སྤོབས་པ་མཐའ་ཡས།
རང་གི་རང་དབང་ནམ་ཡང་མི་འདོར་ཞིང་། །
དེ་བཞིན་གཞན་ལ་འཚེ་བ་མི་བགྱིད་པའི། །
ཆོས་མཐུན་ལས་ཀྱིས་རང་རང་འཚོ་བ་འདི། །
འཇིག་རྟེན་མི་ཡི་རྩ་བའི་དམ་ཚིག་ཡིན། །
རང་དབང་བདེ་བ་སྙིང་ལ་བཅངས་ན་ཡང་། །
སྐྱེས་པའི་ཉིན་ནས་འཆི་བའི་མཐར་ཐུག་བར། །
གཞན་ལ་བསྟུན་ཅིང་གཞན་རྗེས་འབྲངས་འབྲངས་བ། །
བསམ་ན་རང་སེམས་གཞན་གྱི་ཚེ་གཡོག་ཉིད། །
བཙུན་པའི་ངུར་སྨིག་ལྷབ་ལྷུབ་གོས་དང་ཁ་ཆེ་བུ་མོའི་གདོང་གཡོག་འདི། །
གཅིག་གིས་བལྟས་ན་གཅིག་གི་ཆས་འདི་དོན་མེད་ངལ་བའི་ཁུར་ཙམ་སྟེ། །
བྲམ་ཟེ་རལ་བ་ཅན་གྱིས་མཐོང་ན་གཉིས་ཀ་བླུན་པོའི་ཆ་ལུགས་ཙམ། །
སིག་པ་མགོ་དཀྲིས་ཅན་གྱིས་བསམ་ན་གསུམ་པོའི་སྲོལ་དེ་སྐྱོན་ཅན་ཉིད། །
ལུས་དང་སེམས་ལ་ལྷན་ཅིག་སྐྱེས་པའི་ཆགས་སྡང་ཚོར་བའི་བདེ་སྡུག་དང་། །
འབྲེལ་བ་མེད་པའི་སྲོལ་དང་ལུགས་ལ་ཨ་འཐས་ཞེན་པའི་དབང་གྱུར་ཏེ། །
སྲོག་ཆགས་རྒྱལ་པོ་འགྲོ་བ་མི་ཡིས་རང་གཞན་ཕུང་ལ་སྦྱར་བའི་ཚུལ། །
བསམ་ན་ཉམ་ཆུང་དུད་འགྲོའི་རིགས་ལ་དམ་པའི་མིག་དཔེར་འོས་པ་མང་། །
ཚད་དང་གྲངས་ཀྱི་ཕ་མཐའ་མི་དམིགས་པའི། །
ཆོས་དང་སྲིད་ཀྱི་སྲོལ་ལུགས་ཕལ་མོ་ཆེ། །
ཅི་ཙམ་དང་དུ་བླངས་པ་དེ་ཙམ་དུ། །
ཕྱི་ཕྱིར་རང་ཉིད་འཆིངས་བའི་ཞགས་པ་ཉིད། །
ཆད་ལས་བཙན་པོས་བསྐུལ་བའི་རྒྱལ་ཁྲིམས་དང་། །
དམ་ཚིག་གཉན་པོས་བཞག་པའི་ཆོས་ཁྲིམས་གཉིས། །
གུ་ཡངས་ནང་གི་རང་དབང་འཕྲོག་བགྱིད་ན། །
ལྕགས་སྒྲོག་གསེར་སྒྲོག་འཆིངས་བྱེད་མཉམ་པ་ཉིད། །
ལུས་ཀྱི་འདོམས་དང་ལག་པའི་མཛུབ་མོ་གཉིས། །
གཅིག་སྦེད་གཅིག་སྟོན་ངོ་ཚའིསྤང་བླངས་ལུགས། །
དགོས་དང་དགོང་པ་འཆད་དུ་མ་མཆིས་ཀྱང་། །
དོན་མེད་དང་དུ་བླངས་པའི་ཁྲིམས་སྲོལ་ཙམ། །
ངེས་འབྱུང་བློ་ཡི་ལྕགས་ཀྱུས་མ་ཟིན་པའི། །
མི་འདོད་སྡུག་བསྲན་བཙུན་པའི་ཆ་ལུགས་ལ། །
དམ་པའི་བསླབ་སྡོམ་ཞེས་སུ་མིང་བཏགས་པའི། །
ཁྲིམས་གཙང་མི་ཚེ་དེ་ཡང་དེ་རུ་ཟད། །
རང་དབང་གཞན་གྱིས་འཕྲོག་ཅེས་གཤེ་བྱེད་ཀྱང་། །
རང་ལ་དབང་བ་རང་གིས་འགོག་བྱེད་པའི། །
རང་རེའི་ཁྲིམས་སྲོལ་འགལ་འདུའི་ཕུང་པོ་ཅན། །
རང་ངོ་འཕྲོད་ཚེ་བྱིས་པའི་རྩེད་མོ་ཙམ། །
ཆོས་སྲིད་སྲོལ་ལུགས་ཙམ་དང་རྗེས་བསྟུན་པའི། །
རེ་དོགསཁྲིམས་ཀྱི་ཁུར་འདི་ནམ་བོར་བ། །
དེ་ནི་ལྷན་སྐྱེས་ནང་གི་རང་དབང་སྟེ། །
གུ་ཡངས་སེམས་ཀྱི་ངལ་གསོ་ཞེས་ཀྱང་བྱ། །
མི་མངོན་གསང་བ་སྙིང་གི་ཁང་བུ་ན།
མི་འགྱུར་དུང་བའི་སེམས་ཀྱི་གཞོན་ནུ་འདི། །
མི་ཁའི་སྒྲོ་སྐུར་ཙམ་ལ་མི་འཇིགས་པར། །
མི་ཆོས་གཙང་མས་གཅེས་སྐྱོང་བྱེད་པར་ཞུ། །
རྣམ་འབྱེད་བློ་གྲོས་ཆེན་པོའི་ངར་སྐད་ཀྱིས། གངས་ལྗོངས་རིག་པའི་ས་འཛིན་འགེངས་བྱེད་པ༎་ ངེས་དོན་པཎ་ཆེན་ས་སྐྱ་བླ་མས་ཀྱང༌། བདེ་བའི་མཐར་ཐུག་རང་དབང་ཉིད་དུ་གསུངས། །
མི་ཡི་འཚོ་བར་ལྷ་འདྲེའི་འདུ་ཤེས་ཀྱི༎ ལམ་དང་ལུགས་ཀྱི་སྒྲིབ་ཡོལ་ཆེས་མཐུག་པའི། འཛམ་གླིང་རྩེ་ཐོག་ཉི་མའི་འཇིག་རྟེན་འདི། མུན་པའི་ནང་ནས་མུན་པའི་ནང་དུ་བསྐྱོད༎
གནས་ལུགས་ཐམས་ཅད་ཚད་གཞི་གཅིག་གིས་འཇལ༎ མཛེས་སྡུག་མཐའ་དག་ཁ་དོག་གཅིག་ཏུ་བསྒྲུབ༎ གཞན་གྱི་འདོན་འདུན་བདེ་སྣང་སྣ་ཚོགས་ལ། ཐེ་ཇུས་བྱེད་པའི་ལམ་ལུགས་རང་རེར་མང༌༎་
མི་ལ་རས་པ་གཅེར་བུར་རྒྱུ་བ་དང༌།། དགེ་ཆོས་སྨྱོན་པ་འཆལ་བོར་གྱུར་བ་དག། ཚུལ་འཆོས་སྒྲོམ་བུའི་ནང་གི་སྐྱེས་ཆེན་ཚོའི༎ མཛེས་འཛིན་ལྟ་བའི་རྒྱ་ལ་ཤོང་ངམ་ཅི༎
ཕྱི་རུ་ཁྲིམས་སྒྲིག་གོམས་སྲོལ་གོས་ཀྱིས་དམ།།
ནང་དུ་རེ་དྭོགས་དགའ་སྡུག་བཅིངས་པས་མནར།།
ཕྱི་ནང་མཚམས་སུ་འཚོ་གནས་ཁོ་ནར་རྩོད།།
རང་དབང་ཞེས་པའི་ཚིག་འདིའི་དོན་མ་རྟོགས།།
གཞན་དབང་ཞེས་པ་དངོས་ཡོད་འཚོ་བ་སྟེ།།
རང་དབང་ཞེས་པ་འཚོ་བའི་རྨི་ལམ་ཡིན།།
རྨི་ལམ་སྐྱིད་པོ་བཙོན་རའི་ནང་དུ་རྨིས།།
གླུ་ཆུང་སྙན་མོ་གཉིད་ཁུང་ནང་དུ་ལེན།