སྤོབས་པ་མཐའ་ཡས།
ལྷོ་ཤར་ཨེ་ཤེ་ཡའི་དབུས་རྒྱུད་དུ་ལོ་རྒྱུས་རིང་ཞིང་གནས་བསྟན་སྡེ་བའི་ལུགས་ཀྱི་ཐུབ་པའི་བསྟན་པ་རིན་པོ་ཆེ་གཙོ་བོར་གྱུར་པའི་རིག་གཞུང་ངོ་མཚར་ཅན་གྱིས་ཕྱུག་པའི་ཡུལ་གྲུ་ཁེམ་བྷོ་ཌི་ཡ་ནི་དུས་རབས་ཉི་ཤུ་པའི་ལོ་རབས་བདུན་ཅུ་པར་ཁེ་མེར་དམར་ཤོག་པའི་གདུག་རྩུབ་ཅན་གྱི་གསར་བརྗེའི་ལས་འགུལ་དང་། ཝིད་ནམ་ལྷོ་བྱང་གི་དམག་འཁྲུགས་ལས་ཨ་མེ་རི་ཁས་མཁའ་ཐོག་གི་རྒོལ་རྡུང་དྲག་པོས་དམིགས་འབེན་ཡིན་མིན་གྱི་ཡུལ་མི་བགྲང་ལས་འདས་པ་དམར་གསོད་བཏང་བ་སོགས་ཀྱི་ལོ་རྒྱུས་ཐོས་ན་སྐྱི་གཡའ་བ་མང་པོ་ཞིག་བྱུང་ཡོད། ཡུལ་དེའི་རྒྱལ་པོ་ཤ་ཧ་ནུག་ལ་མཚོན་ན་མི་ཚེ་གང་བོར་ཁེམ་བྷོ་ཌི་ཡའི་ཆབ་སྲིད་ཀྱི་ལས་རིམ་ལ་ཞུགས་ཤིང་སྡུག་སར་ལྷུང་ནས་སྲོག་ཐོག་གི་ཉེས་ཆད་ཁྱབ་བསྒྲགས་ཡན་ཆད་བྱས་མྱོང་ཡང་༡༩༩༠ ནང་ནས་སླར་ཡང་ས་སྐྱོང་ཆོས་རྒྱལ་ཆེན་པོའི་ཁྲི་འཕངས་ལ་དབང་འབྱོར་ཐུབ་པ་བྱུང་བ་སོགས་དར་རྒུད་ཀྱི་གཏམ་རྒྱུད་རིང་མོས་ཡིད་དབང་འགུགས་པ་མང་དུ་མཆིས་སོ།
སྐབས་བབ་འདིར་ངས་འདི་བོད་ཀྱིས་སྐྱབས་བཅོལ་ཞུ་ཡུལ་ནོར་བའི་རྒྱུ་མཚན་ཞིག་དང་སྦྱར་ནས་འཆད་འདོད། དེ་ཡང་ཁེམ་བྷོ་ཌི་ཡའི་ཁི་མིར་དམར་ཤོག་པའི་རྒྱབ་སྐྱོར་ལྟེ་བ་དེ་རྒྱ་ནག་གུང་ཁྲན་གཞུང་ཡིན་ཞིང་རྒྱ་མི་གུང་ཁྲན་གྱིས་ཁོང་ཚོར་དམག་གི་ཉེར་མཁོ་མཁོ་སྤྲོད་དང་བཀོད་འདོམས་ལྟེ་བའི་འགན་འཁུར་གྱི་ཡོད། རྒྱལ་པོ་ཤི་ཧ་ནུག་གིས་ཁི་མིར་དམར་ཤོག་པའི་དྲག་ཤུགས་ལ་ཁ་གཏད་གཅོག་མི་ཐུབ་པ་ཤེས་ནས་ཐོག་མར་ཁོང་ཤར་རྒྱག་གིས་ཧྥ་རན་སིར་སྐྱབས་བཅོལ་དུ་བསྐྱོད། ཧྥ་རན་སིས་ལོ་ཧ་ཅང་མང་པོར་ཁེམ་བྷོ་ཌི་ཡ་དབང་བསྒྱུར་བྱས་མྱོང་བ་དང་དམག་ཆེན་གཉིས་པའི་རྗེས་སུ་ཁེམ་བྷོ་ཌི་ཡ་རང་བཙན་བྱུང་སྐབས་སུ་རྒྱལ་པོ་ཤི་ཧ་ནུག་འདི་ཡང་ཧྥ་རན་སིས་བསྐོ་བཞག་བྱས་པ་རེད། དེར་བརྟེན་ཧྥ་རན་སི་ནི་ནུབ་ཕྱོགས་ཀྱི་སྟོབས་ཅན་རྒྱལ་ཁབ་ཅིག་ཡིན་པ་ཙམ་དུ་མ་ཟད་དམིགས་བསལ་གྱི་འབྲེལ་བ་ཞིག་ཀྱང་ཡོད་སྟབས་ཁོང་ཧྥ་རན་སིར་སྐྱབས་བཅོལ་དུ་འགྲོ་བ་དེ་ཧ་ཅང་འོས་ཤིང་འཚམས་པ་ལྟ་བུ་ཡིན། སྤྱིར་བཏང་འབྲེལ་བ་ཟབ་མིན་ཙམ་ནས་བསམ་ན་ཧྥ་རན་སི་དང་རྒྱལ་པོ་ཤི་ཧ་ནུག་གི་འབྲེལ་བ་དེ་བོད་དང་རྒྱ་གར་གྱི་འབྲེལ་བ་ལས་བརྒྱ་འགྱུར་གྱི་འབྲེལ་ལམ་ཟབ་པ་ཡོད།
ཡིན་ན་ཡང་ལོ་ཤས་རྗེས་ཁེམ་བྷོ་ཌི་ཡའི་ཡུལ་གྲུ་ཡོངས་རྫོགས་ཕོལ་པོ་ཊིས་སྣེ་ཁྲིད་པའི་ཁི་མེར་དམར་ཤོག་པས་དབང་བསྒྱུར་བྱས་རྗེས་ཁེམ་བྷོ་ཌི་ཡའི་རྒྱལ་པོ་ཤི་ཧ་ནུག་མཆོག་པེ་ཅིང་ལ་སྐྱབས་བཅོལ་དུ་ཕེབས་ནས་དེར་ཡུན་རིང་དུ་རྒྱུན་བཞུགས་གནང་། རྒྱལ་པོ་རང་ལ་གྱེན་ལོག་ཁ་གཏད་བྱེད་མཁན་གྱི་ཁི་མེར་དམར་ཤོག་པའི་བཀོད་འདོམས་རོགས་སྐྱོར་བ་རྒྱ་དམར་གུང་ཁྲན་ཡིན་བཞིན་དུ་རྒྱལ་པོ་ཁོང་པེ་ཅིང་ལ་སྐྱབས་བཅོལ་དུ་ཕེབས་ཟེར་བ་དེ་བློ་ཡུལ་དུ་མི་ཤོང་བ་ཞིག་རེད། དོན་དངོས་སུ་རྒྱལ་པོ་མཆོག་གིས་པེ་ཅིང་ལ་སྐྱབས་བཅོལ་ཞུས་པ་དེ་ནི་ཆབ་སྲིད་ཀྱི་མཁྱེན་རླབས་དང་གཟིགས་རྒྱ་ཧ་ཅང་ཆེན་པོའི་མཛད་པ་ཞིག་ཡིན་པ་ད་ལྟ་གཞི་ནས་ཤེས་པ་རེད།
དེ་ཡང་གལ་སྲིད་རྒྱལ་པོ་ཤི་ཧ་ནུག་མཆོག་ཧྥ་རན་སི་ལྟ་བུར་སྐྱབས་བཅོལ་དུ་བཞུགས་ཡོད་ན་ཁོང་དང་ཁོང་གི་རྒྱལ་ཁབ་གཉིས་ཀྱི་འབྲེལ་ཐག་གཏན་ཆད་དུ་འགྲོ་རྒྱུ་ཡིན་པ་དང་། ཧྥ་རན་སི་གཙོས་པའི་ནུབ་ཕྱོགས་དམངས་གཙོའི་གཞུང་གི་བཀོད་འདོམས་ལ་ཁི་མེར་དམར་ཤོག་པས་མི་ཉན་པ་སྨྲོས་མེད་ཡིན་སྟབས་རྒྱལ་ཁབ་དེ་ཚོས་རྒྱལ་པོ་རང་གི་སྲོག་སྐྱོབ་ཐུབ་ན་ཡང་རང་གི་རྒྱལ་ཁབ་ཀྱི་ཆབ་སྲིད་ལ་ཤུགས་རྐྱེན་ཐེབས་མི་ཐུབ་པ་མཐོང་ནས་རྒྱལ་པོ་འདིས་ཁེ་ཉེན་ཆེ་བའི་སྐྱབས་བཅོལ་ས་དེ་པེ་ཅིང་གདམས་པ་རེད།
རྒྱལ་པོ་ཁོང་གི་གཟིགས་སྣང་ལ་ཁི་མེར་དམར་ཤོག་ཚོགས་པ་ནི་པེ་ཅིང་གུང་ཁྲན་གཞུང་གིས་ཐག་སྣེ་ན་ཐོགསཔའི་འགུལ་གཟུགས་ཅིག་ཡིན་སྟབས་རྒྱ་ནག་དམར་ཤོག་པའི་དཔུང་པ་རུ་འཛིན་མ་ཐུབ་ན་གཞན་སུས་ཀྱང་འགུལ་སྐྱོད་དེ་མཚམས་འཇོག་མི་ཐུབ་པ་མཁྱེན་པ་རེད། པེ་ཅིང་གི་ངོས་ནས་མར་ཁེ་སིའི་རིང་ལུགས་ཁ་ཏོན་བྱེད་ཀྱི་ཡོད་རུང་ལག་ལེན་ངོ་མར་ཐུག་སྐབས་ཁེམ་བྷོ་ཌི་ཡའི་ཆབ་སྲིད་ལ་ཇུས་གཏོགས་བྱེད་དགོས་ན་ཁི་མིར་དམར་ཤོག་ཚོགས་པ་དང་རྒྱལ་པོ་ཤི་ཧ་ནུག་གཉིས་པོའི་ལྗིད་ཚད་གང་མཐོ་ལྟ་རྒྱུའི་བེད་སྤྱོད་ཀྱི་ཆེད་དུ་རྒྱལ་པོ་ལ་སྐྱབས་བཅོལ་གྱི་གནས་སྟངས་གང་ལེགས་སྤྲད། རྒྱལ་པོ་རང་གི་རེ་འདོད་བཞིན་རྒྱབ་སྐྱོར་གང་ལེགས་གནང་མཐར་ཁི་མིར་དམར་ཤོག་པ་ལྟག་ཆུ་ཆད་པའི་རྫིངས་བུ་བཞིན་དུ་གྱུར་ནས་མཐར་མི་དམངས་ཀྱི་འདེམས་ཤོག་བརྒྱུད་ནས་རྒྱལ་པོ་ཤི་ཧ་ནུག་མཆོག་མི་འཇིགས་སེང་གེའི་ཁྲི་ལ་དབང་བསྒྱུར་ནས་འཚོ་ཞིང་གཞེས་པ་འདི་རེད།
སྐབས་དེའི་ཁེམ་བྷོ་ཌི་ཡའི་དཀའ་རྙོགས་དང་བོད་ཀྱི་དཀའ་རྙོགས་གཉིས་ཐལ་མོ་སྦྱར་བ་བཞིན་སྦྱར་ན་མི་མཚུངས་ས་མང་པོ་ཡོད་པ་སྨྲོས་མེད་ཡིན་ཡང་གནད་དོན་ངོ་མ་དེ་རང་རེས་རྒྱ་གར་ལ་སྐྱབས་བཅོལ་ཞུས་པ་དང་རྒྱལ་པོ་ཤི་ཧ་ནུག་གིས་པེ་ཅིང་ལ་སྐྱབས་བཅོལ་ཞུས་པ་དེ་གཉིས་བསྡུར་སྐབས་རང་རེ་ལ་རང་སྲོག་ཐར་ཙམ་གྱི་རེ་བ་ལས་ཆབ་སྲིད་ཀྱི་གནད་དོན་ཐག་གཅོད་བྱེད་པའི་ཐབས་ལམ་ཞིག་སེམས་ཀྱི་ནང་ལ་འཁོར་ཐུབ་མེད་པ་གསལ་པོ་རེད། རང་རེས་དབུ་ཁྲིད་མི་དྲགས་ཚང་མས་རྒྱ་གར་ལས་གཞན་པའི་སྐྱབས་གནས་ཤིག་ཡོད་པར་ངོས་ཟིན་མ་མྱོང་ལ་སྒེར་གྱི་འཇོན་ཐང་ངོམ་མཁན་ཁ་ཤས་ཤིག་ཐའེ་ཝན་དང་ཨ་མེ་རི་ཁ་སོགས་ནུབ་ཕྱོགས་རྒྱལ་ཁབ་ཏུ་བསྐྱོད་པ་ཙམ་རེད།
དོན་དངོས་སུ་ཁྱེད་ཚོས་བསམ་བློ་ཞིག་ཐོངས་དང་། རང་རེས་སྐྱབས་བཅོལ་ཞུ་ཡུལ་ཚོས་རྒྱ་ནག་གི་ཁ་ནང་དུ་ཚུད་ཚར་བའི་བོད་དེ་ཚུར་ལེན་པའི་ངལ་བ་དང་དུ་ལེན་གྱི་རེད་དམ། རྒྱ་གར་དང་རྒྱ་ནག་གཉིས་གཞི་རྩའི་ཆབ་སྲིད་ལམ་ལུགས་ཀྱི་སྟེང་ནས་འགལ་ཟླར་གྱུར་ཡོད་ཐོག་ས་མཚམས་རྩོད་རྙོགས་གཙོ་བོར་གྱུར་པའི་དགྲ་ཟླའི་རང་བཞིན་དུ་གནས་ཡོད་ལ་ཐའེ་ཝན་ནི་དེ་ལས་ཀྱང་གཅིག་ཁོངས་སུ་གཅིག་འདུས་མིན་གྱི་རྩོད་རྙོགས་ལངས་བཞིན་ཡོད། ཨ་མེ་རི་ཁ་སོགས་ནུབ་ཕྱོགས་དམངས་གཙོའི་ཡུལ་གྲུ་གཞན་ཚོ་ཡང་དེ་ནང་བཞིན་རྒྱ་ནག་བྱ་རོག་འུག་པའི་གནས་སྟངས་སུ་གྱུར་ཡོད། དེར་བརྟེན་རང་རེའི་སྐྱབས་བཅོལ་ཞུ་ཡུལ་ཚོས་རྒྱ་ནག་གི་ཁ་ནང་ནས་བོད་དེ་ཚུར་ལེན་དགོས་ན་དམག་འཐབ་མ་ཡིན་པའི་ཐབས་ལམ་གཞན་ཞིག་ལུས་མེད། གཅིག་བྱས་ན་རང་རེས་དབུ་ཁྲིད་ཚོས་རྒྱ་གར་དང་ཨ་མེ་རི་ཁ་ལྟ་བུའི་སྟོབས་ཅན་རྒྱལ་ཁབ་ཅིག་ང་ཚོའི་རྒྱབ་རྩར་ལངས་ནས་དངོས་སུ་རྒྱ་ནག་ལ་དམག་འཁྲུགས་བྱས་ནས་ང་ཚོའི་དགོས་འདུན་བསྒྲུབ་པའི་རེ་བ་སྟོང་པ་ཞིག་བཅངས་པ་ཡིན་སྲིད།
all dearest . sorry that i write English . but i try to join your guys Khada .
but its really impossibles .
maybe take some time .
ཕྱོགས་གང་མང་ཞིག་ནས་བསམ་བློ་བཏང་ཚེ་གོང་ས་མཆོག་རྒྱ་གར་དུ་སྐྱབས་བཅོལ་ལ་ཕེབས་པ་འདི་གཅིག་པོའི་དགོངས་བཞེད་ཀྱང་དེ་དུས་སུ་གདམས་ཀ་མེད་པ་ཞིག་ཡིན་སྲིད་ཀྱང་། ཕུགས་རྒྱང་རིང་པོའི་བོད་དོན་འཐབ་རྩོད་ཀྱི་ཕྱོགས་ནས་ལྟ་དུས་འགྲན་ཟླ་མེད་པའི་སྟེས་དབང་གི་གདམས་ཀ་ཞིག་ཏུ་མཐོང་གི་འདུག