བཀྲ་ཤིས་དོན་འགྲུབ།
རྒད་པོ་འཁོགས་པོ་ཡིན་པའི་གྲོགས་པོ་ཚོ།།
རྒས་ཉམས་མ་སྟོན་འཇིག་རྟེན་གཉིད་ལས་སློང་།།
རྒུད་ཉམས་མ་སྟོན་གསོན་པའི་བཟོ་སྟོན་དང་།།
ང་དང་ཁྱོད་ཀྱི་མདུན་ལམ་གཅིག་པ་ཡིན།།
ཤ་དར་ཁྲག་དར་ཡིན་པའི་ན་གཞོན་ཚོ།།
ལང་ཚོ་མེ་རུ་འབར་བའི་ངར་ཤུགས་དེ།།
སྙན་ངག་དམར་པོའི་ལམ་ནས་གྱེར་ཤོག་དང་།།
ང་དང་ཁྱོད་ཀྱི་མདུན་ལམ་གཅིག་པ་ཡིན།།
ཁྱོད་ཀྱི་སྙིང་རྩའི་འགྱུ་བ་གཉོམ་མེད་ན།།
ངོ་དེབ་ངོས་འདི་ཁྱོད་ཀྱི་གར་སྟེགས་རེད།།
སྲིད་པ་འུར་ཆོམ་སྒྲ་ཡིས་ཁོངས་ཤོག་དང་།།
ང་དང་ཁྱོད་ཀྱི་མདུན་ལམ་གཅིག་པ་ཡིན།།
སྨྱུ་གུའི་རྩེ་མོ་མ་ཟད་བར་དུ་རྡོར།།
མཐེབ་གཞོང་ལེབ་མོ་མ་ཆག་བར་དུ་ཁོལ།།
རྩོམ་རིག་ཅེས་པ་ཤི་རུ་མ་འཇུག་དང་།།
ང་དང་ཁྱོད་ཀྱི་མདུན་ལམ་གཅིག་པ་ཡིན།།
རྩོམ་རིག་སྒྱུ་རྩལ་འདེགས་པའི་ཀ་ཆེན་དུ།།
སྔོན་ཆད་ཞལ་གྱིས་བཞེས་པའི་དམ་བཅའ་དེ།།
ད་ལྟ་ངན་བསྐྱུར་བྱས་པའི་བཟོ་མ་སྟོན།།
ང་དང་ཁྱོད་ཀྱི་མདུན་ལམ་གཅིག་པ་ཡིན།།
རྒད་པོ་ཚོས་གཞོན་ཉམས་བྱེད་པ་མཐོང་ན་
རྒན་མོ་ཚོས་ག་རེ་བསམ་ཡོང་ངམ།
ཧ་ཧ
ཡག་པོ་བྲིས་འདུག
རྒད་མོ་ཚོས་ཀྱང་གཞཽན་ཉམས་སྟོན་ངེས་རེད། དེ་དུས་ཁྱེད་རང་འཁྲུལ་མ་ཡོང་ང་། ཧཧཧཧཧ
བཀྲ་བའི་རྣམ་མང་ཤེས་བྱའི་དགའ་ཚལ་ཆེ།།
ཤིས་པ་སྒྲུབ་པའི་ཞུམ་མེད་སྙིང་སྟོབས་དང་།།
དོན་ཀུན་འབྱེད་པའི་ཤེས་རབ་དངོས་གྲུབ་གང་།།
གྲུབ་པའི་སྐྱེས་བུ་དེ་ལ་བདག་ཡིད་མགུ།།
སྣང་གྲགས་རིག་གསུམ་མགྲིན་པའི་འགྱུར་ཁུག་ཏུ།།
འགུགས་པའི་ངལ་བ་བསྟེན་ཚུལ་མ་ཤེས་ཀྱང་།།
རྣ་བར་འཇགས་པའི་སྙན་ཚིག་རྒུན་ཆང་ཞིག།
ལོ་མང་སོང་ནས་སླར་ཡང་འཐུང་སྐབས་རྙེད།།