འབའ་སྲས།
རང་གི་ནུས་པ་ཡོན་ཏན་གཞན་ལ་མིན།།
གཞན་ལ་ཚང་བ་ཇི་སྙེད་རང་གི་མིན།།
ཐམས་ཅད་ཆོས་ཉིད་གཅིག་ལ་གནས་སྲིད་ན།།
མཆོག་དམན་གོང་འོག་དབྱེ་བ་མེད་དོ་ལོ།།
ཁྱུང་ཆེན་མཚོ་རུ་འཛུལ་བར་མི་སྲིད་ལ།།
ཉ་ཆེན་མཁའ་རུ་འཕུར་ཡང་མི་ཐུབ་པས།།
ཁྱོད་ཀྱིས་འཇོན་པ་ངས་ཀྱང་བྱེད་དོ་ཞེས།།
གཞན་སྟོབས་ལག་ལེན་རང་ཉིད་གསོད་པའི་གྲི །
གཡག་ལ་རྭ་ཅོ་སྐྱེས་ན་མཛེས་མོད་ཀྱང་།།
མི་ལ་རྭ་གཉིས་སྐྱེས་ན་བདུད་དུ་བརྩི།།
མི་ཡི་ཡན་ལག་མི་ལ་མཛེས་པ་དང་།།
ཟོག་གི་ཡན་ལག་མཛེས་ཀྱང་མི་ལ་མིན།།
དཔའ་བོས་རལ་གྲི་འཕྱར་ན་དགྲ་མགོ་གཅོད།།
སྡར་མས་གྲི་ཆུང་རང་གི་སྙིང་ལ་བསྣུན།།
གཞན་ལྟར་འཇུག་ན་རང་ཡང་གཞན་ལྟར་དགོས།།
རང་གཞན་གཅིག་མཚུངས་བྱེད་པ་ཤིན་ཏུ་བླུན།།
མཁས་པའི་མདུན་དུ་ལེགས་བཤད་གླེགས་བམ་མཐོ།།
བླུན་པོའི་ཁ་ན་རྒྱུན་དུ་ཉོག་གཏམ་མང་།།
མཁས་བླུན་གཉིས་ཀྱི་སྐད་ཆ་གཅིག་ཡིན་ན།།
རྣམ་དཔྱོད་ཤེས་རབ་ཕྱག་དར་ཁྲོད་ཀྱི་རྫས།།
ཕྱུག་པོའི་རུམ་ན་གསེར་དངུལ་རིན་ཆེན་མང་།།
དབུལ་བོའི་མདུན་དུ་སྣོད་ཆོས་སྟོང་བ་མང་།།
ཕྱུག་པོའི་ཉལ་ས་དབུལ་བོར་མི་བདེ་ལ།།
དབུལ་བོའི་ཁ་ཟས་ཕྱུག་པོར་ག་ལ་ཞིམ།།
དེས་ན་རང་ངོ་རང་གིས་ཤེས་པར་མཛོད།།
གཞན་ལུགས་མེ་ལོང་བལྟས་ནས་མདོག་མ་སྟོན།།
རང་ཉིད་མེ་ལོང་རང་གི་སེམས་དེ་བྱོས།།
མེ་ལོང་ལྟ་བྱེད་རང་གི་མིག་གཉིས་བྱོས།།
༠༡/༠༦/༡༤ ཕྱི་དྲོར།
གཅིག་ལ་གཅིག་འགྱན་མེད་པའི་སྤྱི་ཚོགས་ནི།
དུར་སའི་རྡོ་རིང་དག་དང་ཁྱད་ཅི་ཡོད།
ཐམས་ཅད་ཚངས་རྒྱལ་ཡིན་པ་མ་ཤེས་ན།
སངས་རྒྱས་གསུངས་ལ་གུས་པས་ཅི་ཞིག་བྱེད།
རང་བློ་གཞལ་བའི་ཤེས་བ་ཚད་ལྡན་ཞིག།
གནམ་གྱི་འོག་ལ་བཙལ་ཡང་རྙེད་མ་དོ།
གཞན་གྱི་ཤེས་བྱ་རང་གིས་སྦྱངས་བ་ཡིས།།
རང་ནི་གཞན་ལས་ལྷག་པའི་ཤེས་བྱའི་མཛོད།
རང་དང་གཞན་གཉིས་མི་ཡིན་གཅིག་མཚུངས་རེད། །
རང་དང་གཞན་གཉིས་མི་ལུས་གཅིག་མཚུངས་རེད། །
རང་དང་གཞན་གཉིས་མི་རབས་གཅིག་པ་རེད། །
རང་དང་གཞན་གཉིས་འགྲན་ཚད་གཅིག་མཉམ་དགོས། །
རང་ཉིད་རྒུལ་ན་གཞན་གྱི་མཐོང་ཆུང་བྱ།
རང་ཉིད་རྒྱལ་ན་ཀུན་གྱི་རྒྱབ་སྐྱོར་བྱ།
དར་རྒུལ་སྣ་མང་འབྱུང་བའི་མི་ཚེའི་འདིར།
རང་ཉིད་འགྲིགས་ན་སྤྱི་ཚོགས་རྒྱལ་བར་འགྱུར།
རང་ཉིད་རང་རྐང་མགོ་ནས་མ་ལངས་བར།
གཞན་མགོ་སྟ་རེ་གཡུག་པའི་སྲོལ་འདི་ནི།
བོད་པའི་ཀུན་གྱི་རྒྱུད་ན་རང་འཇགས་སུ།
གནའ་ནས་དེང་གི་བར་དུ་སྒྱུར་སྲོལ་མེད།
ཧ་ཧ་ཧ་་་་ད་ཟོག་རྫི་རྒད་ཁོག་དག་གིས་ཁ་ཏ་བསླབ་བྱ་འདྲ་ཞིག་འདུག