རེབ་གོང་གི་གོ་རེ།

ནགས་ཤོད་རིག་རལ།

སེང་ལྕམ་འབྲུག་མོའི་མཁར་ཤུལ་དུ་གྲགས་པའི་ཡུལ་ཤུལ། ས་ཆེན་འགུལ་ཐེངས་གཅིག་གིས་གྲངས་མེད་སྤུན་ཟླའི་ཚེ་སྲོག་སྐད་ཅིག་ནང་དུ་འཕྲོག་ཕྱིན་འདུག
རྒྱལ་ཁབ་གཞན་དུ་ས་ཡོམ་གྱི་ཤུགས་ཚད་དེ་ལས་ཆེ་བའི་ཁྲོད་དུ་མི་གྲངས་ཉི་ཤུ་ལྷག་ལས་འདས་གྲོངས་ཕྱིན་མེད་མོད། ཡ་ང་བའི་ང་ཚོའི་སྤུན་ཟླ་དེ་ཚོ་བཙན་དབང་དང་འཇམ་བསླུ་གཉིས་ཀྱི་ཁྲོད་དུ་རང་གི་ཕ་མེས་ནས་བཞག་པའི་སྦྲ་ནག་ནས་ཐོན་དགོས་བྱུང་བ་དང་། འཚོ་རྟེན་དུ་གྱུར་པའི་སྒོ་ཕྱུགས་བཙོངས་དགོས་ཐུག
རྒྱུས་མེད་པའི་ཕག་གྲུམ་སྔོན་པོའི་ཁང་པའི་ནང་དུ་འཚོ་བ་གསར་པའི་ལམ་བུ་ཞིག་བསུ་འགོ་ཚུགས་མོད་སྤུས་ཀ་མེད་པའི་ཁང་ཁྱིམ་དེ་དག་ད་ལྟ་སྲོག་གི་གཤེད་མར་གྱུར་འདུག ངོ་མ་མི་སེམས་སུ་རྨ་ཁ་བྱུང་དུས་གཉེན་བཤེས་འདས་གྲོངས་སུ་འགྲོ་བའི་རྒྱུ་རྐྱེན་ས་ཡོམ་ཙམ་དུ་རྩ་བ་ནས་འདེད་ཐུབ་ཀྱི་མི་འདུག ཁྲག་དང་མིག་ཆུས་ཚོས་པའི་སྤུན་ཟླ་ཚོའི་སྐུ་ཕུང་མིག་གིས་བལྟ་མི་གཟོད་པའི་སྐབས་སུ་ག་ས་གང་དུ་ཐར་ཐོར་དུ་ལུས་པའི་ཕག་གྲུམ་སྔོན་པོ་དེ་དག་ཅི་འདྲའི་མིག་ལ་གཟན་པ་ཞིག་རེད་ཨང་།
ཡིན་ནའང་རྐྱེན་ངན་གྲང་རེག་གིས་རྒོལ་བའི་ནམ་ཟླ་འདིར་མདོ་དབུས་ཁམས་གསུམ་གྱི་སྤུན་ཟླ་རྣམས་དང་ཡུལ་གྱར་དུ་ཡོད་པའི་སྤུན་ཟླ་ཡོངས་རྫོགས་ཀྱི་དབུགས་ཀྱི་རྒྱུ་བ་ཡུལ་ཤུལ་མི་དམངས་རྣམས་དང་མཉམ་གཏོང་བྱེད་པ་མཐོང་དུས་ངའི་སེམས་ཁོངས་སུ་ཡང་དྲོད་ཀྱི་རླབས་རྒྱུན་ཞིག་ལྡང་གི་འདུག
ཁང་ཤུལ་དང་ས་རྡུལ་ཁྲོད་ག་ས་གང་དུ་མི་སེར་གྱི་སྲོག་སྐྱོབ་བཞིན་པའི་དགེ་འདུན་དེ་དག་མཐོང་དུས་རྗེས་སུ་ཡི་རང་དང་དད་པའི་སྟོབས་ཀྱིས་སོར་མོའི་འདབ་མ་སྙིང་ཁར་མི་ཟུམ་རང་དབང་མི་འདུག ངོ་མ་དགེ་འདུན་ཚོ་ནི་ང་ཚོ་བོད་པ་རྣམས་ལ་ཡོད་པའི་ཡོད་ཚད་རེད། ཚེ་ཕྱི་མའི་སྐྱབས་གནས་ཡིན་པ་མ་ཚད། ཚེ་འདིར་རྐྱེན་ངན་གོད་ཆགས་བྱུང་བའི་སྐབས་སུ་ལུས་པོ་ས་རྡུལ་འོག་ནས་འཐེན་རོགས་བྱེད་མཁན་དང་། སེར་ཁ་གས་པའི་སེམས་ཀྱི་རྨ་ཁ་ཡོད་ཚད་གསོ་རོགས་བྱེད་མཁན། གློ་བུར་ལུས་དང་ཁ་བྲལ་བའི་རྣམ་ཤེས་བསྔོ་སྨོན་གྱིས་དག་པའི་ཞིང་དུ་སྐྱེལ་མ་མཛད་མཁན་རེད། དགེ་འདུན་ཚོའི་ངུར་སྨྲིག་ན་བཟས་ས་ཡོམ་རྗེས་ཀྱི་ཁང་ཤུལ་སྨུག་ཐིང་ངེར་བཀབ་པའི་གཟུགས་བརྙན་དེ་དག་ང་ཚོས་ནམ་འཚོའི་བར་དུ་བརྗེད་ག་ལ་ཐུབ། དེ་བཞིན་བོད་ནང་དང་རྒྱ་ནག་གི་ས་ཆ་ག་ས་གང་དུ་ཡོད་པའི་བོད་རིགས་སློབ་མ་དེ་དག་གིས་ཕ་མས་རང་ལ་བསྐུར་བའི་དངུལ་ཕྲན་བུ་དེ་དག་བསྡུས་ནས་རྐྱེན་ངན་ནང་ལྷུང་བའི་སྤུན་ཟླ་དག་ལ་བསྐུར་བ་འདི་ནི་ཅི་འདྲའི་དགའ་འོས་པ་ཞིག་དང་མི་སེམས་འགུལ་བ་ཞིག་རེད་ཨང་། གསར་སྐྱེས་ན་གཞོན་འདི་དག་གིས་མི་རིགས་འདི་གང་དུ་འགྱེལ་བ་དེ་ནས་ཡར་བསླང་འདོད་པའི་སྙིང་སྟོབས་འདི་ནི་ཅི་འདྲའི་རྗེས་སུ་ཡི་རང་འོས་པའི་འགན་ཁུར་ཞིག་མ་ཡིན་ནམ།

ད་དུང་དེ་དག་ལས་ཀྱང་ངའི་སེམས་པ་འདར་དུ་འཇུག་པ་དང་འདྲེན་བྱེན་བརླན་དུ་འཇུག་མཁན་ནི་རེབ་གོང་གི་གོ་རེ་དེ་དག་རེད་ཨ། ཁང་ཤུལ་དང་ས་རྡུལ་ཁྲོད་དུ་ལུས་པའི་ཡུལ་ཤུལ་སྤུན་ཟླ་རྣམས་ལ་རེབ་གོང་མང་ཚོགས་ཀྱིས་གོ་རེ་རླངས་འཁོར་མང་པོ་ཁེངས་པ་བཟོས་ནས་བསྐྱལ་འདུག གོ་རེ་དེ་དག་ཉིན་མཚན་མཐུད་ནས་བཟོས་འདུག གོ་རེ་རེ་རེའི་ནང་དུ་རིགས་རྒྱུད་གཅིག་པའི་སྤུན་ཟླ་ལ་འཆང་པའི་བརྩེ་བ་ཇི་ཙམ་ཞིག་འདུས་ཡོད་དམ། གོ་རེ་དེ་དག་ནི་སྐྱོ་སྣང་གི་མེ་ཡིས་བསྲེག་པ་དང་སྐྱོ་སྣང་གི་མིག་ཆུས་བརླན་པ་ཡིན་པས་དེ་དག་ནང་དུ་བརྩེ་བ་ཇི་ཙམ་འདུས་པ་ནི་རི་མོའི་ལམ་གྱིས་མཚོན་ཐབས་ག་ལ་ཡོད། རེབ་གོང་གི་གོ་རེ་ཨ་རེབ་གོང་གི་གོ་རེ།
རྐྱེན་ངན་བར་ཆད་བྱུང་ཚེ་ཁྱེད་ནི་རེབ་གོང་གི་གོ་རེ་ཙམ་མ་ཡིན་པར་མདོ་དབུས་ཁམས་གསུམ་གྱི་གོ་རེར་གྱུར་འདུག ཇི་སྲིད་གོ་རེའི་གཏམ་རྒྱུད་གནས་པ་དེ་སྲིད་དུ་མདོ་དབུས་ཁམས་གསུམ་གྱིས་གྲུབ་པའི་མི་རིགས་འདི་གནས་ངེས་རེད་ལ། གོ་རེའི་གཏམ་རྒྱུད་འདི་ཡང་མི་རབས་ནས་མི་རབས་བར་དུ་བརྒྱུད་ངེས་རེད།
དུས་ནམ་ཞིག་ང་རང་རེབ་གོང་དུ་སླེབས་པའི་གོ་སྐབས་དེ་བྱུང་ན་ངས་གོ་རེ་གཅིག་ཉོས་ནས་བཟའ་ངེས་ཡིན་ལ། རེབ་གོང་གྲོགས་པོ་རྣམས་ཀྱི་འཁྲིས་ནས་གོ་རེའི་གཏམ་རྒྱུད་ཆ་ཚང་ཞིག་ཉན་ངེས་ཡིན།