ནམ་མཁའ།
ང་ཚོས་རི་སྒང་འདི་ནས་ད་ལོ་གཅིག་པོ་མར་མེ་ཁྲོམ་སྐོར་ཐེངས་ག་ཚོད་ཞིག་བྱས་ཟིན་པ་ཡིན་ནམ། མར་མེ་ཁྲོམ་སྐོར་བྱས་ཚར་རྗེས་ལས་འགུལ་ཡང་ཚར་བ་ལྟ་བུ་ཞིག་རེད། མར་མེ་ཁྲོམ་སྐོར་ལ་ཡོང་མཁན་ཚང་མ་མི་དཀྱུས་མ་གཉོམ་ཆུང་རིགས་མ་གཏོགས་ཕེབས་ཡོད་ཚོད་མི་འདུག་ལ།དེ་ཡང་རྒྱལ་ཡུམ་རྐང་རྩེད་ལྒང་བུ་རྩེད་བའི་སྐབས་དང་བསྡུར་ན་མི་ཡང་མང་པོ་སླེབས་མི་འདུག་ཟེར།
བཙན་བྱོལ་གཞུང་གི་འཐབ་རྩོད་ནི་མར་མེ་ཁྲོམ་སྐོར་གྱི་ངོ་བོ་འགྱུར་ལ་ཉེ་བས་ཅི་འདྲའི་ཐབས་སྐྱོ་བོ་ཞིག་རེདའང་།མར་མེ་ཁྲོམ་སྐོར་དེ་ཡང་ལས་ཁྲལ་ལྟ་བུ་ཞིག་ཏུ་འགྱུར་འདུག བོད་ནང་ནས་མི་ལུས་རིན་པོ་ཆེ་བོད་མི་ས་ཡ་དྲུག་གི་བདེ་སྡུག་ཆེད་མེ་རུ་སྒྲོན་ཀྱང་།བཙན་བྱོལ་གྱི་སྐུ་ངོ་ཚོའི་ཁྲལ་དུ་ཆགས་པའི་མར་མེ་ཁྲོམ་སྐོར་ཆུ་ཚོད་གཅིག་ལྷག་ལ་བྱས་རྗེས།རང་སེམས་དུ་སྡུག་བསྔལ་གྱི་ཚོར་བ་ཅི་ཡང་མེད་པར་རང་ཁྱིམ་ལོག
དྲག་དམག་གི་འཇིག་རྟེན་ཏུ་གྱུར་བའི་གངས་རིའི་ལྗོངས་ཀྱི་དཔའ་བོ་དང་དཔའ་མོ་ཚོའི་ཤུལ་ལུས་ནང་མི་ཚོར་སེམས་གསོའི་འཚམས་འཕྲིན་ཙམ་ཡང་གཞུང་དམངས་གཉིས་ཀྱི་ཡིད་ལ་འཆར་ཐུབ་མེད་པ་འདི་ཅི་ཡིན་ནམ།ང་ཚོ་བོད་མི་རིགས་ཀྱི་གོམས་སྲོལ་ལ་ཡང་།མི་ཚང་ཞིག་གི་མི་ཞིག་བཀྲོངས་བའི་ཉིན་མོ་ཤུལ་ལུས་ཀྱི་ནང་མི་ཚོར་གྲོང་སྡེ་དང་མི་གཞན་ཚོས་མྱ་ངན་གྱི་འཚམས་འདྲིའི་ཞོར་དུ་སེམས་གསོ་རེ་གནང་གི་ཡོད།
ལས་འབྲས་དང་མ་གྱུར་སེམས་ཅན་མི་འདོད་པའི་ཨ་རི་དང་ཡོ་རུབ་སོགས་ཀྱི་དམག་མི་ཨ་ཧྥུ་རྒན་ནས་འདས་བའི་ཚེ་ཁོང་ཚོའི་སྲིད་འཛིན་གྱིས་ནང་མི་ཚོར་སེམས་འཕྲིན་ག་འདྲ་བྱེད་ཀྱི་འདུག འོན་ཀྱང་ང་ཚོའི་གཞུང་འཛིན་པ་ཚོས་ཁ་ནས་མར་གྱུར་སེམས་ཅན་དང་ཞི་བདེ་གླེང་ཞོར། རང་གི་མི་རིགས་ཀྱིས་བོད་མི་ས་ཡ་དྲུག་གི་ཆེད་དུ་རང་སྲོག་བློས་བཏང་ན་ཡང་ཤུལ་ལུས་ནང་མི་ཚོར་སེམས་གསོའི་འཚམས་འཕྲིན་ཙམ་ཡང་མི་བྱེད་པ་འདི།གཞུང་གི་སྐུ་ངོ་ཚོའི་སེམས་དེ་བོད་ནང་གི་གཞི་ལུས་མི་དམངས་དང་རྒྱང་ཐག་རིང་བའི་རྐྱེན་རེད་སྙམ།
མ་ཟད་ཨ་རིའི་རླུང་འཕྲིན་ཁང་གི་ཀུན་གླེང་དང་རང་དབང་རླུང་འཕྲིན་སོགས་ཀྱི་གསར་འགོད་པ་ཚོ་ཡང་གསར་འགྱུར་སྒྲོགས་སྦྱངས་མ་གཏོགས་ཡིད་ལ་འཆར་ཐུབ་ཀྱི་མེད་པ་འདྲ། ཁོང་ཚོས་ཀྱང་བཀའ་སྤྱིའི་ལས་སྣེ་རིགས་ལ་ཐད་གར་བཅའ་འདྲི་བྱས་ཏེ་རྒྱལ་སྤྱིའི་དཔའ་བོ་དང་དཔའ་མོ་ཚོའི་ནང་མི་ཚོར་ག་རེ་གསུངས་རྒྱུ་ཡོད་ཅེས་བཅའ་འདྲི་བྱས་ན་ཆོག་མོད།འོན་ཀྱང་ཁོང་ཚོ་ཡང་དེང་སང་གི་འཕྲུལ་ཆས་མི་བཞིན་མཛུབ་མོ་གཅིག་གིས་མནན་པ་ལ་རྟེན་པ་བཞིན་ཡིད་ལ་མ་འཆར་བ་ཡིན་ནམ།ཡང་ན་ཁོང་ཚོའི་ལས་ཁུང་གི་སྒྲིགས་འཛུགས་ལ་འགལ་བ་རེད།གཅིག་བྱས་ན་ཁོང་ཚོའི་ཡིད་ལ་འཆར་བར་དཀའ་གང་ཡིན་ཟེར་ན་གསར་འགོད་ཀྱི་ཉམས་མྱོང་མེད་ལ།གསར་འགོད་ཀྱི་སློབ་སྦྱོང་ཡང་མེད་པའི་མི་དག་ཡར་སྒྲིགས་ནས་བཞག་ཡོད། ཡིན་ཡང་འཇིགས་སྐུལ་རིང་ལུགས་པའི་འགོ་བ་བྷེན་ལ་རྡེན་དམར་གསོད་བྱས་དུས་ཀུན་གླེང་ཚང་གིས་རྒྱ་གར་ལྷོ་ཕྱོགས་ནས་བཟུང་བལ་ཡུལ་དང་རྡ་ས་སོགས་གང་སར་བཅའ་འདྲི་ཐད་གར་བྱས་ཏེ་བགྲོ་གླེང་འདྲ་བྱེད་ཀྱི་འདུག དེ་ནི་དྲང་མོ་བཤད་ན་ང་ཚོ་བོད་མི་ཚོར་འབྲེལ་བ་གཅིག་ཀྱང་མེད།
རྡ་ས་འདིར་ཆབ་སྲིད་མི་གླེང་མཁན་ཡང་མེད་ལ་ཆབ་སྲིད་མི་ཤེས་མཁན་ཡང་མེད།ཡིན་ད་ཡིན་རང་ཡུལ་ཤོར་བའི་མི་དག་འཛོམས་སའི་ཆབ་སྲིད་ཀྱི་རི་སྒང་ཞིག་ཡིན། རི་སྒང་དེར་མཇུག་མ་རིང་མོའི་སྤྲེའུ་ཚོགས་པའི་ནགས་ཚལ་ཞིག་ཀྱང་ཡིན་པ་མ་ཟད།མཇུག་མ་མེད་པའི་ཆབ་སྲིད་ཀྱི་ཚིག་ཙམ་གྱིས་འཁྲབ་སྟོན་བྱེད་པའི་རི་སྒང་ཞིག་ཀྱང་ཡིན། ང་ཚོ་ཆ་ཚང་གིས་སོར་མོ་བཅུ་བོ་སོ་སོའི་བྲང་ལ་བཞག་སྟེ་བསམ་གཞིགས་བྱས་དང་།གལ་སྲིད་སོ་སོའི་སྤུན་མཆེད་ཞིག་གིས་རང་ལུས་མེ་བསྲེགས་བཏང་རྗེས།རྡ་སའི་རི་སྒང་ནས་མི་དམངས་འགས་མར་མེ་ཁྲོམ་སྐོར་བྱས་རྗེས་གཞུང་གི་དབང་འཛིན་པ་ཚོས་ཤུལ་ལུས་ནང་མི་ཚོར་སེམས་གསོའི་འཚམས་འཕྲིན་ཙམ་ཡང་མེད་པར་ཤར་རྒྱག་རང་ཁྱིམ་དུ་ལོག་ཚེ།ཁྱེད་ཅག་གི་སེམས་སུ་ཅི་ཞིག་འཆར་རྒྱུ་ཡིན་ནམ།ངས་འདི་ལྟར་བཤད་ཚེ་ནམ་མཁས་གཞུང་ལ་ཁ་རྡུང་གཏོང་གི་འདུག་ཟེར་ནས་ང་ལ་བཀའ་ཀྱོན་གཏོང་སྲིད་མོད།ཡིན་ཡང་ང་ལ་ཁ་རྡུང་གཏོང་འདོད་མཁན་ཚོས་བཏང་ན་ཆོག་ལ་ཚིག་ངན་ག་རེ་བཤད་ཀྱང་ཆོག་ང་དེ་ལཁོང་ཁྲོ་ལངས་དགོས་དོན་མེད།
ངས་ཀྱང་དམངས་གཙོའི་སྨྲ་བརྗོད་ཀྱི་རང་དབང་བེད་སྤྱོད་གཏོང་གི་ཡོད་ལ།ཁྱེད་ཚོས་ཀྱང་སྨྲ་བརྗོད་རང་དབང་གིས་ང་ལ་ཁ་རྡུང་བཏང་ཆོག མ་ཟད་ངས་རྒྱལ་གཅེས་དཔའ་བོ་དང་དཔའ་མོ་ཚོའི་སྙིང་སྟོབས་དང་ཤུལ་ལུས་ནང་མི་ཚོའི་སེམས་ཀྱི་སྡུག་བསྔལ་ལ་གདོང་སེམས་མཉམ་བསྐྱེད་ཆེད་བཤད་པ་ཡིན།ང་ལྟ་བུ་ཞིག་གིས་ནང་མི་ཚོར་སེམས་འཕྲིན་ཕུལ་ཀྱང་ནུས་པ་མི་འདུག དེ་བས་གཞུང་གི་བཀའ་ཁྲི་དང་གྲོས་ཚོགས་ཚོགས་གཙོ་གང་རུང་གིས་རླུང་འཕྲིན་བརྒྱུད་ནས་སེམས་འཕྲིན་རེ་གསུངས་ན་ཤུལ་ལུས་ནང་མི་ཚོའི་སེམས་ལ་ཕན་ཐོག་ཡོད་ལ།གཞི་ལུས་སྤུན་ཟླ་ཚོའི་སེམས་ཤུགས་མི་ཆགས་པ་ཕན་ཐོག་ཡོད།
རྒྱལ་གཅེས་དཔའ་བོ་དཔའ་མོ་ཚོའི་སྙིང་སྟོབས་དང་རྒྱལ་བཙོང་ང་ཕོད་གཉིས་བསྡུར་ན་ད་རུང་གཞུང་གི་ངོས་ན་རྒྱལ་བཙོང་ང་ཕོད་རིན་ཐང་ཆེ་བར་འདུག གང་གིས་ཟེར་ན་ང་ཕོད་ཤི་རྗེས་གཞུང་གིས་ཡིག་ངག་གཉིས་ཀྱིས་མྱ་ངན་འཚམས་འཕྲིན་ཕུལ་ཡོད། དེ་མ་ཡིན་པའི་ཁ་སང་བལ་ཡལ་ཁྲིམས་ཁང་གིས་བོད་ཀྱི་ཞི་བའི་འཐབ་རྩོད་པ་གླིང་ཚ་རྡོ་རྗེ་ལོ་ལྔ་ཡི་ཁྲིམས་ཐག་བཅད་ཟིན་མོད།གཞུང་གི་ངོས་ནས་ནུས་པ་ཐོན་མིན་ལ་མ་ལྟས་བར་བལ་གཞུང་ལ་ཁྲིམས་ཐག་གཅོད་དགོས་བའི་རྒྱུ་མཚན་གང་ཡིན་སོགས་ཀྱི་དྲི་བ་ཙམ་ཡང་བཀོད་ཡོད་མེད་རེད། ཁོའི་ཕ་མ་གཉིས་ཁོང་ཚོའི་མིག་མདུན་ན་ཡོད་ཀྱང་སེམས་གསོའི་འཚམས་འཕྲིན་ཞིག་ཀྱང་ཡོད་པ་ཡང་གོ་ཐོས་མི་འདུག་ལ།དུས་བབ་གསར་ཤོག་དང་བང་ཆེན་གསར་ཤོག་སོགས་ཀྱིས་ཀྱང་དེའི་སྐོར་ལ་ཁྲི་ཐོག་ན་འགྱིང་ངེར་ཡོད་པའི་སྐུ་ངོ་ཚོར་བསམ་ཚུལ་ཙམ་ཡང་བཅའ་འདྲི་བྱས་མི་འདུག་པས་བློ་ཕམ་བྱུང་།
ངས་སྨྱུག་ཁ་ནང་ལ་གཏད་འདུག་བསམ་མཁན་ཚོས་ཀྱང་ཁ་རྡུང་གཏོང་ཞོར་བསམ་གཞིགས་ཞིབ་མོར་རེ་གནང་གལ་ཆེ།ང་ཡང་ཁྱེད་ཚོ་བཞིན་རང་གཞུང་ལ་ཁ་ཞེ་གཉིས་མེད་ཀྱི་དགའ་མཁན་ཞིག་ཡིན་མོད།དེ་རིང་གི་འདི་ཁོག་ལ་བཅུགས་ཀྱང་མནོན་ཐུབ་ཀྱི་མི་འདུག་པས་རང་དབང་མེད་པར་འབྲི་ཤོར་སོང་བས་ཀློག་མཁན་ཡོངས་ལ་དགོངས་འགལ་མེད་པར་ཞུ།ནམ་མཁས༡༦/༦༢༠༡༢ལ་ཡོ་རུབ་ནས་བྲིས།
ཁྱེད་ཀྱིས་བཤད་པ་བདེན་པ་རེད།བརྙན་འཕྲིན་གསར་འགོད་དང་གསར་ཤོག་གསར་འགོད་པ་ཚོ་ཡང་འཕྲུལ་ཆས་ཀྱི་མི་བཞིན་གནས་ཚུལ་འགོད་རྒྱུ་དང་གནས་ཚུལ་སྒྲོགས་སྦྱངས་བྱེད་རྒྱུ་མ་གཏོགས་ཡིད་ལ་དྲན་རྒྱུ་མེད་ཚོད་རེད།ཁྲི་ཐོག་གི་མི་དེ་ཚོ་བཅའ་འདྲི་རེ་བྱས་ན་ཆོག དེ་མ་གཏོགས་དཔོན་པོ་ཚོའི་ཡིད་ལ་དྲན་རྒྱུ་མེད་ཐག་ཆོད་།
ཁྱེད་ཀྱི་སྐད་ཆ་ལ་རྒྱབ་སྐྱོར་བརྒྱ་ཆ་བརྒྱ་ནས་བརྒྱ་ཡོད།
གཞུང་དམངས་གཉིས་ནས་མེ་སྲོག་གི་ལས་འགུལ་འདི་ལ་སྐུལ་སློང་དང་རྗེས་སུ་ཡིད་རངས་མེད་པའི་ཁུལ་རེད། ཡིན་ན་ཡང་བོད་མི་ཞིག་གི་འདི་ལྟར་བོད་མི་རིགས་ཆད་དུ་ལས་གཏོང་ཆེན་མོ་འདི་ལ་མར་མེ་ཁྲོམ་སྐོར་ཞུ་དང་ཞུ། ང་ཚོད་བོད་པ་ཡིན་པ་གཅིག་པ་རེད། ཡིན་ན་ཡང་ཤུལ་ལུས་ནང་མིར་སེམས་གསོའི་འཚམས་འཕྲིན་འབུལ་བ་ནི་གཞུང་དམངས་གཉིས་ཀྱིས་འདི་ལ་རྒྱབ་སྐྱོར་ཡོད་པ་དང་དེ་ལ་སྐུལ་འདེད་ཡོད་པའི་རྣམ་པ་རེད། ངས་ལྟོས་ན་དེ་ནི་མ་འགྲིག་པ་རེད། སྐུ་ངོ་ཚོས་གང་འདྲ་ཞིག་གི་སྒོ་ནས་སེམས་གསོའི་སྐད་ཆའི་གོ་རིམ་སྒྲུག་དགོས་རེད། དེ་ན་ཁྱོས་འདི་ནས་སེམས་གསོའི་དཔེ་མཚོན་ཙམ་འདིར་ཕྲིས་དང་དེ་ནས་ང་ཚོས་དེ་ཡི་དགེ་སྐྱོན་གྱི་དབྱེ་བ་དང་སྐུ་ངོ་ཚོ་གཉིད་ལས་སློང་ཨེ་ཐུབ་ལྟ་བའི་བསྒྲོ་གླེང་བྱེད་དགོས། དེ་མ་གཏོགས་མར་མེ་ཁྲོམ་སྐོར་ཚར་དུས་ལས་འགུལ་ཚར་བར་སྣང་ན་སེམས་གསོའི་ཡིག་གེ་ཕུལ་ཚར་དུས་ལས་འགུལ་ཚར་བ་འདྲ་བོ་མི་ཆགས་པ་མི་སྲིད། ནམ་མཁའ་ལགས་ད་ནས་བཟུང་བཅའ་བའི་བཅའ་སྟངས་ལས་བཅའ་དགོས་བའི་དགོས་སྟངས་མིན་ཐལ། སེམས་ཤུགས་འདི་བོད་ཞིག་ཡིན་པའི་དུངས་ཞེན་རེད། སྲལ་འི།
ནམ་མཁའ་ལགས་ཀྱིས་ཡག་པོ་གསུང་འདུག། ཁྲི་ཐོག་ལ་འགྱིང་པའི་སྐུ་ངོ་རྒྱགས་ལུག་དེ་ཚོ་་་་ཅི་བྱས་ན་དྲག་གི་རེད། ངོ་མ་བཤད་ན་ལོ་མཇུག་གི་ཉི་ཤུ་དགུའི་གླུད་ལ་བརྫངས་ན་ཡག་ཤོས་རེད།
ནམ་མཁའ་ལགས་ཀྱི་རྩོམ་འདི་ནང་དོན་ཧ་ཅང་ལེགས་ཀྱང་སྐུ་ངོ་ཚོས་རྣ་ཅོག་རྒྱབ་ཀྱི་རླུང་བུ་བཞིན་སྣང་མེད་དུ་གཏོང་སྲིད། ད་དུང་རང་ཅག་རྣམས་ཀྱིས་མུ་མཐུད་ནས་གདུང་སེམས་མཉམ་སྐྱེད་ཀྱིས་ལས་འགུལ་ཚང་མར་ཞུགས་ཐུབ་པའི་བརྩོན་ལེན་བྱེད་མུས་ལགས་སོ།
འདི་འདྲའི་འབད་པ་་ངོ་མ་གལ་ཆེ་གི་།
སྐྱབས་མགོན་རིན་པོ་ཆེས་དམངས་གཅོའི་གསོལ་རས་གནང་ན་ཡང་ ཇི་སྲིད་ཡང་སྲིད་ལམ་ལུགས་འདི་སྒོ་མ་རྒྱབ་བར་དམངས་གཅོ་ཡང་དག་ཞིག་མི་ཡོང་ རྒྱུ་མཚན་ད་ལྟ་སྲིད་ཕྱོག་ཀྱི་དམངས་གཙོ་ཕྲན་བུ་ཡོད་ན་ཡང་ ཆོས་ཕྱོགས་ཀྱི་དམངས་གཙོ་དེ་མེད་ངོ་མ་རེད་ གལ་སྲིད་ཡོད་ན་ཆོས་རྒྱུད་དབུ་འཛིན་འོས་ཤོག་ཀྱི་ལམ་ནས་མི་བཀོ་བ་ཅི་ཡིན་།
ཡག་པོ་འདུག་པས་རྒྱབ་སྐྱོར་ཡོད་་་་་
ཨོ་སྐྱབས་སུ་མཆི
གཞུང་དང་གཞུང་འབྲེལ་མིན་པའི་ཚོགས་པ་ཚོས་ཚོགས་འདུ་དང་ལས་འགུལ་སོགས་ནམ་ཡོད་ལ། བོད་ནང་གི་མེར་བསྲེགས་གཏོང་མཁན་དཔའ་བོ་དཔའ་མོ་རྣམས་དང་ཤུལ་ལུས་ནང་མི་ལ་གདུང་སེམས་མཉམ་སྐྱེད་ཡོད་ཅེས་གསུང་གི་འདུག དེ་མིན་སེམས་གསོའི་འཚམས་འཕྲིན་སོགས་བསྐུར་ན་ནི་ཤུལ་ལུས་ནང་མི་ཚོར་རྒྱ་གཞུང་གིས་དཀའ་ངལ་ཆེན་པོ་སྤྲད་རྒྱུ་ཡིན་པ་བཤད་མ་དགོས་པ་རེད། གླིང་ཚ་ཚེ་བརྟན་རྡོ་རྗེ་ལ་ཁྲིམས་ཐག་བཅད་པའི་གནས་ཚུལ་དེ་བྱུང་ནས་ཉིན་ཁ་ཤས་ལས་ཕྱིན་མེད་པས་དེའི་ཐད་གཞུང་དང་ཚོགས་པ་ཚོས་ཅི་ཡང་བྱས་མ་སོང་ཞེས་བཤད་རྒྱུ་ད་ལྟ་སྔ་དྲག་པ་མིན་ནམ་སྙམས། དེས་ན་ནམ་མཁའི་སྐད་ཆ་དེ་ཚོ་གནས་ལུགས་ཡོད་པ་ཞིག་མཐོང་མ་སོང་།
སྐུ་ཞབས་ནམ་མཁའ་ལགས་ཀྱིས་བཤད་པ་ངེས་བར་དོ་སྣང་བྱེད་དགོས་པ་འདུག །བཙན་བྱོལ་ལ་རེ་བ་རྒྱག་ས་ཞིག་ཡོད་ན་མེད་ན་སྒྲིག་འཛུགས་ཁག་རེད། དགོན་སྡེ་གྲྭ་ཚང་ནི་རང་གི་སྐད་ཡིག་དང་རིག་གཞུང་གང་ཅིའི་ཐད་ནས་བོད་ནང་ཁྲག་གི་རྒྱུ་བ་ཇི་བཞིན་ཁྱབ་ཐུབ་ཡོད་ལ་ནུས་པ་ཐོན་ཐུབ་ཀྱི་ཡོད། དེ་མིན་ཚོགས་པ་གཞན་པ་ནི་ཤེས་ཡོན་དང་ཆབ་སྲིད་ཐད་ནས་སྤྱི་ཚོགས་ནང་ནུས་པ་ཐོན་པ་ཞིག་ཡོང་ཐུབ་ཀྱི་མེད་པ་ཅི་ཡིན་ནམ།
ང་ཚོས་ནམ་རྒྱུན་གཞུང་དང་གཞུང་འབྲེལ་མིན་པའི་ཚོགས་པ་དག་ལ་འཁང་ར་བྱེད་བདེ་བ་དེ་མང་གཙོས་འགྲོ་སྟངས་ཤིག་ཡིན་ལས་ཆེ། ཡིན་ནའང་ངས་འདི་ལྟར་འདྲི་ན་འདོད། གཞུང་དང་གཞུང་འབྲེལ་མིན་པའི་ཚོགས་པ་མ་གཏོགས་རང་ཉིད་ལ་འགན་ཡོད་དམ་མེད། སོ་སོས་འགན་ཅི་ཞིག་ཁུར་ཡོད། ཡང་ཅིག་བཤད་ན། གཞན་ལ་ཕན་སེམས་མེད་ཅེས་རྒྱུན་དུ་སྨྲས། རང་ལ་ཉམས་ལེན་མེད་པ་ཡིད་སྐྱོའི་གནས།
ང་ཚོའི་ག་དུས་ཡིན་རུང་སོ་སོའི་གཞུང་ལ་ངན་སྨོད་འདྲ་བྱེད་ནས་འདུག་ན་ཕན་ཐོག་གང་ཡང་མེད། དེ་ལས་ཁྱོད་ཚོས་ལས་འགུལ་རེ་སྤེལ་ནས་མི་ལ་ཤོད་དང་ཡག་པོ་ཡོད། དེ་མིན་འགན་ཁུར་མེད་པའི་ཉོབ་གཏམ་དེ་དག་ཉུང་ན་མི་མཛེས་སམ། ངས་ལྟས་ན་གཞུང་ངོས་ནས་ནུས་ཤུག་གང་ཡོད་གནང་གི་འདུག་བསམ་གྱི་ཡོད། རྒྱ་སྤྱི་དང་རྒྱ་ནང་སོ་སོར་བརྡ་ལེན་འཕྲོད་པའི་ལས་འགུལ་ཡང་གང་མང་སྤེལ་བཞིན་འདུག རྒྱབ་སྐྱོར་གནང་མི་ནི་རྒྱ་ཁབ་སོ་སོར་རག་ལུས་པ་ལས་བོད་མིའི་སྒྲིགས་འཛུག་ལ་གང་ཡང་བྱག་ཡག་མེད་ལ་་་དེ་ལས་ཀྱང་བཀའ་གཏོང་དབང་མེད་པར་ཁྱོད་ཚོས་ལོས་ཤེས། འོ་ན་ཁྱོད་ཚོས་ལས་འགུལ་འདི་ལྟ་བུར་ཞིག་སྤེལ་དགོས་འདུག་ཞེས་གཞུང་ལ་བསམ་འཆར་ཕུལ་རུང་མི་ཆོག་པ་གང་ཡང་མེད། དེ་མིན་དྲྭ་ནང་དུ་འགན་ཁུར་མེད་པའི་སྐད་ཆ་ཅང་ཅང་བཤད་ན་ཕན་ལས་མནོད་ཆེ་བ་མ་གཏོག་གང་ཡང་མེད་པར་ལོས་མཁྱེན།
ད་ཆ་བོད་མིའི་མཐོ་རིམ་འགོ་ཁྲིད་ཚོས་ཇི་གང་འཇོན་གྱི་མེད་པ་དངོས་ཡོད་གནས་ཚུལ་རེད་མ་གཏོགས།མི་མང་གིས་ལས་འགུལ་སྤེལ་གྱི་འདུག་ག ལོ་སྔ་ཕྱི་ཙམ་ནང་བོད་མི་བཞི་བཅུ་ལྷག་གིས་རང་ལུས་མེར་བསྲེགས་བཏང་སོང་ང་།རི་འགོའི་ལུག་རྫི་དང་ན་ཁའི་ཆུ་ལེན་གྱི་ནག་མོ་ཚོ་ཚུན་ཆད་ཡར་ལངས་བརྒྱབས་ཏེ་མི་ག་ཚོད་འཇུས་སོང་།དགེ་འདུན་པ་དང་སློབ་ཕྲུག་ག་ཚོད་ལས་འགུལ་སྤེལ་ཏེ་བཙོན་འཇུག་བྱས་སོང་།ཐ་ན་ལོ་བརྒྱད་དགུ་ཅན་གྱི་སློབ་ཆུང་གི་ཕྲུ་གུ་ཚུན་ཆད་ཡར་ལངས་ངོ་རྒོལ་བྱས་སོང་ང་།ལོ་སྔ་ཕྱི་འདི་དག་ནང་བོད་མི་མང་གིས་ཞི་བའི་ལས་འགུལ་ལྟ་བུ་ཅིག་སུས་སྤེལ་ཐུབ་ཡོད་རེད།འོན་ཀྱང་།ཕྱི་རྒྱལ་དུ་ཡོད་བོད་མིའི་སྒྲིག་འཛུགས་དང་ཚོགས་པ་ཁག་སོགས་ནས་མཆོད་འབུལ་དང་མར་མེ་ཁྲོམ་བསྐོར་ཙམ་ཕྱིའི་མཐོང་སྣང་འདྲ་ཆགས་པོ་ཙམ་ལས་ཇི་བྱས་མྱོང་མེད་ད།དེ་འདྲ་སོང་མ་འཇོན་ན་མ་འཇོན་པ་བཤད་དགོས་རེད་ལ་བསམ་བཞིན་ཁྱད་གསོད་ཀྱིས་མ་བྱས་པ་ཡིན་ན་ལྷག་པར་ངོ་རྒོལ་བྱེད་དགོས་རེད།
ད་ལྟ་བར་བཀའ་ཤག་གསར་པས་ཕྱི་རྒྱལ་ལ་འབྲེལ་བྱས་ཏེ་བོད་མི་སྲིད་བཙོན་གཅིག་ལ་སྨན་བཅོས་ཙམ་ཡང་རག་མྱོང་མེད་ད།བྱས་ཚད་མང་ཆེ་ཤོས་གྲུབ་འབྲས་མེད་པའི་དུས་ཚོད་གཏོང་ཐབས་ཙམ་རེད།
ནམ་མཁའ་ལགས། ཁྱེད་ཀྱིས་གསུང་བ་ལ་རྒྱབ་སྐྱོར་ཡོད། བཤད་ཐུབ་མཁན་གྱིས་བཤད་པ་དེ་མ་བཤད་པ་ལས་ཡག་གི་རེད། བདག་རང་གཞུང་ལ་སྐྱོན་རྒྱག་རྒྱུར་མི་དགའ་ཡང་། ཁྱེད་ཀྱིས་གསུང་ལ་གནས་ལུགས་འདུག་པས་ད་ཐེངས་རྒྱབ་སྐྱོར་བྱེད་འདོད་བྱུང་། མ་གཞི་ནས་ང་ཚོའི་རྩ་དོན་དེ་བག་ལ་ཞ་བའི་ཉེན་ཁ་འདུག དཔའ་བོ་མང་བོ་ཞིག་གི་ཚེ་སྲོག་དམར་བོ་མེ་ལ་ཕུལ་ཡང་ད་ནི་རྒྱུན་གོམས་སུ་སོང་འདུག་པའི་ཚོར་བ་བྱུང་། བོད་རང་དབང་ང་ཚོའི་སེམས་སུ་གསོན་ཡོད་ན་ནམ་ཞིག་རེ་བ་ཡོད་པ་རེད་མོད། ད་ནི་སེམས་ན་རྙིང་ཀྱིན་པའི་རྟགས་མཚན་མང་བོ་འདུག བོད་ནང་གི་རང་དབང་གི་སྐད་འབོད་ཙམ་ལ་དོ་སྣང་ཙམ་ཡང་བྱེད་དཀའ་བའི་ཚོད་དུ་འདུག་ལ། ཚེ་སྲོག་མེ་ལ་གཏིམ་ཡང་ད་ནི་ཚོར་ཤུགས་དེ་འདྲ་ཞིག་མི་འདུག་པའི་དུས་ལ་སླེབ་འདུག ད་ག་རེ་བྱེད་དགོས་རེད། ཡིད་ཆད་པའི་ཉིན་མོར་བོད་ནང་སྐད་འབོད་ཙམ་ཡང་བྱེད་མཁན་མ་བྱུང་ན་ང་ཚོས་རྒྱལ་སྤྱིའི་སྟེང་ཅི་ཞིག་གི་བདེན་པ་སྟོན་དགོས་སམ། གཞུང་གིས་གང་ཡང་མ་བྱས་པ་མིན་ཡང་ད་ལྟ་དེ་ཙམ་གྱིས་ཡིད་ཚིམ་ཐབས་ག་ལ་ཡོད། མུ་མཐུད་འདི་འདྲ་འབྲི་རོགས་ཞུ་འདོད་བྱུང་། ཁྱེད་ཀྱི་ངོ་སོ་གཏོད། ང་ཚོ་འཆི་མི་སྲིད། ང་ཚོས་ངེས་པར་དུ་གསོན་ལམ་འཚོལ་དགོས་་་་ ་་་་་
ནམ་མཁའ་ལགས་ཀྱིས་ཡག་པོ་གསུང་འདུག། ཡིན་ན་ཡང་ཁྲི་ཐོག་ལ་འགྱིང་པའི་སྐུ་ངོ་རྒྱགས་ལུག་དེ་ཚོ་ཅིག་པོ་ལ་སྐྱོན་ཆ་འགྲངས་བསྡད་ན་འགྲིག་མི་འདུག།་དེ་མིན་པ་ང་ཚོའི་སྦྱི་ཚོགས་ནང་ལ་བླ་མ་དང་མཁན་པོ་གཙོས་ཤེས་ཡོན་པ་དང་། མི་རིགས་ཉམས་ཞིབ་པ། ཆབ་སྲིད་པ་མང་པོ་ཡོད་རེད་ཁོ་ཚོས་ག་རེད་བྱས་ནས་ལས་འགུལ་ཆུང་ཆུང་འདི་འདྲའི་ཞིག་ལ་ཡོང་མི་ཐུབ་པར་་གང་ཡིན་ནམ།
གཞིས་ལུས་ཀྱི་ཚེ་སྲོག་རེ་རེ། བྱེས་འབྱོར་གྱི་མར་མེ་རྐང་རེ།
མི་སེར་གྱིས་ལས་འགུལ་རེ་རེ། གཞུང་འཛིན་གྱིས་སྣང་མེད་རེ་རེ།
མི་མང་གི་འོས་ཤོག་རེ་རེ། སྐུ་ངོ་ཡི་ང་རྒྱལ་རེ་རེ།
མི་མང་གི་འདུས་ཚོགས་རེ་རེར། བཀའ་ཁྲི་ཡིས་རང་བསྟོད་རེ་རེ།
བཀའ་ཁྲི་ཡི་སྐོར་རྒྱགས་རེ་རེ། འབྲས་མེད་ཀྱི་གྱོང་ཁ་རེ་རེ།
བཀའ་ཁྲིའི་གཏམ་བཤད་རེ་རེར། ཤེས་ཡོན་གྱི་མཆོག་འཛིན་སྣ་རེ།
ནམ་མཁའ་ལགས།ཁྱེད་ཀྱི་བསམ་ཚུལ་ཐུང་ངུ་འདིས་ཕན་ཐོག་ཅུང་ཟད་བྱུང་ཡོད་ས་རེད།གོང་གི་ཀ་སྦུག་གི་མར་མེ་ཁྲོམ་སྐོར་ཤལ་ལུས་ནང་མི་ལ་སེམས་གསོའི་ཆེད་དུ་ཡིན་ལབ་འདུག ད་རིམ་གྱིས་སྐུ་ངོ་རྒྱགས་པ་ཚོས་ཀྱང་ཁ་ནས་ཚིག་འགའ་ཐོན་ས་རེད།དེ་མིན་དེ་རིང་ནང་མི་ཤུལ་ཆེད་དུམར་མེ་ཁྲོམ་སྐོར་བྱས་ཟེར་བ་ཞིག་གོ་མ་སོང་ལ།
དེ་བར་དུ་ཅས་བཅོས་རོགས།ཤུལ་ལུས་ལ་བཅོས་རོགས།