མི་ཉག་ཀུན་དགའ་བཀྲ་ཤིས། དབྱིན་ཡུལ།
ཕྱི་རོལ་གྱི་རྣམ་པའི་མངོན་སྟངས་ཀྱི་ཆ་ནས་རྡོ་རྗེ་ཤུགས་ལྡན་གྱི་གནད་དོན་འདི་རྐང་རྩེད་སྤོ་ལོའི་རུ་ཁག་གཉིས་བར་གྱི་རྐང་སྤོལ་འགྲན་བསྡུར་ཞིག་དང་ཅུང་ཟད་འདྲ་བ་འདུག་ཀྱང་རྩེད་མོ་ངོ་མ་ཞིག་ལ་ངོས་འཛིན་བྱ་ཐབས་གཏན་ནས་མེད། རྩེད་མོ་འདིར་མགོ་འཁོར་དྲགས་ན་ཕྱིས་སུ་དེ་འབྱུང་གི་འབྲས་བུ་ངན་པ་འབྱུང་བའི་རྩེད་འགྲན་ཧ་ཅང་ཆེན་མོ་ཞིག་ཏུ་འགྱུར་བའི་སྔོན་བརྡ་གཏོང་གིན་འདུག
རུ་ཁག་འདི་གཉིས་ཀྱི་བར་ལ་རྣམ་པ་དང་སྤྱོད་པ། དམིགས་ཡུལ་དང་རྒྱབ་ལྗོངས། དེ་བཞིན་བྱེད་ལས་སོགས་མི་འདྲ་བའི་ཆ་མང་པོ་ཞིག་ཡོད། རྐང་རྩེད་སྤོ་ལོའི་འགྲན་བསྡུར་ཟེར་བ་རྒྱལ་ཕམ་གྱི་རང་བཞིན་ཅན་ཡིན་པ་བཞིན་ཁ་གཏད་ཤོག་ཁག་གཉིས་པོས་ཅིག་ཤོས་ཐོབ་ན་གཞན་དེས་འཚམས་འདྲིའི་ལག་པ་གཏོང་ལ། གཞན་དེ་ཤོར་ན་ཅིག་ཤོས་དེས་དགའ་བསུའི་ཕན་ཚུན་འཐམ་རེས་བྱེད་སྲོལ་ཡོད་པ་ཞིག་རེད། མ་ཟད་རུ་ཁག་གཉིས་ཀ་རྩེད་རིགས་ཆེད་ལས་ཀྱི་འཇོན་ནུས་ཐད་གཅིག་པ་གཅིག་རྐྱང་མིན་ན་ཡང་དྲག་ཞན་གྱི་ཧེ་བག་མངོན་གསལ་དོད་པོ་རང་མེད་སོང་ན་ཡག་ཉེས་ཀྱི་དབྱེ་བ་འབྱེད་ཐུབ་པ་དང་། ལྟ་མཁན་གྱི་མིག་ཟུང་ལ་སྤྲོ་སྣང་དང་དཔྱད་གླེང་གི་དང་ག་འཕེལ་བར་གྲོགས་བྱེད་པའི་ནུས་པ་ཤུགས་ཆེར་འདོན་ནུས། དངོས་ཡོད་ཐོག་ཕན་ཚུན་གཅིག་གིས་གཅིག་ལ་འགྲན་ནུས་པའི་བཟང་ཕྱོགས་ཀྱི་སྙིང་སྟོབས་དང་སྤོབས་པ་ཆ་ཚང་ཡོད་དགོས། དེ་ནི་རྩེད་རིགས་ཡོངས་ལ་ཚང་དགོས་པའི་ཉུང་མཐར་གྱི་ཆ་རྐྱེན་ཞིག་ཀྱང་རེད།
འོན་ཀྱང་ཤུགས་ལྡན་རུ་ཁག་དང་དེའི་ཕྱོགས་འགལ་རུ་ཁག་གཉིས་ཀྱི་རྩེད་འགྲན་ནི་གནམ་ས་ལྟ་བུའི་ཆ་ཧ་ཅང་མི་སྙོམ་པའི་རུ་ཁག་གཉིས་བར་གྱི་འགྲན་བསྡུར་ཡ་མ་བརླ་ཞིག་སྟེ། ཕན་ཚུན་རིགས་བསྒྲེ་བྱ་རྒྱུ་མེད་པའི་ཤོག་ཁག་གཉིས་རེད། དེ་ལྟར་ཡིན་ན་ཡང་རྒྱལ་ཕམ་གྱི་ས་མཚམས་ངེས་པར་དུ་འབྱེད་དགོས་པ་རེད། རྙོག་འཛིང་ཅན་གྱི་རྩེད་འགྲན་གྱི་དཀའ་ངལ་དེ་སེལ་བར་རྩོད་པ་དེའི་འབྱུང་ཁུངས་འདེད་དགོས་པ་ལས་དེ་ཆབ་སྲིད་ནང་དྲུད་ནས་གླེང་ན་ཆབ་སྲིད་ཀྱི་ངོ་བོའམ་གནད་དོན་ཞིག་ལ་འགྱུར་འགྲོ་ལ་དཔལ་འབྱོར་དང་འདྲེས་ནས་བཤད་ན་དཔལ་འབྱོར་གྱི་དཀའ་ངལ་འདྲ་པོ་ཞིག་ལ་ཆགས་པའི་ཉེན་ཁ་ཆེ། དེར་བརྟེན་ངོ་བོ་མི་འདྲ་བའི་བརྗོད་གཞི་རྣམས་སོ་སོར་གླེང་དགོས་པ་ལས་ཉ་ཉུང་མཉམ་བསྲེ་བྱེད་ན་མཇུག་འབྲས་བཟང་པོ་ཞིག་སྨིན་དཀའ།
དོལ་ཚོགས་ལ་ཁ་གཏད་པའི་ཕྱོགས་འགལ་གྱི་རུ་ཁག་ལ་ཆེད་ལས་ཀྱི་རུ་ཁག་དོ་དམ་པ་དང་རྒྱལ་སྤྱིའི་ཚད་གཞིར་སླེབས་པའི་རྩེད་འགྲན་པ་མང་པོ་ཞིག་ཡོད་ལ་རྩེད་མོའི་འགྲན་བསྡུར་གྱི་ཆ་ཤས་ཡོངས་རྫོགས་བླངས་དང་ལེན་བཞིན་པ་རེད། དེས་རྐྱེན་གྱིས་ད་བར་རྒྱལ་སྤྱིའི་སྡིངས་ཆའི་སྟེང་དུ་རྒྱལ་ཁའི་དགའ་རྟགས་རྐྱང་རྐྱང་རག་པ་ལས་ཕམ་ཁའི་འཕྱ་སྨོད་དང་གྱོང་གུན་ཉོ་དགོས་པ་བྱུང་མེད། འོན་ཀྱང་བར་ལམ་ཞིག་ནས། དམིགས་བསལ་ཉེ་བའི་ཆར་ཤུགས་ལྡན་བསྟེན་གསོལ་མི་བྱེད་པའི་ཤོག་ཁག་གི་རྩེད་ཐང་དུ་སྐྱོད་པའི་ལམ་དུ་སྒེར་གྱི་ཁེ་ཕན་དང་མིང་གྲགས་ཀྱི་བ་དན་འཛམ་གླིང་སྤྱི་ཚོགས་ཀྱི་མཁའ་དབྱིངས་སུ་འཕྱོ་བའི་དོན་དུ་ཚོགས་སྒེར་འདྲ་མིན་འཚང་ནས་དོལ་རྒྱལ་རུ་ཁག་གི་སྒྲིག་འཛུགས་སུ་མི་ཞུགས་པའི་རྩ་བའི་དམ་བཅའ་དང་མི་མཐུན་པའི་རྙོག་གླེང་མང་དག་བྱས་པ་རེད། དཔེར་ན་ཟང་ཟིང་གི་འབྲེལ་བ་མི་བྱེད་པའི་འུར་སྒྲོག་དང་། ཤུགས་ལྡན་རུ་ཁག་དེ་བོད་པའི་སྤྱི་ཚོགས་ནང་བཀག་ལྡོག་བྱས་པ་དང་ཕུད་པ་སོགས་དཀྲོག་གཏམ་གྱི་མིང་ཚིག་འདི་ཚོས་ཆེད་ལས་རུ་ཁག་གི་དཔུང་ཤུགས་རེ་ཞིག་ཉམས་དམས་སུ་བཏང་དང་གཏོང་བཞིན་ཡོད་པ་མ་ཟད་བྱེད་མི་བདེ་བའི་དཀའ་ངལ་མང་པོ་ཞིག་བཟོས་དང་བཟོ་བཞིན་མཆིས། ཚུལ་དེ་ཡིས་ཤུགས་ལྡན་རྩེད་འགྲན་རུ་ཁག་ལ་འགྲན་རྩོད་ཁྲོད་མུ་མཐུད་དུ་ཞུགས་པའི་སྤོབས་པ་སྦྱིན་ལ་བརྟག་དཔྱད་ལ་ཡིད་མི་བརྟས་པའི་ལྟད་མོ་བའི་གྲངས་འབོར་ཡང་སྔར་ལས་མང་བ་རུ་ཁག་དེའི་ཕྱོགས་སུ་འགུག་པའི་ཕན་རླབས་རྒྱ་ཆེར་སྐྲུན་བཞིན་ཡོད།
བློ་ཕམ་པ་ཞིག་ལ། རྩེད་ཐང་སྟེང་མཉམ་གཅིག་ཏུ་བུད་པའི་ཤུགས་ལྡན་རུ་ཁག་ལ་སྤྱང་གྲུང་ལྡན་པའི་ཆེད་ལས་པའི་དོ་དམ་པ་མེད་ལ་རྩེད་མོའི་སྒྲིག་འཛུགས་མི་ཤེས་པའི་རྩེད་འགྲན་པ་འགའ་ལས་གྲུབ་པའི་ཡིད་རྟོན་དང་ཆ་འཇོག་ནམ་ཡང་བྱེད་མི་རིགས་པའི་རུ་ཁག་ཉག་ཅིག་ཏུ་གྲུབ་པ་དང་། སྒྲིག་འཛུགས་ལྡན་པ་དང་ཁྲིམས་དང་མཐུན་པའི་་ལྟད་མོ་བཤམ་སྟོན་བྱེད་ཐུབ་ཀྱི་མེད་པས་ན་ལྟད་མོ་བ་ཉིན་རེ་བཞིན་ཇེ་ཉུང་ནས་ཇེ་ཉུང་དུ་འགྲོ་བཞིན་ཡོད། དོལ་རྒྱལ་རུ་ཁག་རྩེད་མོ་འདི་གཅིག་བུར་མགོ་འཁོར་ནས་བོད་མི་རིགས་ཀྱི་རྩ་དོན་གྱི་རྩེད་མོ་ངོ་མ་རྩེ་སའི་ཐང་ཆེན་རྒྱ་ཡན་དུ་གཏོང་བ་ཡང་འགན་འཁྲི་མེད་པའི་རུ་ཁག་ཐེབས་ཆག་ཅིག་གི་ངོ་བོར་གྱུར་ཟིན་ལ་འཇིག་རྟེན་པའི་ལྷའམ་འདྲེ་ཞིག་གི་དོན་དུ་མི་རིགས་ཀྱི་ལ་རྒྱ་ཡང་ཆུའི་གཏིང་དུ་བསྐྱུར་ནས་ཡར་གནམ་དང་མར་ས་ལ་མི་སླེབས་པའི་ཁྲེལ་མེད་ཀྱི་ཤོག་ཁག་དག་མ་ཞིག་ཏུ་གྱུར། དེ་ནི་རྩེད་འགྲན་རུ་ཁག་འདིའི་རྒྱབ་ལྗོངས་དང་ལོ་རྒྱུས་རང་ཉིད་ཀྱིས་ཁ་གྲགས་འོང་ལ་གསལ་བཤད་ཀྱང་བྱེད་བཞིན་ཡོད།
ཤུགས་ལྡན་རུ་ཁག་འདི་ཚགས་ཤོག་དང་བརྡ་འཕྲིན་གྱི་འཇིག་རྟེན་ཆེན་མོའི་མཁའ་དབྱིངས་ནས་མཇའ་ལྟར་ཡོངས་སུ་ཡལ་ལ་ཉེ་བའི་སྐབས་འདིར་ཁ་གཏད་ཚོགས་པའི་རུ་ཁག་གིས་སྐྱར་དུ་ཕམ་ཉེས་བཏང་ཟིན་པ་དང་རྩེད་ན་བཟང་ཕྱོགས་ཀྱི་རྣམ་པ་ཅི་ཡང་འཐོབ་རྒྱུ་མེད་པའི་ཤུགས་ལྡན་རུ་ཁག་དང་སྐྱར་དུ་འགྲན་བསྡུར་ཞིག་གི་མགོ་བཙུགས་པས་རྩེད་མོ་འདི་མཇུག་སྒྲིལ་བར་ལས་སླ་པོ་མེད་པར་འགྱུར་བཞིན་པ་མ་ཟད། ཁོ་ཚོ་ཇེ་ངར་དང་། དེ་བཞིན་རྩེད་འགྲན་གྱི་གནད་དོན་དེ་མགོ་ཇེ་རྙོག་ཏུ་འགྲོ་བཞིན་ཡོད།
གལ་སྲིད་དོལ་ཚོགས་རུ་ཁག་དང་དོན་སྙིང་ལྡན་པའི་རྐང་སྤོལ་འགྲན་བསྡུར་གསར་པ་ཞིག་བྱེད་འདོད་ན་ཐོག་མར་མི་དང་མིའི་བར་གདོང་དང་གདོང་ཐུག་ནས་རྨོངས་གཉིད་ལས་ད་དུང་མ་སེལ་བའི་རུ་ཁག་དེའི་སྐད་ཅོར་ཅན་གྱི་རྒྱབ་སྐྱོར་པའི་དཔུང་ཚོགས་ལ་མངོན་ལྐོག་མེད་པའི་ཐོག་ནས་རུ་ཁག་དེའི་ལོ་རྒྱུས་དང་རྒྱབ་ལྗོངས་མ་ནོར་བ་ཡོངས་རྫོགས་ཤེས་སུ་འཇུག་དགོས། དེ་ཡང་དྲང་བདེན་དང་། ཞིབ་འཇུག་གི་བརྒྱུད་རིམ་ལྡན་པ། འདས་སོང་གི་ལོ་རྒྱུས་སོགས་གཞི་ལ་བཞག་ནས་གོ་བརྡ་གཙང་མ་སྤྲོད་དགོས། རྩེད་འགྲན་པ་རྣམས་ལ་ཡང་སྤོ་ལོ་རྩེད་སྟངས་དང་དེའི་སྒྲིག་གཞི་སོགས་མཐར་ཕྱིན་པ་སློབ་ཅིང་དོན་ཕན་ལྡན་པའི་སྦྱོང་བརྡར་ཡང་སྤྲད་དགོས།
ཁོ་ཚོར་རྩེད་ཐང་སྒང་ལ་བབ་ན་མི་ཆོག་ཟེར་ན་མི་འགྲིག་ལ། འདོད་པ་མེད་ན་འཐོན་དགོས་པའི་བཙན་བཀའ་ཡང་གཏོང་མི་ཉན། བྱེད་མ་བྱེད་དེ་ནི་ཁོ་ཚོའི་ཐོབ་ཐང་རེད་ལ་རང་དབང་ཀྱང་རེད། སྐད་ཆ་ལྡོག་ནས་བཤད་ན་ཆེད་ལས་པ་དང་འགན་ཁུར་ལྡན་པའི་རྐང་སྤོལ་རུ་ཁག་རང་ཉིད་ཁོ་ཚོའི་རུ་ཁག་དང་རྐང་སྤོལ་རྩེ་མིན་སོ་སོས་ཐག་གཅོད་བྱེད་པའི་འགན་དབང་སོ་སོའི་ལག་པའི་ནང་ལ་ལོས་ཀྱང་ཡོད། གལ་སྲིད་ཆ་ནམ་ཡང་མི་མཚུངས་པའི་རུ་ཁག་ཅིག་དང་ཨུ་ཚུགས་ཀྱིས་ཅི་ཙམ་བསྡུར་ཡང་ཆེད་ལས་པའི་རུ་ཁག་གི་དུས་ཚོད། མིང་གནས། རིན་ཐང་། གཟི་བརྗིད། དེ་བཞིན་རྒྱལ་སྤྱི་ཅན་གྱི་གོ་གནས་སོགས་ལ་གནོད་སྐྱོན་ཐེབས་འགྲོ་བའི་རྒྱུ་རུ་མི་འགྱུར་བའི་ངེས་པ་ཡང་མེད།
ཤུགས་ལྡན་རུ་ཁག་སྟེ། ཆེད་ལས་མིན་པའི་རུ་ཁག་ལ་ཕམ་ཉེས་བྱུང་ན་དོན་དངོས་སུ་དེ་ནི་ཁོ་ཚོར་མཁོ་བ་དང་ཁོ་ཚོས་རེ་སྙེག་བྱེད་པའི་རྒྱལ་ཁ་ཞིག་དང་། ཐབས་སྡུག་ཆགས་ན་ཁོ་ཚོར་དགོས་པའི་སྐད་གྲགས་འགྲོ་བའི་རྒྱུ་རེད། རྐང་འདྲེན་བཞག་ནའང་ཁོ་ཚོས་འཚོལ་བའི་བཅོས་མའི་ངུ་སྒྲ་གཅིག་བུའི་དོན་དུ་རེད། རྒྱུ་མཚན། ཁོ་ཚོར་ཆེད་ལས་པ་དང་སྐད་གྲགས་ཡོད་པའི་དོ་ཟླ་ཞིག་ལ་འགྲན་པའི་གསེར་འདྲ་བའི་གོ་སྐབས་ཡོད་པ་མ་ཟད་ཁོ་ཚོར་ཐོབ་རྒྱུ་དང་ཤོར་རྒྱུ་ཞིག་མེད་པ་ཆགས་ཟིན་པའི་གནས་སྟངས་དེ་རེད།།
༢༩/༡༠/༢༠༡༤