རྔ་བ་ཀུན་བཟང་།
དེང་སང་ང་རི་འདབ་གྱི་ཁང་ཆུང་ཞིག་གི་ནང་དཔེ་ཀློག་བྱེད་ནས་བསྡད་ཡོད། གཡས་གཡོན་ན་ཟང་ཟིང་མེད། ཧ་ཅང་གི་ལྷིང་འཇགས་ཡིན། ཞོགས་པའི་སྐྱ་རེངས་དང་མཚན་མོའི་ཟླ་འོད་མ་གཏོགས་ང་ལ་སྒོ་རྡུང་མཁན་མེད། སྐྱ་རེངས་ཀྱི་འོད་མདངས་རི་འགོ་ནས་ཤར་ཡོང་དུས། ང་བྱིས་པ་བསམ་མེད་ཞིག་དང་འདྲ་བར། མལ་ས་ནང་རྐང་རྐྱང་ལག་རྐྱང་བྱེད་ནས་རྨི་ལམ་གྱི་ཞིང་ཁམས་ན་ཡོད། སྒེའུ་ཁུང་གི་བར་སེང་ནས་ཉི་འོད་ཀྱི་དྲོད་རླབས་ཆེ་རུ་འགྲོ་དུས། ད་གཟོད་ང་གཉིད་ལས་སད་ཡོང་བས། སྐྱ་རེངས་ནི་ངའི་དུས་ཚོད་འཁོར་ལོ་ལ་ཆགས། གལ་ཏེ་གནས་ཚུལ་འདི་ངའི་ཨ་མས་ཤེས་ན། ང་ལ་གཅར་ནོ་ཁོ་ཐག་ཡིན།
དེ་ནས་སྐར་མ་འགའ་གོར་དུས། ང་ཡར་ལངས་ནས་བར་ཁྱམས་ཀྱི་རྐུབ་ཀྱག་ཐོག་ལ་ཆུ་ཚ་བོ་ཕོར་པ་གང་འཐུང་ཞོར་ལ་བསྡད་ཏེ། རང་འབྱུང་གི་མཛེས་པ་ལ་རོལ།
ལྟོས་དང་། རྩེ་མོ་གནམ་ལ་ཟུག་པའི་རི་རྣམས་འཛུམ་མུལ་མུལ་ངང་རང་རང་ས་ལ་བསྡད་ནས། ང་དང་ཆ་འདྲ་བ་ཞོགས་པའི་ཉི་འོད་ལ་རོལ། རེད་དེ་ནུབ་ཕྱོགས་ནས་སྤྲིན་ནག་འགའ་ཡོང་ནས་རྫ་རི་དང་རྩི་ཤིང་ལོ་མ་རྣམས་ཀྱང་དབང་མེད་ངང་སྤྲིན་ནག་འགའ་ཡི་འཐུམ།
འོན་ཀྱང་། མཛེས་པ་ཟེར་ནོ་གཡོག་པ་དང་འཐུམ་པ་ཙམ་གྱི་མེད་པ་བཟོ་ག་ལ་ཐུབ་བམ། རི་མགོ་སྨུག་པའི་གཡོག་ན་བུད་མེད་མཛེས་མ་ཞིག་གི་རྒྱན་ཆ་གོན་པ་དང་ཆ་འདྲ་རེད། ཇི་མཛེས་དང་ཅི་ཡག་ལ་འགྲོ།
ཇི་ཙམ་བལྟས་ཀྱང་ཡིད་མི་ཚིམ། སྨུག་པ་ལང་ལོང་དང་རྩི་ཤིང་ལོ་མ་དག་འབྲེལ་ཡོང་དུས། སྒྱུ་རྩལ་པ་དག་སྙིང་ཁ་ན་ཟེར་བ་ངོ་མ་བདེན་པ་མཐོང་།
2021/8/9 བོད་ཁྱིམ་ཟ་ཁང་ནས་བྲིས།