བ།།
ཕྱིར་དྲན་རླུང་བུས་སྒུལ་ཐེངས་ཤིག་གིས།།
སྦྲང་ཆར་བཞིན་དུ་དལ་གྱིས་འཐོར་སོང༌།།