(Shakesphear) གྱིས་བརྩམས།
ངམ་རིང་ཡོན་ཏན་རྒྱ་མཚོས་བོད་བསྒྱུར་བྱས།
གྲོང་ཁྱེར་ཝི་རཱོ་(Verona)ནའི་ནང་འབྱོར་ཕྱུག་ལྡན་པའི་ཁྱིམ་ཚང་གཉིས་ཡོད་པ་ནི་ཁེའ་པུའུ་ལེ་ཀྲེ(Capulets)དང༌། མན་ཀྲ་གྷ་སི(Montagues)ཡིན། ཁྱིམ་ཚང་གཉིས་འཁོན་འཛིན་རྙིང་པ་ཞིག་གིས་རྐྱེན་གྱིས་ཕན་ཚུན་དགྲ་བོ་ཆགས་ཏེ། ཐ་ན་ཁྱིམ་སོ་སོའི་གཡོག་པོ་དང་རྗེས་འབྲང་པ་རྣམས་ཀྱང་འཕྲད་སྐབས་ཕན་ཚུན་སྡང་ཟུག་དང་ཚིག་ངན་མི་སྨྲ་བར་མཛའ་བརྩེ་འཛུམ་བག་རྒོད་པ་ནི་ཉིན་མོའི་སྐར་མ་དང་གཉིས་སུ་མེད་ལ། སྐབས་རེ་ཚིག་ངན་སྨྲས་པ་དེ་དག་གིས་རྐྱེན་གྱིས་ཕན་ཚུན་འཁྲུག་འཛིང་ཤོར་ནས་ཞི་བདེ་འོད་སྟོང་འབར་བའི་གྲོང་ཁྱེར་ཝི་རོ་ན་ནིའི་སྲང་ལམ་གི་ཞི་བདེར་དོ་ཕོག་བཏང་བ་ཉུང་ཉུང་ག་ལ་ཡིན། ཐེངས་གཅིག་ཁྱིམ་བདག་ཕྱུག་པོ་ཁེའ་པུའུ་ལེ་ཀྲེ་ཡིས་གསོལ་སྟོན་ཆེན་པོ་ཞིག་བཤམས་ཏེ་ལང་ཚོའི་ལོ་འདབ་རྒྱས་པའི་སྨིན་ལེགས་མ་དང༌། ཆེས་མཐོའི་མི་དྲག་རྣམས་མགྲོན་འབོད་བྱས་པ་མ་ཟད། མོན་ཀྲ་གྷ་སི་ནང་གི་གཡོག་པོ་དང་ཉེ་གྲས་རྣམས་མ་གཏོགས་དེ་མིན་ལང་ཚོས་ཕྱུག་པའི་ན་ཆུང་མ་རྣམས་གསོལ་སྟོན་དེར་མགྲོན་འབོད་བྱས་ཡོད། ཁྱིམ་བདག་ཕྱུག་པོ་མོན་ཀྲ་གྷ་སྀ་ཡི་བུ་རཱོ་མིའོ་ཡི་(Romeo)ཡིད་དབང་རབ་ཏུ་འཕྲོག་པའི་ན་ཆུང་མ་རོའ་ས་ལན(Rosaline)ཡང༌། ཁེའེ་པུའུ་ལེ་ཀྲེ་ཚང་གི་གསོལ་སྟོན་དེར་འབྱོར་ཡོད།
སྤྱིར་མོན་ཀྲ་གྷ་སི་ཚང་ལ་མཚོན་ན། ཁྱིམ་བདག་ཁཱེ་པུའུ་ལེ་ཀྲེའི་ཕྱོགས་གཏོགས་མི་ཚོགས་ཁྲོད་དུ་བསྐྱོད་རྒྱུ་ཤིན་ཏུ་ཉེན་ཚབས་ཆེ་ཡང༌། རཱོ་མིའོ་ཡི་གྲོགས་པོ་བྷན་འོ་ལིའོ་(Benvolio)ཡིས་རོའ་མིའོ་ལ་ཁོའི་མཉམ་དུ་རྣམ་ཀུན་དུས་སྟོན་སྐབས་དཔེ་གསར་དུ་འཛིན་པའི་གདོང་འབག་གྱོན་ཏེ་ཁྱིམ་བདག་ཕྱུག་པོ་ཁེའ་པུའུ་ལེ་ཀྲེ་ཡི་གསོལ་སྟོན་དུ་ཕྱིན་ནས་འཇིགས་ཉེན་ལས་གཡོལ་ཐུབ་ན། རོའ་མིའོ་ཡི་ཡིད་དབང་འཕྲོག་པའི་ན་ཆུང་རོའ་ས་ལེན་གྱི་དཀར་ཞིང་མཛེས་པའི་བཞིན་བཟང་ཁོའི་མིག་གིས་ལོངས་སུ་སྤྱོད་ཐུབ་པ་མ་ཟད། མཛེས་ཤིང་ལྟ་ན་སྡུག་པའི་ཁོ་མོའི་བཞིན་དཔལ་གསོལ་སྟོན་དུ་འཛོམས་པའི་མཛེས་མར་གྲགས་པའི་ན་ཆུང་མ་རྣམས་ཀྱི་ལང་མཚོའི་མཛེས་སྡུག་དང་བསྡུར་ཐུབ་པའི་བསྐུལ་སློང་བྱས། རོའ་མིའོ་ཡིས་རང་གི་བཤད་པའི་སྐད་ཆར་དེ་ཙམ་དོ་ཁུར་མ་བྱས་ཀྱང་ཁོའི་སེམས་ཁོང་ན་བཞད་པའི་བརྩེ་དུང་གི་མེ་ཏོག་ཡོད་ཚད་རོའ་ས་ལན་ལ་ཕུལ་སྟབས། ཁེའ་པུའུ་ལེ་ཀྲེ་ཡིས་བཤམས་པའི་གསོལ་སྟོན་ལ་འགྲོ་རྒྱུར་ཐག་བཅད། རོའ་མིའོ་ཡིས་རོའ་ས་ལེན་ལ་བཅངས་པའི་བརྩེ་དུང་ནི་དྭངས་གཙང་ལྷད་མེད་པ་ཡིན་ཞིང་རྒྱུན་ཏུ་ཁོའི་མཚན་མོའི་རྨི་ལམ་ལ་ཡང་བར་ཆད་བྱུང་བ་མ་ཟད་ཐ་ན་རང་གི་བརྩེ་བའི་གྲོགས་པོ་རྣམས་ཀྱང་བྲལ་ཏེ་ཁེར་རྐྱང་དུ་ཁོ་མོའི་རབ་དཀར་གྱི་བཞིན་བཟང་ཡིད་ལ་བསྒོམས་ཏེ་སྡོད་ཀྱི་ཡོད།
ཆེས་བློ་ཕངས་པ་ཞིག་ལ་རོ་ས་ལེན་གྱིས་ཆང་ལན་ཆུ་འཇལ་གྱི་དཔེ་ལྟར་རོའ་མིའོ་ཡིས་མོ་ལ་བཅངས་བའི་བརྩེ་དུང་ལ་སྣང་ཆུང་གིས་ཐ་ན་ཁོ་ལ་བརྩེ་དུང་མཚོན་ཆེད་བཞིན་འཛུམ་ཙམ་ཡང་སྟོན་གྱི་མེད་སྟབས་རོའ་མིའོ་སྐྱོ་གར་དང་ཡིད་ཆད་ཀྱི་གནས་སུ་ལྷུངས། རོའ་མིའོ་ཡི་གྲོགས་པོ་བྷན་འོ་ལིའོ་ཡིས་རང་གི་གྲོགས་པོའི་རྨས་སྐྱོན་ཤོར་བའི་བརྩེ་དུང་གི་རྨ་ཁ་གསོ་ཆེད་ཁོ་ལ་བརྒྱད་གཉིས་ལང་ཚོས་ཕྱུག་པའི་སྨིན་ལེགས་མང་པོ་ཞིག་མཚམས་སྦྱོར་བྱས་ཀྱང་ངལ་བ་འབྲས་མེད་དུ་གྱུར། དེར་བརྟེན་རོའ་མིའོ་ཡིས་རང་གི་གྲོགས་པོ་བྷན་འོ་ལིའོ་དང༌། མཱར་ཁུའུ་ཀྲེའུ(Mercutio)གཉིས་ཀྱི་མཉམ་དུ་གདོང་ལ་འབག་གྱོན་ཏེ་ཀེབ་པུའུ་ལེ་ཀྲེ་ཡི་ཁྱིམ་དུ་གསོལ་སྟོན་ལ་ཕྱིན་པ་དང༌། ཁོ་ཚོ་གསུམ་ལ་ཁྱིམ་བདག་ཁེབ་པུའུ་ལེ་ཀྲེ་རང་ཉིད་ཀྱིས་སྣེ་ལེན་བྱས་པ་མ་ཟད་ཁོང་རྣམས་ལ་ཞབས་བྲོ་འཁྲབ་རོགས་ན་ཆུང་མཛེས་མ་མང་པོ་ཡོད་སྐོར་ཡང་བཤད།
ཡུད་ཙམ་རྗེས་ཁོ་ཚོ་གསུམ་ཞབས་བྲོ་འཁྲབ་བཞིན་པའི་སྐབས་ཁོ་པའི་མིག་ལམ་དུ་ནུ་ཆུང་མ་མཛེས་མ་ཞིག་མཐོང་བས་ཁོ་པོའི་སེམས་སུ་ན་ཆུང་བུ་མོ་དེའི་མཛེས་སྡུག་གིས་དགྱེས་སྟོན་དེར་འཛོམས་པའི་གཞོན་ནུ་མ་རྣམས་ཀྱི་མཛེས་སྡུག་ཟིལ་གྱིས་མནན་པར་མ་ཟད། འོད་ཆེམ་ཆེམ་དུ་འཕྲོ་བའི་བཞུ་མར་དེར་འོད་མདངས་སྔར་བས་ཆེས་ཆེར་འབར་བའི་བློ་སྟོབས་སྦྱིན་པའི་སྣང་བ་ཞིག་སྟེར། ཁོའི་ངག་ནས་ཁོ་མོ་ནི་མཛེས་མ་འདི་ཚོའི་དབུས་སུ་བྱིའུ་ཚོགས་ནག་པོའི་ཁྲོད་དུ་དཀར་པོ་ཐོན་པ་དང་གཉིས་སུ་མ་མཆིས་ཞེས་པའི་བསྟོད་ཚིག་དབང་མེད་དུ་ཤོར་མ་ཐག ཕྱུག་བདག་ཁཱེབ་པུའུ་ལེ་ཀྲེ་ཡི་ཉེ་དུ་ཀྲེ་བྷོ་ཀྲེ་(Tybalt)«ཡིས་བསྟོད་ཚིག་དེ་ཐོས་པ་མ་ཟད། སྐད་གདངས་དེས་རོའ་མིའོ་ཡིན་པ་ཤེས་རྟོགས་ཐུབ། ཀྲེ་བྷོ་ཀྲེ་སྤྲོ་ཐུང་བས་མོན་ཀྲ་གྷ་སི་ཚང་གི་མི་ཁོ་ཚོའི་ཁྱིམ་དུ་མགྲོན་འབོད་མ་བྱས་ཀྱང༌། གདོང་འབག་གྱོན་ཏེ་བསྟན་བཤིག་སློང་བར་ཡོང་བ་དེར། ཁ་སྤོ་ཁ་ནས་ལངས་ཞེ་སྤོ་གཏིང་ནས་འཁྲུགས་ཏེ་ངར་སྐད་སྒྲོག་བཞིན་རཱོ་མིའོ་མགྲོན་ཤོག་མེད་པར་ཁོ་ཚོའི་ཁྱིམ་དུ་འཛུལ་ཞུགས་བྱས་པ་དེར་ཡ་ལན་སྤྲོད་རྒྱུ་མ་ཟད་ཚེ་སྲོག་གི་རྒྱུ་བའང་གཅོད་རྒྱུའི་ཉེན་བརྡ་བཏང༌།
ཞབས་བྲོ་ཚར་རྗེས་རོའ་མིའོ་ཡིས་འདྲེན་བྱེད་ཟུང་གིས་མཛེས་སྡུག་ལྡན་པའི་ན་ཆུང་མ་དེའི་ཕྱོགས་སུ་བལྟ་བཞིན་བསྡད། སྐབས་དེར་ཁོའི་གདོང་ལ་གྱོན་པའི་འབག་དེས་བློ་ཁོག་འཕར་མ་ཞིག་སྦྱིན་སྟབས། ན་ཆུང་མ་དེའི་འཁྲིས་སུ་བསྐྱོད་ནས་ཁོ་མོའི་དཀར་ཞིང་འཇམ་པའི་
ལག་ཟུང་ནས་བཟུང་ཞིང་མིག་ཟུང་གི་མདའ་མོ་ཁོ་མོའི་འདྲེན་བྱེད་ལ་འཕེན་བཞིན། ཁོ་མོར་གསལ་ལ་མི་གསལ་བའི་གཏམ་ཤབ་ཤུབ་ཏུ་སྨྲས། སྨིན་ལེགས་མ་དེའི་ཁོ་ལ་སྨྲས་པའི་གཏམ་རྣམས་ཕྱི་ཚུལ་ནས་སྒམ་བརླིང་ལྡན་ཡང་ཁོ་མོའི་ཡིད་ཀྱི་རྦ་ཀློང་ནི་ལང་ཚོའི་ཤ་ཁྲག་རྒྱས་པའི་ཕོ་གསར་དེས་གཡོ་བར་བྱས་ཡོད། ཡུད་ཙམ་གྱི་རྗེས་ནས་ན་ཆུང་མ་དེའི་ཨ་མས་སྐད་གཏོང་སྐབས། རྒྱུས་མངའ་མེད་པའི་མཛེས་མ་དེས་རོའ་མིའོ་ཡི་ཡིད་དབང་གཏིང་ནས་འཕྲོག་ཅིང་བརྩེ་དུང་གི་མེ་ཏོག་འབུལ་ཡུལ་དུ་གྱུར་ཡོད་ནའང༌། ཁོའི་ཁྱིམ་གྱི་དགྲ་ཡི་དྭངས་མ་ཁྱིམ་བདག་ཁེབ་པུའུ་ལེ་ཀྲེ་ཡི་བུ་མོ་འཇུའུ་ལི་ཀྲེ་( Juliet)ཡིན་པ་ཤེས་རྟོགས་བྱུང༌།
ཁྱིམ་ཚང་གཉིས་ཀྱི་འཁོན་འཛིན་དེས་རོའ་མིའོ་ལ་དཀའ་ངལ་དང་འགལ་རྐྱེན་འཕྲད་མོད། ཁོས་འཇུའུ་ལེ་ཀྲེ་ལ་བཅངས་པའི་བརྩེ་དུང་དེར་དོ་ཕོག་གང་ཡང་གཏོང་མ་ཐུབ། འཇུའུ་ལེ་ཀྲེ་ཡིས་ཀྱང་རང་གིས་གསོལ་སྟོན་སྐབས་གླེང་མོལ་བྱ་ཡུལ་གྱི་སྐྱེས་པ་དེ་རོའ་མིའོ་ཡིན་པ་མ་ཟད། ཁོ་དང་འདྲ་བར་ཁོ་མོའི་ཡིད་དབང་ཕོ་གསར་དེས་ཕྲོགས་ཏེ་བརྩེ་དུང་གི་ས་བོན་བཏབ་པ་དེར་བློ་མི་བདེ་བའི་ཚོར་བ་ཅུང་ཞིག་ཡོད་ནའང༌། ཁོ་མོར་མཚོན་ན་ཁྱིམ་གྱི་འགལ་ཟླ་ལ་བརྟེན་ནས་རོའ་མིའོ་ལ་འཁོན་དུ་འཛིན་མི་སྲིད་པར། དེ་ལས་ལྡོག་སྟེ་སེམས་ཀྱི་ཞིང་སར་བརྩེ་དུང་གི་ས་བོན་བཏབ་པ་དེ་ནི་བསླུ་བ་མེད་པར་ངོས་འཛིན་བྱས་ཡོད། རོའ་མིའོ་རང་གི་གྲང་ཤུར་ཤུར་གྱི་སེམས་པ་དེ་འཇུའུ་ལེ་ཀྲེར་ཐོག་མར་འཕྲད་ཡུལ་གྱི་ཁང་པ་དེ་ནས་བྲལ་མ་ཕོད་སྟབས། མཚན་ཞིག་རོའ་མིའོ་ཁོ་རང་གི་གྲོགས་པོ་རྣམས་དང་མཉམ་དུ་བསྡད་ཡོད་ཀྱང༌། ཡུད་ཙམ་རྗེས་ཁོ་ཚོའི་ཁྲོད་ནས་ཐོན་ཏེ་འཇུའུ་ལེ་ཀྲེ་ཡི་ཁང་རྒྱབ་ཀྱི་སྡུམ་རྭའི་གྱང་ལ་འཛེགས་ཏེ་ཁོ་མོའི་འཁྲིས་སུ་བསྐྱོད་སྟབས་འཇུའུ་ལེ་ཀྲེ་ཁོ་མོའི་སྒེའུ་ཁུང་དུ་ཐོན།
ན་ཆུང་མ་དེའི་མཛེས་སྡུག་རྣམ་པར་བཀྲ་བའི་བཞིན་དཔལ་དེ་ནི་ཤར་ཕྱོགས་ཉི་མའི་འོད་མདངས་ཆེས་ཆེར་རྒྱས་ཏེ་སྣ་ཚོགས་མེ་ཏོག་བཞད་པའི་ལྡུམ་རྭའི་ནང་ལ་འཕྲོས་པ་བཞིན། གཞན་པའི་རྒྱུ་སྐར་ལ་སྐྱེངས་པ་དབང་མེད་དུ་སྟེར། འཇུའུ་ལེ་ཀྲེ་ཡི་དཀར་ཞིང་འཇམ་པའི་བཞིན་བཟང་དེ་ཁོ་མོའི་ཕྲ་ལ་མཉེན་པའི་ལག་ཟུང་གིས་སྟེང་བཞག་སྟེ་འགྲམ་སྐྱོར་བྱེད་སྐབས་རོའ་མིའོ་སྟོང་བསམ་གྱི་ཞིང་ཁམས་སུ་ཆས་ཏེ་རང་ཉིད་འཇུའུ་ལི་ཀྲེ་ཡི་ཕྲ་ལ་མཉེན་པའི་མཛུབ་མོའི་སོར་གདུབ་ཏུ་བརྫུས་ཏེ་ཁོ་མོའི་བཞིན་བཟང་ལ་འཆང་བའི་རེ་སྨོན་བྱས་ཏེ་བསྡད་པ་དང་དུས་མཚུངས་སུ་ཁོའི་སེམས་སུ་ཁོ་མོ་གཅིག་པོ་ཡིན་པའི་སྣང་བ་འཁོར་ཏེ། བའཇུའུ་ལི་ཀྲེ་ཞེས་གསལ་ལ་མི་གསལ་བའི་འབོད་སྒྲ་དེར་རང་ཉིད་ཀྱིས་ཧེ་ང་ཡིན་ཞེས་སྐད་མདངས་དམའ་མོའི་ཐོག་ནས་འཇུའུ་ལི་ཀྲེ་ཡིས་མི་ཐོས་པ་བྱས་ནས་རང་ཉིད་ཀྱིས་རང་ལ་ལན་བཏབ།
འཇུའུ་ལི་ཀྲེ་ཡིས་རོའ་མིའོ་ཁྱིམ་གྱི་འཁྲིས་སུ་འབྱོར་བ་ཤེས་མེད་ཀྱང༌། སེམས་ཀྱི་ལྡུམ་རྭར་གསར་དུ་བཞད་པའི་བརྩེ་དུང་གི་མེ་ཏོག་དེའི་དྲི་བསུང་གིས་སྒེའུ་ཁུང་གི་འཁྲིས་སུ་མཚན་ལྗོངས་དེར་དབང་མེད་དུ་ཁྲིད་ནས་བརོའ་མིའོ་རོའ་མིའོ་ཁྱེད་ལ་ཅིའི་ཕྱིར་རོའ་མིའོ་ཞེས་མིང་བཏགས་སམ། ཁྱེད་ཀྱི་བརྩེ་བའི་ཕ་མ་དང་མིང་དེ་གཉིས་བསྐྱུར་ཕོད་དམ། གལ་དེ་མ་ཕོད་ཚེ་ཁོ་མོས་མི་རིང་བར་ཁེའབ་པུའུ་ལེ་ཀྲེ་བསྐྱུར་ཆོག་ཅེས་ལྷད་མེད་བརྩེ་དུང་མཚོན་པའི་སྙིང་སྡུག་འབོད་སྒྲ་དེ་རོའ་མིའོ་ཡིས་ཐོས་སྟབས། འཇུའུ་ལི་ཀྲེ་ལ་སྐད་ཆ་ཤོད་པའི་བློ་སྤོབས་འཕར་མ་ཞིག་སྐྱེས་ཀྱང༌། པི་ཝང་ལྟར་སྙན་པའི་འབོད་སྒྲ་མུ་མཐུད་དུ་རང་ཉིད་ཀྱི་སེམས་ཁོངས་སུ་ཅི་ཡོད་པའམ། དྲན་པ་རྣམས་ཁེར་རྐྱང་དུ་སྨྲས་པ་དང་སྦྲགས་ཁོའི་མིང་ལ་རོའ་མིའོ་བཏགས་པ་དེ་དང༌། ཁོ་བོ་མོན་ཀྲ་གྷ་སི་ཡི་ཁྱིམ་མི་ཡིན་པ་དེར་འཁང་ར་བྱས་པ་མ་ཟད། ཕྱིས་འབྱུང་རོའ་མིའོ་ཁོ་མོར་བདག་པའི་ཚེ་ཁོའི་མིང་བརྗེ་རྒྱུའི་སྨོན་ཚིག་ཀྱང་སྨྲས།
རོའ་མིའོ་ཡིས་མཐའ་མཇུག་གི་སྐད་ཆ་དེ་ཐོས་མ་ཐག་མོས་ཁེར་རྐྱང་དུ་སྨྲས་པའི་རེ་སྨོན་གྱི་སྐད་ཆ་དེ་ཁོ་རང་ཉིད་ལ་ལབ་པ་བཞིན། ལམ་སང་ཁང་རྒྱབ་ནས་ཐོན་སྟེ་འཇུའུ་ལེ་ཀྲེ་ལ་རང་ཉིད་ཀྱི་འདོད་འདུན་བཞིན་ཁོ་ལ་མིང་ཇི་ལྟར་གདགས་ཀྱང་འཐུས་པ་མ་ཟད། གལ་ཏེ་ཁོ་མོ་རོའ་མིའོ་ཞེས་པའི་མིང་དེར་མི་དགའ་ཚེ་ཁོས་ལམ་སང་མིང་དེ་དོར་རྒྱུའི་ཁས་ལེན་ཀྱང་བྱས། རཱོ་མིའོ་ཡིས་འཇུའུ་ལེ་ཀྲེ་ཡི་ཁེར་རྐྱང་གི་འབོད་སྒྲ་དེར་ཁོ་མོའི་ཁང་རྒྱབ་ནས་ལན་བརྒྱབ་པས་ཐོག་མར་མོས་རཱོ་མིའོ་ཡིས་སྐད་ངོ་མ་ཤེས་སྟབས་མི་མེད་པའི་མཚན་མོའི་འཇིག་རྟེན་དེར་ཁོ་མོའི་སེམས་གཏིང་གི་གསང་བ་རྟོགས་མཁན་གྱི་སྐྱེས་པ་སུ་ཡིན་ནམ་སྙམ་པའི་འཇིགས་སྣང་དང་དངངས་སྐྲག་ཚད་མེད་སྐྱེས། འོན་ཀྱང༌། ཁོས་བསྟུད་མར་ཁང་རྒྱབ་ནས་སྐད་ཆ་བཤད་སྟབས། གང་བཤད་པའི་སྙིང་གཏམ་ཚང་མ་ཐོས་པས་ལམ་སེང་རོའ་མིའོ་ཡིན་པ་ངེས་ཐུབ།
རོའ་མིའོ་མན་ཀྲ་གྷ་སི་ཚང་གི་ཁྱིམ་མི་ཡིན་སྟབས། གལ་ཏེ་འཇུའུ་ལི་ཀྲེ་ཡི་ཁྱིམ་མི་ཞིག་གིས་ཁོ་ལྡུམ་རའི་ནང་ཡོད་པ་མཐོང་ཚེ་ཁོ་གསོད་པར་ཐེ་ཚོམ་མེད་པས་ཁོའི་ལྐུགས་རྟགས་དང་ཉེན་ཚབས་ཆེ་བའི་བྱ་སྤྱོད་དེར་འཁང་ར་བྱས་པར། རོའ་མིའོ་ཡིས་ལམ་སེང་གལ་ཏེ་ཁྱེད་ཀྱིས་ཁོ་བོར་ཐུགས་རྒྱུད་བཟང་པོའི་ཐོག་ནས་གཟིགས་སྐྱོང་ལེགས་པར་གནང་ཚེ་ང་དགྲ་བོའི་འཇིགས་པ་ལས་ཐར་ངེས། དེ་མིན་མཛེས་མ་ཁྱེད་ཀྱི་མཉམ་དུ་འགྲོགས་མ་ཐུབ་པར་མི་ཚེ་རིང་པོར་འཚོ་བ་ལས་དགྲ་བོའི་ལྡང་ཟུག་དང་འཁོན་འཛིན་འོག་ཏུ་འཆི་བ་དགའ་ཞེས་བཤད་པས་འཇུའུ་ལི་ཀྲེ་ཡིས་ཁྱེད་འདིར་སུ་ཞིག་གིས་ཁྲིད་བྱུང་ཞེས་དྲིས་པར་ཁོས་ལྷད་མེད་པའི་བརྩེ་དུང་གིས་ལམ་སྣེ་དྲངས་བྱུང་ཞེས་བཤད། འཇུའུ་ལུ་ཀྲེ་རང་གིས་རཱོ་མིའོ་ལ་བརྩེ་དུང་མཚོན་པའི་ཁེར་རྐྱང་གི་འབོད་སྒྲ་རྣམས་ཡིད་ལ་དྲན་ཏེ། ཁོ་མོའི་དཀར་ཞིང་གཙང་བའི་བཞིན་བཟང་ངོ་ཚས་དམར་པོར་གྱུར་ནའང༌། སྨྲས་ཟིན་པའི་ཁེར་རྐྱང་གི་འབོད་ཚིག་དག་ཕྱིར་བསྡུ་ཐབས་མེད་པ་ནི་འཕང་ཚར་བའི་མདའ་མོ་ཚུར་ལོག་པའི་རེ་བ་བྱས་པ་དང་མཚུངས།
སྤྱིར་ཡུལ་སྲོལ་ལྟར་ན་རྣམ་དཔྱོད་ལྡན་པའི་བུད་མེད་ཚོས་རང་གི་སེམས་ཁོང་གི་གསང་བ་རང་དགའ་ཡུལ་གྱི་སྐྱེས་པས་མི་བསླུ་ཆེད་བར་ཐག་རིང་ཙམ་བྱས་ཏེ་སྡོད་པ་ལྟར། འཇུའུ་ལི་ཀྲེ་ཡིས་ཀྱང་བྱས་ན་འགྲིག་མོད། ཁོ་མོར་མཚོན་ན་རོའ་མིའོ་རང་ཁྱིམ་འཁྲིས་སུ་ཡོད་མིན་མ་ཤེས་པར་སེམས་ཁོང་ན་ཡོད་ཚད་ཁོ་ལ་ཕུལ་ཟིན་པའི་བརྩེ་དུང་གི་འབོད་སྒྲ་ཁོས་ཐོས་སྟབས། ད་ཆ་དགའ་ཡང་མི་དགའ་བའི་ཟོལ་བྱས་པས་ཅི་ལ་ཕན། དེར་བརྟེན་འཇུའུ་ལི་ཀྲེ་ཡིས་སྦ་གསང་མེད་པར་རང་གི་སྔོན་དུ་སྨྲས་ཟིན་པ་རྣམས་དྲང་པོར་བརྗོད་ཞོར་ཁོའི་མིང་ནས་འབོད་བཞིན་དུ་རང་ཉིད་ཀྱིས་ཁོ་ལ་བཅངས་པའི་བརྩེ་དུང་དེ་བསླུ་བྲིད་ཀྱི་དྲི་མས་མ་སྦགས་པར། ལྷད་མེད་དུང་དཀར་ལྟ་བུ་ཡིན་པར་ངོས་འཛིན་དགོས་པའི་རེ་འབོད་བྱས།
སྤྱིར་མོའི་བྱ་སྤྱོད་དེ་དག་མིག་སྔར་མཛེས་པོ་མེད་ཀྱང༌། བུ་མོ་གཞན་གྱི་གཡོ་སྒྱུའི་གདོང་འབག་གྱོན་ཏེ་ངོ་ཚའི་ཁུར་གྱིས་ནོན་ཁུལ་བྱེད་པའི་ཟློས་གར་འཁྲབ་ཚན་དང་མི་འདྲ་བར་ལྷད་མེད་ཅིག་ཡིན་པ་སྨོས་ཅི་དགོས།
རོའ་མིའོ་ཡིས་སྟེང་ཕྱོགས་ཀྱི་ལྷ་རྣམས་དཔང་དུ་བཙུགས་ཏེ་ཡིན་ལུགས་ཚུལ་མཐུན་གྱིས་སྤྱོད་པ་བསྲུངས་བའི་ན་ཆུང་མ་ཁྱོད་ལ་བརྙས་བཅོས་དང་ལོག་མཐོང་མི་བྱ་ཞེས་མནའ་བོར་ལ་ཉེ་བའི་སྐབས། འཇུའུ་ལི་ཀྲེ་ཡིས་ཡུད་ཙམ་རིང་ཁྱོད་དང་མཉམ་སྡོད་ཀྱི་གོ་སྐབས་བྱུང་བ་དེར་དགའ་བ་ཚད་མེད་སྐྱེས་ཀྱང༌། ཕན་ཚུན་བརྩེ་དུང་གི་མདུད་པ་ནམ་ཡང་མི་ཞིག་པའི་མནའ་ཚིག་འཇོག་པ་དེ་ནི་ཧོལ་རྒྱུག་དང་བློ་གྲོས་ཀྱིས་མ་འདངས་པའི་བྱ་སྤྱོད་ཅིག་རེད་ཅེས་བཤད། རོའ་མིའོ་ནི་སྤྱང་རྒན་ལྟོགས་པ་ཞིག་དང་འདྲ་བར་ད་དུང་དྭངས་གཙང་བརྩེ་དུང་གི་རི་མོ་ནམ་ཡང་མི་འགྱུར་བའི་མནའ་ཚིག་སྔར་བས་ཆེ་བ་ཞིག་འཇོག་དགོས་པའི་རེ་འདུན་བཏོན་པ་དེར། འཇུའུ་ལི་ཀྲེ་ཡིས་ཅུང་འཛུམ་བཞིན་དུ་ངའི་ཡོད་ཚད་སྔོན་ནས་ཁྱེད་ལ་ཕུལ་ཟིན་པས་སླར་ཡང་འབུལ་དགོས་པ་ཞིག་ཅི་ཞིག་ཡོད་ནའང་འབུལ་བར་ཐེ་ཚོམ་དང་སོམ་ཉི་གཏན་ནས་མི་དགོས་ཞེས་སྨྲས་པས། ཁོ་ལ་བཅངས་པའི་བརྩེ་དུང་ནི་རྒྱ་མཚོ་ལྟར་ཟབ་པའང་རྟོགས་ཐུབ།
བརྩེ་དུང་གི་དྲ་རྒྱར་ཚུད་པའི་ན་ཆུང་གཉིས་མུན་ནག་གི་འཇིག་རྟེན་དེར་འཕྲད་དེ་སྙིང་གཏམ་བཤད་བཞིན་པའི་སྐབས། མཚན་གྱི་དུས་ཚོད་གང་འཚམ་ཞིག་ཏུ་སླེབས་ཟིན་པས། འཇུའུ་ལི་ཀྲེ་ཡིས་གཡོག་མོས་མོ་ཉལ་བར་སྐད་བཏང་པས་མི་འགྲོ་མཐུ་མེད་དུ་གྱུར། འོན་ཀྱང་ཡུད་ཙམ་རྗེས་མགྱོགས་པར་ཁོའི་ཕྱོགས་སུ་ཡོང་ནས་སྙིང་སྡུག་རོའ་མིའོ་གལ་ཏེ་ང་ལ་བཅངས་པའི་བརྩེ་དུང་ལ་ལྷད་མེད་ཅིང༌། ང་དང་མཉམ་དུ་ཀྱག་ཀྱོག་མི་ཚེའི་མདུན་ལམ་དུ་མཉམ་བསྐྱོད་བྱེད་པའམ་མདུན་པ་གཙང་མ་ཡོད་ཚེ། སང་ཉིན་གཉེན་སྒྲིག་གི་དུས་བཀག་བྱེད་པར་བང་ཆེན་ཞིག་ཅིས་ཀྱང་མངག་ཐབས་བྱེད་དགོས་ཞེས་གྲོས་མོལ་བྱེད་སྐབས་གཡོག་མོས་བསྟུད་མར་སྐད་བཏང་སྟབས། སླར་ཡང་ཡུད་ཙམ་ཕྱིན་ཏེ་ཚུར་ཡོང་བ་སོགས་མདོར་ན་བརྩེ་དུང་གི་འདབ་མ་མཉམ་དུ་བཞད་པའི་གཞོན་ནུ་གཉིས་ཀྱི་ཐོས་འཛིན་གྱི་བུ་གར་ཤིན་ཏུ་སྙན་པའི་རོལ་དབྱངས་ནི་ཕན་ཚུན་གྱི་ངག་ལས་ཐོན་པའི་སྙིང་གཏམ་ཡིན་སྟབས་ཁོང་གཉིས་གཅིག་ཡིད་གཅིག་ལ་ཆགས་ཏེ་ཡུད་ཙམ་ཡང་བྲལ་མི་ཕོད་བཞིན་དུ་མཚན་འཇུག་གི་རྨི་ལམ་སྒུག་པར་སོ་སོའི་ཁྱིམ་དུ་མི་བསྐྱོད་མཐུ་མེད་གྱུར།
དུས་དེ་ནས་བཟུང་འཇུའུ་ལི་ཀྲེ་ཡི་འབྱུང་འགྱུར་གྱི་བདེ་སྡུག་རཱོ་མིའོ་ལ་ཐུག་ཡོད་སྟབས་མོ་རང་གི་དཀོན་མཆོག་དང་གཉིས་སུ་མེད་པར་འཇིག་རྟེན་འདིར་ཁོའི་རྗེས་སུ་བསྙེག་རྒྱུ་ཡིན་པ་སྨོས་ཅི་དགོས། ཞོགས་པའི་སྐྱ་རེངས་ཤར་ལ་ཉེ་བའི་སྐབས་རོའ་མིའོ་བརྩེ་དུང་གིས་མྱོས་ཏེ་གཉིད་མ་ཁུགས་ཀྱང༌། ཁོས་ཁྱིམ་དུ་འགྲོ་བའི་ཚབ་ལ་བཙུན་པ་ལོའ་རཱན་སི་(Lowrence)འཚོལ་བར་ཕྱིན།
ཐུགས་རྒྱུད་བཟང་བའི་བཙུན་པ་ཁོང་ཞོགས་པའི་ཁ་འདོན་སྐྱོར་བཞིན་ཡོད་པའི་སྐབས་རཱོ་མིའོ་ཁོང་གི་འཁྲིས་སུ་འབྱོར་བས་ཁོ་ནམ་རྒྱུན་དང་མི་འདྲ་བར་ཞོགས་པ་སྔ་མོར་ཡོང་བ་དེས་ཁོང་ལ་རོའ་མིའོ་མཚན་གང་གཉིད་མ་ཁུགས་པའི་ར་སྤྲོད་བྱས་པ་མ་ཟད། ཁོང་གཉིད་མ་ཁུགས་པའི་རྒྱུ་མཚན་ཡང་རཱོ་མིའོ་ཡི་སྔོན་མའི་སྙིང་སྡུག་རོའ་ས་ལེན་ལ་བཅངས་པའི་བརྩེ་དུང་གི་རླབས་རྒྱུན་དེས་ཡིན་པར་དགོངས། འོན་ཀྱང་བསམ་ཡུལ་ལས་འདས་པ་ཞིག་ལ་རཱོ་མིའོ་ཡིས་བཙུན་པའི་དགོངས་གཞི་ལས་ལྡོག་སྟེ་རང་ཉིད་དང་འཇུའུ་ལི་ཀྲེ་ཡི་གསར་དུ་བཞད་པའི་བརྩེ་དུང་གི་སྐོར་རྣམས་ཁོང་ལ་ཞུས་པར་མ་ཟད། ཁོ་གཉིས་ཀྱི་བརྩེ་དུང་ལ་བར་ཆད་མི་འབྱུང་ཆེད་མགྱོགས་པོར་གཉེན་སྒྲིག་བྱེད་ཐུབ་པར་རོགས་རམ་སྐྱབས་འཇུག་ཞུས། བཙུན་པ་ལཱོ་རཱན་སི་ཁོའི་འགྱུར་སླ་བའི་བརྩེ་དུང་ལ་ཧང་སང་སྟེ་མིག་ཅེར་རེར་གཟིགས་བཞིན་བཞུགས། བཙུན་པ་ལཱོ་རཱན་སིས་དེ་སྔོན་རཱོ་མིའོ་ཡིས་རཱོ་སི་ལེན་ལ་བཅངས་པའི་ལྷད་མེད་པའི་བརྩེ་དུང་དང༌། མོས་ཁོ་ལ་བསྟན་པའི་གྲང་ཤུར་ཤུར་གྱི་རྣམ་འགྱུར་ངན་པ་དེས་ཁོའི་ཡིད་སེམས་དཀྲུག་མྱོང་བའི་གནས་ཚུལ་རྣམས་མཁྱེན་གྱི་ཡོད་པས། ཁོང་གིས་སྐྱེས་པའི་བརྩེ་དུང་ནི་སྙིང་དབུས་སུ་མེད་པར་མིག་ནང་ལ་ཡོད་ཅེས་པའི་དཔེ་དེ་ཡང་བདེན་འདུག་དགོངས། རཱོ་མིའོ་ཡི་དེའི་ལན་དུ་རཱོ་སཱ་ལེན་གྱིས་ཁོ་ལ་མི་དགའ་བཞིན་དུ་རང་ཉིད་ཀྱི་ཡོད་ཚད་ཁོ་མོར་ཕུལ་བ་དེར་རང་གིས་རང་ལ་འཁང་ར་བྱས་པ་དང་སྦྲགས། ད་ཆ་འཇུའུ་ལི་ཀྲེ་དང་ཁོང་གཉིས་ལ་མཚོན་ན་ཕན་ཚུན་གཅིག་སེམས་གཅིག་ལ་ཆགས་ཏེ་བརྩེ་དུང་གི་འདབ་མ་ལྷུག་པོར་གྲོལ་བ་སོགས་ཀྱི་གནས་ཚུལ་རྣམས་བཙུན་པ་ལཱོ་རཱན་སི་ལ་ཆད་ལྷག་མེད་པར་ཞུས།
ཐུགས་རྒྱུད་བཟང་པའི་བཙུན་པའི་དགོངས་པར་འཇུའུ་ལི་ཀྲེ་དང་རོའ་མིའོ་གཉིས་གཉེན་སྒྲིག་བྱེད་ཐུབ་ན་ཁེབ་པུའུ་ལི་ཀྲེ་ཚང་དང༌། མོན་ཀྲ་གྷ་སི་ཚང་གཉིས་ཀྱི་འཁོན་འཛིན་རྣམས་ཀྱང་ཞི་ཐུབ་ངེས་རེད་དགོངས་པར་བརྟེན། གཅིག་ནས་བཙུན་པ་རང་ཉིད་ཁྱིམ་ཚང་གཉིས་ཀྱི་མཐུན་གྲོགས་ཡིན་པ་མ་ཟད། ལྷག་པར་དུ་རཱོ་མིའོ་ཡིས་ཁོ་ལ་བརྩི་མཐོང་ཤིན་ཏུ་ཆེན་པོ་བྱེད་ཀྱི་ཡོད་སྟབས་ཁོང་གིས་གཞོན་ནུ་གཉིས་ཀྱི་བག་སྟོན་བཤམ་རྒྱུའི་ཞལ་བཞེས་གནང༌།
འཇུའུ་ལི་ཀྲེ་ཡིས་སྔོན་གྱི་ཁ་ཆད་ལྟར་མོས་བཏང་བའི་བང་ཆེན་རཱོ་མིའོ་ཡི་འཁྲིས་སུ་འབྱོར་སྟབས། ཁོས་རོའ་མིའོ་ཡིས་བང་ཆེན་དེ་བརྒྱུད་འཇུའུ་ལི་ཀྲེ་མགྱོགས་པོར་བཙུན་པ་ལཱོ་རཱན་སིའི་ཁྱིམ་དུ་འབྱོར་དགོས་པའི་མངགས་ཆ་བྱས་པ་ལྟར་འཛོམས་པ་དང༌། བཙུན་པས་དཀར་ཕྱོགས་ཀྱི་ལྷ་རྣམས་ཁོང་ཚོའི་བྱ་སྤྱོད་དེར་བརྙེས་པ་མ་ཟད། འབྱུང་འགྱུར་མོན་ཀྲ་གྷ་སི་ཚང་དང༌། ཁེབ་པུའུ་ཀྲེ་ཚང་གཉིས་ཀྱི་འཁོན་འཛིན་རྣམས་ཞི་སྟེ་ཞི་བདེའི་དཔལ་ལ་རོལ་ཐུབ་པའི་སྨོན་ལམ་བཏབ།
བག་སྟོན་ཚར་རྗེས་རཱོ་མིའོ་ཡིས་མཚན་དེར་དེ་སྔོན་ཁོ་གཉིས་འཕྲད་ཡུལ་གྱི་ལྡུམ་རྭའི་ནང་འཇུའུ་ལི་ཀྲེ་ལ་འཕྲད་པར་ཡོང་རྒྱུའི་ཁས་ལེན་བྱས་པར་སྒུག་མི་བཟོད་པའི་ངང་ཉིན་མོ་རྫོགས་རྒྱུའི་རེ་སྨོན་བྱས་ཀྱང༌། སྒུག་དགོས་པའི་དུས་ཚོད་ནི་བྱིས་པ་ཆུང་ངུ་ཞིག་གིས་གྱོན་ཆས་གསར་པ་གྱོན་འདོད་དང༌། ལོ་གསར་གྱི་དུས་ཚོད་སྒུག་དཀའ་བའི་སྣང་བ་དང་གཉིས་སུ་མ་མཆིས། ཉིན་དེའི་ཞོགས་པར་རཱོ་མིའོ་ཡིས་མགྱོགས་པོ་བྷན་འོ་ལིའོ་དང་མཱར་ཁིའུ་ཀྲིའོ་གཉིས་ཝི་རཱོ་ས་ཡི་སྲང་ལམ་དུ་སྐྱོད་སྐབས། ཁེབ་པུའུ་ལེ་ཀྲེ་ཡི་ཕྱོགས་གཏོགས་མང་པོ་ཞིག་ལ་འཕྲད་པ་དང༌། དེའི་གའི་ཁྲོད་དུ་ཀྲེ་བྷོལ་ཊེ་ཡང་སླེབས་ཡོད། ཀྲེ་བྷོལ་ཊེ་ཞེས་པའི་མི་དེ་ནི་དེ་སྔོན་ཁེབ་པུའུ་ལི་ཀྲེ་ཡི་གསོལ་སྟོན་བཤམས་སྐབས། རཱོ་མིའོ་ལ་རྒོལ་བར་རྩོམ་མཁན་དེ་ཡིན་ཡང་ཁོས་མཱར་ཁེའུ་ཀྲིའོ་མཐོང་སྟབས་ཁོ་ལ་མོའན་ཀྲ་གྷ་སི་ཡི་བུ་རཱོ་མིའོ་ཡི་གྲོགས་པོ་བྱས་པ་དེར་སྐྱོན་བརྗོད་དང་ལྡང་ཟུག་ཚད་མེད་བྱས།
མཱར་ཁེའུ་ཀྲིའོ་ནི་ཀྲེ་བྷོལ་ཊེ་དང་འདྲ་བར་ཤ་དར་ཁྲག་རྒྱས་ཀྱི་ཕོ་གསར་དར་མ་ཞིག་ཡིན་སྟབས་ཁོ་ལ་ལམ་སེང་ཚིག་ངན་གྱིས་ཡ་ལན་བསློགས། བྷན་འོ་ལིའོ་ཡིས་ཁོ་གཉིས་ཀྱི་ཁ་རྩོད་དེ་ཞི་བར་བྱེད་ཐུབ་མིན་ལ་མ་ལྟོས་པར་སྐབས་དེར་རཱོ་མིའོ་ཁོ་ཚོའི་འཁྲིས་སུ་འབྱོར་སྟབས། ཀྲེ་བྷོལ་ཀྲེ་ཡིས་ཁྲོ་བའི་མིག་ཟུང་རཱོ་མིའོ་ལ་གཏད་དེ་ཁ་རྡུང་དྲག་པོ་བཏང༌། འོན་ཀྱང་ཀྲེ་བྷོལ་ཀྲེ་འཇུའུ་ལི་ཀྲེ་ཡི་གཉེན་མཚན་ཡིན་པ་དང༌། རཱོ་མིའོ་ནི་ཁྱིམ་གྱི་རྙོག་འཛིང་ནང་དེ་སྔོན་ནས་ཚུད་མེད་པ་མ་ཟད། ཁོ་ནི་ནམ་རྒྱུན་ཞི་ཞིང་དུལ་བ་ཞིག་ཡིན་སྟབས། རྒོལ་ལན་སློག་པའི་ཚབ་ཏུ་ཁོའི་ཁྱིམ་གྱི་མིང་དང་བཅས་གུས་ཞབས་ལྡན་པའི་ངང་ཀྲེ་བྷོལ་ཀྲེ་ལ་བཐུགས་རྒྱུད་བཟང་བའི་སྐུ་ཞབས་ཁེབ་པུའུ་ལི་ཀྲེ་ཞེས་བོས་ཏེ། ཁོ་དང་མཉམ་དུ་ཞི་འཆིང་ཡོང་ཐབས་བྱས་ཀྱང༌། མོའན་ཀྲ་གྷ་སི་ཁྱིམ་མི་ཚང་མར་སྡང་ཞིང་ཁྲོ་མཁན་ཞིག་ཡིན་སྟབས། རཱོ་མིའོ་ཡི་ཞི་འཇམ་གྱི་སྐད་ཆར་མ་ཉན་པར་རལ་གྲི་ཤུབས་ནས་བཏོན། རཱོ་མིའོ་ཡི་གྲོགས་པོ་མཱར་ཁེའུ་ཀྲིའོ་ཞེས་པས་རཱོ་མིའོ་ཡིས་ཀྲེ་བྷོལ་ཀྲེ་ལ་ཞི་འཆིང་བྱེད་པའི་རྒྱབ་ལྗོངས་མ་ཤེས་སྟབས། རཱོ་མིའོ་ཡི་བྱ་སྤྱོད་དེ་སོ་སོའི་ངོ་ཚ་ལྟ་བུར་མཐོང་སྟེ་ཁོས་ཀྲེ་བྷོལ་ཀྲེ་ལ་ཚིག་རྩུབ་མང་དག་སྨྲས་པ་དང་སྦྲགས། རཱོ་མིའོ་དང་བྷན་འོ་ལིའོ་གཉིས་ཀྱིས་བཀག་ཀྱང་མ་ཁོག་པར་མཱར་ཁེའུ་ཀྲིའོ་ས་ལ་མ་འགྱེལ་བར་དུ་འཐབ་འཛིང་བྱས། རཱོ་མིའོ་ཡིས་རང་གི་གྲོགས་པོ་མཱར་ཁེའུ་ཀྲིའོ་རྐྱེན་ལམ་དུ་ཕྱིན་ཡོད་པ་ཤེས་འཕྲལ། ཁོང་ཁྲོ་བཟོད་གླག་མེད་པར་ཀྲེ་བྷོལ་ཀྲེ་ལ་ཚིག་རྩུབ་ཀྱིས་སྡིགས་མོ་དང་འབྲེལ་ཁོ་དང་འཐབ་སྟེ་ཀྲེ་བྷོལ་ཀྲེ་ལྔ་ལམ་དུ་བརྫངས།
རྐྱེན་ངན་གྱི་གནས་ཚུལ་དེ་གཟུགས་མེད་ཀྱི་རླུང་བུ་དང་འདྲ་བར་གང་སར་ཁྱབ་པས་མི་ཚོགས་མང་པོ་ཞིག་ཁོ་ཚོའི་འཁྲིས་སུ་འདུ་འཛོམས་བྱས། མི་ཚོགས་དེ་དག་གི་ཁྲོད་དུ་ཕྱུག་བདག་ཁེབ་པུའུ་ལི་ཀྲེ་དང༌། མཱོན་ཀྲ་གྷ་སི་བཟའ་ཟླ་བཅས་པ་ཡང་འབྱོར་ཡོད་པ་མ་ཟད། ཡུད་ཙམ་རྗེས་ལ་ཝི་རཱོ་ན་ཡུལ་གྱི་རྒྱལ་པོ་ཡང་ཕེབས། རྒྱལ་པོ་ཁོང་ནི་ཀྲེ་བྷོལ་ཀྲེ་ཡིས་རྐྱེན་ལམ་དུ་བཏང་བའི་སྐྱེས་པ་མཱར་ཁེའུ་ཀྲིའོ་དང་འབྲེལ་འདྲིས་ཆེན་པོ་ཡོད་པ་ཞིག་ཡིན་པར་བརྟེན། རྒྱལ་པོའི་གཞུང་དང་མི་མང་གཉིས་ཀ་ཞི་བདེར་དོ་ཕོག་གཏོང་བའི་ཁྱིམ་ཚང་གཉིས་ཀྱི་འཁོན་རྩོད་དེས་སྔོན་མ་ནས་བཟུང་སུན་གཙེར་བཟོས་སྟབས། ད་ལམ་ནག་ཉེས་ཅན་རྣམས་ལ་ཉེས་པ་ཚ་ནན་ཞིག་གཏོང་རྒྱུའི་ཐག་གཅོད་བྱས།
བྷན་འོ་ལིའོ་རྒྱག་རེས་ཀྱི་འབྱུང་རྐྱེན་རྣམས་མཐོང་བའི་དཔང་པོ་ལྟ་བུར་གྱུར་པས། རྒྱལ་པོས་ཁོ་སྐད་བཏང་སྟེ་རྐྱེན་ངན་གྱི་སྐོར་རྣམས་གསལ་པོར་དྲིས་པར། ཁོས་རཱོ་མིའོ་ལ་དོ་ཕོག་མི་ཡོང་བའི་ཆེད་རང་གི་གྲོགས་པོ་བྱས་པའི་ནོར་འཁྲུལ་འགའ་མ་གཏོགས་ཚང་མ་སྦ་གསང་མེད་པར་རྒྱལ་པོར་ཞུས། རང་གི་གཅེས་ཕྲུག་ཀྲེ་བྷོལ་ཀྲེ་འཇིག་རྟེན་ཕྱི་མར་གཤེགས་པའི་སྡུག་བསྔལ་གྱིས་དགྲ་བོར་ཤ་ལན་བསློག་རྒྱུ་མ་གཏོགས་དྲན་རྒྱུ་མེད་པའི་ལྕམ་སྐུ་ཁེབ་པུའུ་ལི་ཀྲེ་ལགས་ཀྱིས་རྒྱལ་པོར་བྷན་འོ་ལིའོ་ཡི་གྲོགས་པོ་ཡིན་པ་མ་ཟད། མོའན་ཀྲ་གྷ་སི་ཚང་གི་ཕྱོགས་གཏོགས་ཀྱང་ཡིན་པས། ཁོས་ཁོ་ཚོའི་ནོར་འཁྲུལ་སྦས་སྐུང་བྱེད་ངེས་པས་ཁོ་ལ་ཡིད་ཆེས་མ་བྱས་པའི་ཐོག་མི་གསོད་ལག་དམར་བར་དྲང་པོའི་ཁྲིམས་ཀྱིས་ཆད་པ་གཅོད་གནང་དགོས་ཞེས་འབོད་སྐུལ་བྱས་པ་དང་སྦྲགས། ད་ལྟ་རང་གི་བུ་མོ་འཇུའུ་ལི་ཀྲེ་ཡི་བཟའ་ཟླ་ཡིན་པ་མ་ཤེས་པར་བུ་རཱོ་མིའོ་ལའང་ཁ་རྡུང་བཏང༌། གཞན་ཡང་རྒྱལ་པོའི་སྐུ་མདུན་དུ་ལྕམ་སྐུ་མཱོན་ཀྲ་གྷ་སི་ཡོད་པས་ཁོང་གིས་རང་ཉིད་ཀྱི་བུའི་སྲོག་སྐྱོབ་ཞུ་ཆེད་དུ་ཀྲེ་བྷོལ་ཀྲེ་ཡིས་ཐོག་མར་རཱོ་མིའོ་ཡི་གྲོགས་པོའི་སྲོག་བཅད་པའི་ཉེར་ལེན་ལ་བརྟེན་ནས་རཱོ་མིའོ་ཡིས་ཀྲེ་བྷོལ་ཀྲེ་བསད་པ་དེར། ཁོས་ཉེས་ཁྲིམས་ཕོག་དགོས་པའི་ནོར་འཁྲུལ་གང་ཡང་བྱས་མེད་ཅེས་རྒྱལ་པོར་ཞུས། ལྕམ་སྐུ་གཉིས་ཀྱི་རྩོད་གཞི་གནད་དོན་དེ་དག་ལ་རྒྱལ་པོས་ཟབ་ལྷིང་གིས་ཞིབ་འཇུག་བྱས་མཐར། རཱོ་མིའོ་ཡུལ་ཝི་རཱོ་ན་ནས་ཕྱིར་འབུད་བྱེད་དགོས་པའི་བཀས་བཅད་གནང༌།
རཱོ་མིའོ་ཡི་བཟའ་ཟླར་གྱུར་ནས་ཆུ་ཚོད་བཞི་ཙམ་ལས་མ་ཕྱིན་པའི་འཇུའུ་ལི་ཀྲེ་ལ་མཚོན་ན་དེ་ནི་ཤིན་ཏུ་བཟོད་པར་བཀའ་བའི་གནད་དོན་ཞིག་ཡིན་ལ་རྒྱལ་པོའི་བཀའ་ཁྲིམས་འོག་ནས་དེ་ནི་ཁོ་གཉིས་མཐའ་མའི་གྱེས་བྲལ་ཡང་ཡིན་སྲིད་པའི་སྣང་བ་སྟེར། ཡིད་སྐྱོ་ཐབས་སྡུག་གི་གནས་ཚུལ་ངན་པ་དེ་ཐོས་སྐབས། ཐོག་མར་རང་གི་སྤུན་མཆེད་གསོད་མཁན་གྱི་ལག་དམར་བ་རཱོ་མིའོ་ལ་ཁོང་ནས་ཁྲོ་ཡང༌། ཁོང་གཉིས་ཀྱི་བར་ན་གཟུགས་མེད་བརྩེ་དུང་གི་མདུད་པ་དམ་པོ་ཞིག་ཡོད་སྟབས། ཁོང་ཁྲོ་རང་ཤུགས་ཀྱིས་ཞི་སྟེ་རང་གི་སྤུན་མཆེད་གྲོངས་པའི་མྱ་ངན་གྱི་མིག་ཆུ་དེ། སྤུན་མཆེད་ཀྱིས་གསོད་པར་འདོད་པའི་རང་གི་བཟའ་ཟླ་རཱོ་མིའོ་གསོན་པོར་འཚོ་ཐུབ་པའི་དགའ་སྤྲོའི་མིག་ཆུར་གྱུར། འོན་ཀྱང་མོའི་སེམས་སུ་རཱོ་མིའོ་རང་ཉིད་དང་བྲལ་ཏེ་ཕྱིར་འབུད་བྱེད་དགོས་པའི་གནས་ཚུལ་དྲན་སྐབས་ཡིད་སྐྱོ་བའི་མིག་ཆུ་བར་མེད་དུ་བཞུར་བཞིན། ཉེས་ཁྲིམས་དེ་ནི་ཀྲེ་བྷོལ་ཀྲེ་ཡི་སྲོག་བཀུམ་པ་བས་ཀྱང་བཟོད་པར་དཀའ་བ་ཞིག་ཏུ་གྱུར། མི་གསོད་ཁྲག་སྦྱོར་གྱི་རྐྱེན་ངན་དེ་ཚོས་མཚོན་རཱོ་མིའོ་བཙུན་པ་ལཱོ་རཱན་སི་ཡི་ཁྱིམ་དུ་གནས་ཚང་གཡར་ནས་བསྡད་ཡོད་པས། ཁོས་རང་ཉིད་ཕྱིར་འབུད་བྱ་དགོས་པའི་གནས་ཚུལ་རྣམས་ཐོས།
ཁོ་ལ་མཚོན་ན་ཝི་རོའ་ན་ལས་གཞན་པའི་སྡོད་གནས་ཆགས་ཡུལ་ཞིག་མེད་པ་མ་ཟད། འཇུའུ་ལི་ཀྲེ་མ་གཏོགས་ན་ཆུང་མ་གཞན་ཞིག་རང་གི་སྣང་ངོར་མེད་པའི་ཚོར་བ་ཞིག་ཡོད་པས། ཁོ་མོ་དང་ཁ་བྲལ་ནས་ཡུལ་གྱར་དུ་འགྲོ་དགོས་པ་ནི་འཆི་བདག་གི་ཉེས་ཁྲིམས་ལས་ཀྱང་བཟོད་དཀའ་བའི་གནས་སུ་གྱུར་པ་མ་ཟད། དཀོན་མཆོག་གི་ཐུགས་རྗེས་རང་ཉིད་ཁོ་མོ་གང་གནས་ཀྱི་ས་དེར་མཉམ་དུ་བསྡད་ན་དགའ་བདེའི་འོད་སྟོང་རྒྱས་པ་ལས། དེ་མིན་འཇིག་རྟེན་ན་ཡོད་ཚད་སྡུག་བསྔལ་དང་གདུག་རྩུབ་སོགས་ལས་སྙིང་པོ་གང་ཡང་མེད་པའི་སྣང་བ་ཤར།
ཐུགས་རྒྱུད་བཟང་བའི་བཙུན་པ་ལཱོ་རཱན་སི་ཡིས་ཁོའི་སྡུག་བསྔལ་ཞི་ཆེད་སེམས་གསོ་ཇི་ཙམ་བྱས་ཀྱང་རཱོ་མིའོ་ཡི་སྨྱོན་པ་དང་འདྲ་བར་རང་གི་སྐྲ་འཐེན་བཞིན་དུར་ཁུང་འཚོལ་གྱི་ཡིན་ཟེར་བཞིན་གཟུགས་པོ་ས་ལ་བསྡབས་ནས་བསྡད། རཱོ་མིའོ་ལ་བརྩེ་བའི་སྙིང་སྡུག་མའི་ལན་ཞིག་འབྱོར་བས་སྐྱོ་གདུང་གི་རྦ་རླབས་འཁྲུག་པའི་ཁོའི་སེམས་པ་ཅུང་ཙམ་བག་ཕེབས་པར་གྱུར། གོ་སྐབས་དང་བསྟུན་ནས་བཙུན་པས་ཁོའི་ཕོ་ཁྱོ་གའི་ཉམས་བརླགས་པའི་བྱ་སྤྱོད་དེར་འཁང་ར་བྱེད་བཞིན་དུ་ཁྱོད་ཀྱིས་ཀྲེ་བྷོལ་ཀྲེ་རྐྱེན་ལམ་དུ་བཏང་ཟིན་པ་མ་ཟད། ད་དུང་རང་གི་ཆེད་དུ་གསོན་པའི་བརྩེ་གྲོགས་སམ་སྙིང་གྲོགས་དང༌། རང་ཉིད་ཀྱང་གསོད་པར་འདོད་པ་ཡིན་ནམ་ཞེས་བཤད། སྲོག་ཆད་མ་དགོས་པར་རཱོ་མིའོ་ཡུལ་འབུད་བྱེད་དགོས་པའི་ཁྲིམས་གཅོད་དེ་ཤིན་ཏུ་ཡང་ལ། གལ་ཏེ་ཁོས་ཀྲེ་བྷོལ་ཀྲེ་གསོད་མ་ཐུབ་ཚེ། ཀྲེ་བྷོལ་ཀྲེ་ཡིས་རཱོ་མིའོ་གསོད་ངེས་པས་ཀྲེ་བྷོལ་ཀྲེ་བསད་ནས། འཇུའུ་ལི་ཀྲེ་རང་གི་ཆུང་མར་ཉར་ཐུབ་པ་དེ་ནི་ཁོ་ལ་མཚོན་ན་དགའ་འོས་པའི་གནས་ཚུལ་ཞིག་ཡིན་ནའང༌། བཙུན་པ་ཁོ་ལ་རེ་ཐག་ཆད་ནས་ཤི་ཟིན་པའི་མི་རྣམས་ལ་གདུང་སེམས་སྐྱེད་དགོས་པའི་སློབ་སྟོན་གནང་བ་མ་ཟད། ཁོའི་ཤིན་ཏུ་སྐྱོ་བའི་ཉམས་དེ་ལ་དེའི་མཚན་མོ་ཐོག་མར་འཇུའུ་ལི་ཀྲེ་ལ་ཐུགས་འཕྲད་བྱས་མཚམས་རྒྱལ་པོའི་བཀས་བཅད་པ་ལྟར། ཐད་ཀར་མཱན་ཀྲུའུ་བ་(Mantua)«རུ་ཕྱིན་ནས་བཙུན་པས་གཞོན་ནུ་ཕོ་མོ་གཉིས་གཉེན་སྒྲིག་བྱས་ཟིན་པའི་གནས་ཚུལ་སྤྱི་ལ་མ་ཁྱབ་བར་དུས་ཚོད་འོས་འཚམས་ཤིག་ལ་ཡུལ་དེར་སྡོད་དགོས་པའི་བཀའ་བཏང༌།
དེ་ནི་མེ་ཆུ་ལྟར་འཁོན་དུ་འཛིན་པའི་ཁྱིམ་ཚང་གཉིས་སླར་ཡང་མཛའ་མཐུན་གྱི་ཟམ་པ་འཛུགས་པའི་ཐབས་ལམ་ལེགས་ཤོས་ཡིན་པ་མ་ཟད། རཱོ་མིའོ་ཡུལ་གྱར་དུ་མཱན་ཀྲུའུ་བ་ལར་ཕྱིན་པ་དེ་རྒྱལ་པོའི་བཀའ་ལྟར་བསྒྲུབས་པ་ཡིན་པས། ཕྱིས་སུ་ཝིའ་རཱོ་ནང་ལ་ལོགས་སྐབས་སྔོན་མ་བྲལ་དུས་ཀྱི་སྡུག་བསྔལ་ལས་ལྡབ་ཉི་ཤུ་ཙམ་གྱི་བདེ་སྐྱིད་ཆེ་བའི་སྣང་བ་ཞིག་སྟེར་ངེས་ཡིན། རཱོ་མིའོ་ཡིས་བཙུན་པ་རྒན་པོའི་བཀའ་དྭངས་ལེན་གྱིས་ཁོང་གི་ཁྱིམ་ནས་ཐོན། དེའི་མཚན་མོར་འཇུའུ་ལི་ཀྲེ་ཡི་མཉམ་དུ་བསྡད་དེ། ཉིན་རྗེས་མར་རང་ཉིད་གཅིག་པུར་མཱན་ཀྲུའུ་བ་ལ་བསྐྱོད་རྒྱུའི་སེམས་ཐག་བཅད་པས། བཙུན་པས་ཁོ་ལ་ཁྱིམ་གྱི་གནས་ཚུལ་སྐོར་ཡིག་འབྲེལ་མི་ཆད་པར་བྱ་རྒྱུའི་ཞལ་བཞེས་གནང༌།
རཱོ་མིའོ་དེ་སྔོན་རང་གི་སྙིང་གྲོགས་འཇུའུ་ལི་ཀྲེ་ཡིས་ཁོ་ལ་བཅངས་པའི་བརྩེ་དུང་གི་འབོད་སྒྲ་ཐོས་ཡུལ་ལྡུམ་ར་བརྒྱུད། མཚན་དེར་ཁོ་མོའི་ཁྱིམ་དུ་ཁོ་གཉིས་མཉམ་འཛོམས་ཀྱི་དུས་དེར་བདེ་སྐྱིད་ཚད་མེད་ཅིག་བྱུང་ཡང༌། བརྩེ་དུང་གི་ཞགས་པས་དམ་པོར་བཅངས་པའི་ཁྱོ་ཤུག་གཉིས་ཀྱི་ཡུད་ཙམ་གྱི་བདེ་བ་དེ་མ་ཤི་གསོན་བྲལ་བྱེད་དགོས་པའི་སྡུག་བསྔལ་གྱི་རལ་གྲིས་དུམ་བུར་བཅད་དེ། སྒུག་འདོད་མེད་པའི་བྲལ་དུས་ཀྱི་ཞོགས་པ་དེ་རྣམ་ཀུན་དང་མི་འདྲ་བར་མགྱོགས་པོར་སླེབས་པ་མ་ཟད། སྣ་ཚོགས་སྐད་སྙན་སྒྲོག་པའི་བྱིའུ་ཚོགས་ཀྱི་མགྲིན་དབྱངས་ཀྱང་རྣ་བའི་ཚེར་མ་ལྟར་སུན་སྣང་དཔག་མེད་སྐྱེས། སྐྱ་རེངས་བུ་མོ་དབང་ཕྱོགས་ས་འཛིན་གྱི་སྤོ་ནས་འཛིན་མའི་ཁྱོན་ལ་གཟིགས་མོར་ཆས་པའི་སྐབས་དེར། བརྩེ་ལྡན་ཁྱོ་ཤུག་གཉིས་བྲལ་དུས་ཡིན་པས་རཱོ་མིའོ་ཡིས་ཆུང་མ་འཇུའུ་ལི་ཀྲེ་ལ་མཐའ་མཇུག་གྱེས་བྲལ་གྱི་ལེགས་སྨོན་བྱེད་པ་དང་སྦྲགས། ཁོ་མོར་མཱན་ཀྲུའུ་བ་ནས་གནས་བྲིས་འབབ་ཆུའི་རྒྱུན་བཞིན་འཛད་མེད་གཏོང་རྒྱུ་ཁས་ལེན་དམ་བཅའ་བྱས་ཏེ་ག་ལེར་ཁོ་མོ་དང་བྲལ་འགོ་བརྩམས།
རཱོ་མིའོ་ཁོ་མོའི་ཁང་བའི་སྒེའུ་ཁུང་ནས་མར་བབས་ཏེ་ཁང་འོག་ཏུ་ལངས་ནས་སྡོད་པའི་སྐབས། འཇུའུ་ལི་ཀྲེ་ཡིད་སྐྱོ་བའི་སེམས་སུ་རཱོ་མིའོ་ནི་ཤི་ཟིན་པའི་སྐྱེས་པ་ཞིག་དུར་ཁུང་དུ་ལྷག་པ་དང་གཉིས་སུ་མེད་པའི་སྣང་བ་ཞིག་བྱུང་བ་མ་ཟད། རཱོ་མིའོ་ལ་ཡང་དེ་མཚུངས་ཀྱི་སྐྱོ་སྣང་ཞིག་སྐྱེས་མོད། གལ་ཏེ་ཁོ་མཱན་ཀྲུའུ་བ་རུ་སླེབས་ཟིན་ནས་ཝི་རཱོ་ན་ཡི་ནང་ཉིན་གཅིག་འཕར་མ་བསྡད་ཚེ། རང་སྲོག་ཤོར་རྒྱུ་ལས་གཞན་མ་མཆིས་པས་ཡིད་སྐྱོ་ཡང་ཐབས་ཅི་ཡོད། དེ་ནི་བརྩེ་དུང་གི་མེ་ཏོག་མཉམ་དུ་བཞད་ཅིང་ལས་དབང་དམན་པའི་ན་གཞོན་གཉིས་ཀྱི་སྐྱོ་གར་གྱི་གཏམ་རྒྱུད་ཐོག་མ་དེ་འགོ་ཚུགས་ཙམ་ཡིན།
རཱོ་མིའོ་ལ་མཚོན་ན་ཁྱིམ་བདག་ཁེབ་པུའུ་ལི་ཀྲེ་རང་གི་བུ་མོ་འཇུའུ་ལི་ཀྲེ་ལ། པཱ་རི་སི་ཞེས་པའི་ན་གཞོན་ཞིག་མཚམས་སྦྱོར་བྱ་རྒྱུའི་གནས་ཚུལ་མ་ཤེས་པར་ཉིན་མང་པོར་བསྡད། པཱ་རི་སི་ཞེས་པའི་སྐྱེས་པ་དེས་རཱོ་མིའོ་དང༌། འཇུའུ་ལི་ཀྲེ་གཉིས་ཀྱིས་ལྐོག་ཏུ་གཉེན་སྒྲིག་བྱས་པའི་གནས་ཚུལ་གང་ཡང་ཤེས་ཀྱི་མེད་ལ། པཱ་རི་སི་ནི་ལང་ཚོའི་ཤ་ཁྲག་རྒྱས་ཤིང་བློ་ཁོག་ཆེ་བའི་མི་ཞིག་ཡིན་སྟབས། གལ་ཏེ་འཇུའུ་ལི་ཀྲེ་ལ་རཱོ་མིའི་དེ་སྔོན་ནས་མ་འཕྲད་ཚེ། པཱ་རི་སི་ཁོ་མོའི་འོས་ཤིང་མཚམས་པའི་བཟའ་ཟླར་འགྱུར་སྲིད་པ་སྨོས་ཅི་དགོས།
འཇུའུ་ལི་ཀྲེ་རང་གི་ཕའི་བཙན་བཀའ་ལ་འ་ཆད་འུ་ཐུག་གི་གནས་སུ་གྱུར་ནས། ཐོག་མར་པཱ་རི་སི་དང་གཉེན་སྒྲིག་བྱེད་པར་གཡོལ་ཆེད་ཕ་མ་གཉིས་ལ་སྨྲས་པ། གཅིག་ནས་རང་ཉིད་ན་ཚོད་ཆུང་བ་དང༌། གཉིས་ནས་ཉེ་ཆར་རང་གི་སྤུན་མཆེད་ཀྲེ་བྷོལ་ཀྲེ་རྐྱེན་ལམ་དུ་ཕྱིན་ཙམ་ཡིན་སྟབས། ཡིད་སྐྱོ་བའི་སྡུག་བསྔལ་གྱིས་སྐྱེས་པ་གསར་པ་ཞིག་གི་མཉམ་དུ་ཆང་ས་བརྒྱབ་སྟེ་བདེ་བར་སྡོད་པའི་འདུན་པ་མེད་པ་དང༌། ལྷག་པར་དུ་ཁེབ་པུའུ་ལི་ཀྲེ་ཚང་གི་ཀྲེ་བྷོལ་ཀྲེ་དུར་ཁུང་དུ་སྦས་མཚམས་ལམ་སེང་བག་སྟོན་བཤམས་པ་ནི་འོས་འཚམས་ཤིག་མིན་ཞེས་པ་སོགས་གཉེན་སྒྲིག་ལས་གཡོལ་ཆེད། རང་ཉིད་དང་རཱོ་མིའོ་གཉིས་ཀྱི་གསང་བའི་གནས་ཚུལ་མ་གཏོགས་རྒྱུ་མཚན་ཡོད་ཚད་བཤད།
ཆེས་བློ་ཕངས་པ་ཞིག་ལ་ཁྱིམ་བདག་ཁེབ་པུའུ་ལི་ཀྲེ་ཡིས་ཁོ་མོས་བཤད་པའི་རྒྱུ་མཚན་རྣམས་རྣ་རྒྱབ་ཀྱི་རླུང་ལ་བསྐུར་ཏེ། བཀའ་དབང་བཙན་པོས་འཇུའུ་ལི་ཀྲེ་ལ་གཉེན་སྒྲིག་གི་གྲ་སྒྲིག་བྱས་ཤིང་གཟའ་ཕུར་བུའི་ཉིན་བག་སྟོན་བཤམ་རྒྱུའི་ཐག་བཅད། ཝི་རཱོ་ན་ཡུལ་གྱི་སྤོབས་པ་བྱེད་འོས་པའི་ན་ཆུང་འཇུའུ་ལི་ཀྲེ་ལ་མཚམས་སྦྱོར་བྱེད་འོས་པའི་སྐྱེས་པ་ལང་ཚོ་རྒྱས་ཤིང་འབྱོར་ཕྱུག་ལྡན་པ་ཞིག་རྙེད་སྐབས། བུ་མོའི་སྤུན་མཆེད་འདས་གྲོངས་སུ་གྱུར་བའི་མྱ་ངན་དེས་ཁོ་མོའི་འབྱུང་འགྱུར་གྱི་བདེ་སྐྱིད་ལ་འགོག་རྐྱེན་བཟོ་བར་བརྩིས་ཏེ་མོའི་ཁ་ལ་མ་བཞག
འཇུའུ་ལི་ཀྲེ་ཡི་ཡིད་སྐྱོ་བའི་བསམ་པ་སངས་ཐབས་ཟད་དེ་བཙུན་པ་ལཱོ་རཱན་སི་ལ་ཉེན་ཚབས་ཆེ་བའི་གནས་ཚུལ་དེའི་དྲ་རྒྱ་ནས་ཐར་ཆེད་རོགས་རམ་སྐྱབས་འཇུག་ཞུ་བར་ཕྱིན་པའི་ཚེ། བཙུན་པ་ཁོང་གིས་”ཁྱོད་ལ་ཡ་ཡུད་ཆེ་བྱའི་བྱ་བ་རྩོམ་པར་བློ་སྟོབས་ཡོད་དམ”ཞེས་དྲིས་པར། མོས་རང་ཉིད་བཟའ་ཟླ་འཚོ་གནས་ཡོད་བཞིན་དུ་པཱ་རི་སི་ལ་གཉེན་སྒྲིག་པ་ལས་གསོན་པོར་དུར་ཁུང་དུ་འཆི་བ་དགའ་ཞེས་བློ་སྤོབས་ཡོད་ལུགས་བརྗོད་སྟབས། བཙུན་པ་ཁོང་གིས་མུ་མཐུད་ནས་ “ཁྱོད་ཁྱིམ་དུ་སོང་ནས་ཕའི་རེ་འདུན་བཞིན་དགའ་བའི་ཟོལ་གྱི་འཛུམ་མདངས་བསྟན་ཏེ། པཱ་རི་སི་དང་མཉམ་དུ་གཉེན་སྒྲིག་བྱ་རྒྱུའི་མོས་མཐུན་ཡོད་ལུགས་སྐོར་བརྗོད་དགོས་ལ། སང་ཉིན་གཉེན་སྒྲིག་མ་བྱས་གོང་གི་ཉི་མ་མཐའ་མ་ཡིན་པས་ངེས་པར་དུ་ངས་སྤྲད་པའི་སྨན་འདི་འཐུང་དགོས་”ཞེས་སློབ་སྟོན་གནང༌། སྨན་ནུས་ཀྱི་དུས་ཡུན་དེ་དག་གི་ནང་གཟུགས་པོ་གྲང་མོར་གྱུར་ཏེ་དབུགས་མེད་པ་ལྟ་བུར་འགྱུར་གྱི་ཡོད་སྟབས། ཕྱི་ཉིན་དེར་ཁོ་མོའི་འབྱུང་འགྱུར་གྱི་གཏན་གྲོགས་སུ་འགྱུར་ངེས་པའི་སྐྱེས་པ་པཱ་རི་སི་ཁོ་མོ་བསུ་བར་ཡོང་སྐབས། མོའི་དྲོད་ཡལ་ཟིན་པའི་བེམ་གཟུགས་མཐོང་ཚེ་ཤི་བར་ངོས་འཛིན་གྱིས་ཡིད་སྐྱོ་བའི་ངང་དུར་ཁུང་དུ་སྦ་ངེས་པ་ཡིན་པ་སྨོས་ཅི་དགོས།
བཙུན་པ་རྒན་པོས་འཇུའུ་ལི་ཀྲེ་ལ། གལ་ཏེ་ཁྱོད་ཀྱིས་བུད་མེད་ཀྱི་སྤྱོད་ཚུལ་དོར་ཏེ་དཔའ་མཛངས་ལྡན་པའི་སྒོ་ནས་བཙུན་པའི་སློབ་སྟོན་རྣམས་ལག་ལེན་ཐུབ་ཚེ། ཆུ་ཚོད་ཞེ་གཉིས་ཀྱི་རྗེས་སྨན་ནུས་ཡལ་ཏེ་སླར་ཡང་གཉིད་ལས་སད་པ་ལྟར་འཇིག་རྟེན་དུ་གསོན་པོར་འཚོ་ཐུབ་པའི་ཁག་ཐེག་བྱས་པ་མ་ཟད། ཁོ་མོ་དྲན་པ་མ་སོས་གོང་ནས་བཙུན་པ་ཁོང་གིས་ཡིག་འབྲེལ་བྱས་ནས་རཱོ་མིའོ་ལ་ཁོང་ཚོའི་གསང་བའི་བྱ་སྤྱོད་ཀྱི་གནས་ཚུལ་རྣམས་གསལ་པོར་བརྗོད་དེ། རཱོ་མིའོ་མཚན་ལ་དུར་ཁུང་དུ་འཇུའུ་ལི་ཀྲེ་བསུ་བར་ཡོང་ནས་མཱན་ཀྲུ་བ་རུ་འཁྲིད་དགོས་པའི་གནས་ཚུལ་རྣམས་ཀྱང་བརྗོད་དགོས་ཀྱི་ཡོད། འཇུའུ་ལི་ཀྲེ་ཡིས་རཱོ་མིའོ་ལ་བཅངས་པའི་བརྩེ་དུང་དང༌། པཱ་རི་སི་མཉམ་དུ་གཉེན་སྒྲིག་བྱ་དགོས་པའི་འཇིགས་སྐྲག་གིས་ཁོ་མོ་ཡང་ཡ་ཡུད་ཆེ་བའི་བྱ་བ་དེར་ཞུགས་པའི་བློ་སྟོབས་སྦྱིན། དེ་ཉིན་མོས་བཙུན་པའི་འཁྲིས་ནས་གཉིད་སྨན་ཁྱེར་ཏེ་རང་ཁྱིམ་དུ་འགྲོ་བའི་ལམ་བར་དུ་པཱ་རི་སི་དང་འཕྲད། མོས་བཙུན་པའི་བཀའ་སློབ་བཞིན་འཛུམ་པའི་ཟོལ་གྱིས་ཁོའི་ཆུང་མ་བྱ་འདུན་ཡོད་ལུགས་ཀྱི་རྣམ་འགྱུར་བསྟན། དེ་ནི་ཁེབ་པུའུ་ལི་ཀྲེ་ལ་མཚོན་ན་དགའ་འོས་པའི་གཏམ་བཟང་ཞིག་ཡིན་པས། ཁོང་གི་གཉེར་རིས་ཀྱིས་ཁེངས་པའི་བཞིན་དཔལ་ཡང་ད་ཆ་དགའ་སྤྲོའི་འཛུམ་གྱིས་མྱོས་ཏེ་ལང་ཚོ་རྒྱས་པའི་ཕོ་གསར་ཞིག་དང་གཉིས་སུ་མེད་པར། རྒས་པའི་གཉེར་མ་ཡང་རེ་ཞིག་མེད་པར་གྱུར། ལྷག་པར་དུ་དེ་སྔོན་རང་ཉིད་ཀྱིས་མཚམས་སྦྱོར་བྱས་པའི་སྐྱེས་པ་པཱ་རི་སི་ཡི་མཉམ་དུ་གཏན་གྲོགས་བྱ་རྒྱུར་ཁས་ལེན་མ་བྱས་པར། ཁོང་གི་ཐུགས་རྒྱུད་དཀྲུག་མཁན་གྱི་བུ་མོ་འཇུའུ་ལི་ཀྲེ་རང་གི་ཆེས་བརྩེ་བའི་ཕྲུ་གུར་གྱུར། དེར་བརྟེན་གཉེན་སྒྲིག་རྟེན་འབྲེལ་གྱི་གོ་སྒྲིག་ལེགས་པར་བྱས་ཏེ། དེ་སྔོན་ཡུལ་ཝི་རཱོ་ས་རུ་སུ་ཞིག་གིས་ཀྱང་མཐོང་ཐོས་མ་མྱོང་བའི་འགྲོ་གྲོན་བཏང་སྟེ་དགྱེས་སྟོན་གྲ་སྒྲིག་གཟབ་རྒྱས་བྱས།
རེས་གཟའ་ལྷག་པའི་མཚན་མོར་འཇུའུ་ལི་ཀྲེ་ཡིས་གཉིད་སྨན་དེ་མ་འཐུང་གོང༌། མོའི་སེམས་སུ་དེ་སྔོན་རཱོ་མིའོ་དང་ཁོ་རང་གཉིས་ཀྱི་བག་སྟོན་མདོར་བསྡུས་ཤིག་བཙུན་པ་ལཱོ་རཱན་སི་ཡིས་བྱས་སྟབས། ཁོང་གིས་རང་ཉིད་གནས་ཚུལ་དེའི་སྐོར་ལས་གཡོལ་ཆེད། ཁོ་མོར་དུག་སྤྲད་པ་མིན་ནམ་སྙམ་པའི་ཀུན་རྟོག་གི་སྤྲིན་ཕུང་སེམས་ཀྱི་མཁའ་དབྱིངས་སུ་ལང་ལོང་གཡོས་ཀྱང༌། ཕྱོགས་གཞན་ཞིག་ནས་བཙུན་པ་ཁོང་ཐུགས་རྒྱུད་ཤིན་ཏུ་བཟང་བ་མ་ཟད། སེམས་ཅན་ལ་ཕན་པ་སྒྲུབ་མཁན་གྱི་ཆོས་ལུགས་མི་སྣ་ཞིག་ཡིན་པ་ཁོ་མོའི་ཡིད་ལ་ཤར་སྐབས། ཡིད་ཀྱི་དོགས་པ་རྣམས་སྤྲིན་ཕུང་རླུང་གིས་གཏོར་བ་བཞིན་རང་ཡལ་དུ་གྱུར། ཡིན་ན་ཡང་དེ་བས་ཀྱང་བློ་མི་བདེ་བ་ཞྀག་ལ་ཤོད་སྲོལ་ལྟར་ན། འདས་པོ་རྣམས་ཀྱི་རྣམ་ཤེས་རང་གི་ཕུང་པོ་སྦ་ཡུལ་གྱི་དུར་ཁུང་དུ་མཚན་ལ་ཡོང་བའི་སྐོར་དྲན་པ་དང༌། གལ་ཏེ་རང་ཉིད་རཱོ་མིའོ་མ་སླེབས་གོང་དྲན་པ་སོས་ཏེ་འཇིགས་ཡེར་བའི་དུར་ཁྲོད་དུ་གཅིག་པུར་ལུས་ཚེ། འཇིགས་སྣང་གིས་སྨྱོན་མར་འགྱུར་སྲིད་སྙམ་པའི་དངངས་སྐྲག་སྐྱེས་ཀྱང༌། ཁོ་མོ་ནི་བརྩེ་དུང་གི་གཞན་དབང་དུ་གྱུར་ཡོད་སྟབས་གཉིད་སྨན་བཏུང་སྟེ་དྲན་མེད་དུ་གྱུར།
པཱ་རི་སི་ཞོགས་པ་སྔ་པོར་འཇུའུ་ལི་ཀྲེ་བསུ་བར་ཡོང་སྐབས། ཁོའི་འདྲེན་བྱེད་ཀྱི་མདུན་དུ་སྣང་བ་ནི། དེ་སྔོན་གསོན་པོར་འཚོ་བའི་མཛེས་ལྡན་འཇུའུ་ལི་ཀྲེ་ཡི་ཚབ་ཏུ་རྣམ་ཤེས་བརླགས་པའི་ཁོ་མོའི་བེམ་གཟུགས་ལས་མེད་པས། ཁོའི་རེ་བ་ཡོད་ཚད་ད་ཆ་འཆི་བདག་རྒྱལ་པོས་བཅོམ་སྟེ་ཡངས་ཤིང་གཙང་བའི་ཁང་བཟང་དེ་ཡང་ཇི་འདྲའི་རྙོག་ཟིང་ཆེ་བའི་གནས་ཤིག་ཏུ་གྱུར་འདུག པཱ་རི་སི་རང་གི་འབྱུང་འགྱུར་གྱི་ཆུང་མ་འཇུའུ་ལི་ཀྲེ་དང་མཉམ་དུ་ཐ་ན་བག་སྟོན་ཙམ་ཡང་བཤམས་ཁོམ་མེད་པར་འཆི་བདག་རྒྱལ་པོས་མི་ཡུལ་ནས་བཙན་དབང་གིས་ཁྲིད་པས་མྱ་ངན་གྱིས་མྱོས་པ་མ་ཟད། ལྷག་པར་དུ་སྡུག་བསྔལ་གྱི་ཁུར་བོས་མནན་པའི་འཇུའུ་ལི་ཀྲེ་ཡིས་ཕ་མ་གཉིས་མཐོང་སྐབས་ཁོའི་སེམས་དེ་བས་ཀྱང་སྐྱོ་བར་གྱུར།
ཁོང་གཉིས་ལ་འབྱུང་འགྱུར་བདེ་སྡུག་གི་རེ་བ་བཅོལ་ཡུལ་བུ་མོ་གཅིག་ལས་མེད་པ་དེ་ཡང༌། སྙིང་རྗེས་དབེན་པའི་གཤིན་རྗེ་རྒྱལ་པོས་ཁོང་གཉིས་ཀྱི་བུ་མོ་བག་སྟོན་བཤམ་ལ་ཉེ་བའི་སྐབས་དེར་ཁོང་ཚོའི་མིག་མདུན་ནས་ཕྲོགས་པས། ད་ཆ་གཉེན་སྒྲིག་རྒྱས་སྟོན་ཆེད་གོ་སྒྲིག་གཟབ་རྒྱས་བྱས་ནས་ཡོད་སྟབས། གཤིན་ཆོག་སྒྲུབ་པར་སྟ་གོན་དང་གྲ་སྒྲིག་གང་ཡང་བྱེད་མི་དགོས་པར་མ་ཟད། འཇིག་རྟེན་འདིར་ཕྱིར་ལོག་བྱེད་པའི་རེ་བ་མེད་པར་བླ་མ་གདན་དྲངས་ཏེ། སྙིང་ཉེ་བའི་བུ་མོ་འཇུའུ་ལི་ཀྲེ་ཡི་ཕུང་པོ་དུར་ཁུང་དུ་མི་སྐྱེལ་མཐུ་མེད་དུ་གྱུར། གནས་ཚུལ་ངན་པ་ནི་གཟུགས་མེད་ཀྱི་རླུང་བུ་དང་འདྲ་བར་གཏམ་བཟང་ལས་ལྡབ་འགྱུར་གྱི་ཁྱབ་པ་མགྱོགས་པས། མཱན་ཀྲ་བ་རུ་བཙུན་པ་ལཱོ་རཱན་སི་ཡིས་བཏང་བའི་བང་ཆེན་རཱོ་མིའོ་ཡི་འཁྲིས་སུ་མ་འབྱོར་གོང༌། ཁོས་འཇུའུ་ལི་ཀྲེ་རྐྱེན་ལམ་དུ་སོང་བའི་ཡིད་སྐྱོའི་གནས་ཚུལ་ཐོས་སྟབས། དེ་བས་ཀྱང་ཆེས་བློ་ཕངས་པ་ཞིག་ལ། རཱོ་མིའོ་ཡིས་རང་གི་སྙིང་གྲོགས་ཀྱི་ཆུ་ཚོད་ཞེ་གཉིས་དྲན་མེད་དུ་གྱུར་བའི་གཉིད་སྨན་ཟོས་ཏེ་ཆུ་ཚོད་ཞེ་གཉིས་རྗེས་དྲན་པ་སོས་མཚམས་དུར་ཁུང་དུ་་བསུ་བར་ཡོང་བའི་རེ་སྒུག་བྱས་ཡོད་པ་ག་ལ་ཤེས། ཁོས་ཐོས་འདོད་མེད་པའི་གནས་ཚུལ་དེ་རྣ་བའི་ནང་མ་ལྷུང་གོང་སེམས་སུ་ནམ་རྒྱུན་དང་མི་འདྲ་བར་དགའ་བདེའི་ཚོར་སྣང་ཞིག་སྐྱེས་པ་མ་ཟད། དེའི་མཚན་དེར་རྨི་ལམ་ལ་རང་ཉིད་འཇིག་རྟེན་འདི་དང་བྲལ་ཏེ་རྣམ་ཤེས་མེད་པའི་ཕུང་པོ་འཇུའུ་ལི་ཀྲེ་ཡིས་མཐོང་ཞིང༌། མོའི་སྲབ་ཅིང་འཇམ་པའི་མཆུ་སྒྲོས་ཀྱིས་ཁོ་ལ་འོ་འགའ་བྱས་སྟབས་ཁོ་སླར་ཡང་མི་ཡུལ་དུ་གསོན་པོར་གནས་སྟེ་རྒྱལ་པོ་ཆགས་པ་རྨིས།
དེར་བརྟེན་ཝི་རཱོ་ས་ནས་བང་ཆེན་ཞིག་རཱོ་མིའོ་ཡི་འཁྲིས་སུ་འབྱོར་སྐབས། ཁོའི་བསམ་པར་མཚན་གྱི་རྨི་ལམ་ལ་གཞིགས་ཚེ་བཀྲ་ཤིས་ཀྱི་གཏམ་བཟང་ཞིག་ཤོད་རྒྱུ་ཡོད་པའི་རེ་སྒུག་བྱས་མོད། བསམ་ཡུལ་ལས་འདས་པ་ཞིག་ལ་ཁོ་བོའི་གཏན་གྲོགས་འཇུའུ་ལི་ཀྲེ་འཆི་བདག་ཕོ་ཉས་ཟིན་པ་ཐོས་སྟབས། ཁོ་གློ་བུར་དུ་མཚན་དེར་ཝི་རཱོ་སའི་དུར་ཁུང་དུ་ཁོ་མོའི་བེམ་གཟུགས་ལ་ལྟ་བར་འགྲོ་འདོད་ཤིན་ཏུ་ཆེ་བས་རྟ་ཞིག་གླས་ཤིང༌། ཐང་ཆད་པའི་སེམས་སུ་སྡུག་བསྔལ་གྱི་རྦ་ཀློང་དྲག་པོ་གཡོས་ནས་གདོན་ཞུགས་པ་ལྟར་གྱུར་པའི་རཱོ་མིའོ་དེ་སྔོན་རང་ཉིད་བསྐྱོད་མྱོང་བའི་སྨན་རིགས་ཚོང་ཁང་ཞིག་ཏུ་དུག་ཉོ་བར་བསྐྱོད། སྒམ་ཆུང་སྟེང་ལ་བསྒྲིགས་པའི་བང་ཁྲིའི་འཁྲིས་སུ་བཞུགས་ཤིང་བཞིན་མདོག་སྐྱོ་བའི་སྨན་ཚོང་བ་དེས། མཱན་ཀྲུའུ་བ་ཡི་རྩ་ཁྲིམས་ནང་སྨན་ཚོང་བས་མིའི་ཚེ་སྲོག་ལ་གནོད་པའི་དུག་བཙོང་ཚེ་སྲོག་ཐོག་གི་ཉེས་ཆད་ཡིན་པའི་འབྲེལ་བརྗོད་བྱས་པ་མ་ཟད། དུག་ཉོ་དགོས་ཚེ་ས་ཕྱོགས་དེར་དུག་ཚོང་པ་གཅིག་ཡོད་པའི་སྐོར་ཡང་བཤད། དེར་བརྟེན་རཱོ་མིའོ་ཡི་དུག་ཚོང་བ་དེ་རྩད་གཅོད་ཀྱིས་རང་ཉིད་ལ་དུག་ག་རེ་མཁོ་བ་རྣམས་ཁོང་ལ་ཆད་ལུས་མེད་པར་བཤད་པ་དང་སྦྲགས། དུག་རིན་དུ་གསེར་སྤྲད་སྟབས་དུག་ཚོང་བ་དེས་དོག་གཞི་རྣམས་རྒྱབ་སྐྱུར་གྱིས། ཐ་ན་ཁོ་ལ་མི་ཉི་ཤུའི་ནུས་ཤུགས་ཡོད་ཀྱང་ཐུན་གཅིག་ཟོས་ཚེ་གློ་བུར་དུ་སྲོག་གི་རྒྱུ་བ་གཅོད་ནུས་པའི་དུག་དེ་རཱོ་མིའོ་ལ་བཙོང༌། རཱོ་མིའོ་ཡིས་དུག་དེ་འཇུའུ་ལི་ཀྲེ་ཡི་དུར་ཁུང་གི་འཁྲིས་སུ་ཟ་འདུན་གྱིས་ལམ་སང་ཝི་རཱོ་ས་ལ་ཁོ་མོའི་ཕུང་པོར་ལྟ་བར་བསྐྱོད་པས། མཚན་གོང་ཙམ་ལ་ཝི་རཱོ་ས་ལ་འབྱོར་བ་མ་ཟད་ཁེབ་པུའུ་ལི་ཀྲེ་ཚང་གི་ཕ་མེས་ཀྱི་དུར་ཁུང་དབུས་སུ་ཀྲོང་ངེར་ལངས་ཡོད་པའི་ཡེ་ཤུའི་ལྷ་ཁང་ཡང་རྙེད།
ཁོས་མེ་ཏོག་ཆུན་པོ་ཞིག་དང་བཅའ་དངོས་འགའ་ཁྱེར་ཏེ་ལྷ་ཁང་གི་རྭ་སྐོར་གྱི་སྒོ་གཅོག་པར་རྩོམ་སྐབས། གློ་བུར་དུ་རྒྱབ་ཕྱོགས་ནས་སྐྱེས་པ་ཞིག་གི་སྐད་གདངས་ཀྱིས་ཁོ་ལ་གདོན་འདྲེ་མོའན་ཀྲ་གྷ་སི་ཞེས་པའི་མིང་ནས་འབོད་བཞིན། ཁོའི་ལུགས་དང་མི་མཐུན་པའི་བྱ་སྤྱོད་དེ་མཚམས་འཇོག་དགོས་པའི་བཀའ་བཏང༌། མི་དེ་ནི་པཱ་རི་སི་ཡིན་ཞིང་ཁོ་དུས་མིན་མཚན་མོར་འཇུའུ་ལི་ཀྲེ་ཡི་དུར་ཁུང་དུ་མྱ་ངན་དང་གདུང་འབོད་བྱེད་པར་ཡོང་མོད། སྤྱིར་པཱ་རི་སི་ཡིས་རཱོ་མིའོ་ཅི་ཞིག་གི་ཆེད་དུ་དུར་ཁུང་ནང་ཡོང་མིན་མ་ཤེས་ཀྱང༌། རཱོ་མིའོ་ཁེབ་པུའུ་ལི་ཀྲེ་ཚང་གི་དགྲ་བོ་ཡིན་པ་མ་ཟད་མོའན་ཀྲ་གྷ་སི་ཡི་ནང་མི་ཡིན་པ་ཤེས་སྟབས། ཁོ་འདས་པོའི་ཕུང་པོར་ཚུལ་མིན་གྱི་བྱ་ངན་སྤེལ་བར་ཡོང་བའི་ངོས་འཛིན་གྱིས། ཁོང་ཁྲོ་ཆེན་པོའི་ངང་རཱོ་མིའོ་ལྷ་ཁང་ནང་འཛུལ་དུ་མ་བཅུག་པར་མ་ཟད། ཁོ་ཕྱིར་ཕུད་ཟིན་ནས་ཝི་རོའ་ས་རུ་ཡོང་བའི་ཁྲིམས་འགལ་གྱི་བྱ་སྤྱོད་སྤེལ་བ་དེར་ཉེས་ཅན་པའི་མིང་བཏགས། རཱོ་མིའོ་ཡིས་གལ་ཏེ་པཱ་རི་སི་ཡིས་ཀླད་པ་མཁྲེགས་བཟུང་གིས་རང་ཉིད་དུར་ཁུང་འཁྲིས་སུ་མ་བཏང་ཚེ་དུར་ཁུང་འཁྲིས་སུ་སེམས་མེད་ཀྱི་ཕུང་པོར་གྱུར་ཟིན་པའི་ཀྲེ་བྷོལ་ཀྲེ་ཡི་མཇུག་འབྲས་དང་གཅིག་པ་ཡོང་རྒྱུའི་ཉེན་བརྡ་བཏང་ཡང༌། པཱ་རི་སྀ་ཡིས་རཱོ་མིའོ་ཡི་འཇིགས་སྐུལ་ལ་མ་ཉན་པར་ཁོ་ལ་ལག་དམར་བའི་ཉེས་འཛུགས་ཀྱིས་རྒྱལ་པོའི་འཁྲིས་སུ་འཁྲིད་པར་རྩོམ་སྐབས། རཱོ་མིའོ་ཁོང་ཁྲོ་གཏིང་ནས་ལངས་ཏེ་པཱ་རི་སི་དང་འཐབ་སྟེ་ཁོའི་སྲོག་གི་རྒྱུ་བ་བཅད། རཱོ་མིའོ་མཱན་ཀྲ་བ་ནས་ཡོང་བའི་ལམ་བར་དུ་འཇུའུ་ལི་ཀྲེ་ཡི་ཕས་མོ་ལ་བཙན་སྦྱོར་བྱས་པའི་འབྱུང་འགྱུར་གྱི་བཟའ་ཟླ་པཱ་རི་སི་ཡིན་པ་ཤེས་རྟོགས་བྱུང་སྟབས། ད་ཆ་ཁོས་བསད་པའི་པཱ་རི་སི་མཐོང་སྐབས་རྐྱེན་ངན་གྲོགས་སུ་ཤར་བཞིན་ལག་ཟུང་གིས་ཁོ་བཀྱག་ཞོར་ཁོའི་ཕུང་པོ་འཇུའུ་ལི་ཀྲེ་ཡི་དུར་ཁུང་གི་འཁྲིས་སུ་སྦ་རྒྱུའི་དམ་བཅའ་སེམས་ལ་བརྟན་པོར་བཟུང༌།
རཱོ་མིའོ་ཡིས་འཇུའུ་ལི་ཀྲེ་ཡི་དུར་ཁུང་ཁ་ཕྱེ་དེ་ལྟ་སྐབས་ཁོ་མོའི་མཛེས་ཆོས་ཡོངས་སུ་རྫོགས་པའི་བཞིན་དཔལ་དེ་རྨི་ལམ་དུ་ཆས་པ་དང་གཉིས་སུ་མེད་པར། འཆི་བདག་རྒྱལ་པོས་ཁོ་མོའི་སྲོག་ཕྲོགས་ཀྱང་ལང་ཚོའི་མཛེས་སྡུག་བཅོམ་མ་ཐུབ་པར་སྔར་བཞིན་མཛེས་ཆོས་མེ་ཏོག་བཞད་པ་དང་འདྲ་བར་གནས་ཡོད། འཇུའུ་ལི་ཀྲེ་ཡི་འཁྲིས་སུ་ཡོད་པའི་ཕུང་པོ་ནི་ཁོ་མོའི་སྤུན་མཆེད་ཀྲེ་བྷོལ་ཀྲེ་ཡིན་པས། རཱོ་མིའོ་ཡིས་ཁོའི་རྣམ་ཤེས་བརླགས་པའི་ཕུང་པོར་ཁོ་མོའི་ཚབ་ཏུ་སྤུན་མཆེད་ཞེས་བོས་ཏེ་སྟེ་དགོངས་སེལ་ཞུས་པ་དང་སྦྲགས། ཁོའི་དགྲ་བོ་རཱོ་མིའོ་ང་ཉིད་ཕྱི་མའི་ལམ་དུ་འགྲོ་རྒྱུའི་ཁས་ལེན་བྱས་རྗེས། མཐའ་མཇུག་གི་སྨོན་ཚིག་རྒྱག་ཞོར་འཇུའུ་ལི་ཀྲེ་ལ་ཡིད་ཚིམ་པའི་འོ་ཞིག་བྱས་ནས་དུག་དེ་ཁྱུར་མིད་བཏང༌། དུག་དེ་ནི་ད་ཆ་དངས་ལ་ཉེ་བའི་འཇུའུ་ལི་ཀྲེ་ཡི་གཉིད་སྨན་དང་མི་འདྲ་བར་ནུས་པ་ཤིན་ཏུ་ཆེ་བས་འཆི་ལམ་དུ་འགྲོ་རྒྱུ་ལས་ལམ་གཉིས་པ་ཞིག་ཡོང་ག་ལ་སྲིད།
བཙུན་པ་ལོའ་རཱན་སི་ཡིས་རང་གིས་རཱོ་མིའོ་ལ་སྤྲིངས་པའི་གནས་བྲིས་རྣམས་ཁོ་ལ་ལག་སོན་མ་བྱུང་བ་ཤེས་རྟོགས་བྱུང་འཕྲལ། བཙུན་པ་རང་ཉིད་ཀྱིས་མེ་ཏོག་ཆུན་པོ་ཞིག་དང་བཅའ་དངོས་འགའ་ཁྱེར་ནས། སྨན་ནུས་ལས་དྲན་པ་སོས་ལ་ཉེ་བའི་ན་ཆུང་མ་འཇུའུ་ལི་ཀྲེ་བསུ་བར་དུར་ཁུང་དུ་ཕེབས། ཐུགས་རྒྱུད་ཤིན་ཏུ་བཟང་བའི་བཙུན་པ་ཁོང་དུར་ཁུང་དེར་འབྱོར་སྐབས། ཁོང་གི་འདྲེན་བྱེད་ཡུལ་དུ་སྣང་བ་ནི་མེ་ཏོག་ཆུན་པོ་ཞིག་དང་དཔའ་དམ་གཅིག དེ་བས་ཡ་མཚན་པ་ཞིག་ལ་རཱོ་མིའོ་དང་པཱ་རི་སི་གཉིས་ཀྱང་སྲོག་གི་རྒྱུ་བ་ཆད་དེ་དུར་ཁྲོད་དུ་འགྱེལ་ཡོད་པ་གཟིགས་པས་ཧ་ལས་ཧོན་ཐོར་ཏེ་ཅི་བྱ་གཏོལ་མེད་དུ་གྱུར། ཁོང་གིས་རྐྱེན་ངན་དེའི་འབྱུང་རྐྱེན་ལ་བསམ་གཞིགས་མ་བྱས་གོང་འཇུའུ་ལི་ཀྲེ་དྲན་པ་སོས། མོས་བཙུན་པ་ལཱོ་རཱན་སི་དུར་ཁུང་འཁྲིས་སུ་ཡོད་པ་མཐོང་སྐབས། རང་ཉིད་གནས་གང་དུ་ཡོད་མིན་དང་རྒྱུ་མཚན་རྣམས་མ་ཤེས་པར་བཙུན་པ་ལ་རང་གི་སྙིང་གྲོགས་རཱོ་མིའོ་ཡི་སྐོར་དྲིས། ཟློག་ཏུ་མེད་པའི་རྐྱེན་ངན་བར་ཆད་ཅིག་གིས་ཁོང་ཚོའི་ལྐོག་གྱུར་གྱི་འཆར་གཞི་རྣམས་རྨེག་མེད་དུ་བཅོམ་སྟབས། ད་ཆ་རཱོ་མིའོ་ཡི་ཚབ་ཏུ་བཙུན་པ་རང་ཉིད་ཀྱིས་ཁོ་མོ་དུར་ཁུང་ནས་སྐད་གཏོང་སྐབས། གློ་བུར་དུ་བར་ཐག་མི་རིང་བའི་སར་མི་ཚོགས་ཀྱིས་སྐད་སྒྲ་སྒྲོག་པ་ཐོས་པས་ཁོང་འཇིགས་སྐྲག་སྐྱེས་ཏེ་གར་སོང་ཆ་མེད་དུ་གྱུར།
འཇུའུ་ལི་ཀྲེ་ཡིས་རཱོ་མིའོ་ཡི་ལག་ན་ཡོད་པའི་ཕོར་བ་ཆུང་ཆུང་དེ་མཐོང་སྐབས་ཁོའི་གཤེད་མ་དུག་ཡིན་པ་ར་འཕྲོད་བྱུང༌། ད་ཆ་ཁོ་མོའི་ཆགས་ས་བརྟེན་ས་སྙིང་གི་དུམ་བུ་དེ་འཇིག་རྟེན་ཕྱི་མར་བཞུད་ཟིན་སྟབས། རང་ཉིད་ཀྱང་ཁོའི་རྗེས་སུ་བསྙེག་རྒྱུ་ལས་དེ་མིན་ཐབས་གཞན་ཅི་ཡོད། དེར་བརྟེན་མོས་ཁོའི་ལག་ཏུ་བཟུང་བའི་ཕོར་བ་ཆུང་ཆུང་དེ་ཚུར་བླངས་ནས་དུག་ཟ་བར་འདོད་ཀྱང༌། ཕོར་བ་དེ་སྟོང་པ་ཡིན་སྟབས་ཁོའི་ཁའི་ནང་ལ་དུག་ལྷག་འཕྲོ་ཡོད་པར་སྙམ་ནས་འོ་བྱེད་བཞིན་དུག་གཞིབ་པར་འདོད་མོད། ཡོད་ཚད་ངལ་བ་འབྲས་མེད་དུ་གྱུར།
མི་ཚོགས་ཀྱི་སྐད་སྒྲ་སྔར་བས་ཉེ་བར་འབྱོར་སྐབས་མོས་རཱོ་མིའོ་ཡིས་བཏགས་པའི་རལ་གྲི་ཤུབས་ནས་བཏོན་ཏེ། རང་ཉིད་ཀྱི་ལྟོ་བར་བཙུགས་པས་ཁོའི་འཁྲིས་སུ་འགྱེལ། རཱོ་མིའོ་དང་པཱ་རི་སི་གཉིས་འཐབ་འཛིང་བྱེད་པའི་སྐབས། པཱ་རི་སི་ཡི་གཡོག་པོ་ཞིག་གིས་མཐོང་བས་སྐོར་སྲུང་བར་བརྡ་བསྐྱལ་ནས་ཁོ་ཚོ་དེར་འབྱོར། མི་གསོད་ཁྲག་སྦྱོར་གྱི་གནས་ཚུལ་དེ་ཝི་རཱོ་སའི་ཡུལ་མི་རྣམས་ཀྱིས་ཐོས་འཕྲལ། ཁོ་ཚོས་ལམ་སང་སྲང་ལམ་གང་སར་ཀུ་ཅོ་བསྒྲགས་པས་ཁེབ་པུའུ་ལི་ཀྲེ་ཚང་དང༌། མཱོན་ཀྲ་གྷ་སི་ཚང་གི་ཁྱིམ་མི་རྣམས་ཀྱང་ཉལ་བཟོ་མ་བདེ་བར་མལ་ལས་ལྡང་སྟེ་སྲང་ལམ་དུ་ཅ་ཅོ་སྒྲོག་པའི་སར་བསྐྱོད།
བཙུན་པ་ལཱོ་རཱན་སི་གནོང་འགྱོད་ཆེ་བའི་སྤྱོད་ཚུལ་གྱིས་ཅ་ཅོ་སྒྲོག་བཞིན་ལྷ་ཁང་གི་རྭ་བ་ནས་ཐོན་སྐབས་ཉེན་རྟོགས་པས་འཛིན་བཟུང་བྱས་པ་དང༌། མི་ཚོགས་རྣམས་ཁེབ་པུའུ་ལི་ཀྲེ་ཚང་གི་དུར་ཁུང་དུ་འདུས། ཡུལ་གྱི་རྒྱལ་པོ་ཝི་རཱོ་ན་ཡིས་བཙུན་པ་རྒན་པོར་ཡ་མཚན་པའི་དོན་རྐྱེན་དེའི་སྐོར་ལ་འདྲི་རྩད་བྱས་པར། ཁོང་གིས་ཁེབ་པུའུ་ལི་ཀྲེ་ཚང་དང༌། མཱོན་ཀྲ་གྷ་སི་ཚང་གི་ཁྱིམ་མི་རྣམས་ཡོད་པའི་སར་ཁོང་ཚོའི་གཅེས་ཕྲུག་གཉིས་ཀྱི་ཤིན་ཏུ་ཟབ་པའི་བརྩེ་དུང་ལམ་ལྷུང་འབྱུང་ཆེད་དང༌། ན་གཞོན་ཕོ་མོ་གཉིས་ཀྱི་གཉེན་སྒྲིག་དེས་ཁོང་ཚོ་ཁྱིམ་ཚང་གཉིས་པོའི་བར་གྱི་འཁོན་འཛིན་རྣམས་ཞི་བར་དམིགས་ཏེ། རང་ཉིད་ཀྱིས་ཁོང་གཉིས་ཀྱི་བག་སྟོན་ཐད་ལ་ཐེ་གཏོགས་བྱས་པའི་སྐོར་རྣམས་ཆད་ལུས་མེད་པར་རྒྱལ་པོར་ཞུས་པ་མ་ཟད། དུར་ཁུང་དུ་ལུས་པའི་ན་ཆུང་འཇུའུ་ལི་ཀྲེ་རཱོ་མིའོ་ཡི་ཆུང་མར་གྱུར་ཟིན་མོད།
འོན་ཀྱང་བཙུན་པ་ཁོང་ལ་ཁོང་གཉིས་གཉེན་སྒྲིག་བྱས་པའི་སྐོར་ཕྱིར་བསྒྲགས་བྱེད་པར་དུས་ཚོད་འོས་འཚམས་ཤིག་མ་བྱུང་གོང་ནས། འཇུའུ་ལི་ཀྲེ་ལ་རང་གི་ཕས་བཟའ་ཟླ་གཞན་ཞིག་བཙན་སྦྱོར་བྱས་སྟབས། ཁོ་མོས་འདོད་པ་མེད་པའི་བག་སྟོན་དེ་ལས་གཡོལ་ཆེད་གཉིད་སྨན་ཟོས་པའི་ཉེར་ལེན་ལ་བརྟེན། ཁོ་མོ་དྲན་མེད་དུ་གྱུར་སྟབས་མི་རྣམས་ཀྱིས་ཁོ་མོ་ཤི་བར་བརྩིས་ཏཻ་ཕུང་པོ་དུར་ཁུང་དུ་སྐྱེལ་རིང༌། བཙུན་པ་རྒན་པོས་རཱོ་མིའོ་ལ་ཡིག་འབྲེལ་བྱས་ཏེ་འཇུའུ་ལི་ཀྲེ་བསུ་བར་ཡོང་དགོས་པའི་འཆར་གཞི་ཡོད་ཀྱང༌། སྟབས་མ་ལེགས་པ་ཞིག་ལ་ཁོང་གིས་སྤྲིངས་པའི་གནས་བྲིས་རྣམས་རཱོ་མིའོ་ལ་མ་འབྱོར་བ་སོགས་ཀྱི་གནས་ཚུལ་རྣམས་ཀྱང་རྒྱལ་པོར་ཆད་ལུས་མེད་པར་ཞུས་རྗེས། བཙུན་པ་ཁོང་དུར་ཁུང་ནང་འཇུའུ་ལི་ཀྲེ་བསུ་བར་ཡོང་སྐབས། རཱོ་མིའོ་དང་འཇུའུ་ལི་ཀྲེ་གཉིས་ཀྱི་བེམ་གཟུགས་དུར་ཁུང་དུ་ལྷག་ཡོད་པ་གཟིགས་པ་ལས། དེ་མིན་ཁོ་ཚོའི་འཁྲུག་རྐྱེན་གསལ་པོ་མ་ཤེས་ཀྱང༌། དེའི་འབྱུང་རྐྱེན་མདོ་ཙམ་ཞིག་རཱོ་མིའོ་དང༌། པཱ་རི་སི་གཉིས་འཐབ་འཁྲུག་བྱེད་པ་མཐོང་མཁན་གྱི་བློན་པོ་དེས་བཤད་པ་མ་ཟད། དེ་མིན་ཞིབ་ཕྲ་རྣམས་རཱོ་མིའོ་ཡི་མཉམ་དུ་མཱན་ཀྲུ་བ་ནས་ཡོང་མཁན་གྱི་བློན་པོ་ཞིག་གིས་རྒྱལ་པོར་ཞུས།
བློན་པོ་དེ་བརྒྱུད་རཱོ་མིའོ་ཡིས་རང་གི་ཕ་མར་དགོངས་སེལ་ཞུས་པ་དང་འབྲེལ། རང་ཉིད་ཀྱི་འཆི་རྐྱེན་རྣམས་གསལ་པོར་འཁོད་པའི་ཡི་གེ་ཞིག་བཞག་ཡོད། ཡི་གེ་དེའི་ནང་འཁོད་རང་ཉིད་དང་འཇུའུ་ལི་ཀྲེ་ཡི་ལྐོག་འབྲེལ་དང་དུག་ཇི་ལྟར་ཟོས་ལུགས་དང༌། དུར་ཁུང་དུ་ཤི་བར་ཇི་ལྟར་ཡོང་ལུགས་རྣམས་གསལ་པོར་བཀོད་ཡོད་སྟབས། བཙུན་པས་བཤད་པའི་གནས་ཚུལ་དང་མགོ་མཇུག་མཐུན་པར་བརྟེན། ཁོང་མི་གསོད་ནག་ཉེས་ཀྱི་དོགས་གཞི་ལས་ཐར། རྒྱལ་པོས་མོའན་ཀྲ་གྷ་སི་ཚང་དང༌། ཁེབ་པུའུ་ལི་ཀྲེ་ཚང་གཉིས་ཀྱི་རྒྱུ་མཚན་མེད་པའི་འཁོན་འཛིན་ལ་སྐྱོན་བརྗོད་བྱས་པ་མ་ཟད། ཁོ་ཚོས་རང་ཉིད་ཀྱི་ཤ་ཁྲག་ལས་མཆེད་པའི་ཕྲུ་གུའི་བརྩེ་དུང་ལ་དོ་ཕོག་བཏང་བ་དེར་དཀོན་མཆོག་གིས་ཉེས་ཁྲིམས་བཏང་པ་ར་སྤྲོད་ཀྱང་བྱས།
དེ་ནས་བཟུང་ཁྱིམ་ཚང་གཉིས་ཀྱི་འཁོན་འཛིན་རྣམས་གཅེས་ཕྲུག་ན་གཞོན་ཕོ་མོ་གཉིས་ཀྱི་དུར་ཁུང་དུ་སྦས་ཏེ། ཁྱིམ་གཉིས་ཀྱི་ཞི་ཆིང་མཚོན་ཆེད་ཁེབ་པུའུ་ལི་ཀྲེ་ཡིས། མཱོན་ཀྲ་གྷ་སི་ལ་གཅེན་པོ་ཞེས་འབོད་བཞིན་མཛའ་མཐུན་གྱི་ལག་གདངས་སྦྲེལ་ནས། ཞི་མཐུན་ནི་ཁོའི་སེམས་ཁོང་གི་རེ་བ་ཡོད་ཚད་དེ་ཡིན་པར་བརྗོད། མོའན་ཀྲ་གྷ་སི་ཡིས་དེ་བས་ལྷག་པར་ཁོས་ཡུལ་ཝི་རཱོ་ན་རུ་བཟོ་བཀོད་འགྲན་ཟླ་བྲལ་ཞིང་གསེར་གཤའ་མ་ལས་གྲུབ་པའི་འཇུའུ་ལི་ཀྲེ་ཡི་འདྲ་གཟུགས་ཤིག་བསྐྲུན་རྒྱུ་ཁས་བླངས་པ་དང༌། ཁེབ་པུའུ་ལི་ཀྲེ་ཡིས་ཀྱང་དེའི་ཚབ་ཏུ་རཱོ་མིའོ་ཡི་འདྲ་གཟུགས་ཤིག་བཟོ་རྒྱུའི་ཁས་ལེན་བྱས།
ད་ཆ་རྟ་འགྲོ་རྡུལ་ཡལ་གྱི་དཔེ་ལྟར་རྐྱེན་ངན་རྣམས་བྱུང་ཟིན་ཏེ་ཁྱིམ་གཉིས་ཀྱིས་གསར་དུ་བཙུགས་པའི་མཛའ་མཐུན་གྱི་ཟམ་པ་བརྟན་མོད། ཁོང་ཚོའི་འདས་པའི་འཁོན་འགྲས་དང་ལྡང་ཟུག་ནི་ཤིན་ཏུ་ཆེ་སྟབས། མཐར་བརྩེ་དུངས་ཀྱི་ཞགས་པས་བཅིངས་པའི་གཞོན་ནུ་ཕོ་མོ་གཉིས་ཀྱི་རིན་བྲལ་གྱི་ཚེ་སྲོག་མ་གཏོགས་གཞན་གང་གིས་ཀྱང་འཁོན་འགྲས་དེ་བཟློག་མེད་དུ་གྱུར་ཏོ།། །།
སྒྲུང་འདིའི་ནང་གི་ན་གཞོན་ཕོ་མོ་གཉིས། །
སྟོན་མཇུག་ཡུལ་ཙམ་འཕུར་བའི་ཕྱེ་ལེབ་གཉིས། །
དབྱར་ཁར་འཁྱུག་ཙམ་བཞད་པའི་མེ་ཏོག་གཉིས།
མུན་ཁྲོད་སྐད་ཅིག་སྣང་བའི་སྐར་མདའ་གཉིས། །
ཐུགས་རྗེ་ཆེ། དངོས་ནས་ཡག་པོ་བསྒྱུར་ཡོད་ཀི བརྩམས་སྒྲུང་འདི་སྔོན་ཆད་དབྱིན་ཡིག་ལས་ཐེངས་ཤིག་བཀླགས་ཡིན། ད་ཐེངས་བོད་ཡིག་གི་ལམ་ནས་བཀླགས་ཐུབ་སོང་བར་སྒྱུར་མཁན་ལ་ཐུགས་རྗེ་ཆེ། བརྩམས་སྒྲུང་འདི་ནི་དབྱིན་ཇིའི་བརྩེ་དུང་བརྩམས་སྒྲུང་གི་ཚབ་མཚོན་ཞིག་ཏུ་བགྲེང་གི་རེད། ང་རང་ཤིག་སི་ཕེར་གྱི་ཧམ་ལེ་ཐི་དང་ཨོ་ཐཱ་ལེ་འདི་གསུམ་ལ་ཧ་ཅང་དགའ། དེ་ལས་ཀྱང་ཧམ་ལེ་ཐི་བཀླགས་རྒྱུར་ཤིན་ཏུ་དགའ།
འདི་བརྩམས་སྒྲུང་རེད་དམ། མ་ཤེས་ཤེས་མདོག