རང་བཙན་ཐོབ་ཀྱི་མ་རེད་ཟེར་བ་དེ་ལ་འགྲེལ་བཤད་རྒྱག་རྒྱུ་མང་པོ་འདུག རྒྱ་ནག་སྟོབས་ཆེན་པོ་རེད། རྒྱ་ནག་གི་དམག་དང་དཔལ་འབྱོར་ལ་ང་ཚོས་གླགས་འཁེལ་གྱི་མ་རེད། བོད་མི་ཚོ་ཁ་སྟབས་སྐྱོ་པོ་རེད། དུས་རབས་ཉེར་གཅིག་པའི་ནང་ལུང་པ་ལ་ཆབ་སྲིད་རང་བཙན་ཡོད་ནའང་དཔལ་འབྱོར་རང་བཙན་ཡོད་མ་རེད་ཅེས་སོགས་འགྲེལ་བཤད་རྒྱག འོ་ན། སངས་རྒྱས་ཀྱི་གོ་འཕང་ཐོབ་ཐུབ་བམ། ཉོན་མོངས་དུག་གསུམ་སྟོབས་ཆེན་པོ་རེད། ཉོན་མོངས་དུག་གསུམ་ལ་གླགས་འཁེལ་གྱི་མ་རེད། ངའི་བྱང་ཆུབ་ཀྱི་སེམས་ཁ་སྟབས་སྐྱོ་པོ་རེད། དུས་རབས་ཉེར་གཅིག་པའི་ནང་སངས་རྒྱས་ཐོབ་མྱོང་མཁན་ཡོད་པ་མ་རེད། འདི་ལ་ལན་ཡོད་དམ། གུས་རྒད་པོ་དཔལ་འབྱོར་ཚེ་རིང་གིས་ཕུལ།
དེ་ད་ལས་སླ་བོ་རེད།སྤྱོད་འཇུག་ནང་དུ།ཉམས་ཆུང་ཉོན་མོངས་ཤེས་རབ་མིག་གིས་སྤངས།།གསུངས་ཡོད་པ་རེད།དེ་ལ་ཁུ་ནུ་བླ་མ་རིན་པོ་ཆེས་༧གོང་ས་མཆོག་ལ་འགྲེལ་བཤད་བསྐྱོན་སྐབས།ཉོན་མོངས་ཟེར་བ་ཉམས་ཆུང་ཆུང་རེད།རྣམ་དཔྱོད་ཀྱི་བློ་གྲོས་རྒྱས་ཙམ་གྱིས་ཉོན་མོངས་ཀྱི་མགོ་གནོན་ཐུབ་པ་རེད།ཉོན་མོངས་འདུལ་བར་རྡུལ་ཕྲན་མཚོན་ཆ་སོགས་སྟོབས་ཆེན་པོ་མི་དགོས་གསུངས་ཡོད་པ་རེད།ལྷག་པར་ཤེར་ཕྱིན་གྱི་མདོའི་ནང་དུ།སེམས་ལ་སེམས་མ་མཆིས་ཏེ་སེམས་ཀྱི་རང་བཞིན་ནི་འོད་གསལ་བའོ།།ཞེས་གསུངས་ཡོད་པས།ང་ཚོའི་སེམས་ཀྱི་རང་བཞིན་ལྷན་སྐྱེས་ཁོ་རང་ཕར་དེད་ན་སངས་རྒྱས་རེད།འོན་ཀྱང་གློ་བུར་རྣམ་རྟོག་གི་དྲི་མས་བསྒྲིབས་ཙམ་གྱིས་ལན་པ་རེད།དེ་བས་མགོན་པོ་ཀླུ་སྒྲུབ་ཀྱིས།ལས་དང་ཉོན་མོངས་ཟད་པས་ཐར།།ལས་དང་ཉོན་མོངས་རྣམ་རྟོག་ལས།།དེ་དག་སྤྲོས་ལས་སྤྲོས་པ་ནི།།སྟོང་པ་ཉིད་ཀྱིས་འགག་པར་འགྱུར།།སོགས་གསུངས་ཡོད་ཙང་།ཆོས་ཀྱི་གནད་ཤེས་མཁན་ཅིག་ཡིན་ན་དྲིས་བ་དེ་འདྲ་ཡོང་མི་སྲིད་པ་རེད།
ང་ཚོའི་རྒྱུད་ཀྱི་ཉོན་མོངས་དང་ཁམས་བདེ་གཤེགས་སྙིང་པོ་གཉིས་བསྡུར་ན།ཉོན་མོངས་ཟེར་བ་དེ་ཧ་ཅང་ཉམ་ཆུང་དང་སྟོབས་ཆུང་རེད།འོན་ཀྱང་།རྒྱ་ནག་དང་བོད་ཀྱི་གནས་སྟངས་དེ་ལས་ལྡོག་པ་རེད།བོད་ཟེར་བ་དེ་མི་གྲངས་དང་སློབ་སྦྱོང་།ཆིག་སྒྲིལ་དང་མཐུན་རྐྱེན་གང་ཆ་ནས་རྒྱ་དང་བསྡུར་ན་ཧ་ཅང་ཉམ་ཆུང་ཡིན་པ་མངོན་གསལ་དོད་པོ་རེད།སྟབས་ཡག་ནས་རྒྱ་ནག་ནང་འཁྲུག་གིས་འཐོར་བཤིག་འགྲོ་བ་ལྟ་བུ་བྱུང་ན་བོད་ལ་རང་བཙན་གྱི་གོ་སྐབས་མེད་པ་མ་རེད།རེད་དེ།ད་ལྟའི་གནས་བབ་ལ་ལྟོས་ན་དེ་འདྲ་ཧ་ལམ་ཡོང་རྒྱུ་དཀའ་མོ་རེད།ལོ་རྒྱུས་སྟེང་མི་རིགས་གྲངས་ཉུང་ཉམ་ཆུང་མང་པོ་གྲངས་མང་ནང་འཐིམས་ཏེ་ལོ་རེ་ནས་གྲངས་ཉུང་མི་རིགས་མང་པོ་བརླག་འགྲོ་བཞིན་པ་མཐོང་ཆོས་རེད།
ད་ཡར་དྲག་པོས་ལན་སློག་ན་སྒོང་ང་དང་བྲག་གཉིས་རྡུང་ཁ་བརྒྱབས་ཚེ་གང་ལྟར་སྒོང་ང་ལ་གྱོང་རག་རྒྱུ་ཉག་གཅིག་ཡིན་པས།༧གོང་ས་སྐྱབས་མགོན་ཆེན་པོས་གཉིས་སྨན་དང་གྲོལ་མོལ་གྱི་དབུ་ལམ་དེ་བདམས་པ་རེད།དེ་ལས་ལྷག་ཅིག་མེད་པ་རེད།འོན་ཀྱང་ཁ་ཤས་ནས་མ་ཤེས་པ་ཙམ་ཡིན་ན་སྐྱོན་གང་ཡང་མེད་པ་རེད་མོད།ཆེད་དུ་༧གོང་ལ་མི་འཇུ་བ་དང་སྤྱོད་པ་ལོག་འདོད་ཀྱིས་དྲི་བ་དེ་འདྲ་བཏང་ན་སྙིང་པོ་ཅི་མེད་པ་རེད།
རང་བཙན་ཅི་ནས་ཀྱང་དགོས། མི་ཚེ་འདི་ལ་མ་ཐོབ་རུང་ཚེ་རྗེས་མར་ཡིན་ཡང་རྩོད་དགོས་ཟེར་བ་དག་གིས་རྩོད་དགོས་པ་རེད།
སངས་རྒྱས་མ་འཐོབ་པར་དུ་ཚེ་གཅིག་དང་གཉིས། སྐལ་བའི་བར་དུ་སངས་རྒྱས་སྒྲུབ་ནས་ཅི་ནས་ཀྱང་ཐོབ་དགོས་པ་དག་གིས་ཀྱང་དེ་མཚུངས་སངས་རྒྱས་སྒྲུག་དགོས་པ་རེད། ངས་བསམ་ན་དེ་ནི་སྙིང་སྟོབས་ཞིག་ལ་རེག་ལོས་མེད་དམ་སྙམ། བསམ་ཚུལ་བཤད་ཡོད་ལགས།
རིགས་པའི་ལྟ་གྲུབ་རང་གི་ཐོག་ནས་བཤད་ན་དེ་ལྟར་རིགས་འདེད་བཏང་སྟེ་རྩོད་སྒྲུབ་བཤད་ཆོག་ལ་འོས་པ་ཞིག་རེད།
འོན་ཀྱང་དོན་དངོས་དང་ལག་ལེན་རང་གི་ཐོག་ལ་བལྟས་ནས་བཤད་དགོས། ཉོན་མོངས་ཇི་ཙམ་དབང་བཙན་པོ་དང་སྟོབས་ཆེན་པོ་ཡོད་ཀྱང་དེ་མེད་པ་བཟོས་ཏེ་མཐར་ཐུག་གི་དམིགས་ཡུལ་རྣམ་མཁྱེན་འཐོབ་པ་ལ་རྡུལ་ཕྲན་མཚོན་ཆ་མི་དགོས། དམག་མི་མང་པོ་དེ་བས་ཀྱང་ག་ལ་དགོས།
གཙོ་བོ་ཕོ་ཁྱོ་ག་རང་རང་སོ་སོས་འཇོན་པ་ཡིན་ན་འགལ་རྐྱེན་ཉོན་མོངས་འབྲལ་རུང་ངམ་སྤང་རུང་རེད།
རྟོགས་ཚོགས་ཀྱི་ཡོན་ཏན་རང་རྒྱུད་ལ་སྐྱེ་རུང་དང་འབྱུང་རུང་རེད། དེ་ཚོ་ཚང་མ་འགལ་རྐྱེན་དང་བྲལ་ཞིང་མཐུན་རྐྱེན་ཚང་བ་ངེས་པར་ལྟོས་པས་ལྟོས་གྲུབ་འབའ་ཞིག་རེད།
སངས་རྒྱས་པའི་རིག་པའི་གཞུང་ལུགས་ནང་ཕྲ་རགས་ལ་མ་ལྟོས་པར་རྟེན་འབྲེལ་ལྟོས་གྲུབ་ཀྱི་རྣམ་གཞག་རྐྱང་རྐྱང་སྒང་ནས་གྲུབ་མཐའ་རང་རང་གི་གཞི་ལམ་རྣམ་གསུམ་འགྲེལ་བཤད་ཆ་ཚང་ངེ་བ་རེ་ཡོད་པ་འདི་རེད། འདི་ཚོ་ཚང་མ་རིག་པའི་ལྟ་གྲུབ་དང་དངོས་ཡོད་ལག་ལེན་གཉིས་ཀྱི་ཐོག་ནས་བསྒྲུབ་འོས་པ་ཞིག་དང་སྒྲུབ་ཆོག་ཆོག་ཅིག་རེད། །
འོ་ན་ངས་ཁྱེད་ལ་ཅིག་འདྲི། རང་བཙན་ལེན་པ་ལ་སྤྱིར་ན་གོང་ཞུས་ལྟར་རིགས་པའི་ལྟ་གྲུབ་ཀྱི་ཐོག་ནས་རྩོད་སྒྲུབ་བྱེད་ཆོག་ཆོག་ཅིག་རེད་དེ་དོན་དངོས་ལག་ལེན་གྱི་ཐོག་ནས་ཤ་གཟུགས་ཟ་ཆོག་ཆོག་ཅིག་ཡོད་ན་སྟོན་རོགས་གྱིས་དང་ཁོ་བོ་ཡང་རིགས་པ་ཡང་དག་ལ་མོས་མཐུན་དང་དག་པ་སྟེར་མཁན་ཞིག་ཡིན་པའི་ཆ་ནས་ངེས་པ་རྙེད་ན་ཅིས་ཀྱང་འབད་ངེས་ཡིན་ནོ། །
སངས་རྒྱས་ཟེར་བ་ནི་འགྲུབ་ཡ་མེད་པའི་སྟོང་བསམ་ཞིག་ཏུ་འདོད། གལ་སྲིད་འགྲུབ་ཡ་ཡོད་པའི་དབང་དུ་བཏང་ཡང་ནང་གཞུང་ནས་གསུངས་བ་ལྟ་བུ་འདོད་པ་ནི་ཤིན་ཏུ་མ་ངེས་བའིི་དོགས་པའི་གནས་སུ་མཐོང་།
ང་ཚོས་རང་བཙན་རྩོད་ཀྱི་མེད་པར་ག་འདྲ་བྱས་ནས་ཐོབ། དེ་ལ་དྲི་བ་གང་ཡང་དགོས་པ་མ་རེད། ཐོབ་མི་ཐོབ་དེ་རྒྱ་ནག་སྟོབས་ཆེ་ཆུང་གི་མ་རེད། དེ་བོད་ཀྱི་སྙིང་སྟོབས་ལ་རག་ལས་པ་རེད། ད་ལྟ་ང་ཚོ་རང་བཙན་གྱི་ལམ་ཁར་འགྲོ་ཡི་མེད་པར་ག་འདྲ་བྱས་ནས་རང་བཙན་ཐོབ། ང་རང་ཚོའི་ཉོན་མོངས་འདི་སྟོབས་ཆུང་ཆུང་རེད་ཟེར་བ་དེར་གད་མོ་ཞིག་རང་དབང་མེད་པར་ཤོར་སོང་། གལ་ཏེ་ཉོན་མོངས་དེ་སྟོབས་ཆུང་ཆུང་ཞིག་དང་ལས་སླ་བོར་སྤང་ཐུབ་ན། ཅི་ལྟར་ང་ཚོ་སངས་མ་རྒྱས་པ་ཡིན།
ཉིན་སྒོམ་ན་ཉིན་སངས་རྒྱ་དང་མཚན་སྒོམ་ན་མཚན་སངས་རྒྱ་ཟེར་བའི་ཁ་བོ་ཆེ་འདི་དང་། ཉོན་མོངས་ཉམས་ཆུང་ཟེར་བ་འདི་དག་གཅིག་མཚུངས་རེད། །
བོད་པའི་སྤྱི་ཚོགས་ནང་དབུ་མ་དང་རང་བཙན་གྱི་རྩོད་པ་འདི་རིགས་ལམ་རྩོད་པ་ནང་བཞིན་རེད་འདུག ཧ་ཧ་ཧ་ཧ་
སྐད་ཆ་འདི་ཧབ་ཏེ་བལྟས་ན་བདེན་པ་འདྲ་བ་ཞིག་འདུག འོན་ཀྱང་ངས་བལྟས་ན་རང་བཙན་ཐོབ་ཀྱི་མ་རེད་ཟེར་བ་དང་རང་སྲིད་རང་སྐྱོང་ཐོབ་ཀྱི་རེད་ཟེར་གཉིས་ཀ་བསྲེ་དྲག་པའི་སྐྱོན་རེད་འདུག མི་རིགས་ཞིག་གིས་ངོས་ནས་བཤད་ན་འབད་བཙོན་མུ་འཐུད་ནས་བྱས་པས་རང་བཙན་ཅི་ལ་མི་ཐོབ་སྟེ་ངེས་པར་དུ་ཐོབ། འོན་ཀྱང་བོད་པ་ལྟ་བུར་མཚོན་ན་རང་བཙན་ཐབས་རྩོད་བྱེད་མཁན་གྱི་མི་རིགས་འདི་མུ་འཐུད་ནས་རང་བཙན་མ་ཐོབ་བར་གནས་མ་གནས་དེ་བཤད་དཀའ་བ་ཞིག་རེད། བྱས་ཙང་རང་བཙན་ཐོབ་ཀྱི་ཡོད་ནའང་རང་སྲིད་རང་སྐྱོང་རྩོད་དགོས་རྒྱུ་དེ་དེ་འདྲ་རེད་བསམ།
རང་བཙན་དང་སངས་རྒྱས་ཀྱི་གོ་འཕང་གཉིས་དཔེ་མཚོན་བཞག་པ་འདི་ཧོབ་དེ་བལྟས་འདྲ་ཆེ་ཡང་ཞིབ་ཕྲ་བསམ་བློ་བཏང་ན་ཞྭ་དཔེ་ལྷམ་འགེབ་དང་ར་མགོ་ལུག་འབྱར་རང་རེད།སངས་རྒྱས་ཀྱི་གོ་འཕང་ཐོབ་པར་བསྐལ་ཆེན་གྲངས་མེད་གསུམ་གྱི་ཚོགས་བསག་དགོས་རེད།སྐལ་ཆེན་གཅིག་ལའང་འཇིག་རྟེན་དང་།སྐལ་པ།མི་རབས་མང་པོ་ཞིག་འཇིག་འགྲོ་གི་ཡོད།
དེ་བཞིན་ལོ་བཅུ་ཕྲག་འགའ་ཤས་དང་།བརྒྱ་ཕྲག་འགའ་ཤས།སྟོང་ཕྲག་སོགས་ནམ་ཞིག་རང་བཙན་ཐོབ་སྲིད་ཀྱང་དེ་དུས་རང་བཙན་རྩོད་གཞིའི་བོད་མི་རིགས་དང་།དེའི་ངོ་བོ་རིག་གཞུང་།སྐད་ཡིག་བཅས་འཇིག་ཟིན་ཞིང་།དེ་དག་མེད་ན་རང་བཙན་ཡང་རང་བཞིན་གྱིས་དོན་བྱེད་ནུས་མེད་ལྟ་བུ་ཆགས་རྒྱུར་ངེས་པ་རེད།
གོང་གི་རྩོམ་ཡིག་དེེ་ནིན་ཕུགས་བསམ་རིང་ལུགས་པའི་རྨི་ལམ་ཞིག་དང་།ཏོག་ཙམ་སྙན་པ་ཞུས་ན་སྙིང་སྟོབས་ཙམ་པ་པོ་བ་ཞིག་རེད་ཅེས་བརྗོད་མི་ཆོག་མ་རེད།
སངས་རྒྱས་མ་སྒྲུབ་ན་ཐོབ་མི་སྲིད། རང་བཙན་མ་རྩོད་ན་ཐོབ་ཀྱི་མ་རེད། དེས་ན་བོད་པ་ཕལ་མོ་ཆེར་གཉིས་ཀ་མེད་པར་ཆགས་ཚར་འདུག ལན་སོ་སོས་བཏབ་དགོས་པ་ལས་གཞན་དག་མི་འདུག
ང་ཚོས་འབད་བརྩོན་བྱེད་ན་རང་བཙན་ཐོག་ལ་བྱེད་དགོས།
རེ་བ་རྒྱབ་ན་དབུ་མ་ལ་བྱེད་དགོས།
ཡིན་ནའང་། དགྱ་རོ་ཚང་གིས་འདི་གཉིས་ཀའི་གང་ཡང་སྤྲོད་དགོས་མ་རེད།