དགའ་བ་མཇེ་ཕྲུག་ནས།
ཚ་གདུང་ལྕི་མོས་ལུས་ཁམས་མི་ངལ་ཞིང་།།
ཐལ་རྡུལ་བཙོག་པས་མིད་པ་མི་བརྣངས་བའི།།
ཡིད་འོང་མཛེས་པས་ཕྱུག་པའི་ཡུལ་ལྗོངས་ལ།།
མི་ཚེའི་ཕྲེང་བ་རེ་ཞིག་བསྐོར་ན་འདོད།།
དགུན་གཞུང་རི་བོས་ཁ་བ་གོས་སུ་བཀླུབས།།
དབྱར་ཁ་ལྗོན་པས་ཆར་བ་མགྲོན་དུ་བསུས།།
རང་བྱུང་མངོན་ཚུལ་མཚར་བའི་ས་ཆེན་ན།།
ཁོ་བོའི་རྣམ་ཤེས་འདི་ལ་ཚེ་སྲོག་ཐོབ།།
གཡོན་ནས་གཙང་ཆུ་དྭངས་མའི་བཞུད་སྒྲ་གྲགས།།
གཡས་ནས་འདབ་ཆགས་ཚོགས་ཀྱི་སྐད་སྙན་བསྒྲོགས།།
རིག་ཐོས་མྱོང་གསུམ་རང་བྱུང་ཉིད་ཀྱི་དངོས།།
ལུས་སེམས་འདི་ཀོར་བདེ་སྦྱིན་རང་གྲུབ་རེད།།
ན་བུན་སྟུག་པོ་རི་བོའི་སྐེད་རགས་བྱས།།
འཇའ་རིས་སྣ་མང་གུར་བཞིན་མཐའ་ནས་བསྐོར།།
ལྗོན་ཤིང་སྟུག་མ་སྲབ་ཀྱི་བར་མཚམས་སུ།།
སྡེ་བ་རེ་རེ་ཆགས་ཚུལ་འདི་ནི་མཛེས།།
དངུལ་ཆུས་མལ་ཆས་བརླན་དོགས་དབྱར་ལ་དབེན།།
གྲང་འཁྱགས་རུས་རྐང་གཟེར་སྣང་དགུན་ལ་བྲལ།།
ཚ་གྲང་དུས་ལ་འཚམས་པའི་རི་འདབས་སུ།།
ལུས་སེམས་ལྷོད་ལ་བབས་དུས་བདེ་བས་བརྟས།།
འདུ་འཛིའི་ཅ་ཅོས་རྣ་བ་མི་གཟན་ཞིང་།།
ཐ་ཤལ་སྤྱོད་པ་མི་ཡིས་མི་འཁྲབ་སར།།
འཇིག་རྟེན་ལས་ངན་ཇི་ཙམ་བརྗོད་བྱས་ཀྱང་།།
འཆལ་པོ་ང་ཡིས་བདེ་སྐྱིད་རྨང་ནས་རྙེད།།
མཐོ་སར་རི་དང་དམའ་སར་གཙང་ཆུ་རྒྱུག །
དགུན་ཁ་གངས་དང་དབྱར་ལ་ཆར་བ་འབབ།།
དུས་ཀྱི་འཕོ་འགྱུར་རེ་རེའི་ཁུགས་སོ་ནས།།
མཛེས་པའི་ལྗོངས་ལ་ལྟད་མོ་སྣ་ཚོགས་གདའ།།
ཨ་སྔོན་དབྱིངས་ཀྱི་སྐར་ཚོགས་ལྷེམ་མེར་འཚེར།།
ས་གཞི་མུ་མེད་དྭངས་ཁ་གཞན་ལས་དོད།།
གནམ་དྭངས་ས་གཙང་རང་བཞིན་ཞིང་ས་འདི།།
ཡངས་པའི་གཤིས་ཀྱིས་ཕྱུག་པའི་མི་ཡིས་སྨོན།།
སྡོང་པོ་ཆེ་མ་ཆུང་གི་བར་མཚམས་ནས།།
འདབ་ཆགས་སྣ་ཚོགས་ཕན་ཚུན་ཁ་བརྡ་བྱས།།
འགའ་རེ་དུ་མ་སྨུག་ཅིག་འཁྲིགས་པའི་སར།།
ཁྱུ་དང་ཁྱུ་ཞིག་བྱས་ཏེ་བསྐོར་བ་རྒྱག །
བར་སྣང་དབྱིངས་ལ་ནག་ནོག་ཐལ་རྡུལ་མེད།།
སྡེ་བའི་གསེབ་ལ་ཅ་ཅོའི་སྐད་ངན་བྲལ།།
ཡོད་ཚད་ལྷིང་ལ་འཇགས་པའི་ངང་ཚུས་འདིས།།
མི་ཡི་སེམས་ལ་སོས་དལ་གཤིས་ཤིག་སྟེར།།
དགོང་མོ་མུན་པ་རུབ་ཚེ་ཁྱི་དག་ཟུག །
ཞོགས་པ་སྐྱ་རེངས་དུས་ལ་བྱ་སྐད་ཐོས།།
ཡིད་འོང་དུད་འགྲོ་ཆེ་ཆུང་སྣ་ཚོགས་ཀྱིས།།
ཡུལ་གྲུ་འདི་ནས་ང་ལ་གཅེས་པ་ཚོར།།
གཉིད་ལ་བར་ཆད་བཟོ་མཁན་དུག་སྦྲང་མེད།།
མགོ་ལ་ཆག་སྒོ་འཁྲིད་མཁན་སྨྱོན་པ་མེད།།
གནས་འདི་གནས་མ་ལགས་ཀྱིས་བསྐྱོངས་བ་བཞིན།།
འགྲོ་འདུག་སྤྱོད་གསུམ་གནས་བཟོད་བདེ་བར་སྣང་།།
ཆོས་དང་ཆབ་སྲིད་འཐབ་འཛིང་མི་གཙོ་ཞིང་།།
ཕྱོགས་དང་ཕྱོགས་ཀྱི་རིས་སུ་མི་འཁོར་བའི།།
རང་དགར་དཀྱུས་མའི་ལས་ལ་གཞོལ་བྱས་པའི།།
རི་འདབས་འདི་ཡི་ཚོགས་ལ་སྙིང་ནས་སྨོན།།
ས་གཞི་མཛེས་པས་རྒྱན་པའི་ཡུལ་གྲུ་དེའི།།
འཚོ་སྡོད་མི་ཡི་གཤིས་ཀྱང་ལྷག་ཏུ་བཟང་།།
རྡོག་སྒྲ་ས་གནམ་གང་ནས་ཐོས་གྱུར་རུང་།།
ཐེས་བྱུས་ངན་པའི་རླུང་འཚུབ་ལྡང་མཁན་མེད།།
ཡར་སྟོད་རི་ལ་ཆས་ཀྱང་ལྟ་མཁན་མེད།།
མར་མདའ་གཞུང་ལ་བཞུད་ཀྱང་དམོད་མཁན་དབེན།།
གང་འདོད་འཚོ་བ་རོལ་བྱའི་སྣ་ཚོགས་ཁྲོད།།
མིག་ཅེར་སྡང་ཟུག་རྒྱག་མཁན་མེད་འདི་བཟང་།།
སྐྱེས་གཟུགས་ངན་པའི་སྒང་ལ་གཤིས་ཀྱང་ལོད།།
ཡུལ་ལུང་ཟིང་བའི་ས་དེར་སྤྱི་ཚོགས་དོག །
ཕྱི་ནང་མཁའ་དབུགས་ངན་པས་བསྒྲིབས་བྱས་རྗེས།།
ལུས་ངག་ཡིད་ཀྱི་བཀྲག་མདངས་གཞན་ལས་རྒུད།།
ཚེ་སྲོག་རིན་ཐང་གསེར་ལས་མ་ཆེ་ན།།
ནད་ཀྱིས་མནར་དུས་སྨན་པར་བཅར་མདོག་མེད།།
ལུས་ཀྱི་སྲོག་དང་སེམས་ཀྱི་རྣམ་ཤེས་གཉིས།།
ས་ཆེན་འདི་ན་མ་བཅོས་རང་གྲུབ་བདེ།།
སྐལ་བ་སྟོང་གི་ཚེ་ཐག་མི་ལྡན་ཞིང་།།
ནམ་འཆི་ངེས་མེད་ནམ་ཟླའི་འགྱུར་ཁུགས་འདྲ།།
ཉིན་ཞག་གཅིག་ལ་ལུས་སེམས་བདེ་གྱུར་ཚེ།།
སྟོངས་བསམ་སྟོང་ཞིག་བཅངས་བ་ལས་ཀྱང་སྐྱིད།།
འདི་ནས་ཕར་ལ་རྩི་བའི་ལོ་ཟླ་ཞིག །
ཅི་ཙམ་ངེས་མེད་ས་མཐའི་འཚོ་བའི་ཀློང་།།
རང་ཉིད་རང་ལ་དབང་བའི་ལམ་ཆུང་ཉིད།།
ས་ཆེན་འདི་ལ་ཟད་ཟད་བར་དུ་འཚོ།།