དྲི་མེད་ལྷག་བསམ།
ཀ་དག་རྫོགས་ཆེན་མཁན་པོ་ཤྲཱི་ལགས་ལ།།
ཁ་བ་ལྟར་དཀར་ལྷག་བསམ་གླུ་ཆུང་གྱེར་ན།།
ག་ཞའི་གཏམ་དུ་མ་འཛིན་རིག་པའི་དཔའ་བོ།།
ང་ཡི་ཀཱ་ལི་འདི་ལ་ལྗིད་ཚད་ཅིག་ཡོད།།
ཅ་ཅོའི་རྩོད་པ་སྐྱེན་པའི་དྲ་ཐོག་འདི་ན།།
ཆ་ལུགས་འདོད་དགུར་བསྒྱུར་བའི་ཞིག་པོ་མཆིས་མོད།།
ཇ་ལན་ཆུ་འཇལ་མ་བཅོས་གཤིས་སུ་གྲུབ་ལ།།
ཉ་ཟན་ཏིལླི་དོ་ཧ་རྣ་བ་མི་འཇེབས།།
ཏཱ་ལའི་བླ་མ་ཡིན་ཀྱང་བདེན་ཁ་སྟེར་དཀའ།།
ཐ་ཆད་བླུན་པོའི་རང་མཐོང་ཚེར་མའི་མདུང་རྣོ།།
ད་དུས་སྒྱུ་མའི་རྣམ་འགྱུར་འགྱུར་ལྡོག་མྱུར་བས།།
ན་ཆུང་ཟློས་གར་ངོམ་པའི་སྟེགས་བུ་དོག་འདུག །
པ་ཏྲའི་ཆོས་གོས་འོག་ན་སྡིག་རྒན་མང་ཞིང་།།
ཕ་རྒན་རྩིས་མེད་ཡིན་ཀྱང་ལྟ་གདེངས་རྫོགས་ཚུལ།།
བ་ཚྭའི་ཆུ་བཞིན་ཕྱི་ནས་ཐག་གཅོད་དཀའ་ཡང་།།
མ་རབས་འགའ་རེས་ཕྲ་མ་སྔ་བཙན་གཉེར་འདུག །
ཙ་རི་གྲུབ་པའི་གདན་སར་འཇག་སྐྱ་འཁུར་ཞིང།།
ཚ་རོང་སྨྱུགས་མའི་མགོ་བོ་ས་ལ་དུད་པས།།
ཛ་ཡའི་བསྟན་པ་མུ་སྟེགས་གཞུང་ལ་བསྲེ་དུས།།
ཝ་སྐྱེས་མཐར་བྱེད་སེངྒེའི་ང་རོ་སྒྲོགས་རན།།
ཞ་རའི་གཟུགས་ལ་ལྟ་བའི་བྱད་རས་ཡོན་པོ།།
ཟ་མཁས་མི་ཆེན་འགའ་རེའི་ལྟ་གྲུབ་ལགས་པས།།
འ་ཅག་མཁས་གྲུབ་བརྒྱུད་པའི་སེང་ཕྲུག་ངར་མས།།
ཡ་རབས་རྒན་མོའི་བསམ་བཟང་གཏེར་ཏུ་འཇོག་ཆོག །
ར་གཞོབ་དྲི་ལ་སྲེད་པའི་ཚུགས་ཀ་ངོམ་ན།།
ལ་ཐོད་རྣམ་རྒྱལ་ནོར་བུ་ས་ལ་ཟགས་འགྲོ །
ཤ་སྤང་དཀར་ཟས་ཙམ་གྱིས་ཁ་ཕོ་སྒྲོགས་དུས།།
སར་གནས་སེམས་དཔའི་ཕྲིན་ལས་བྱས་པ་དོན་མེད།།
ཧ་ཅང་སྨྲ་འདོད་ཆེ་སྟེ་དུས་ཚོད་དབང་ཆེ།།
ཧ་ལམ་འདི་ཙམ་ཁོངས་སུ་ཐམས་ཅད་ཆུབ་སྙམ།།
ཨ་ཏིའི་མཁན་པོར་སྒྲོ་འདོགས་བྱས་པ་མིན་ཀྱང་།།
ཨ་མཚར་རྩེད་མོའི་གླུ་ཆུང་ཤུགས་ཀྱིས་ཤོར་སོང་།།
ཅེས་པའང་དྲི་མེད་པས་སྨྱོ་གཏམ་མོ། །