བཀྲ་ཤིས་ཚེ་རིང་།
ང་ཚོའི་སྤྱི་ཚོགས་ནང་གི་མི་རེ་འགས་རང་གི་ཁེ་ཕན་ཆེད་མི་གཞན་གྱི་མགོར་ཞྭ་མོ་གཡོག་སྲོལ་ཡོད་པ་ནི། སྤྱི་ཚོགས་ཀྱི་ཞི་འཇགས་བརྟན་བརླིང་དང་སྤྱི་ཚོགས་ཀྱི་ནང་ཁུལ་འཆམ་མཐུན་ལ་བསམ་གཟས་གཏོར་བརླག་བཟོ་བཞིན་ཞིག་རེད། མིའི་སྤྱི་ཚོགས་ཀྱི་སྣང་ངོར་མི་རན་པའི་བྱ་སྤྱོད་འདི་བཙན་བྱོལ་སྤྱི་ཚོགས་འདིར་ཧ་ཅང་ཤུགས་ཆེན་པོ་དར་ཡོད་ལ། དུས་ད་ལྟའང་མུ་མཐུད་དེའི་རིགས་དང་དེའི་རྗེས་སུ་འབྲངས་པ་སྐོར་ཞིག་གིས་སྤྱི་ཚོགས་ཀྱི་མི་བུ་རང་ཚིགས་ཅན་ཚོར་བར་ཆད་ཀྱི་ལས་རྩོམ་གིན་ཡོད། འདིའི་རིགས་སེམས་བག་ཡངས་པའི་མི་བུ་དཔྱོད་ཤེས་པ་ཞིག་ཡིན་ན་བལྟས་མ་ཐག་གསལ་བོར་མཐོང་ཐུབ་པས། ཧང་སང་དགོས་པའི་གནད་ཅིག་ཏུ་བརྩི་མི་སྲིད་མོད། སྤྱིར་བཏང་མང་ཚོགས་དཀྱུས་མའི་རིགས་ལ་དོགས་པ་ཐེ་ཚོམ་གྱི་བློ་སེམས་ཁུར་ལ་སྤྲོད་སྲིད་པས་མི་སུ་ཡིན་རང་རང་གི་རྣམ་དཔྱོད་བེད་སྤྱོད་གཏོང་གལ་ཆེན་པོར་མཐོང་སོང་།
ང་རང་བཙན་བྱོལ་སྤྱི་ཚོགས་འདིར་འབྱོར་ནས་ལོ་ངོ་ཅུང་སོང་མེད་ནའང་། བཙན་བྱོལ་གྱི་ཚོགས་པ་ག་གེ་མོའི་ལས་སྣེ་རག་པའི་ལས་བྱེད་པ་ལ་ཤས་ཧ་ལས་པའི་འཁྲབ་སྟངས་ཡ་མཚར་རེ་ཡོད་པ་གོ་མྱོང་། ངས་ཁོ་ཚོའི་སྐད་ཆ་རེ་རེ་ཉན་ཡོང་དུས་སེམས་ངོར་ཙག་ཤེད་རྒྱུགས་པའི་ན་ཟུག་བཤད་མི་ཕོད་ལ། གངས་རིའི་བཤུལ་ལམ་རྐང་ཐང་གིས་གཤེགས་པའི་དཀའ་ཚེགས་རེ་རེའང་འགྱོད་པ་དང་མིག་ཆུ་འཐོར་མྱོང་། སྐབས་རེ་ལྷོད་ལ་བབས་ཏེ་འདང་ཞིག་བརྒྱབས་ན་འདིའི་རིགས་རྩ་མི་ཚང་བའི་ཁྲམ་ཁ་ཤས་ཡིན་པས། ཞེ་རྩ་གཡའ་དག་པའི་ང་ཚོ་བོད་མི་སྤུན་ཟླ་ཚོའི་ནང་ཁུལ་མཐུན་ལམ་ལ་སུས་ཀྱང་སྒུལ་མི་ཚིགས་པའི་ཡིད་ཆེས་རྙེད་འོང་། ང་ཚོ་ཆོལ་གསུམ་སྤུན་ནང་ཁུལ་གྱི་མཛའ་སེམས་འགྱུར་མེད་ཡིན་ན་ང་ཚོའི་མ་འོངས་པ་ཡང་ཐག་མི་རིང་བའི་ཁག་ཐེག་བྱས་ཆོག
བཞུད་ཚར་བའི་དུས་ཚིགས་སྐྱོ་བོ་ཞིག་གི་སྣེ་རུ་འགྲོ་ཞོར་སེན་བཏོག་ཅིག་བྱས་ན། སྐུ་གཤེགས་དམ་པ་ཟླ་བ་ནོར་བུ་སུ་ཞིག་གིས་སྦྲ་ཁྱིམ་སྨུག་པོའི་སྒོར་སྤྱུགས་པ་རེད། ག་རེ་བྱས་ཏེ་སྙིང་ནད་ཕོགས་ཏེ་ཐ་མར་ཕམ་ཁའི་ངང་གཞན་དུ་གཤེགས་སོང་བ་རེད། གཤེགས་ཚར་བའི་ཕྱི་ཉིན་རླུང་འཕྲིན་སོགས་འཕྲིན་ལམ་སྣ་ཚོགས་བརྒྱུད་སེམས་གསོའི་ཞུ་ཡིག་བསྐུར་རབས་འདུག ཆེས་ཡིད་སྐྱོ་བ་ཞིག་རེད་ཨང་། འདི་ལྟ་བུའི་ངན་འཚང་གི་རྩ་བ་བསྔོག་དགོས་པའི་དུས་ཚོད་གནའ་ནས་སླེབས་ཚར་ནའང་། གཅིག་ངོ་གཅིག་བལྟས་པ་ནང་བཞིན་དོན་དག་སྐོར་ཞིག་གབ་སྦོས་ཀྱི་ཚུལ་གྱིས་ས་སྒོར་ཕུད་ཡོད་པ་མ་རེད། དུས་དེ་རིང་མི་བུ་ཡོད་ཚད་རིག་པས་བརྟས་ནས་ཡོད་ལ་རྟོགས་སད་ཀྱི་བློ་རྒྱ་ཁ་གདེངས་ནས་ཡོད་སྟབས། གཡོ་སྒྱུ་ཁྲམ་གསུམ་ལ་གཏན་ནས་མགོ་སྒུར་མི་སྲིད་པའི་མི་རབས་ཤིག་འཚར་ལོངས་བྱུང་གིན་ཡོད་ལ། རང་དབང་ལོངས་སྤྱོད་དང་ཁ་མཐུན་གྲོས་འགྲིག་གི་སྤྱི་ཚོགས་ཤིག་ཆགས་ན་སྙམ་པའི་འདུ་ཤེས་བསྐྲུན་གྱིན་ཡོད་། ད་རུང་བཤད་རྒྱུ་ཞིག་ལ། རྒན་པདྨ་འབུམ་ཉིན་མོ་སྒོར་འབུད་དཀའ་བའི་ཚོད་དུ་བཅུགས་མྱོང་བའི་གཏམ་རྒྱུད་དེ་གོ་ཨེ་མྱོང་། དེ་དང་དེ་འདྲ་བ་ག་ཚད་ཅིག་བྱུང་ཡོད་པ་འགྲེལ་མི་དགོས་པ་ཞིག་རེད། ཡ་ང་བའི་རང་མྱི་ཤེས་རྒྱ་ཅན་ཚོའི་ནུས་པ་དམར་གསོད་གཏོང་བར་གོམས་པའི་སྲིད་དོན་ཁྲམ་ཚོའི་ཁ་གཏད་དུ་ལངས་དགོས་པའི་དུས་བབས་འདུག་གོ།
རྒྱ་དམར་སྲིད་གཞུང་གིས་བོད་ནང་གི་རྩོམ་པ་པོ་ཚོའི་སྐེ་འབུ་གཅུ་སྟངས་དང་། བཙན་བྱོལ་གྱི་སྐབས་འཚོལ་རིང་ལུགས་པ་མགོ་བདེ་ཚོས། བཙན་བྱོལ་གྱི་མི་བུ་རེ་བ་ཅན་ཚོ་གཅིག་འཕྲོ་གཅིག་ལ། གསང་མྱུལ་དང་། དོ་རྒྱལ་བསྟེན་མཁན། ཆོས་ལུགས་ལ་མི་དད་པ་སོགས་ཀྱིས་མགོ་རུ་བཞུས་ཏེ་སྤྱི་ཚོགས་ཀྱི་སེམས་ངོར་མི་འཕྲོད་པའི་ཞྭ་མོ་གཡོགས་པ་ནི་གཅིག་པ་གཅིག་རྐྱང་ཡིན། མི་སུ་ཡིན་ན་དྲང་བདེན་དང་རང་དབང་ལ་དགའ་ཞིང་དུང་བས་དེའི་རིགས་སུ་འབད་པ་དག་གི་ཚེ་སྲོག་སྲུང་བར་འབད་པ་བྱེད་དགོས། ངས་བལྟས་ན་ཆེས་དོགས་ཟོན་བྱ་དགོས་པ་ནི་རྟག་པར་རྒྱལ་བ་རིན་པོ་ཆེ་ཁ་ནས་གླེང་མཁན་ཚོ་དང་། དད་པ་དང་དམ་ཚིག་བརྟན་པོ་ཡོད་མདོག་གིས་ལྐོག་འབྲེལ་བྱ་མཁན་གྱི་མི་འདི་དག་ཡིན་པས། ག་དུས་ཡིན་ན་འདི་དག་ངན་ལངས་སྐྱག་ལངས་ཏུ་གཏོང་མི་ཉན་ཞེས་བཤད་འདོད་བྱུང་།
ད་ཐེངས་ཀྱི་མདོ་སྨད་རྒྱུན་ལས་ཁང་གིས་སྤེལ་བའི་སྤྱི་ཚོགས་ཟིང་སློང་གི་ཡིག་འཁྱམས་དེའང་། སྔ་མ་བཞིན་སྤྱི་ཚོགས་ནང་ཁུལ་སུན་པོ་བཟོ་བྱེད་ཅིག་ཡིན་པས། འདི་རིགས་ཀྱི་ཕག་ནའང་མི་རྔ་མ་ཅན་ཁ་ཤས་སྐུང་ཡོད་པ་གསལ་བོར་མཐོང་ཐུབ། སྤྱིར་མདོ་སྨད་རྒྱུན་ལས་གྱི་ལས་དོན་ནི་མདོ་སྨད་མི་མང་གི་སྐྱིད་སྡུག་ལ་ལྟ་རྟོགས་བྱེད་དགོས་པ་ཞིག་མ་གཏོགས། སྤྱི་ཚོགས་ཟིང་སློང་དང་སྲིད་དོན་བྱ་འགུལ་ཁོ་ན་སྒྲུབ་པའི་ཚོགས་པ་ཞིག་གཏན་ནས་མིན། ཉེ་སྔོན་ཞིག་ལ་ཨ་ལགས་ཤིང་བཟའ་ཚང་གཙོས་མདོ་སྨད་ཀྱི་ཤེས་ཡོན་པ་སྐོར་ཞིག་གིས་མདོ་སྨད་རྒྱུན་ལས་ཀྱི་ཚོགས་ཆེན་ལ་སྙན་ཞུ་བཏང་འདུག དེའི་ནང་ནའང་མདོ་སྨད་རྒྱུན་ལས་འདི་མདོ་སྨད་མི་མང་གི་དཀའ་ངལ་ཞུ་ས་ཉན་སའི་ཚོགས་པ་ཞིག་དང་། མི་མང་རང་གི་བདེ་སྡུག་ཁོ་ན་སྒྲུབ་ཐུབ་པའི་སྐྱིད་སྡུག་ཚོགས་པ་ཤིག་ཏུ་བསྒྱུར་དགོས་པའི་འབོད་སྐུལ་གནང་འདུག
ཁོ་བས་ཀྱང་དེ་ལྟར་འདོད་ཀྱིན་ཡོད་པས་གཞུག་ནས་བཟུང་སུ་གང་ལ་ཕན་མི་ཐོགས་ན་གནོད་མ་སྐྱེལ་རོགས་ཞེས་ཞུའོ།
༢༠༡༠ ཟླ་༡༢ཚེས༢༣ཉིན་བྲིས།
ཤ་ཚ་བའི་སྐད་ཆ་རང་རེད། རྩོམ་པ་པོ་བཀྲ་ཚེ་ལ་སེམས་ནས་དགའ་ནི་ཞིག་རེད།
བོད་བརྒྱགས་ན་རྙོག་དྲ་བཟོ། རྒྱ་ལྟོགས་ན་རྙོག་དྲ་བཟོ།
ཚོགས་པ་སྐྱིད་སྡུག་སོགས་ཀྱིས་བཟོས་པའི་རྙོག་གླེང་དེ་དག བྱེས་འབྱོར་སྒྲིག་འཛུགས་གཞུང་གི་དཀའ་རྙོག་མ་རེད། ཆུ་ཁོལ་ས་རང་དུ་ཞི་འཇམ་དུ་ཆུགས།
བཀྲ་ཤིས་ཚེ་རིང་ལགས། ཁྱེད་ཀྱིས་གནས་ཚུལ་རྒྱ་ཆེན་པོ་ཞིག་ནས་ཆུང་ས་ཚོགས་པ་ཞིག་གི་སྟེང་བབས་སོང་བས་སེམས་ཚབས་བྱེད་གཞིའི་ནུས་པ་བཅག་པར་ཧ་ཅང་བློ་ཕམ་ཆེ། ཁྱེད་ཀྱིས་འགོ་ཐོག་ཏུ་ང་ཚོའི་སྤྱི་ཚོགས་ནང་གནས་ཚུལ་དེ་འདྲ་ཞིག་ཡོད་སྐོར་གསུངས་པ་དང་འབྲེལ་ཆེས་སེམས་ཚབས་ཆེ་བའི་གནས་ཚུལ་ནི་སྔ་ལོའི་ནང་མ་སུ་རི་བོད་ཁྱིམ་དུ་སློབ་ཕྲུག་བར་འཁྲིག་སྤྱོད་བྱེད་སྐོར་ལས་འཕྲོས་ཏེ་སློབ་ཕྲུག་བཅུ་སྐོར་ཞིག་ཕྱིར་བུད་བྱེད་པ་ཙམ་དུ་མ་ཟད། ད་ཆ་འཛིན་སྐྱོང་ནང་ལྷིང་འཇག་མེད་པའི་གནས་ཚུལ་མང་པོ་ཞིག་ལྷག་བཞིན་པ་མ་ཟད། དེར་ཡོད་དྲུང་ཆེས་གོ་དབང་གི་སྟོབས་ཤུགས་ཀྱིས་འཛིན་སྐྱོང་གཏན་ལྷིང་བཟོ་ཐབས་བྱེད་བཞིན་པ་ལ་རྟེན་ནས་སྲིད་ཇུས་ངན་པ་འཛིན་པའི་མི་ངན་འགས་ཉིན་ལྟར་དྲུང་ཆེ་ཕྱིར་བུད་གཏོང་ཐབས་ཐོག་མཚན་མོ་ནམ་ཡིན་ལ་ཚོགས་འདུ་འཛོམས་བཞིན་ཡོད། ཕྱོགས་གཏོགས་དེའི་ཚོགས་མི་ཁ་ཤས་དྲུང་ཆེ་དང་འབྲེལ་བ་ཧ་ཅང་ཉེ་པོ་སླེབས་ཐུབ་ཡོད་པས་དེ་དག་གིས་ཁོང་གི་ཞེན་ཆ་འཛིན་ཐབས་ལ་འབད་བརྩོན་གཙོ་བོ་བྱེད། གཞན་པ་ཚོས་དེའི་ཁ་གཏད་དུ་འདོན་ཐབས་སོགས་ཐབས་སྣ་ཚོགས་ཤིག་འདོན་དང་བཏོན་བཞིན་པ་རེད། མདོར་ན་ཤིན་ཏུ་རྩ་ཆེ་བའི་ཚོགས་པ་དེ་སྲིད་དོན་ངན་པའི་རྦ་རླབས་ནང་ཚུད་ཅིང་དེར་ཡོད་རང་ཅག་ལས་བྱེད་དང། སློབ་ཕྲུག དགེ་རྒན་ཚང་མར་ཞི་བདེ་མེད་པ་ཞིག་ཏུ་འགྱུར་ཡོད། ཉེ་བའི་ཆར་བོད་ཁྱིམ་ནས་སློབ་དགེ་ལེགས་གྲས་ལྔ་དྲུག་རྩ་དགོངས་ཞུས་ཟིན་ཡོད་ལ་ད་དུང་མང་པོ་ཞིག་གི་ཞབས་ཞུའི་ལྷག་བསམ་རྩ་བརླག་ཏུ་ཕྱིན་ནས་ཡོད་པ་ནི་དངོས་ཡོད་གནས་ཚུལ་ཡིན། མདོར་ན། རང་ཅག་བཙན་བྱོལ་གཞུང་གི་གནས་སྟངས་ཇེ་སྡུག་ཏུ་འགྲོ་བཞིན་པ་ནི་ཡོངས་གྲགས་ཤིག་ཆགས་ཡོད། ཧ་ཅང་གི་བློ་ཕམ་པའི་དུས་ཤིག་ལ་བསླེབས་ཡོད་ན་ཚང་མས་ཐབས་ཤེས་ཤིག་བྱ་དགོས་པར་བསམས། བཀྲིས་བདེ་ལེགས།
ར་རིག་ནས་རྟ་རེད་ཟེར་ན་དེ་མིག་འཕྲུལ་རེད།
བཀྲ་ཤིས་ཚེ་རིང་ཟེར་བ་དེའི་མདོ་སྨད་ཚང་གི་མགོ་ལ་ཅིག་འཇོག་ཐུབ་ཐུབ་བྱེད་ཀྱིན་འདུག
ཁྱེད་ཀྱིས་སོམ་དང་སྤྲིན་མ་འཐིབ་པར་འབྲུག་ཅི་ལྟར་གྲགས་དགོས་པ་རེད། དེ་འཇིག་རྟེན་ཡོངས་གྲགས་ཀྱི་གནས་ལུགས་དང་འགལ་བ་ཞིག་རེད།
ངས་མདོ་སྨད་རྒྱུན་ལས་རྣམ་པར་དྲིས་པ་ཡིན་མོད། ཁོང་ཚོས་ནང་གི་མི་ཞིག་གིས་བཤད་དོན་དེ་འདྲ་འདྲའི་རྙོག་ཟིང་ཞིག་གི་མགོ་བསླངས་ཡོང་གིན་འདུག ཡིན་ནའང་ཞིབ་ཕྲའི་གནས་ཚུལ་རྩར་གཅོད་བྱས་པའི་རྗེས་ནས་མདོ་སྨད་གཞུང་གི་ལངས་ཕྱོགས་ཟེར་ན་འདྲ་ཐག་གཅོད་ཟེར་ནའང་འདྲ། གང་ལྟར་གནད་དོན་འདི་གླེང་སློངས་ཤིག་མི་བྱེད་རང་བྱེད་ཡིན་ས་རེད། ཕྱོགས་མང་པོ་ཞིག་ན་གྲགས་འགུལ་ཆེན་པོ་རེད།
འོན་ཀྱང་ལྟའི་བར་མདོ་སྨད་ཀྱིས་ཐག་གཅོད་གང་ཡང་བྱས་མེད་ཟེར། ངས་བལྟས་ན་ ནམ་སྨད་ལ་གྲགས་ན་བྱ་ཕོ་ཡིན་སྲིད་ཀྱང་། ནམ་སྟོད་གྲགས་མཁན་དེ་བོང་བུ་ཡིན་རྒྱུ་རེད། མདོ་སྨད་གཞུང་ཡིན་མིན་ལ་མ་བལྟས་པར་མདོ་སྨད་ཆོལ་ཁའི་མིང་དྲ་ཐོག་ནས་དོན་མེད་ལ་བརྫད་མ་ཡོང་པ།
འདི་ལོའི་བཀའ་སྤྱིའི་འོས་བསྡུ་སྐབས་དོགས་གནད་ཆེན་པོ་འགའ་མཐོང་བ།
༡ ཐོག་མར་བུད་མེད་ཚོགས་པས་ཚོད་ལྟའི་འོས་བསྡུ་ས་གནས་གང་སར་བྱས་ཀྱང་དུས་ཐོག་འོས་ཐོབ་ཀྱི་གསལ་བསྒྲགས་མི་བྱེད་པར་ཐ་མ་གསར་བསྒྲགས་བྱས་ཀྱང་འོས་མཉམ་ཞུགས་བྱ་མཁན་ཇི་ཙམ་བྱུང་མིན་ཙམ་ལས་གསལ་ཁ་མེད་པའི་རྒྱུ་རྐྱེན་གང་ཞིག་ལ་ཐུག་ཡོད་མེད་དོགས་གནད་དང་པོ་རེད།
༢ དྲ་རྒྱ་ཁག་ཏུ་བློ་སེང་ལ་སྐྱོན་བརྗོད་ཀྱི་བསམ་འཆར་བཀོད་ཀྱང་ཉིན་གཉིས་རེ་མཚམས་ཆ་ཚང་ནག་སུབ་བཏང་ནས་མངོན་མེད་བཟོ་བ་དང་། བཀའ་བློན་འོས་དམིགས་གཞན་ལ་སྐྱོན་བརྗོད་བསམ་འཆར་བཀོད་ཀྱང་ཟླ་བ་གཅིག་ལྷག་ཙམ་མདུན་ཤོག་ལ་འགོད་པ་སོགས་ལ་གཏགས་ན་དྲ་རྒྱ་ཆ་ཚང་བསླུ་ཉེ་ཟིན་པ་དང་གཉིས།
༣ བལ་ཡུལ་ནང་འོས་ཤོག་བཙན་འཕྲོག་བྱས་ཀྱང་ཅུང་ཟད་ལྷག་པ་རྣམས་མདོ་སྟོད་ཀྱི་འོས་ཤོག་ལྷག་པ་སོགས་མི་མངོན་པའི་གཡོ་ཇུས་ཞིག་ཡོད་པ་དང་གསུམ།
༤ སྤྱིར་བལ་ཡུལ་ནང་བོད་པ་རྣམས་བསྡུ་འཛོམས་ཀྱི་རང་དབང་གཏན་ནས་མེད་པ་མ་ཟད་ལྷག་པར་བོད་ཀྱི་མཐུན་མོང་མ་ཡིན་པའི་དུས་དྲན་ཁག་ལ་དེ་བས་བཀག་སྡོམས་ནན་མོ་ཡོད་པ་མ་ཟད་རྒྱལ་སྤྱིའི་འགྲོ་བ་མིའི་ཐོབ་ཐང་དུས་དྲན་སྲུང་བརྩིས་ཞུ་རྒྱུའི་ཆེད་བསྡུ་འཛོམས་བྱས་ཀྱང་བཀག་སྡོམས་ནན་མོ་བྱ་བཞིན་ཡོད་ཀྱང་། ཡ་མཚན་པ་ཞིག་ལ་བལ་ཡུལ་ཁུལ་གྱི་མདོ་སྟོད་ཁམས་རིགས་ཀྱི་མཆོད་རྟེན་ས་གནས་འགོ་འཛིན་ལས་ཁུངས་སུ་སྤྲོད་སྐྱིད་ཐུལ་རོ་ཉིན་གསུམ་བཏང་ཀྱང་བཀག་འགོག་གང་ཡང་མེད་པ་དོགས་གནས་བཞི་པ་རེད། འོན་ཀྱང་ལོ་འདིར་ང་ཚོ་བོད་མི་སྤྱི་ལ་སྤྲོ་སྐྱིད་གཏོང་བའི་གནས་ཚུལ་བཟང་པོ་གང་ཡང་བྱུང་མེད་ལ་དེ་བས་ཀྱང་སྤྲོ་སྐྱིད་ཤོ་སྦག་རྒྱན་འཛུགས་ཤུགས་ཆེན་བྱས་ཏེ་མི་ཁ་ཤས་ཀྱི་ནེ་སྒོར་འབུམ་བཅུ་ལྷག་ཙམ་ཤོར་བ་སོགས་དེ་སྔ་བཙན་བྱོལ་སྤྱི་ཚོགས་ནང་བྱུང་མ་མྱོང་བའི་རྒྱན་འཛུགས་རྩེ་མོ་ཤུགས་ཆེ་ཤོས་དེ་བྱུང་ཡོད་པས་དེ་དག་ལ་ཚང་མས་དགོངས་པ་ཟབ་བཞེས་གནང་རོགས་ཐུགས་བརྩེ་གཟིགས་ཞུ་བཞིན་ཡོད།