ཉེ་ཆར་གྲོགས་པོ་ཞིག་བརྒྱུད་ནས་ང་ལ་རིན་བཟང་གི་མུ་འབྲེལ་ཟིན་ཐོ་ཞེས་པའི་དེབ་གཉིས་འབྱོར་བྱུང་། དེབ་དང་པོ་དེ། ངའི་ཕ་ཡུལ་དང་ཞི་བའི་བཅིངས་འགྲོལ་ ཞེས་པ་དེ་རེད། དེབ་གཉིས་པ་དེ། ངའི་ཕ་ཡུལ་དང་གཟབ་ཉན། ཞེས་པ་དེ་རེད། དེབ་ཀྱི་ནང་དོན་གཙོ་བོ་ནི། མདོ་སྨད་ཁུལ་དུ་ ༡༩༥༨ ལོར་རྒྱ་དམག་སླེབས་སྐབས་ཤི་གསོད་གོད་ཆག་ཆེན་པོ་བྱུང་བའི་སྐོར་རེད། མི་སེར་སྡེབ་གསོད་བྱས་པ་དང་། བཙོན་དུ་འཁྲིད་པ། བོད་རིགས་དཔའ་བོ་ཚོས་གྱེན་རྒོལ་བྱས་པ་བཅས་དེང་སང་གི་རྒན་རྒོན་རྣམས་ལ་བཅར་འདྲི་ཞུས་པ་ཞིག་རེད་ལ། སྐད་ཀྱང་ཤུགས་ཆེ་ཨ་མདོའི་སྐད་དུ་བྲིས་འདུག དེབ་འདི་གཉིས་བོད་ནས་དཔར་སྐྲུན་བྱས་པ་ཞིག་ཡིན་པ་དང་། དཔར་ལོ་ནི་ ༢༠༠༨ ཡིན་དགོས་པ་འདྲ་མོད། དངོས་གནས་ལོ་ཚིགས་དང་དཔར་ཁང་སོགས་གང་ཡིན་གསལ་པོར་བཀོད་མི་འདུག རྩོམ་པ་པོ་རིན་བཟང་ངམ་རིན་ཆེན་བཟང་པོ་དེ་དགེ་འདུན་པ་ཞིག་ཡིན་པ་དང་། ཁོང་གིས་གོང་གསལ་རྒན་རྒོན་རྣམས་ལ་བཅར་འདྲི་ཞུས་པ་ཙམ་མ་ཟད། ཁོང་མདོ་སྨད་ཀྱི་ས་གང་སར་ཕེབས་པའི་མྱོང་ཚོར་ཡང་བྲིས་འདུག
རིང་ནས་སྙིང་ལ་བརྣགས་པའི་འདོད་པའི་དོན།། ཞེས་པའི་ཚིག་དོན་ལྟར། ངེད་ལ་ཡང་འདི་འདྲ་ཞིག་བྱུང་ན་ཅི་མ་རུང་ཞེས་ཧམ་སེམས་ཤིག་ཡོད་པ་དེ་མིག་སྨན་མིག་ཐོག་ཏུ་འཁེལ་བ་ཞིག་བྱུང་ལ། ནགས་ཚང་ཞི་ལིའི་སྐྱིད་སྡུག་དང་དེ་ནས་དེབ་འདི་དག་གི་ཐོག་ནས་གདུག་རྩུབ་ཆེ་བའི་རྒྱ་དམག་གི་ངོ་གདོང་དེ་ཞིབ་ཚགས་པོར་མཐོང་ཐུབ་པ་འདུག ཀྱཱ་ཕུག་བན་དེ་ཞུ་བ་དང་ཁ་སྒང་རྟ་མགྲིན་ཐར་ཞུ་བའི་གྱེན་རྒོལ་གྱི་དཔའ་བོའི་སྣང་བརྙན་དེ་ཚོ་གེ་སར་གྱི་དཔའ་རྟུལ་བཞིན་གསལ་འདུག ཟླ་ཚང་ཡར་འཕེལ་ཞུ་བ་བཅར་འདྲིའི་སྐབས་སུ། ཁོ་རྒྱ་དམག་གིས་བཟུང་ནས་རོགས་པ་བོད་མི་བཙོན་པ་མང་པོ་ལྷན་དུ་འཁྲིད་འགྲོ་སྐབས་འདི་ལྟར། “ནུབ་མོ་ཞིག་ལ། ངུ་ཆོ་བཙོན་མ་ཚང་མ་ལག་པ་རུས་ནས་རླངས་འཁོར་ཞིག་གི་ནང་ལ་བརྫངས་ནས་ལམ་ལ་ཆས། ཆུས་ཁྲེ་སྒམ་གྱི་སྟོད་སྨད་བར་གསུམ་ན་དམག་རེ་རེ་༼བཅས་༽སྤྱི་སྡོམ་དམག་དྲུག་རེ་ཡོད་ཀི ཀོས་ནན་ནས་སུམ་མདོ་བརྒྱུད་བྱེ་སྣའི་བར་དེ་ལ་ཐོན་དུས། ངུ་ཆོའི་༼ང་ཚོའི་༽ནང་ན་ཨ་ཁུ་བཟང་པོ་ཟེར་ནི་ཞིག་ཡོད། ཀླུའི་དགོན་པའི་གྲྭ་པ་རེད། མཚམས་དེར་ཨ་ཁུ་ཤི་སོང་གཟིག་ར། རོ་དམག་མི་གཉིས་ཀྱིས་རླངས་འཁོར་སྒམ་ཁ་ནས་སར་གཡུགས་དང་ཐ།”ཞེས་བྲིས་འདུག
འདས་ལོའི་ལོ་མཇུག་ཏུ་དེབ་འདི་གཉིས་ཀྱི་སྐོར་སྐད་ཆ་གསལ་ལ་མི་གསལ་བ་ཞིག་གོ་ཞིང་། སྐབས་དེར་དེའི་རྩོམ་པ་པོ་ནི་བོད་ཀྱི་སྒྲུང་གཏན་འབྲི་མཁན་ཚེ་རིང་དོན་གྲུབ་ཡིན་ཚུལ་ཞིག་ཀྱང་གོ་སོང་། བདུན་ཕྲག་འགའི་སྔོན་ཕ་ཡུལ་དུ་ཁ་པར་གཏོང་སྐབས་དེའི་རྩོམ་པ་པོ་བྱ་མདོ་རིན་བཟང་ཡིན་པ་དང་། དེབ་དེ་གཉིས་དཔར་བསྐྲུན་བྱས་ནས་ཚོང་རྭ་བཀྲམས་ཡོད་ཚུལ་སོགས་གོ་ཐོས་བྱུང་བ་མ་ཟད། ཁོང་གི་དེབ་གསུམ་པ་དེ་ཡང་དཔར་བསྐྲུན་བྱེད་སྒང་ཡིན་ཚུལ་གོ་བྱུང་། གུས་པར་དེབ་དེ་གཉིས་ད་དུང་ཀློག་སྐལ་མ་བྱུང་ནའང་ནགས་ཚང་གི་སྐྱིད་སྡུག་ནང་བཞིན་སྙན་གྲགས་རྒྱས་སྟངས་དང་གོང་ནས་དགེ་འདུན་རབ་གསལ་ལགས་ཀྱིས་ངོ་སྤྲོད་གནང་བ་ལྟར་ན་ངོ་མས་ཀློག་འདུན་གྱིས་སྒུག་མི་བཟོད་པ་ཞིག་འདུག དྲ་གྲོགས་ཚོའི་ནང་བཀླགས་ཚར་མཁན་ཡོད་ཚེ་ནང་དོན་ཞིབ་ཚགས་ངོ་སྤྲོད་རེ་ཡོང་བའི་རེ་བསྐུལ་ཞུ།
སྤྱིར་ན། ནུབ་ཕྱོགས་སུ་དེབ་དང་གློག་བརྙན་སོགས་གསར་བ་ཞིག་ཐོན་པ་ན། དེ་དང་མཉམ་དུ་དེ་ཚོའི་དགེ་སྐྱོན་དང་གནས་ཚུལ་གནད་བསྡུས་ཤིག་བསྐྱར་ཞིབ་(Review)བྱས་ནས་དུས་དེབ་དང་ཚགས་ཤོག དྲ་གནས་སོགས་སུ་ཐོན་ཡོང་། དེས་མི་མང་བོ་ཞིག་ལ་བལྟ་འདོད་དང་། ཀློག་འདོད་ཀྱི་འདུན་པ་ཞིག་སྤྲོད་ཐུབ དེ་མིན་བལྟ་ཀློག་བྱེད་མ་ཐུབ་པའི་མི་རྣམས་ལ་གནས་ཚུལ་མདོར་བསྡུས་ཀྱི་ངོ་སྤྲོད་ཅིག་རེག་ཡོད།
ང་ཚོ་ལ་ཡང་འདི་ལྟ་བའི་གཤིས་ཀ་ཞིག་དགོས་རྒྱུ་ཡིན་དུ་གལ་ཆེན་དུ་མཐོང་།
ཁ་སང་བོད་ནང་ལ་ཁ་པར་བཏང་ཡིན། ད་ལོར་བོད་ནང་ན་རྒྱུགས་ཆེ་བའི་བོད་ཡིག་གི་དེབ་འདྲ་འདུག་གམ་ཞེས་པར།
ནགས་ཚང་བྱི་ལུའི་སྐྱིད་སྡུག་དང་རིན་བཟང་གི་ཟིན་ཐོ། གཞན་ང་ཚོ་སད་རན་གསུམ་ལ་ྐློག་མཁན་མང་པོས་དགའ་བསུ་ཐོབ་ཀྱི་འདུག་ཟེར།
ངེད་ཀྱིས་ཀྱང་གྲོགས་པོར། དེབ་དེ་འདྲ་འབྲི་མ་ཐུབ་རུང་གནས་ཚུལ་བསྡུ་ལེན་བྱེད་ཐུབ་ན་བྱོས་དང་མ་འོངས་བར་ཕན་ཐོགས་ཀྱི་རེད་ལབ་པ་ཡིན།
རིན་བཟང་གི་ཟིན་ཐོ་འདི་གཉིས་ཨ་མདོའི་ཁ་སྐད་དང་བསྲེས་ནས་བྲིས་ཡོད་པ་འདྲ། འདི་ཡིག་སྐད་ལ་བསྒྱུར་ཐུབ་ན་ཧ་ཅང་དགེ་ཕན་འདུག་སྙམ།
ནགས་ཚང་ཞི་ལིའི་སྐྱིད་སྡུག་བོད་ཀྱི་བང་ཆེན་གྱིས་ཡིག་སྐད་ལ་བསྒྱུར་ནས་བཀྲམས་སོང་།
ཨམ་སྐད་ནང་བྲིས་པའི་དེབ་དང་རྩོམ་ཡིག་གང་ཡིན་ཐམས་ཅད་ཡིག་སྐད་ནང་བསྒྱུར་དགོས་དོན་འདུག་གམ། དང་པོ་དེབ་དེ་གཉིས་བཀླགས། དེ་ནས་ནགས་ཚང་གི་སྐྱིད་སྡུག་ནང་བཞིན་ཡིན་ན་བསྒྱུར་ན་འགྲིག་མོད། དེབ་དེ་གཉིས་ཡོད་ཙམ་གོ་བ་དང་ཨམ་སྐད་ནང་བྲིས་འདུག་ཟེར་ཙམ་ནས་དགོངས་ཚུལ་དེ་འདྲ་བཏོན་པ་ཅུང་སྔ་དྲགས་སྙམ། མ་གཞི་ཆོལ་ཁ་དང་ལུང་ཚན་ཕལ་བའི་ཡུལ་སྐད་ནང་ཡོད་ཚད་ཡིག་སྐད་དང་སྤྱི་སྐད་ནང་བསྒྱུར་དགོས་ཞེས་པ་འདི་ལ་ཡག་ས་ཞིག་ཡོད་པ་ནང་བཞིན་དེ་ལ་སྡུག་ས་ཞིག་ཀྱང་འདུག་པས་དགོངས་ཚུལ་འདོན་སྐབས་ཤེས་པ་གནད་དུ་གནས་རྒྱུ་གལ་ཆེན་པོ་རེད།