༢༠༡༠ལོའི་ཟླ ༣ པའི་ཚེས ༡༢ཉིན་། ཡོ་རོབ་ཀྱི་ལེའི་ཌིན་ཤེཊན་རྒྱལ་ཁབ་ཀྱི་Gaso METER འགྲེམ་སྟོན་ཁང་ཞེས་པར་། གནས་གསར་ཞེས་པའི་སྒྱུ་རྩལ་འགྲེམ་སྟོན་ཞིག་སྤེལ་འགོ་བཙུགས་ཡོད་ཅིང་། འགྲེམ་སྟོན་གྱི་དུས་ཡུན་ནི་བདུན་ཕྲག་དྲུག་ཡིན་འདུག
འགྲེམ་སྟོན་དེ་ནི་སྒྱུ་རྩལ་པ་བཞི་ཡི་རི་མོའི་སྒྱུ་རྩལ་དང་། ཡིག་གཟུགས། འདྲ་པར་། གློག་བརྙན་སོགས་བརྩམས་ཆས་འདྲ་མིན་འདུས་ནས་གྲུབ་པ་ཞིག་རེད། ཁོང་བཞི་པོ་ནི་ཧེལཀ་ ཧེ་སལ་དང་འདུས་བྱུང་ཕུན་ཚོགས་ཚེ་རིང་། ལྗང་བུའམ་ལྕེ་ནག་ཚང་རྡོ་རྗེ་ཚེ་རིང་། ཨན་ཌར་ ཨ་ལེག་ཛན་རྡར་བཅས་ཡིན་ལ། ཁོང་ཚོ་ཚང་མ་སྤྱི་ཟླ ༣ པའི་ཚེས ༡༢ཉིན་གྱི་འགོ་ཚུགས་མཛད་སྒོ་ལ་ཕེབས་ནས་འཇར་མན་གྱི་གཞས་གྲགས་ཅན་བསམ་བློ་ནི་རང་དབང་ཡིན་ཞེས་པ་དེ་བོད་སྐད་ཐོག་མཉམ་གཏོང་གནང་པ་དང་། ལྗང་བུས་སོ་སོའི་སྙན་ངག་ཨ་མདོའི་ཡུལ་སྐད་ཐོག་གྱེར་འདོན་གནང་ཡོད་འདུག
འགོ་ཚུགས་མཛད་སྒོའི་སྐབས་སུ་ཧེལཀ་ཧེ་སལ་གྱིས།“གནས་ནི་ས་ཆ་ཞིག་དང་ས་ཆ་དེར་དད་པའི་རྟེན་འདྲ་མིན་བཞུགས་པ་ལ་གོ་དགོས་ཏེ། འགྲེམ་སྟོན་གྱི་རིང་ལ་ཀུན་གྱིས Gaso METERདེ་བཞིན་གནས་མཇལ་ཞུ་ཡུལ་ཞིག་ལ་ངོས་འཛིན་བྱས་ཆོག”ཅེས་གནས་གསར་གྱི་གོ་དོན་ལ་འགྲེལ་བརྗོད་གནང་པ་རེད།
སྒྱུ་རྩལ་པ་བཞི་བོ་ལས། ཧེལཀ་ཧེ་སལ་དང་འདུས་བྱུང་ཕུན་ཚོགས་ཚེ་རིང་རྣམ་གཉིས་ནི་སྤྱིར་བཏང་གི་བྲིས་རིས་གསར་འབྲི་དང་། དམིགས་བསལ་སྒྲིག་གཤོམ་སྒྱུ་རྩལ་དང་བསྡུས་གཟུགས་སྒྱུ་རྩལ་སྐོར་ལ་ཁྱད་ཆོས་འདོན་གནང་ཐུབ་ཀྱིན་ཡོད་པའི་སྒྱུ་རྩལ་པ་གྲགས་ཅན་གཉིས་ཡིན་ཞིང་། ཉེ་བའི་ལོ་ཤས་རིང་ལ་ཡོ་རོབ་ཀྱི་གྲོང་ཁྱེར་དུ་མར་། ཁོང་གཉིས་ཀྱི་སྒྱུ་རྩལ་བརྩམས་ཆོས་མང་དག་ཅིག་འགྲེམ་སྟོན་གནང་ཞིང་གཟིགས་མཁན་གྱི་དགའ་བསུ་དང་གདེང་འཇོག་མི་དམན་པ་ཐོབ་མྱོང་ཡོད་པ་དང་། ཁོང་གཉིས་ནི་རིག་གནས་བརྗེ་ལེན་གྱི་བྱེད་སྒོ་སྤེལ་གནང་མཁན་གྲགས་ཅན་གཉིས་ཀྱང་ཡིན་འདུག ད་རེས་འགྲེམ་སྟོན་ལ། ཨེལཀ་ནས་དེང་དུས་ཀྱི་མཆོད་གཤོམ་ཞེས་པ། ལྷ་སའི་དད་ལྡན་ཕོ་མོའི་དེང་སང་འཚོ་བའི་གནས་སྟངས་ཤིག་མཚོན་པའི་བརྩམས་ཆོས་ཁ་ཤས་དང་། འདུས་བྱུང་ཕུན་ཚོགས་ཚེ་རིང་གིས་སྨོན་ལམ་ཁང་ཞེས་པའི་སྒྲིག་གཤོམ་བརྩམས་ཆས་ཚན་པ་གཅིག་དང་བསྡུས་གཟུགས་སྒྱུ་རྩལ་བརྩམས་ཆས་བཅུ་གྲངས་ཞིག་གཟིགས་མཁན་ཚོར་སྤྱན་འབུལ་ཞུས་འདུག ཨན་ཌར་ ཨ་ལེག་ཛན་རྡར་ཡིས་་དཀྱིལ་འཁོར་དབྱིབས་ཀྱི་ལྷ་ས་་་ཞེས་པ་ལྷ་ས་གྲོང་ཁྱེར་རྙིང་པའི་ལོ་རྒྱུས་བརྗོད་གཞི་བྱས་ནས། པར་དང་རི་མོ། ཡིག་ཐོག་བཅས་ནས་ལྷ་ས་རྙིང་པ་ཞིག་བསྐྱར་བཞེངས་བྱས། ཁོང་ནི་ཨར་སྐྲུན་རིག་གནས་གནའ་ཤུལ་སྲུང་སྐྱོབ་དང་ཉམ་གསོ་གནང་མཁན་གྱི་རིགས་གཅིག་རྐང་འཛིན་གྱི་མཁས་པ་ཞིག་ཡིན་ཞིང་། ཁོང་གི་སྒྱུ་རྩལ་བརྩམས་ཆོས་འགྲེམ་སྟོན་ལ་ཞུགས་པ་ད་རེས་ཐེངས་དང་པོ་རེད། འགྲེམ་སྟོན་གྱི་ཁོང་གིས་་་ཞེས་པའི་ལེགས་སྦྱར་གསུང་བཤད་ཅིག་ཀྱང་གནང་པ་རེད། གོང་སྨྲས་སྒྱུ་རྩལ་པ་གསུམ་པོ་བཞུགས་ས་འཇར་མན་རྒྱལ་ཁབ་ཡིན་།
ལྗང་བུའམ་ལྕེ་ནག་ཚང་རྡོ་རྗེ་ཚེ་རིང་ནི་། བོད་ཀྱི་རྩོམ་པ་པོ་གྲགས་ཅན་ཞིག་ཡིན་ལ། འདས་པའི་ལོ་དུ་མ་ནས་བཟུང་། ཁོང་གིས་གློག་བརྙན་བཟོ་སྐྲུན་ཐད་ལ་ཡང་ནུས་ཤུགས་འདོན་གྱིན་ཡོད་རེད། ད་རེས་ཁོང་གིས་བརྒྱབ་གནང་ལག་འཁྱེར་ཁ་པར་བརྗོད་གཞིར་བྱས་པའི་འདྲ་པར་བཅུ་གྲངས་ཤིག་འགྲེམ་སྟོན་ལ་ཞུགས་ཡོད་ལ། ཁོང་གིས་བཟོས་གནང་དངོས་བཤུའི་གློག་མཚོ་སྔོན་པོ་ཞེས་པ་གཟིགས་མཁན་དག་ལ་སྤྱན་འབུལ་ཞུ་རྒྱུ་དེ་ཡང་ཐེངས་འདིའ་འགྲེམ་སྟོན་གྱི་ཆ་ཤས་གལ་ཆེན་ཞིག་རེད་འདུག ལྗང་བུའམ་ལྕེ་ནག་ཚང་རྡོ་རྗེ་ཚེ་རིང་ནི་འགྲུལ་བཞུད་ཀྱི་རྣམ་པས་བོད་དང་ཡོ་རོབ་ཀྱི་བར་འཚོ་གཞེས་གནང་བཞིན་ཡོད་རེད།
འགྲེམ་སྟོན་འདི་རྒྱལ་ཁབ་གཞན་ལའང་སྤེལ་ཐུབ་པའི་མཐུན་རྐྱེན་འཚོལ་གྱིན་པའི་སྒང་ཡིན་ཙང་། འགྲེམ་སྟོན་བཀོད་སྒྲིག་གནང་མཁན་གྱིས། ལེའི་ཌིན་ཤེཊན་གྱི་འགྲེམ་སྟོན་ནི་སྤྱི་ཟླ ༤ བའི་ཚེས་༡༧ ཉིན་མཇུག་རྫོགས་འཆར་ཡིན་མོད། འགྲེམ་སྟོན་འདིས་ཕྱི་རྒྱལ་ལའང་གནས་གསར་པ་ཞིག་རྙེད་ཐུབ་པར་ང་ཚོས་རེ་བ་རྒྱག་གིན་ཡོད། ཅེས་འགྲེལ་བརྗོད་གནང་སོང་།།
ལེའི་ཌིན་ཤེཊན་ནི་སུད་སེ་ལན་དང་ཨོ་སི་ཁྲེ་རིའི་བར་ལ་གནས་པའི་རྒྱལ་ཁབ་ཧ་ཅང་ཆུང་ཆུང་ཞིག་ཡིན། རྒྱལ་ཡོངས་ཀྱི་མི་འབོར༣༥༠༠༠ཙམ། ས་ཁྱོན་སྤྱི་ལེ་གྲུ་བཞི་མ་ ༣༥༥ ། ཡུལ་སྐོར་སྤྲོ་འཆམ་དང་། ལག་ཤེས་ཐོན་རྫས། གཏེར་ཁ་སོགས་ཐོན་ཁུངས་ཡག་པོ་ཡོད་པས་དཔལ་འབྱོར་ཡོང་འབབ་ཤིན་ཏུ་བཟང་། སློབ་གསོ་དང་ཕྱི་འབྲེལ་གྱི་ལས་དོན་མང་ཆེ་བ་སུད་སེ་ལན་རྒྱལ་ཁབ་ལ་ལས་བཅོལ་བྱས་ཡོད་། །
འདྲ་པར་མཁོ་འདོན ལྗང་བུ
རྩོམ་ཡིག ཕྱོགས་སྒྲིག