ཕ་ཡུལ་བོད་མདོ་སྨད་མགོ་ལོག་དབལ་ཤུལ་གསེར་རྟའི་གེ་འཕེན་སྡེ་བ་ནས་ཡིན་པའི་ན་གཞོན་རྩོམ་པ་པོ་གངས་སྐྱེས་སྒྲུབ་པ་སྐྱབས་མཆོག་ཕྱི་ལོ་༢༠༡༢་ལོའི་ཟླ་༢་ཚེས་༡༥་ཉིན་གྱི་མཚན་མོའི་བོད་ནང་གི་ཆུ་ཚོད་༡༡་ཐོག་གསེར་རྟ་རྫོང་གི་རང་ཁྱིམ་ནས་རྒྱ་གཞུང་མི་སྣས་བཙན་ཁྲིད་བྱས་འདུག དེ་ཡང་ཁོང་བཙན་ཁྲིད་བྱེད་མཁན་ནི་དཀར་མཛེས་ཁུལ་གྱི་ཉེནརྟོག་མི་སྣ་དང་། གསང་བའི་མི་སྣ། དེ་བཞིན་གསེར་རྟ་རྫོང་གི་ཉེན་རྟོག་མི་སྣ་དང་། གསང་བའི་མི་སྣ་སོགས་ཁྱོན་མི་གྲངས་༢༠་ཙམ་ཡོད་པ་དང་། དེའི་ཁོངས་སུ་གསེར་རྟ་རྫོང་གི་ཉེན་རྟོག་ལས་ཁུངས་ཀྱི་མགོ་གཙོ་དང་། གསང་བའི་ལས་ཁུངས་ཀྱི་མགོ་གཙོ་བཅས་ཡོད་པར་མ་ཟད། གསེར་རྟ་རྫོང་གྲོང་གི་ཆ་ཚང་སློབ་གྲྭ་ཞེས་པའི་སློབ་ཆུང་ཞིག་ཡོད་པ་དེའི་མགོ་གཙོ་ཆོས་དར་ཟེར་བ་དེ་ཡང་དེའི་ཁོངས་སུ་སླེབས་ཡོད་འདུག
གོང་གསལ་རྒྱ་གཞུང་མི་སྣས་གངས་སྐྱེས་སྒྲུབ་པ་སྐྱབས་འཛིན་བཟུང་བྱེད་ཞོར་དུ་ཁྱིམ་ནང་བསྔོགས་གཤེར་བྱེད་སྐབས་ཁོང་གི་བཟའ་ཟླས་སྒྲུབ་པ་སྐྱབས་འཛིན་དོན་ཅི་ཡིན། ཞེས་དང་། ཁྱིམ་ནང་བསྔོགས་གཤེར་ཆོག་པའི་གོང་རིམ་གྱི་ཆོག་མཆན་ཡིག་ཆ་སོགས་ཡོད་དམ། ཡོད་ན་སྟོན་ཞེས་རེ་རེ་བཞིན་དྲིས་པར། ཁོང་ཚོས་སྒྲུབ་པ་སྐྱབས་ལ་སྐད་ཆ་ཞིག་འདྲི་རྒྱུ་ཡོད། དེའི་ཆེད་ཁོང་འཁྲིད་བཞིན་ཡོད། ཅེས་དང་། ཁྱིམ་ནང་བསྔོགས་གཤེར་ཆོག་མཆན་ཡིག་ཆ་འདི་ཡིན་ཞེས་སྟོན་རྒྱུ་ཡོད་མི་འདུག་ཟེར།འོན་ཀྱང་རྒྱ་གཞུང་གི་ཁྲིམས་འགལ་གྱི་དངོས་རྫས་རིགས་གང་ཡང་ཁོང་གི་ཁྱིམ་ནས་ཐོན་མི་འདུག དེ་ནས་ཁོང་གི་ནང་མིས་མཐོང་སར་ཁོང་ལ་རྐང་ལྕགས་དང་། ལག་ལྕགས་སོགས་མ་བརྒྱབ་པར། བདེ་འཇགས་མི་སྣ་གཉིས་ཀྱིས་ཁོང་གི་ལག་པ་གཡས་གཡོན་རེ་རེ་བཞིན་འཇུས་ཤིང་། རྒྱ་གཞུང་མི་སྣ་གཞནདག་གིས་མཐའ་ནས་བསྐོར་ཏེ། ཁྲིད་ཡོད་པ་དང་། དེ་རྗེས་ནས་གར་སོང་དང་། གནས་སྟངས་ཆ་མེད་ཆགས་ཡོད་འདུག
ན་གཞོན་རྩོམ་པ་པོ་གངས་སྐྱེས་སྒྲུབ་པ་སྐྱབས་རང་ལོ་༣༢་ཡིན་ཞིང། སྨྱུག་མིང་ལ་གངས་མེ་སྟག་ཞེས་འབོད། ཁོང་གི་ཕ་མིང་ལ་ཐུབ་ཉི། མ་མིང་ལ་དབང་ལོ། བཟའ་ཟླའི་མིང་ལ་དབང་ཕྱུག་ལྷ་མོ་བཅས་ཟེར་ཞིང་། ཁོང་ལ་བུ་ཕྲུག་གཉིས་ཡོད་པའི་ཆེ་བ་བུ་མོ་ལོ་༨་ཅན་ཞིག་དང་། ཆུང་བ་དེ་བུ་ལོ་༥་ཅན་ཞིག་བཅས་ཡོད་པ་རེད། ཁོང་ཆུང་ངུའི་སྐབས་སློབ་ཆུང་དང་། དེ་རྗེས་གསེར་རྟ་རྫོང་མི་རིགས་སློབ་འབྲིང་དང་། དེ་རྗེས་དཀར་མཛེས་ཁུལ་གྱི་དགེ་འོས་སློབ་གྲྭ་སོགས་ཐོན་རྗེས་གསེར་རྟ་ས་ཆའི་གདར་ཚང་དང་། ཧོར་ཤུལ་སོགས་ལ་དགེ་རྒན་གནང་བ་དང་། དེང་སྐབས་ཀྱང་སྒེར་གཉེར་སློབ་གྲྭ་ཞིག་ཏུ་དགེ་རྒན་གནང་བཞིན་པས་མཚོན་ད་བར་ལོ་ངོ་ཧྲིལ་པོ་༡༠་ཙམ་ལ་དགེ་རྒན་གནང་ཡོད་འདུག་པ་དང་། ཞོར་དུ་ཁོང་གིས་<>ཅེས་པ་སོགས་དེབ་ཁག་གཅིག་བརྩམས་ཡོད་པ་བཅས་ཁོང་གི་ངོ་སྤྲོད་སྙིང་བསྡུས་ཡིན།།
གནས་ཚུལ་མཁོ་སྤྲོད་པ། སྤྱི་ཟུར་གསེར་རྟ་ཚུལ་ཁྲིམས་འོད་ཟེརལགས།
གནས་ཚུལ་དུས་ལྟར་མཁོ་སྤྲོད་བྱས་པར་དགའ་བསུ་ཞུ། ཁོང་ཕྱིར་རང་ཁྱིམ་དུ་བདེན་འཇགས་ངང་འབྱོར་བར་སྨོན།
རྒྱ་དམར་པོའི་སྡུག་སྦྱོང་མནར་གཅོད་ཀྱི་འོག་ན། །བོད་གངས་རིའི་ཐོབ་ཐང་རྩོད་མཁན་གྱི་བུ་ལོའི། །སྲོག་དམར་པོའི་རྒྱུན་ཐག་ཆད་པ་ཡང་འབྱུང་སྲིད། །ལྷ་ཆོས་སྐྱོང་ཡོད་ན་སྐྱོབས་རན་ཞིག་ཡིན་སྐད། །
བང་ཆེན་གསར་ཁང་གིས་གནས་ཚུལ་འདི་མི་བཀོད་དོན་ཅི་རེད་དམ། འདིར་ལྟོས་དུས་བང་ཆེན་ཚུལ་ཁྲིམས་ནི་ངོ་བོ། བྱེད་ལས། དམིགས་ཡུལ་ཚང་མ་མཐོང་གི་མི་འདུག་གམ།
ཕལ་ཆེར་ཉིན་བཅུ་གྲངས་ཤིག་ནས་མངག་འོང་རྒྱུ་རེད་འདོད་ཀི ཁོང་གི་བྱ་བ་མང་པོ་སྒྲུབ་མེད་པས་ཡིན།
གནས་ཚུལ་འདི་འདྲའི་རིགས་ལ་ཕྱི་ལོག་གི་བརྒྱུད་ལམ་ཁག་ནས་ཁྱབ་བསྒྲགས་བྱེད་སྟངས་ལ་ངེས་པར་དུ་གཟབ་དགོས་པར་སེམས། གོ་ཚད་ཚང་མ་ཁྱབ་བསྒྲགས་བྱེད་རྐྱང་བྱས་ཏེ། དོ་བདག་གི་གནས་བབ་ལ་ཞིབ་འཇུག་གང་ཡང་མ་བྱས་པར་ད་དུང་དེའི་ཐོག་འབྲེལ་བཤད་བདེན་མིན་སྣ་ཚོགས་མ་བྱས་ན་ལེགས་པར་སེམས། ཁྱབ་བསྒྲགས་ཁ་ཤས་ཕན་པ་ལས་གནོད་པར་སོང་བ་དེ་འདྲ་ཡང་གོ་རྒྱུ་འདུག རྒྱ་གཞུང་གིས་བོད་མི་འཛིན་བཟུང་བྱས་པ་ཁག་གཅིག་ཚོད་ལྟ་བུ་བྱས་ཏེ་འདི་འཛིན་བཟུང་བྱས་ན་ཕྱི་ཕྱོགས་ནས་འདིའི་ཐོག་དོ་སྣང་ག་འདུག་བལྟས་ནས་ཕྱི་ཕྱོགས་ནས་ཧ་ཅང་དོ་སྣང་བྱེད་མཁན་དང་རྒྱབ་སྐྱོར་བྱེད་མཁན་རིགས་མང་ན། ཁྱེད་ཏཱ་ལའི་རུ་ཚོགས་དང་འབྲེལ་བ་ཡོད་པའི་ཉེས་མིང་བཏགས་ནས་ད་དུང་ཉེས་ཆད་ཇེ་ཆེར་གཏོང་གི་འདུག་ཟེར། ཡང་འཛེམས་ཟོན་མེད་པའི་ཐོག་ནས་བོད་དོན་ཐོག་སེམས་ཤུགས་ཁྱེར་ནས་ནུས་པ་བཏོན་མཁན་དེ་ཚོ་ཕྱི་ཕྱོགས་ནས་གནས་ཚུལ་རྒྱུས་ལོན་བྱས་ནས་དུས་ཐོག་རྒྱལ་སྤྱིའི་ཐོག་བསྒྲགས་མ་ཐུབ་ན་རྒྱ་གཞུང་གིས་གལ་སོང་ཆ་མེད་བྱེད་བཞིན་ཡོད་པ་རེད། འདི་ཚོ་ལ་ངེས་པར་དུ་དབྱེ་ཞིབ་བྱེད་རྒྱུ་དེ་གལ་གནད་ཆེ་བར་སེམས། རྒྱུ་མཚན་ནི་བོད་ནང་གི་གཞིས་ལུས་མི་མང་གི་གནས་ཚུལ་ནི་ཉིན་རེ་ནས་ཉིན་རེར་ཛ་དྲག་ཆེ་རུ་འགྲོ་བཞིན་པ་རེད། མདོ་དོན་ས་ཁུལ་སོ་སོའི་འབྲེལ་ཡོད་ཚོས་ཕྱི་ཕྱོགས་ནས་འགན་བླངས་ན་གསལ་པོ་བཟོས་ན་ཤིན་ཏུ་ལེགས། དཔེར་ན་ཀིརྟི་བྱེས་པ་གྲྭ་ཚང་གི་བོད་གནས་འབྲེལ་མཐུད་པའི་ཕྱག་ལས་གནས་སྟངས་དེ་ཧ་ཅང་གི་ནུས་པ་ཡོད་པ་དང་། གནས་ཚུལ་ཡང་ཁུངས་ལྡན་དུས་ཐོག་མཁོ་སྤྲོད་གནང་ཐུབ་ཀྱིན་ཡོད་པར་ཚང་མས་དཔེ་ལྟ་རྒྱུ་དེ་ཧ་ཅང་གི་གལ་གནད་ཆེ་བར་སེམས།
དེ་རིང་གནས་ཚུལ་མཁོ་སྤྲོད་ཧ་ཅང་གི་ཡག་པོ་འདུག།
ཡིན་ཡང་ དེ་སྔོན་གསེར་རྟ་ནས་མི་གཉིས་ཀྱི་རང་ལུས་མེར་བསྲེགས་བཏང་སོང་ཞེས་ཁྱབ་བསྒྲག་བྱས་ཚར་རྗེས་ཡང་མ་རེད་ཅེས་བཤད་པ་ལྟ་བུ་ དེ་འདྲའི་རིགས་དེ་གཏན་ནས་ཡག་པོ་མི་འདུག།
རྗེས་མ་དེ་འདྲ་བྱས་ན་ ངོ་མ་དེ་ཚོ་ རྫུན་མ་འགྱུར་རྒྱུའི་ཉེན་ཁ་ཡོད་པས་ ཁྱབ་བསྒྲགས་མ་བྱས་སྔོན་ བརྟག་དཔྱད་ཡག་པོ་ཞིག་བྱེད་རྒྱུ་ནི་ཧ་ཅང་གལ་ཆེན་པོ་རེད་བསམ་གི་འདུག།
ཡིན་ཡང་ དེ་ཁྱོད་ཀྱིས་དངོས་གནས་རྫུན་བཤད་ནི་མིན་པ་ཧ་གོ་གི་ཡོད་ལགས་