བྱམས་པ་ལྷུན་གྲུབ།
ཉེ་ཆར་རྩ་ཁྲིམས་དོན་ཚན་ ༣༧༠ པ་ཕྱིར་བསྡུ་གནང་སྐབས། རྒྱ་གར་གཞུང་གིས་ཇ་མུ་ཀཤ་མིར་ནང་རྙོག་ཟིང་མི་འབྱུང་བའི་ཆེད། ཁུལ་དེའི་ཆབ་སྲིད་འགོ་ཁྲིད་དང་མི་ཆེན་དོགས་ཡོད་མང་པོ་ཁྱིམ་འཇུག་དང་། དྲྭ་རྒྱ་དང་ཁ་པར་བཀག་སྡོམ། མང་ཚོགས་འདུ་འཛོམས་མི་ཆོག་པ་སོགས་སྟངས་འཛིན་ནན་པོ་གནང་ཡོད་པས། ད་བར་རྙོག་ཟིང་ཆེན་པོ་གང་ཡང་བྱུང་མེད་པར་གྲགས།
གཟའ་ཟླ་བའི་ཉིན་ནས་རྒྱ་གར་གཞུང་གི་བདེ་སྲུང་སློབ་སྟོན་པ་ཨ་ཇིཏ་ ཌོ་བྷཱལ་(Ajit Doval)ལགས་ཀཤ་མིར་ཁུལ་ལ་དངོས་སུ་ཕེབས་ཏེ། ཁུལ་དེའི་བདེ་སྲུང་དང་མི་མང་གི་གནས་བབ་ཇི་ཡོད་ལ་རྟོག་ཞིབ་གནང་མུས་རེད་འདུག་ལ། དེ་རིང་ཀཤ་མིར་གྱི་མང་ཚོགས་མང་པོ་ཞིག་དང་ཐུག་འཕྲད་ཀྱང་གནང་འདུག དེ་ཡང་ཁོང་གིས་མི་མང་དཀྱུས་མའི་གནས་བབ་ལ་བབས་ཏེ། ཁུལ་དེའི་ལམ་ཁ་གཡས་གཡོན་ལ་མི་མང་མང་པོ་དང་ཐུག་འཕྲད་གནང་ཡོད་པ་མ་ཟད། ཞལ་ལག་ཀྱང་མཉམ་པོར་བཞེས་ཏེ་མི་མང་གི་གནས་སྟངས་རྒྱུས་ལོན་གྱི་འདྲི་ཞིབ་དང་། རྩ་ཁྲིམས་དེ་ཉིད་ཕྱིར་བསྡུ་གནང་བའི་དགོས་དམིགས་གསལ་བཤད་གནང་བ་མ་ཟད། འབྱུང་འགྱུར་ཇ་མུ་ཀཤ་མིར་ལུང་པར་བདེ་འཇགས་དང་འཚོ་ཐབས་ཡར་རྒྱས་འགྲོ་རྒྱུ་ཡིན་སྐོར་དང་། རྒྱ་གར་གཞུང་ངོས་ནས་ཁུལ་དེའི་གྲངས་ཉུང་མི་རིགས་གཙོས་པའི་མི་མང་ཡོངས་ཀྱི་བདེ་སྡུག་ལ་ལྟ་སྐྱོང་ནན་པོ་གནང་ངེས་ཡིན་སྐོར། མི་མང་རྣམས་སེམས་འཚབ་དང་དངངས་སྐྲག་གཏན་ནས་མི་དགོས་པའི་ཁག་ཐེག་དང་གསལ་བཤད་སོགས་གནང་ཡོད་འདུག
ཕྱག་ལས་དེ་དག་ནི་མི་མང་གི་འཇིགས་དངངས་ཞི་བྱེད་དང་། ཡིད་ཆེས་འཕེར་བར་ཕན་ངེས་ཡིན་པ་མ་ཟད། ཁུལ་དེར་རྙོག་ཟིང་མི་འབྱུང་བར་ཁ་ཡོད་ལག་ཡོད་ཕན་ངེས་ཀྱི་ཐབས་ཤེས་ཧ་ཅང་བཟང་པོ་ཞིག་རེད་སྙམ། བདེ་སྲུང་སློབ་སྟོན་པ་ཁོང་ནི་སློབ་སྦྱོང་མཐོན་པོ་གནང་མྱོང་བ་མ་ཟད། ལོ་མང་རིང་ཉེན་རྟོག་པ་གནང་མྱོང་ལ་། དེ་ནས་རིམ་བཞིན་པཱ་ཀིས་ཏན་ནང་ཕྱིན་ཏེ་ལོ་བདུན་རིང་རྒྱ་གར་གསང་བའི་ལྷན་ཁང་གི་གསང་མྱུལ་བའི་ལས་དོན་ཡང་གཉེར་མྱོང་། སྐབས་དེ་དག་ལ་ཁོང་གིས་ཞབས་རྗེས་ཆེན་པོ་མང་དག་བཞག་ཡོད་ལ། དེའི་སྐོར་ངོ་མཚར་ཆེན་པོ་དང་ཆོབ་ཚ་བོའི་དངོས་བྱུང་ལོ་རྒྱུས་ཀྱང་མང་པོ་བྱུང་རབས་འདུག སྐྱིད་སྡུག་འདྲ་མིན་དང་ཡུ་ཡུད་ཆེ་བའི་འཚོ་བ་དང་མྱོང་བ་དེ་དག་གི་ཁྲོད་ནས་ཁོང་ལ་ཕྱི་ནང་གི་གསང་བའི་གནས་དོན་དང་། མི་མང་གི་གནས་བབ་སོགས་ཀྱི་ཐོག་ལ་རྒྱུས་མངའ་ཟབ་མོ་བྱུང་བ་མ་ཟད། མི་མང་དཀྱུས་མའི་འཚོ་བ་ལ་རྒྱུས་ལོན་གནང་ཐབས་མཁས་ལ། མི་མང་ལ་སེམས་ཁུར་ཆེ་བའི་བསམ་བློའི་བག་ཆགས་ཀྱང་ཟབ་པོ་བཞག་མྱོང་ཡོད་འདུག
དེ་རྗེས་རིམ་པར་ཉེན་རྟོག་ལྷན་ཁང་གི་སློབ་སྟོན་པ་དང་། རྒྱ་གར་གསང་བའི་ལྷན་ཁང་གི་སློབ་སྟོན་པ་སོགས་ཕྱག་ལས་རིམ་པ་མང་པོ་གནང་འདུག དེ་བཞིན། ལོ་མང་གོང་ནས་ས་མཚམས་རྩོད་རྙོག་དང་། འཇིགས་སྐུལ་རིང་ལུགས་པ་འགོག་འཇོམ་སོགས་ཛ་དྲག་དང་གལ་གནད་ཆེ་བའི་ལས་དོན་མང་པོ་གནང་མྱོང་བ་མ་ཟད། རྒྱལ་ཁབ་ཕྱི་ནང་གི་གསང་བ་དང་བདེ་སྲུང་གི་གནས་དོན་སོགས་ལ་ཧ་ཅང་རྒྱུས་མངའ་ཆེ་ཞིང་ཤེས་འཇོན་ལྡན་ལ། སྙིང་སྟོབས་དང་རྣམ་དཔྱོད་ཆེ་བའི་མི་སྣ་གྲགས་ཅན་ཞིག་ཡིན།
སྤྱི་ལོ་ ༢༠༡༤ ལོར་མཱོ་དྷི་སྲིད་བློན་འཁེལ་སྐབས། ཁོང་རྒྱ་གར་གཞུང་གི་བདེ་སྲུང་སློབ་སྟོན་པར་བསྐོས་པས། དེ་ནས་འདི་ལོར་བར་པཱ་ཀིས་ཏན་ནང་ཡོད་འཇིགས་སྐུལ་རིང་ལུགས་པར་རྐང་དམག་གིས་འཐབ་རྒོལ་དང་། གནམ་དམག་གིས་གཏོར་རྒོལ། རྒྱ་དཀར་ནག་བར་ས་མཚམས་རྙོག་ཟིང་སྐབས་རྒྱ་ནག་ལ་ཁ་གཏད་དང་དཔུང་ངོམ་གྱི་སྲིད་ཇུས་བརྟན་འཛིན་དང་། མཐར་ཞི་འགྲིག་གང་ལེགས་བྱུང་བ་སོགས་ཀྱི་ཐོག་ལ་སློབ་སྟོན་དང་ཐག་གཅོད་གནང་མཁན་གཙོ་གྲལ་ཞིག་ཡིན་པར་གྲགས།
ཁོང་གི་གཟུགས་ཉམས་དང་དཔའ་མཛངས་ལྡན་པའི་སྣང་བརྙན་དེ་དག་ལ་བརྟེན་ནས་རྒྱ་གར་བ་རྣམས་ཀྱིས་ཁོང་ལ་ཇེམས་བྷོནྜ་(Games Bond)ཞེས་ཀྱང་འབོད། མདོར་ན་ཁོང་ནི་མཱོ་དྷི་སྲིད་གཞུང་གི་བདེ་སྲུང་བརྟན་བརླིང་གནང་བར་སྙིང་སྟོབས་ཆེ་བའི་སྟག་རྒོད་ལྟ་བུའི་མི་སྣ་ཞིག་ཡིན་པ་ཡང་ངོས་འཛིན་བྱེད་ཀྱི་ཡོད་ལ། ཁོང་གི་ཞབས་རྗེས་དང་། རྣམ་དཔྱོད། དཔའ་མཛངས་ལྡན་པའི་སྙིང་སྟོབས་སོགས་ལ་བལྟས་ན། བོད་བཙན་པོའི་རྒྱལ་རབས་སྐབས་ཀྱི་བློན་པོ་མགར་སྟོང་བཙན་ལྟ་བུ་ཞིག་ཡིན་པར་སྣང་།།
བྱམས་པ་ལྷུན་གྲུབ་ཀྱིས་ ༢༠༡༩།༧།༧ དགོང་མོར་བྲིས།