—-འབའ་སྲས།
སེམས་ན་སྡུག་ཆེ་ཁོག་ན་མེ་འབར།།
གདོང་ན་འཛུམ་དགོད་རྔུལ་ཆུའི་ཕྲེང་བསྟར།།
སེམས་ཀྱི་སྡུག་བསྔལ་གདོང་གིས་མི་སྟོན།།
འབའ་སྲས་ང་ཡི་ཐུན་མིན་ཁྱད་ཆོས།།
དཔྱིད་ཀྱི་མེ་ཏོག་འཛུམ་མེར་བཞད་དུས།།
སྤྲིན་དཀར་འདབ་མ་མཁའ་ནས་འཕུར་དུས།།
སྙན་ངག་དོན་ལ་ཡོད་ཚད་གཏོང་མཁན།།
འབའ་སྲས་རྒད་པོ་དགོད་སྒྲ་ལྷང་ལྷིང་།།
མཚམས་རེར་མཐོང་ན་ལྐུགས་པར་འདྲ་བ།།
ལན་རེར་ཐུག་ན་གླེན་པ་གླེན་ནག །
གཡང་དཀར་ལུག་གི་བལ་དང་མཚུངས་པའི།།
འབའ་སྲས་གཤིས་རྒྱུད་འཇམ་པོ་བལ་ཡིན།།
རྒད་མོའི་མདུན་ནས་ཉམ་ཆུང་ཉམ་ཆུང་།།
བུ་ཕྲུག་སྔུན་ནས་ཡ་རབས་ཡ་རབས།།
ཕྱི་ལ་ཤོར་ན་མ་རབས་མ་རབས།།
འབའ་སྲས་མི་འདི་དཔྱད་པས་མི་ཁེད།།
ཆབ་དཔལ་རིག་གསུམ་ཐད་ནས་སྡར་མ།།
ཆང་དུ་མཛེས་མ་བཅོམ་པའི་དཔའ་བོ།།
ཇ་ཆང་འཛོམས་ས་ཚང་གི་གཞི་བདག །
འབའ་སྲས་མི་འདིར་གླེང་ན་མི་ཚར།།
སྐྲ་ལ་བལྟས་ན་ལོ་ལོན་རྒད་པོ།།
ལུས་རྩལ་རྩེས་ན་ན་གཞོན་དར་མ།།
བུད་མེད་སྙིང་རྩ་གཅོད་པའི་སྟ་རེ།།
འབའ་སྲས་མྱི་འདི་གྲི་མ་མདུང་ཡིན།།
དགྲ་དགའ་གཉེན་སྡུག་བྱ་བ་མི་བྱེད།།
ཆུང་མ་བུ་ཕྲུག་འགྲམ་ལྕག་མི་སྟེར།།
སྐུ་རླུང་བཞེངས་ན་ཕ་མ་ཡིན་ཡང་།།
སྣ་ཁུང་ནང་ནས་ཧུར་སྒྲ་འབྱིན་ན།།
གཟུགས་པོ་དབྱར་རྩྭ་དགུན་འབུར་འདྲ་བ།།
ཐོད་པ་ཉི་མའི་དཀྱིལ་འཁོར་དང་མཚུངས།།
ལྭ་བ་ཅ་དག་གོན་ནས་སོང་ན།།
གསར་བུ་མང་བོའི་གྲས་ནས་ལྷིང་ཡིན།།
ཝུ་ཆང་འཐུང་ན་ཕོ་བ་ཞབས་མེད།།
ལ་གཞས་བླང་ན་མགྲིན་པ་འགག་མེད།།
སྙན་ངག་བྲིས་ན་མཛུབ་མོ་ཟད་མེད།།
འབའ་སྲས་ལུས་ལ་ལྕགས་ཀྱི་སྲོག་ཡོད།།
མིག་གིས་རྒྱང་བལྟས་རི་བོ་མི་མཐོང་།།
ཐག་ཉེར་ཅེར་ཡང་ཡིག་ནོར་མི་རིག །
ཐག་རིང་ཐག་ཉེ་རིང་ཚད་མེད་པའི།།
འབའ་སྲས་མྱི་འདིར་ཉེ་རིང་ཁྱད་མེད།།
ལ་ལས་འུར་བསྟོད་འབའ་སྲས་མཁས་ཟེར།།
ལ་ལས་དམའ་འབེབས་འབའ་སྲས་བླུན་བརྗོད།།
ཚང་མས་གླེང་དང་མ་གླེང་ཅི་བྱ།།
འབའ་སྲས་ང་རང་ལྐོག་ཏུ་གྱུར་མེད།།
འོ་མ་འཐུང་ན་རྩ་ཁ་དམ་འགྲོ །
ཆང་རག་བཏུང་ན་ལྕེ་གཏིང་ལྷོད་འགྲོ །
ཆང་དང་འོ་མ་བདུད་རྩིར་མཐོང་མཁན།།
འབའ་ཡི་སྲས་པོ་ཁ་སྒང་བསམ་གཏན།།
༢༠༡༧/༠༣/༢༧ རང་ཁྱིམ་ནས་དེ་མ་ཐག