བློ་བཟང་རིན་ཆེན་གྱིས་བསྒྱུར།
1 Knowledge will give you power, but good character will give you respect.
1 ཤེས་ཡོན་གྱིས་ཁྱོད་ལ་སྟོབས་ཤུགས་སྦྱིན་མོད། འོན་ཀྱང་གཤིས་རྒྱུད་བཟང་པོས་ཁྱོད་ལ་བརྩི་འཇོག་སྦྱིན་ངེས།
2 Don’t change yourself to win someone’s heart. Stay true and you’ll find someone who likes you for being you.
2 མི་གཞན་གྱི་ཡིད་སེམས་འགུག་ཆེད་རང་ཉིད་མ་བསྒྱུར་བར་བདེན་པ་རྒྱུན་འཁྱོངས་བྱས་ན། ད་གཟོ་ཁྱོད་ཀྱིས་རང་ཉིད་ལ་དགའ་བའི་མི་ཞིག་རྙེད་ཐུབ།
3 Trust is like glass，once broken it will never be the same again。
3 ཡིད་ཆེས་ནི་ཤེལ་དམ་ཞིག་དང་མཚུངས། ཐེངས་གཅིག་གཏོར་བརླག་ཏུ་སོང་ཚེ། ནམ་ཡང་སྔར་བཞིན་འགྱུར་རྒྱུ་མེད།
4 Always love your friends from your heart and not from your mood or need.
4 རང་གི་བློས་ཐུབ་ཀྱི་གྲོགས་པོ་ལ་རྒྱུན་དུ་སེམས་སྟེང་ནས་བརྩེ་བ་སྤྲོད་དགོས་པ་ལས། རང་གི་ཁམས་དང་དགོས་མཁོ་དང་བསྟུན་ནས་བརྩེ་བ་སྤྲོད་མི་བྱ།
5 Never lie to someone who trusts you and never trust someone who lies to you.
5 ཁྱོད་ལ་ཡིད་རྟོན་བྱེད་པའི་མི་ལ་ནམ་ཡང་རྫུན་བཤད་མི་རུང་ཞིང་། ཁྱོད་ལ་རྫུན་བཤད་པའི་མི་ལ་ནམ་ཡང་ཡིད་རྟོན་བྱ་མི་རུང་།
6 Don’t change so people will like you. Be yourself and the right people will love the real you.
6 རང་ཉིད་ལ་འགྱུར་བ་མི་གཏོང་བར་རང་ཉིད་ངོ་མ་དེ་བྱོས་དང་། མི་མང་པོ་ཞིག་ཁྱེད་ཉིད་ལ་དགའ་བར་ངེས་ལ། དོན་དམ་གྱི་མི་ཞིག་གིས་ཁྱེད་ལ་བརྩེ་བ་སྤྲོད་ངེས།
7 Keep your distance from people who will never admit they are wrong and always try to make you feel like it’s all your fault.
7 ནོར་འཁྲུལ་ངོས་ལེན་མི་བྱེད་པའི་མི་ལ་རྒྱང་ཐག་འཇོག་དགོས། ཁོ་ཚོས་རྒྱུན་དུ་རང་གི་ནོར་འཁྲུལ་ཡོད་ཚད་ཁྱེད་ལ་འགེལ་ངེས།
8 Success is not always what you see.
8 རྒྱལ་ཁ་ནི་ཁྱེད་ཀྱི་མཐོང་བ་ལྟར་མིན།
9 Broken trust is like a melted chocolate, no matter how you tried to freeze it it will never return to its original shape.
9 ཆག་གྲུམ་ཤོར་བའི་ཡིད་ཆེས་ནི་ཅོག་ལེ་ཊི་ཞུ་བ་དང་མཚུངས། ཁྱེད་ཀྱིས་དེ་ཇི་ལྟར་འཁྱག་པ་བཟོས་ཀྱང་སྔར་གྱི་རྣམ་པར་ཕྱིར་ལོག་མི་ཐུབ།
10 When someone is so sweet to you, don’t expect that person will be like that all the time. Remember, even the sweetest chocolate expires.
10 མི་ཞིག་གིས་ཁྱེད་ལ་སྤྲོ་སྣང་སྤྲོད་སྐབས། ཞིམ་མངར་ལྡན་པའི་ཅོག་ལེ་ཊི་ལའང་དུས་ཚོད་རྫོགས་རྒྱུ་ཡོད་པ་ཡིད་ལ་བཅིངས་ནས། ཁོས་ནམ་ཡང་དེ་ལྟར་བྱེད་པའི་རེ་བ་མ་གནང་།
11 Never stop trying. Never stop believing. Never give up. Your day will come.
11 བརྩོན་པ་མ་ལྷོད། ཡིད་ཆེས་མ་བརླག་པར་མདུན་དུ་བསྐྱོད་ཚེ། ཉིན་ཞིག་ཁྱེད་ཀྱི་དམིགས་འདུན་ལ་སླེབ་ངེས།
2020/12/25
•འདི་ནི་ཁོ་བོས་དྲ་ལམ་གྱི་ལེགས་བཤད་ཐུང་ངུ་གོ་སླ་བ་འགའ་ཞིག་ཕྱོགས་བསྒྲིགས་བྱས་ཏེ་བོད་ཡིག་ཏུ་བསྒྱུར་ཁུལ་བྱས་པ་ཙམ་ལགས་ན། ལྷག་བསམ་གཙང་བའི་དགེ་རྒན་རྣམས་དང་དྲ་གྲོགས་དག་གིས་ནོར་བ་ཡོ་བསྲང་དང་ལམ་སྟོན་གང་མང་ཞིག་གནང་བའི་རེ་བ་ལྕི།
ཁྱེད་རང་གི་འགྱུར་འདི་ཡག་པོ་བྱུང་འདུག ཕལ་ཚིག་མང་བའི་འགྱུར་གསར་ཞིག་དགོས་ན་ངས་བྲིས་ནས་ཕུལ་ཆོག
ཡོ་བ་བསྲང་ཡ་ཡོད་མེད་གས་ཤེས་མ་སོང་། གང་ལྟར་ང་ནི་ཚིགས་བཅད་གཅིག་མེད་ཀྱང་བོད་ཀྱི་སྐད་ཡིག་ཏུ་ལེན་མཁན་རྣམ་པར་རབ་ཏུ་དགའ། ཤིན་ཏུ་གུས། བཀའ་དྲིན་ཆེ།
1 Knowledge will give you power, but good character will give you respect.
1 ཤེས་ཡོན་གྱིས་ཁྱོད་ལ་སྟོབས་ཤུགས་སྤྲོད་ཐུབ་ཀྱང་། ཡ་རབས་བཟང་སྤྱོད་ཀྱིས་ཁྱོད་ལ་བརྩི་མཐོང་འོངས།
2 Don’t change yourself to win someone’s heart. Stay true and you’ll find someone who likes you for being you.
2 མི་གཞན་པ་ཞིག་གི་ཡིད་སེམས་འགུག་པར་རང་བློ་སྒྱུར་མི་ཉན། རང་ཚུགས་མུ་མཐུད་ནས་སྡོད་དང་། ཁྱོད་རང་ལ་དགའ་མཁན་ཞིག་ཡོད་པ་རང་གིས་ཤེས་ཐུབ།
3 Trust is like glass，once broken it will never be the same again。
3 ཡིད་ཆེས་ནི་ཤེལ་ནང་བཞིན་རེད། ལན་ཅིག་ཆག་སོང་ན། སྔར་ནང་བཞིན་ཡང་སྐྱར་ནམ་ཡང་མི་འོངས།
4 Always love your friends from your heart and not from your mood or need.
4 རང་སྐྱིད་པོ་ཡོད་མེད་དང་། དགོས་མཁོ་དང་བསྟུན་ནས་མ་ཡིན་པར། རང་གིས་གྲོགས་པོ་ཚོ་ལ་སྙིང་གུང་ནས་དགའ་དགོས།
5 Never lie to someone who trusts you and never trust someone who lies to you.
5 ཁྱོད་ལ་ཡིད་ཆེས་བྱེད་མཁན་མི་ལ་རྫུན་ནམ་ཡང་ཤོད་མི་རུང་། ཁྱོད་ལ་རྫུན་བཤད་པའི་མི་ལ་ཡིད་ཆེས་ནམ་ཡང་བྱེད་རྒྱུ་མེད།
6 Don’t change so people will like you. Be yourself and the right people will love the real you.
6 སྒྱུར་བ་མ་གཏོང་བར་སྡོད་དང་། མི་ཚོས་ཁྱོད་ལ་དགའ་པོ་བྱེད་འོངས། ཁྱོད་རང་ཁྱོད་རང་ནང་བཞིན་སྡོད་དང་། མི་དངོས་གནས་ཡག་པོ་དེ་ཚོས། ཁྱོད་རང་ལ་དངོས་གནས་དགའ་ཡོང་།
7 Keep your distance from people who will never admit they are wrong and always try to make you feel like it’s all your fault.
7 སོ་སོའི་ནོར་འཁྲུལ་ལ་ངོས་ལེན་བྱེད་མི་ཐུབ་མཁན་དང་གཅིག ཁོ་ཚོས་རྒྱུན་དུ་ནོར་འཁྲུལ་ཡོད་ཚད་ཁྱོད་རང་ལ་ཡོད་པར་བློ་དྭོགས་བཟོ་མཁན་དེ་ཚོ་དང་ཐག་རིང་ཙམ་སྡོད་དགོས།
8 Success is not always what you see.
8 ཁྱེད་རང་གིས་རྒྱུན་དུ་གང་མཐོང་བ་དེ། ལམ་ལྷོང་མ་རེད།
9 Broken trust is like a melted chocolate, no matter how you tried to freeze it it will never return to its original shape.
9 ཆག་གྲུམ་ཤོར་བའི་ཡིད་ཆེས་ནི། ཅོག་ལེ་ཊི་ཞུ་བ་དང་གཅིག་པ་རེད། ཁྱེད་ཀྱིས་ཇི་ཙམ་འབད་ནས་འཁྱག་པ་བཟོས་ཀྱང་། སྔར་གྱི་ནང་བཞིན་བཟོ་དབྱིབས་རྙིང་པར་སྐྱར་ལོག་མི་ཐུབ།
10 When someone is so sweet to you, don’t expect that person will be like that all the time. Remember, even the sweetest chocolate expires.
10 དུས་ཞིག་ལ་མི་ཞིག་གིས་ཁྱེད་ལ་དགའ་སྣང་སྐྱེ་སོང་ན། མི་དེ་ལས་རྟག་པར་འདི་འདྲ་འོངས་བའི་རེ་བ་རྒྱག་མི་ཉན། དཔེར་ན། དུས་ཚོད་ཡོལ་བའི་ཅོག་ལེ་ཊི་ཀྱང་། དགའ་སྣང་འོངས་ཐུབ།
༼མཆན། ཨིན་སྐད་དུ། sweet , sweet གཉིས་ཡོད་པ་ལྟར། བོད་འགྱུར་ནང་ལ། དགའ་སྣང་། དགའ་སྣང་གཉིས་ཡོད་པ་བཟོས་ཡོད། ༽
11 Never stop trying. Never stop believing. Never give up. Your day will come.
11 བརྩོན་པ་ནམ་ཡང་མ་ལྷོད། ཡིད་ཆེས་ནམ་ཡང་མ་བརླག རེ་བ་ནམ་ཡང་མ་ཆད། ཁྱོད་ཀྱི་ཉི་མོ་དེ་འོངས་ངེས།
དྲ་གྲོགས་བློེ་རིན་ལགས་ལ་སྐྱོན་བརྗོད་དང་། ཡོ་སྲང་གང་ཡང་བྱས་པ་མིན། དིང་དུས་ང་ཚོའི་བོད་སྐད་སྤྱི་སྐད་འབྲི་སྟངས་ལ་ཞབས་ཞུ་ཅུང་ཟད་ཅིག་ཞུ་ཐུབ་ན་སྙམ་ནས། གོ་སྐབས་ཡོད་ཚད་ལ་སྨྱོན་པ་ལྟར་བྱུས་གཏོགས་བྱས་ནས། གཞོན་སྐྱེས་འགའ་ལ་ཕན་ན། སྙམ་ནས་བསྒྱུར་བའོ།།
ཆོས་ཀྱི་ཕུང་པོ་བརྒྱད་ཁྲི་བཞི་སྟོང་འདི་ཡང་རང་སེམས་འདུལ་བའི་ཆེད་ཡིན་གསུངས་པ་
དེ་འདྲའི་སེམས་དེ་འདུལ་དཀའ་བ་ཅི་ཡིན་ནམ། གོ་བདེ་བའི་གསལ་བཤད་གཅིག་གནང་དང།
རྒྱུ་མཚན་ནི།
ཡོན་ཏན་མེད་ཀྱང་ང་རྒྱལ་སྐྱེ། །
བཏང་སྙོམས་སྒོམ་ཡང་ཁྲག་དྲོ་འོངས།
ཁོང་ཁྲོ་བྱེད་འདོད་མེད་ཀྱང་སྐྱེ། །
འདོད་ཆགས་དགའ་ནས་གོམས་དྲག་སྐྱོན། །
གཏི་མུག་དེ་བས་བསལ་དཀའོ།།
ཆོས་ཕུང་བརྒྱད་ཁྲི་བཞི་སྟོང་དེ་ཡང་། ཆོས་པོ་ཏིའི་བོང་ཚོད་ལ་མ་ཡིན་པར། འདོད་ཆགས་དང་། ཞེ་སྡང་དང་། གཏི་མུག་དང་། དུག་གསུམ་ཆ་སྙོམས་པ་བཞི་རུ་ཕྱེ་ནས། རེར་རེས་ལ་ཉི་ཁྲི་ཁྲི་བཞི་སྟོང་། ཉི་ཁྲི་བཞི་སྟོང་ཡོད་པའི་གཉེན་པོར་ཆོས་ཕུང་བརྒྱད་ཁྲི་བཞི་སྟོང་དུ་གསུངས་དགོས་བྱུང་བ་རེད། དེ་མིན་པོ་ཏི་ཙམ་ལ་བརྩིས་ན། ཡོད་པ་ལས་ཉམས་པ་མང་བ་ཡང་ཡོད་་སྲིད་པས། ད་ཡོད་བཀའ་བསྟན་དེ་དག་གི་ས་སངས་རྒྱས་སུ་འགྲོ་བའི་ལམ་ཆ་ཚང་མེད་པར་ཁས་ལང་དུ་སོང་བས་སྐྱོན་ཡོད་རེད།
ཚིག་གཅིག་ཏུ་དགོས་ན། སངས་རྒྱས་མ་རྒྱས་བར་དུ་འདུལ་དཀའ་བ་མང་པོ་ཡོད་པས་སོ།།
རྒན་ཀརྡོ་རབ་འབྱམས་པ་དང་བདེ་འཇགས་ཕོ་ཉ་སོགས་ཀྱིས་ཞབས་མཆན་བཀོད་པར་ཐུགས་རྗེ་ཆེ་ཞུ། ལྷག་དོན་རྒན་ཀརྡོ་རབ་འབྱམས་པ་ལགས་ཀྱི་ལམ་སྟོན་གནང་བར་བཀའ་དྲིན་ཆེ། ང་ནི་དབྱིན་ཡིག་ཤེས་འདོད་ཡོད་པའི་ལས་དང་པོ་བ་ཞིག་ཡིན། དེའི་སྟབས་ཀྱི་ཁྱེད་ཅག་གི་ལམ་སྟོན་ཧ་ཅང་མཁོ། བཀའ་དྲིན་ཆེ།