སྐྱོ་བྲག་དགའ་དབང་།
རྗེ་བཙུན་མི་ལ་རས་པ་ལ་བླ་མ་མར་པ་ལོ་ཙཱ་བས། བལ་ཡུལ་གྱི་ཡོལ་མོ་གངས་ར་མདོ་ཕལ་པོ་ཆེ་ནས་ལུང་བསྟན་པའི་གནས་ཡིན་པས་དེ་ལ་སྒོམས། ཞེས་བཀའ་བསྩལ་པ་བཞིན། རྗེ་བཙུན་མི་ལ་རས་པའང་བླ་མའི་བཀའ་བསྒྲུབ་ཕྱིར་ཡོལ་མོ་གངས་ར་ལ་བྱོན་པའི་ཚུལ་ནི། རྒྱལ་ཐང་པ་བདེ་ཆེན་རྡོ་རྗེའི་མི་ལའི་རྣམ་ཐར་ལས། རྗེ་བཙུན་གྱི་རྒྱལ་པོ་མིད་ལ་རས་པ་ཅེས་པ་དེ་ཉིད་ཀྱིས། མོན་གྱི་གནས་སེངྒེ་གླིང་གི་ནགས་ལ་སྒོམ་དུ་བྱོན་ནོ། །དེ་ལྟ་བུའི་གནས་དེ་ཤིང་རྩི་ནགས་ཚལ་ཤིན་དུ་སྟུག་པ། མེ་ཏོག་མང་པོ་སྐྱེས་པ། སྤྲ་དང་སྤྲེའུ་མང་པོ་གནས་པ། མི་དང་སྐྱེ་བོའི་ཚོགས་ཀྱིས་དབེན་པ། གཞི་བདག་དང་ལྷ་འདྲེའི་ཚོགས་ཀུན། ཤིན་དུ་གཉན་པའི་གནས་དེར་གདན་ཕེབས། དེེའི་ཤིང་སྡོང་ཆེན་པོ་གཅིག་གི་རྩ་ན།བུག་པ་མི་གཉིས་ཙམ་ཤོང་བ་གཅིག་འདུག་པའི་ནང་དུ་བཞུགས་ཏེ། ཉིན་མཚན་མེད་པར་ས་དེ་ནས་སྐད་ཅིག་ཀྱང་མ་གཡོས་པར་མཉམ་པར་གཞག་སྟེ་སྒོམས་སོ། །དེ་ལྟར་བཞུགས་པའི་དུས་ན་ཡང་། ཁམ་གྱི་ཟས་ཤིང་ཏོག་རེ་ཙམ་མིན་པ་གསོལ་རྒྱུ་མེད་དང་། ཏིང་ངེ་འཛིན་ཁོ་ན་ཟས་སུ་གསོལ་བས། ཡོན་ཏན་གྱི་མངོན་རྟགས་དེར་ཡང་ཆེར་འཁྲུངས་སོ། །ཞེས་གསུངས་པ་དག་ཡིན་ཅིང་།
ཡོལ་མོའི་ཡུལ་བཀོད་རྒྱས་པ་མི་ལ་རས་པའི་མགུར་འབུམ་དུ།མོན་ཡུལ་ཤིང་རི་བདེ་བའི་ཁར། །སྤང་རི་མེ་ཏོག་བཀྲ་བའི་ཡུལ། །ལྗོན་ཤིང་གར་སྟབས་བྱེད་པའི་གསེབ། །སྤྲ་སྤྲེའུས་རྩེད་མོ་རྩེ་བའི་ས། །བྱ་སྐད་སྣ་ཚོགས་སྒྲོག་པའི་གནས། །བུང་བ་ལང་ལིང་འཕུར་བའི་ས། །ཉིན་མཚན་མེད་པའི་འཇའ་རིས་འཁྱུག །དབྱར་དགུན་མེད་པར་སྦྲང་ཆར་འབབ། །སྟོན་དཔྱིད་མེད་པར་ན་བུན་འཁྲིགས། །ཞེས་དང་། ཡོལ་མོ་སྟག་ཕུག་སེང་གེ་རྫོང་། །སྟག་མོའི་ངར་སྐད་སྐྱི་ཤ་ཚ། །དེས་དབང་མེད་སྐུ་མཚམས་དམ་དུ་བཅུག །སྟག་ཕྲུག་གི་རྩེད་འཕྱོ་སྙིང་རྗེ་སྐྱེ། །དེས་དབང་མེད་དུ་བྱང་སེམས་བསྒོམ་དུ་བཅུག །སྤྲེའུའི་ཙི་སྒྲ་ཞེ་ལ་བཅགས། །དེས་དབང་མེད་དུ་སྐྱོ་ཤས་སྐྱེ་རུ་བཅུག །སྤྲེལ་ཕྲུག་གི་ཀི་སྒྲ་དགོད་སྙིང་འདོད། །དེས་དབང་མེད་དུ་སེམས་བསྐྱེད་བསྒོམ་དུ་བཅུག །ཁུ་བྱུག་གི་ངག་སྙན་ཡིད་རྩ་སྐྱོ། །དེས་དབང་མེད་དུ་མཆི་མ་འཆོར་དུ་བཅུག །ཅོ་གའི་འགྱུར་སྐད་རྣ་བར་སྙན། །དེས་དབང་མེད་དུ་སྣང་བ་སྐྱིད་དུ་བཅུག །བྱ་རོག་གི་སྒྲ་སྐད་སྣ་ཚོགས་པ། །རྣལ་འབྱོར་འདུག་གྲོགས་སེམས་ལ་ཕན། །གནས་འདི་འདྲར་བསྡད་ན་ངང་གིས་སྐྱིད། །གྲོགས་གཅིག་ཀྱང་མེད་ན་དེ་བས་སྐྱིད། །ཅེས་གསལ་བ་དག་ནི་མི་ལའི་སྒྲུབ་གནས་སྟག་ཕུག་སེང་གེ་རྫོང་།ཞྭ་དམར་ཆོས་ཀྱི་དབང་ཕྱུག་གི་བལ་ཡུལ་ལམ་ཡིག་ནོར་བུའི་འཕྲེང་བ་ལས། དེའི་ཕྱི་ཉིན་སྔ་དྲོའི་ཁ་ཟས་སྤྱད་ནས་རིམ་གྱིས་འོངས་ཏེ། རྗེ་བཙུན་མི་ལ་རས་ཆེན་ལ་མངའ་བདག་མར་པས་ལུང་བསྟན་པའི་གནས་སྟག་ཕུག་སེངྒེ་རྫོང་ཞེས་གྲགས་པ། སྔར་སྟག་གི་ཚང་ཡིན་པས་དེ་སྐད་དུ་བརྗོད་པ་ཉེ་སྐོར་ན་རྗེ་མི་ལ་ལ་སྟག་གིས་བསྐོར་བ་བྱས་པའི་སར་མི་ལའི་ཞབས་རྗེས་དང་།སྟག་གི་རྗེས་ཡོད་པའི་སྒྲུབ་གནས་དེར་སླེབས་ཏེ་རྨི་ལམ་ཀ་བཞི་མའི་མགུར་དང་ཕྱག་མཆོད་སྨོན་ལམ་བགྱིས་ཤིང་དེ་ནུབ་དེར་གནས་སོ། །སང་ཉིན་དེ་ནས་རིམ་གྱིས་སོང་སྟེ།ཕ་བོང་གི་སྟེང་དུ་རྗེ་མི་ལའི་ཞབས་རྗེས་དང་སྟག་གི་རྗེས་སོགས་ཡོད་པའི་ཚན་གཉིས་མཇལ་ཏེ་ནགས་ཐང་ཞེས་བྱ་བ་ཞིག་ཏུ་གནས་སོ། །ཞེས་སྔགས་འཆང་ཤཀྱཱ་བཟང་པོའི་གདན་ས་ཙུ་ཊི་དགོན་ནས་མར་ཡོང་བའི་ས་ལ་ཡོད་པར་གསལ་བ་བཞིན།ཇོ་མོ་གཡང་རིའི་ནུབ་ཀྱི་རི་འདབས་གཙང་འགྲམ་ན་ཡོད་པས་ཡིན་གྱི་ཡོལ་མོའི་རི་སྟོད་རྣམས་ནི་དགུན་དུས་ཁ་བ་ཆགས་པའི་གྲང་མོ་རེད།
མི་ལ་རས་པ་ཡོལ་མོ་ལ་བཞུགས་པའི་རིང་། མོན་ཡུལ་གྱི་བནྡེ་གཞོན་ནུ་མ་ལྔ་ཙམ་ཆོས་ཞུར་བྱུང་བ་རྣམས་ལ། དབང་དང་གདམས་ངག་གནང་ནས་སྒོམ་དུ་བཅུག་པས་ཉམས་རྟོགས་བཟང་པོ་སྐྱེས་པ་ལ་རྗེ་བཙུན་ཐུགས་མཉེས་པར་མགུར་འབུམ་དུ་གསལ་བ་དང་།རྒྱལ་ཐང་པའི་མི་ལའི་རྣམ་ཐར་དུ་སྙ་ནམ་པའི་ཡོན་བདག་ཕོ་མོ་རྣམས་ཀྱིས་གྲོས་བྱས་ཏེ། མི་གཉིས་རྗེ་བཙུན་གདན་འདྲེན་དུ་བཏང་། ཡུན་རིང་པོའི་བར་དུ་མ་རྙེད། རྗེས་སུ་རྗེ་བཙུན་ཉིད་ཤིང་སྡོང་ཅིག་གི་འགྲམ་ན་བཞུགས་པ་དང་མཇལ། ཕྱག་འཚལ་སྙུན་ཞུས་ནས། བུ་སློབ་རྣམས་ཀྱིས་བདག་ཅག་གཉིས་སྤྱན་འདྲེན་དུ་བཏང་པ་ལགས་པས་ཅིས་ཀྱང་གཤེགས་པར་ཞུ་ཅེས་ཞུས་ན་ཡང་།རྗེ་བཙུན་གྱི་ཞལ་ནས། ང་ཁྱེད་ཀྱི་ཕྱིར་ནས་མི་འགྲོ་གསུང་ནས་མ་བྱོན།ཁོ་པ་གཉིས་ལོག་ཡོངས་པས། ཡུལ་པའི་ཡོན་བདག་ཕོ་མོ་ཐམས་ཅད་ངུད་མོ་འདོན་ཅིང་འདུག་པར་གསལ་བ་དག་གིས་རྗེ་བཙུན་ཡོལ་མོ་ལ་ལོ་ཤས་རིང་བཞུགས་ཡོད་པ་ནི་ཤེས་ཐུབ་པ་ཡིན།
ཕྱིས་ནི་ཡོལ་མོ་ལ་མི་ཚོགས་མང་དུ་སོང་བས་རྣམ་ཐར་རྣམས་སུ་གསལ་བའི་སྤྲ་དང་སྤྲེའུ་ནི་མཚམས་ལན་རེ་ཙམ་ཡོང་གི་ཡོད་ལ། སྟག་ནི་ཡོད་སྲིད་པ་རེད་ཟེར་བ་ཙམ་དུ་གྱུར་གདའ། རྒྱལ་ཐང་པའི་མི་ལའི་རྣམ་ཐར་དུ་གསལ་བའི་ཤིང་སྡོང་ཆེན་པོ་ལ་ནི་ཕོ་འདོམ་གསུམ་གྱིས་ཆིངས་པ་ཞིག་ཡོད་ཅིང་། དེ་ནི་ལོ་འགའི་ཡར་སྔོན་དུ་བསྐམས་ཟིན་པ་ཡུལ་པས་བཅད་པའི་རྩ་བ་སྐམ་པོ་དང་བྲག་རྡོའི་འོག་གི་ལམ་ཟུར་ན་སྡོང་དུམ་གཉིས་ཙམ་མཐོང་དུ་གདའ་ལ། བུག་པ་མི་གཉིས་ཙམ་ཤོང་བ་ཡང་བཟོ་བཅོས་ཀྱིས་ཅུང་ཟད་ཆེ་རུ་བཏང་ཤག །
སྒྲུབ་ཕུག་གི་ནང་དུ་མི་ལ་རས་པའི་རྡོ་སྐུ་ལག་ཁྲུ་གང་པ་ཞིག་འདུག་པ་ནི། ཐོག་མར་ལུག་རྫི་ཞིག་གིས་རྩྭ་གསེང་ནས་རྙེད་པ་སྒྲུབ་ཕུག་ཏུ་ཉར།བར་ལམ་ཞིག་ཏུ་སྒྲུབ་གནས་ཉེ་སྐོར་གྱི་ཡུལ་ཚོ་རྣམས་ལ་ཆོས་ཁྲིམས་པ་བཞི་ཡོད་པའི་ཡ་གྱལ་གྱ་པ་ཞེས་པའི་ཁྱིམ་རྒྱུད་སྒྲུབ་ཕུག་གི་ཐོག་འབུར་དིལ་གྲོང་ཚོར་ཡོད་པ་དེས་སྒེར་ཉར་བྱས་པ་ན། ན་ཚ་རྐྱེན་ཆག་ཀྱང་བྱུང་ཞིང་། ཡུལ་པས་ཀྱང་རྙོག་སྒྲ་བཤད་པས་སླར་སྒྲུབ་ཕུག་ཏུ་བཞག་པ། དབང་ཐང་ཞེས་པའི་གྲོང་མི་ཞིག་གིས་ཕྱི་འདྲེ་ནང་བཙོང་བྱས་ཏེ། ཡོལ་མོའི་ཕར་ཚུར་གྱི་མྱི་འགའ་མཉམ་རུབ་ཀྱིས་བརྐུས་པ་དཀའ་ཚེགས་ཆེན་པོས་བལ་པོའི་རྒྱལ་ས་ཡམ་བུ་ལ་ཁུར་ཐུབ་ཙམ་བྱུང་སྟེ་དབྱངས་ཅན་ཟེར་བའི་བུད་མེད་ཅིག་གི་ནང་དུ་སྦས། བུད་མེད་དེ་གཤིན་ཆོག་ཅིག་ཏུ་འགྲོ་བ་ན་ཆང་གིས་ར་བཟི་སྟེ་རྡོ་སྐུ་ཁང་པ་ལ་ཡོད་པ་ཁ་ནས་ཤོར། བལ་ཡུལ་གཞུང་གི་ཉེན་རྟོག་པས་བླངས་པ་རིམ་སྤྲོད་ཀྱིས་ཐ་མ་སྒྲུབ་ཕུག་ཏུ་སླེབ་པའི་བར་ཟླ་བ་དྲུག་འགོར་བའི་རིང་།ཡོལ་མོར་ཆར་པ་འབབ་རོགས་མ་བྱས་པ་དང་། རྡོ་སྐུ་སླེབ་མ་ཐག་ཆར་ཆེན་བབས་པ་དང་། རྐུ་མ་འབྲེལ་ཡོད་དང་བཅས་པ་ཕལ་མོ་ཆེ་སྔ་རྗེས་སུ་ན་ཤི་བྱུང་བ་སོགས་ཀྱི་ངོ་མཚར་བཤད་ཅིང་། ཡུལ་མི་ཚོས་རང་བྱུང་རྡོ་སྐུ་རིན་བྲལ་གྱི་ནོར་བུར་བརྩིས་ཏེ་སྐུ་སྨད་ཨར་འདམ་གྱི་ནང་དུ་སྦྱར་ནས་ཉར་གདའ།
སྒྲུབ་ཕུག་གི་མདུན་ཕྱོགས་ལ་ཡུལ་པའི་ལྷ་ཁང་རྡོ་བརྩེགས་ཤིག་ཡོད་པ་ནི། བླ་མ་རྡོ་རྗེ་དང་། ཞང་པ་གྲགས་པ་རྡོ་རྗེས་གཙོ་བོར་བྱས་པའི་ཡུལ་པ་དག་གིས་སྒྲུབ་གནས་གཟར་བོའི་འོག་ངོས་སུ་རྡོ་བརྩེགས་ཤིང་སྟེང་ངོས་ནས་ས་ཕབ་སྟེ་བཞེངས་པ་མྱི་ལོ་སུམ་ཅུ་རྩ་གྲངས་འགྲོ་བ་ན་ས་ཡོམ་གྱིས་བཤིག་པ་སླར་ཡང་བཞེང་གིན་གདའ་ལ། སྒྲུབ་ཕུག་གི་རྒྱབ་ལོགས་སུ་བཀའ་བརྒྱུད་པའི་སྒྲུབ་ཁང་སྟག་ཕུག་མཉམ་ཉིད་གླིང་ཞེས་པ་ཞིག་ཡོད་པ་ནི། མཁན་པོ་ཚུལ་ཁྲིམས་རྒྱ་མཚོའི་བཙུན་དགོན་བལ་པོའི་རྒྱ་ས་ཡམ་བུར་ཡོད་པ་ཐེག་མཆོག་གླིང་གིས་བཞེངས་ཏེ་མྱི་ལོ་ཉེར་ལྔ་ཙམ་འགྲོ་བ་ན་ས་ཡོམ་གྱིས་བཤིག་པ་སླར་ཡང་བཞེང་གིན་གདའ།
ཁོ་བོ་ཡོལ་མོའི་སྟག་ཕུག་སེང་གེ་རྫོང་གི་མཇལ་སྐོར་ལ་ཐོག་མར་སླེབ་པ་ནི། བོད་རབ་བྱུང་བཅུ་བདུན་པའི་ས་བྱི་ལོའི་དཔྱིད་ཀ་ལ་རེད།སྐབས་དེར་ནི་མཁན་པོ་དཔའ་བརྟན་དང་། རྩིས་ཆེ་ལེགས་མཐོང་།ཀ་པུ་ལི་སྟེ་ངེད་བཞི་ཡོད། ཞག་མ་གཉིས་གསུམ་ཞིག་སྒྲུབ་ཕུག་ནང་དུ་ཉལ་སྐལ་བྱུང་ཞིང་། ལྷ་ཁང་དང་སྒྲུབ་ཁང་དག་ཁྲ་ཕུང་ངེ་མཇལ་དུ་གདའ། བར་པར་སླེབ་པ་ནི་མེ་བྱ་ལོའི་སྟོན་ཀ་ལ་རེད། སྐབས་དེར་ཡང་མཁན་པོ་དཔའ་བརྟན་དང་།བསོད་ནམས་ཆོས་དབྱིངས། འཇམ་དབྱངས་དོན་གྲུབ། ཀོ་ཀོ་ཏཱ་ར་སྟེ་ངེད་ལྔ་ཞག་མ་བཞི་ལྔ་ཞིག་ལ་བསྡད་པ་ཡིན། ལྷ་ཁང་དང་སྒྲུབ་ཁང་ཚང་མ་ས་ཡོམ་གྱིས་བཤིག་པས་དྲི་ཟའི་གྲོང་ཁྱེར་དུ་སླེབ་པ་འདྲ་བོར་ཡོད་ནའང་སྒྲུབ་ཕུག་ལ་ནི་སྐྱོན་ཆག་ཅི་གང་བྱུང་མི་གདའ། འཇིག་བྱེད་ས་ཡོམ་ནི་ཤིང་ལུག་ལོའི་དཔྱིད་ཀ་བལ་ཡུལ་ཕྱོགས་ལ་ཤུགས་ཚད་ཆེས་ཆེ་བ་ཞིག་བྱུང་བ་དེ་ཀ་ལགས་ཤིང། ཐ་མར་སླེབ་པ་ནི་ས་ཁྱི་ལོའི་དགུན་ཁ་ལ་རེད། འདི་སྐབས་ནི་ང་རང་གཅིག་པུ་ཡིན། སྒྲུབ་ཕུག་ནང་དུ་ཉིན་གྲངས་སོ་བརྒྱད་རིང་སྒོམ་ཐུན་ལ་ཞུགས་པའི་གོ་སྐབས་ཐོབ་ཅིང་།ལྷ་ཁང་དང་སྒྲུབ་ཁང་བསྐྱར་བཞེང་གི་ལས་ཀ་ནི་གྲོག་མའི་ཚང་སྒོ་ལ་སླེབ་པ་འདྲ་བོ་རེད། སྔ་རྗེས་གང་གི་སྐབས་ཡིན་ནའང་གཙོ་བོ་བཀའ་བརྒྱུད་གོང་མ་རྣམས་ཀྱི་རྣམ་ཐར་བཞིན་སེམས་ངོ་སྐྱོང་བ་ལ་འབད་པའི་ཁུལ་བྱས་པ་སྟེ་ལུས་སེམས་ཞི་བར་གནས་པ་འབའ་ཞིག་ཏུ་བྱུང་ངོ་།།
སྒྲུབ་གནས་འདི་ཉིད་བཀའ་ཤིན་ཏུ་གཉན་པས་བཀའ་བརྒྱུད་དང་རྙིང་མའི་ཆོས་བརྒྱུད་འཛིན་པ་དག་ལས་གཞན་པའི་ཆོས་ལུགས་གྲུབ་མཐའ་སུའི་བླ་གྲྭ་མཚམས་སྒྲུབ་བྱེད་དུ་ཡོང་ན་ཡང་། ཆེ་སྟེ་ཤི་བ་དང་། འབྲིང་སྟེ་སྨྱོ་བ་དང་། ཆུང་སྟེ་ཆོ་འཕྲུལ་བྱུང་བས་འདུག་མ་བཅུག་པའི་ལོ་རྒྱུས་ནི་རབས་དང་རིམ་པ་མང་པོ་ཞིག་ཡུལ་མི་དག་ལ་བཤད་དུ་གདའ་འོ། །
་་་་་་་་་་་་་ ཞི་བདག་དང་ལྷ་འདྲེའི་ཚོགས་ཀུན། ཤིན་དུ་གཉན་པའི་གནས་དེར་གདན་ཕེབས། ་་་་་་་་་་
ཞེས་དང་།
་་་་་་་་་ སྔར་སྟག་གི་ཚང་ཡིན་པས་དེ་སྐད་དུ་བརྗོད་པ་ཉེ་སྐོར་ན་རྗེ་མི་ལ་ལ་སྟག་གིས་བསྐོར་བ་བྱས་པའི་སར་མི་ལའི་ཞབས་རྗེས་དང་།སྟག་གི་རྗེས་ཡོད་པའི་སྒྲུབ་གནས་དེར་སླེབས་ཏེ་རྨི་ལམ་ཀ་བཞི་མའི་མགུར་དང་ཕྱག་མཆོད་སྨོན་ལམ་བགྱིས་ཤིང་དེ་ནུབ་དེར་གནས་སོ། ་་་་་་་་་་་
ཞེས་དང་།
་་་་་་་་་་་ སྒྲུབ་གནས་འདི་ཉིད་བཀའ་ཤིན་ཏུ་གཉན་པས་བཀའ་བརྒྱུད་དང་རྙིང་མའི་ཆོས་བརྒྱུད་འཛིན་པ་དག་ལས་གཞན་པའི་ཆོས་ལུགས་གྲུབ་མཐའ་སུའི་བླ་གྲྭ་མཚམས་སྒྲུབ་བྱེད་དུ་ཡོང་ན་ཡང་། ཆེ་སྟེ་ཤི་བ་དང་། འབྲིང་སྟེ་སྨྱོ་བ་དང་། ཆུང་སྟེ་ཆོ་འཕྲུལ་བྱུང་བས་འདུག་མ་བཅུག་པའི་ལོ་རྒྱུས་ནི་རབས་དང་རིམ་པ་མང་པོ་ཞིག་ཡུལ་མི་དག་ལ་བཤད་དུ་གདའ་འོ། ། ་་་་་་་་་་
་
འདི་གསུམ་ག་ཡིད་ཆེས་པའི་གནས་སུ་ཅང་མི་མཐོང་ངོ་།།
དཔྱད་པ་ཕལ་ཆེ་བ་ལེགས། རྗེས་སུ་ཡི་རང་ངོ་། འོན་ཀྱང་། འོན་ཀྱང་། སྟག་ཕུག་སེངྒེ་རྫོང་གི་བདག་པོ་སུ་ཡིན་རྩོད་པ་ཀུན་ཕན་གྱི་ལམ་དུ་འཇུག་པའི་སྐུལ་མ་གནང་རོགས། ཨ་མ་གཡང་རིའི་རྩེར་ལྷ་ཁང་བཞེངས་དགོས་པ་གུ་རུ་པདྨའི་ལུང་བསྟན། རྩོད་མེད་གྱི་གཏེར་ཆེན་རིག་འཛིན་རྒོད་ལྡེམ་པའི་ལུང་བསྟན་ཡོད། བལ་བོད་ཀྱི་ཕན་བདེ་དང་མཐོང་ཚད་ཀྱི་སྐྱེ་ཐར་བའི་ལམ་དུ་འཇུག་པའི་དགོས་པ་ཡོད་པར་གསུངས། བར་ཆད་ཡོད་པ་ནི་ཀུན་ལ་གྲགས། རི་བོའི་རྩེར་ལྷ་ཁང་ཐེངས་གསུམ་བཞེངས། ཐེངས་གསུམ་འཇིག། དང་པོ་གྲུབ་ཆེན་སུརྱཱ་སེངྷ་དང་། བར་བ་ཡོལ་མོའི་ཡུལ་གྱི་སྐྱབས་མགོན་གཅིག་པུ་བཀའ་རྙིང་བསྟན་པའི་ཤིང་རྟ་༧རྗེ་མགོན་ནང་པ་ཆེན་པོ་ཀརྨ་འཕྲིན་ལས་བདུད་འཇོམས་རེད། ཕྱི་མ་མཁན་པོ་ཞིག་གིས་བཞེངས། ལུང་བསྟན་ལས། དུས་ལན་གཅིག་ལྔ་བརྒྱའི་ཐ་མ་ལ༔སེམས་ཅན་ཚེ་ཐུང་བསྒྲུབ་པའི་ལོང་མེད༔བཤད་གྲྭ་དང་བསྒྲུབ་པའི་དམ་ཆོས་ནུབ་པའི་དུས་སུ༔ལྷ་ཁང་དེ་ཉིད་བརྩིག་པར་འགྱུར་རོ༔ལྷ་ཁང་དེ་དང་པོ་སྲ་ཞིང་བརྟན་པ་བརྩིག༔ཞིག་རལ་དུ་མ་སོང༔མཆོད་པ་མ་ཆག་པ་བྱས༔སྦས་ཡུལ་དེར་སངས་རྒྱས་ཀྱི་བསྟན་པ་དར་ཞིང་རྒྱས་ལ་ཡུན་རིང་དུ་གནས་པར་འབྱུང་ངོ༔ ཞེས་བཀོད་པ་འདི་ལའང་རྗེས་སུ་ཡི་རང་ཞུ།
བཀའ་སྙིང་པའི་ལྷ་ཀླུས། ས་དགེར་བསྟན་པ་དང་། བསྟན་འཛིན་ལ་གནོད་ན། ལྷ་དེའི་ཞབས་འདྲེན་ཡིན་པ་ལས་བསྟོད་བསྔགས་སུ་མི་འགྲོའོ།།
ཧི་མ་ལའི་བྲག་ཕུག་དང་གད་ཕུག་དང་ས་ཕུག་ཐམས་ཅད་གྷུ་རུ་དང་མི་ལའི་སྒྲུབ་ཕུག་དང། གངས་རི་དཀར་པོ་ཐམས་ཅད་ཨུ་རྒྱན་གྱི་པད་ཞྭ། ཆུ་རྡོལ་ཐམས་ཅད་རྡོ་རྗེ་ཕག་མོའི་བ་གའི་ཆུ། མདོར་ན་ཧི་མ་ལའི་གཡའ་རི་གངས་རི་བྲག་རི་མཚོ་དང་བཅས་པ་ཐམས་ཅད་ཁོང་གཉིས་ཀྱི་གནས་རིར་བལྟ་ཚུལ་འདི་ལ་བསམ་འཆར་ཡོད་དམ།
གཞུང་ཕྱི་མོའི་དབུ་མ་པ་སློབ་དཔོན་ཀླུ་སྒྲུབ་ཀྱི་དངོས་སློབ་། སློབ་དཔོན་འཕགས་པ་ལྷ་དང་། གུ་རུ་པདྨ་འབྱུང་གནས་གཉིས་ནི། རྫུས་སྐྱེས་སུ་འདོད་པའི་ལུགས་གཅིག་དང་། ཡང་སློབ་དཔོན་ནི་དགུང་གྲངས་སྟོང་ཕྲག་བཞུགས་པའི་ལུགས་སུ་གང་ཡ་མི་སྲིད་པ་མེད་ཀྱང་། སྐོབ་དཔོན་མངལ་སྐྱེས་སུ་འདོད་ན་ཅི་ཆ་མེད་དོ། །
བལ་ཡུལ་དུ་རྡོ་རྗེ་ཕ་མོའི་བྷ་གའི་ཆུ་ཞིག་ང་རང་གིས་མིག་གསོན་པོ་འདི་ཡིས་མཇལ་ཐུབ་པ་ཅིག་འདུག གཞན་ཡང་གར་ཞར་མཁའ་འགྲོའི་གླིང་ལ་རྒྱལ་བ་རྒོད་ཚང་པས་བཞག་པའི་པུས་མོ་གཉིས་ཀྱི་རྗེས་དང་། ཁོང་རང་གི་ལིངྒའི་རྗེས་ནི་མཇལ་རྒྱུ་འདུག་གདའ།།