གནས་ཚུལ་གཏོང་མཁན། དོན་འགྲུབ་བཀྲ་ཤིས།
ཟླ་འདིའི་ཚེས་༡༦ ཉིན་གྱི་དགོང་དྲོ་ཆུ་ཚོད་༥་༣༠ ཐོག་རྒྱ་གར་ལྷོ་ཕྱོགས་སྦེལ་ཀོབ་བོད་མའི་གཞིས་ཆགས་བོད་ཀྱི་གཞོན་ནུ་ལྷན་ཚོགས་དང་བུད་མེད་ལྷན་ཚོགས་ཐུན་མོང་གིས་གོ་སྒྲིག་འོག ཁ་སང་ཕྱི་ཚེས་༡༥ ཉིན་བོད་བསྟན་སྲིད་ཆེད་སྐུ་ལུས་མེར་བསྲེག་གནང་མཁན་བོད་ནང་ཁམས་རྟའུ་རྫོང་ཁོངས་ཀྱི་རྒྱལ་གཅེས་དཔའ་བོ་འཕྲིན་ལས་རྣམ་རྒྱལ་ལགས་ཀྱི་གཙོས་བོད་བསྟན་སྲིད་ཆེད་སྐུ་ལུས་ཞུགས་འབུལ་གནང་མཁན་ཡོངས་ལ་གདུང་སེམས་མཉམ་བསྐྱེད་མཚོན་ཆེད་བསྔོ་སྨོན་མཆོད་འབུལ་གྱི་ལས་འགུལ་ཞིག་ལུགས་བསམ་གཞིས་གྲོང་དང་པོའི་དྲན་རྟེན་བྱང་ཆུབ་མཆོད་རྟེན་མདུན་ཐང་དུ་སྤེལ་ཡོད་པ་དང་། ལས་འགུལ་ཐོག་ལུགས་བདེ་གཉིས་ཀྱི་གཞོན་ནུ་བུད་མེད་ཀྱི་ཚོགས་མི་མི་མང་༡༠༠ བརྒྱ་ལྷག་འདུ་འཛོམས་ཀྱི་སྨོན་ལམ་གསོག་སྒྲུབ་གནང་ཡོད་པ་རེད།
དེ་ཡང་ཕྱི་ཚེས་༡༥ ཉིན་་བོད་སྟན་པ་ཆབ་སྲིད་ཆེད་དུ་གཅེས་བའི་ལས་སྲོག་ལོངས་སྤྱོད་དང་བཅས་པ་བློས་བཏང་གནང་མཁན་རྒྱལ་གཅེས་དཔའ་བོ་འཕྲིན་ལས་རྣམ་རྒྱལ་ལགས་ནི་བོད་མདོ་ཁམས་ཏྲེ་ཧོར་རྟའུ་རྫོང་ཁོངས་ཁང་གསར་ཡུལ་ཚོ་སྒ་ནུབ་རི་ཡོང་གྲོང་པ་ནས་ཡིན་པ་དང་། དཔའ་བོ་འཕྲིན་ལས་རྣམ་རྒྱལ་ལགས་ནི་ད་ལྟ་རང་ལོ་༣༢ ཡིན་པ་དང་ཁོང་གིས་ཕ་མིང་ལ་བདུད་ལོ་དང་མ་མིང་ལ་དཔལ་ལྷ་ཟེར་གྱི་ཡོད་པ་རེད་ལ། ཁ་སང་ཉིན་གུང་བོད་ནང་གི་ཆུ་ཚོད་༡༢ ཡས་མས་གྱི་ཐོག་ལ་ཁང་གསར་ཡུལ་ཚོའི་ཉེ་འགྲམ་དུ་བོད་བསྟན་སྲིད་ཀྱི་ཆེད་དུ་རང་ལུས་མེར་བསྲེགས་བཏང་ནས་སྐུ་གྲོངས་ཡོད་འདུག
རང་སྲེག་མ་གྱིས། །
ལ་རྒྱ་མ་བརླགས། །
གསོན་པོར་གནས་ནས། །
སྤྱི་དོན་འབུངས་ཤོག །
རང་སྲེག་སླར་ཡང་མེད་པར་ཐུགས་རྗེས་གཟིགས། །
འདས་པོ་ཁོང་དལ་རྟེན་མྱུར་དུ་ཐོབ་པའི་སྨོན་ལམ་ཞུ།