བོད ལྷ་ཀླུ་གཉན་གསུམ།
མི་མང་བོ་ཞིག་ནས་རང་ཉིད་ཀྱིས་རང་ལ་རེ་བ་མེད་པར་འདོད་ཀྱི་ཡོད་ལ། དེ་ནི་རང་ཉིད་ནས་འགོ་བརྩམས་པའི་བྱས་ཉེས་དེ་ཉིད་རང་ཉིད་ཆགས་ཀྱི་ཡོད་པར་གཏན་ནས་ངེས་འཛིན་བྱེད་ཐུབ་ཀྱི་མེད་པར་རང་ཉིད་ཀྱི་འདོད་བློ་ཞིག་གི་བཙན་འོག་ནས་རང་ཉིད་སུས་ཀྱང་མི་ཤེས་པའི་བཙོན་དུ་བཅུགས་དེ། མི་ཡུལ་དུ་རང་ཉིད་ཁེར་རྐྱང་དུ་འཚོ་ཡོད་པར་འདོད་ནས། སྨྱོས་རྫས་ཀྱི་རིགས་ལ་བརྟེན་པ་དང་། ལས་ཀ་སོགས་བྱེད་འདོད་ཀྱི་འདུན་པ་མེད་པར་གཏོང་བ། མི་རིགས་ཚད་ཀྱི་བྱེད་སྟངས་ལ་ཚུགས་པ་ཟ་བ་དང་། རང་ཉིད་ནི་མི་དེ་དག་ལས་ཀྱང་མ་འདྲ་བ་ཞིག་དུ་བསམ་ནས་ཟུར་དུ་འཇོག་པའི་སྣང་ཚུལ་འདིས། རང་ཉིད་ཁེར་རྐྱང་གི་སྣང་བ་ཞིག་དུ་ཁྲིད་ཀྱི་ཡོད་པ་མ་ཟད། འཇིག་རྟེན་ནི་བདེ་བ་མེད་པ་ཞིག་དུ་འདོད་ཀྱི་ཡོད་ལ། གང་བྱས་ཐབས་ཅད་ནི་སྙིང་བོ་མེད་པ་ལྟ་བུ་ཞིག་དུ་ཚོར་ནས་མི་སུ་ཡིས་སྐད་ཆ་ལ་ཉན་འདོད་ཀྱི་འདུན་པ་མེད་པར་གྱུར་བ་རེད།
ལྷག་པར་དུ་ཁེར་རྐྱང་གི་སྣང་བ་འདི་བྱུང་ཡུལ་གཙོ་བོ་དེ་ནི་ནུབ་ཕྱོགས་ཀྱི་དབལ་འབྱོར་འགྲན་རྩོད་ཀྱི་མི་སེམས་བོར་བའི་འགྲན་རྩོད་ཀྱི་དུས་རབས་ནས་བྱུང་བ་ཡིན་ལ། དེང་སང་ནད་ཚ་དེ་རིགས་འཛམ་གླིང་གི་ཡུལ་གྲུ་གང་སར་བཙན་འཛུལ་ཐེབས་ནས་བོད་མི་བྱེས་གཞིས་གཉིས་ཀྱི་ཁྲོད་དུ་ནད་ཚ་འདི་བྱུང་ཟིན་པ་རེ་ཟུང་དང་། བྱུང་ལ་ཉེ་བའི་མི་ཡང་མི་ཉུང་བ་ཞིག་ཡོང་གི་ཡོད་སྟབས། ངས་དེ་རིང་རེ་བ་མེད་པའི་ཁོར་ཡུག་གི་མི་ཟེར་ནས་གླེང་གཞི་འདིས་སྟེང་ནས་མི་གླེང་ཀ་མེད་བྱུང་།
ནུབ་ཕྱོགས་རྒྱལ་ཁབ་ཁག་དུ་སེམས་ནད་བྱུང་ནས་སེམས་ཁམས་རིག་པ་དག་ལ་སྒོར་མོ་སྤྲད། རང་རང་གི་བྱིས་པ་དག་ལ་དེ་དག་གི་དྲུང་དུ་འགྲོ་སོང་ཕོན་ཆེན་བཏང་ནས་དེ་དག་གི་སྐད་ཆ་ལ་ཉན་དུ་འཇུག་གི་ཡོད་པ། དེ་ཡི་ནང་དུ་རྒན་བྱིས་གཉིས་ཀ་འདུ། ལྷག་པར་དུ་གཞོན་སྐྱེས་ཀྱི་ཁྲོད་དུ་མང་བོ་ཞིག་བྱུང་གི་ཡོད་པ་དེ་ནི་ང་རང་བོད་དུ་ཡོད་དུས་སུ་གོ་མྱོང་མེད་ལ། བོད་མི་དག་གི་ཁྲོད་དུ་དེ་ཡི་སྐོར་གྱི་དཀའ་ངལ་ཡོད་པ་དེ་ཡི་སྐོར་ཡང་མང་བོ་ཞིག་གཏན་ནས་གོ་རྒྱུ་མེད། གཏན་ནས་མེད་ཟེར་ན་སྲང་བར་དུ་ལྡོམ་ནས་སྨྱོན་པ་ཆགས་ཡོད་མཁན་རེ་ཟུང་མཐོང་རྒྱུ་ཡོད་ཀྱང་། དེ་དག་གི་གྲངས་ནི་དངོས་ནས་དཀོན་པོ་ཡིན།
འདི་རིགས་བྱུང་བའི་རྒྱུད་རིམ་ངེས་ལ་བསམ་བློ་བཏང་དུས། ཁོང་ཚོ་ལ་གྲོགས་པོ་དང་ཉེ་རིང་གི་བྱམས་བརྩེ་དང་མི་དང་མིའི་བར་གྱི་འདུ་ཤེས་ཟབ་མོ་དེ། བརྩེ་བའི་འཕོངས་དེ་ཁེར་རྐྱང་གི་སྣང་བའི་ཁྲོད་དུ་འཁྱམ་ནས་བར་སྐབས་ཤིག་ལ་རང་ཉིད་ཀྱིས་རང་ལ་ཡིད་ཆེས་མེད་པའི་མི་ཞིག་ལ་ལྟ་བཞིན་ཡོད་ལ། དེ་ལྟར་ལྟ་འགོ་བཙུགས་པ་ནས་མི་དང་འབྲེལ་བ་ཉུང་དུ་འགྲོ་བ་དང་། ཡོད་པ་དེ་དག་ལ་ཡང་ཡིད་ཆེས་དང་བློས་ཐུབ་ཟེར་བ་ཞིག་གཏན་ནས་ཡོང་གི་མེད་པར། ཉིན་རེའི་འཚོ་བའི་ནང་དུ་དོགས་པ་རྐྱང་རྐྱང་གི་འཚོ་བཞིན་ཡོད་པ་རེད། དེ་ཡིན་དུས་བོད་ཕྱི་ནང་གཉིས་སུ་ད་ལྟ་དེ་དག་གི་རིགས་ཡོང་རྒྱུར་ཐག་ཉེ་ནས་ཉེ་རུ་ཡོང་བཞིན་པ་འདི་དག་ལ་བསམ་ནས། ངས་རང་གི་སྐད་ཡིག་གི་སྟེང་ནས་བོད་མི་ཚོར་དབལ་འབྱོར་ཁོ་ནའི་བྲན་གཡོག་བྱེད་མི་རུང་བར་འབོད་སྐུལ་ཞུ་བཞིན་ཡོད། དེ་ལྟར་ཆགས་པས་ཕྱིར་ཉིན་ནས་རེ་བ་མེད་པའི་ཁོར་ཡུག་གི་མི་ཞིག་ཆགས་རྒྱུར་ཐེ་ཚོམ་མི་འདུག་ཞེས་སྔོན་བརྡ་བཏང་བ་ཡིན།