རྒྱ་ནག་གི་སྲིད་བློན་ལི་ཁེ་ཆང་ལ་བོད་དོན་འཐབ་རྩོད་པའི་ངོ་རྒོལ་སྐད་འབོད་ཀྱི་རྡུང་རྡེག་དྲག་པོ་ཕོག་པ།

གནས་ཚུལ་མཁོ་གཏོང་བ། བོད་རང་བཙན་སློབ་ཕྲུག་ཚོགས་པ།

དེ་རིང་རྒྱ་གར་གྱི་རྒྱལ་ས་ལྡི་ལི་རུ་ཞོགས་པའི་ཆུ་ཚོད་བཅུ་གཅིག་ཙམ་ལ་བོད་རང་བཙན་སློབ་ཕྲུག་ཚོགས་པའི་ལས་འགུལ་བ་གསུམ་གྱིས་རྒྱ་ནག་གི་སྲིད་བློན་ལེ་ཁེ་ཆང་རྒྱ་གར་ལ་གཞུང་འབྲེལ་གཟིགས་སྐོར་ཆེད་སླེབས་ཡོད་པར་ངོ་རྒོལ་སྐད་འབོད་བྱས་ཡོད་པ་རེད། དེ་རིང་ལས་འགུལ་དེ་ཉིན་འགའི་རིང་སྲིད་བློན་ཁོང་རྒྱ་གར་ལ་གཞུང་འབྲེལ་གཟིགས་སྐོར་སྐབས་སྡོད་སའི་་ཏཇ་མགྲོན་ཁང་གི་(Taj Palace་Hotel)གི་ཉེ་འགྲམ་མི་ཊར་བརྒྱ་ལྷག་ཙམ་ཞིག་ནས་སྤེལ་ཡོད་པ་དང་། ངོ་རྒོལ་སྐད་འབོད་ཀྱི་ལས་འགུལ་འདིའི་ཐོག་མཉམ་ཞུགས་གནང་མཁན་བཀྲ་ཤིས་ལགས་ནས་རྒྱ་དམར་བོད་ནས་ཕར་རྒྱུགས་ཤིག རྒྱ་ནག་རྒྱ་གར་ནས་ཕར་རྒྱུགས་ཤིག ལེ་ཁེ་ཆང་། བོད་ལ་རང་དབང་མྱུར་དུ་ཐོབ་ཀྱི་རེད་ཅེས་འབོད་ཚིག་བྲིས་ཡོད་པའི་ཕིཊི་ཉི་ཤུ་ཅན་གྱི་འཕྲེད་དར་རིང་པོ་ཞིག་བཏོན་ནས་བོད་རང་བཙན།བོད་མིའི་རང་དབང་ནི་རྒྱ་གར་གྱི་བདེ་འཇགས་ཡིན་ཞེས་འབོད་ཚིག་ཤུགས་ཆེན་བསྒྲགས་ཡོད་པ་རེད། ད་ལྟ་ལས་འགུལ་སྤེལ་མཁན་ཕལ་ཆེ་བ་ཞིག་རྒྱ་གར་ཉེན་རྟོག་པའི་འཇུ་བཟུང་བྱས་ནས་ཉེ་འགྲམ་གྱི་ས་གནས་བཙོན་ཁང་ཞིག་གི་ནང་བཀག་ཉར་བྱས་ཡོད།

རྒྱ་གར་རྒྱལ་ཡོངས་བོད་རང་བཙན་སློབ་ཕྲུག་ཚོགས་པའི་གཞི་རིམ་འབྲེལ་མཐུད་པ་བསྟན་འཛིན་ཚེ་ལྷ་ལགས་ནས་“ང་ཚོ་དེ་རིང་འདིར་ཡོང་ནས་ལས་འགུལ་སྤེལ་ཡག་དེ་རྒྱ་ནག་གི་སྲིད་བློན་ལེ་ཁེ་ཆང་ལ་བོད་ནང་གི་ད་ལྟའི་དངོས་ཡོད་གནས་སྟངས་དང་དཀའ་ངལ་རྣམས་ཁོ་སྲིད་བློན་ཞིག་ཡིན་པའི་ཆ་ནས་ནག་ཉེས་ཡོད་ཙང་ཁོ་ལ་གདོང་ལེན་དང་ངོ་ཚ་ཕབ་པའི་ཆེད་དུ་ཡིན་ཞིང་། རྒྱ་ནག་གི་དྲང་བདེན་མ་ཡིན་པའི་སྲིད་བྱུས་ཀྱི་འོག་ཏུ་ད་བར་དུ་བོད་མི་༡༡༧ གྱིས་རང་ལུས་མཆོད་མེ་རུ་ཕུལ་བའི་གནས་ཚུལ་བྱུང་ཡོད་པས་རྒྱ་ནག་གི་ངོས་ནས་གདུག་རྩུབ་ཅན་གྱི་སྲིད་བྱུས་དེ་མཚམས་འཇོག་བྱེད་དགོས་པའི་བརྡ་ལན་གསལ་བོ་ཞིག་སྤྲད་རྒྱུའི་ཆེད་དུ་ཡིན་”ཞེས་བརྗོད་སོང་། “གལ་ཏེ་རྒྱ་གར་གྱི་ཆེས་མཐོའི་འགོ་འཁྲིད་ཚོ་སོ་སོའི་རྒྱལ་ཁབ་ལ་ཞི་བདེ་དང་བདེ་འཇགས་སྲ་བརྟན་ཡོང་བའི་རེ་འདུན་བཅངས་ཡོད་ཚེ་སྲིད་བློན་ལི་དང་མཉམ་དུ་བོད་ཀྱི་གནད་དོན་ཐད་གྲོས་བསྡུར་ངེས་པར་དུ་བྱེད་དགོས་པ་དང་།རྒྱ་ནག་གིས་ཁྲིམས་འགལ་ཐོག་བོད་བཙན་འཛུལ་བྱས་པའི་ཆབ་སྲིད་ཀྱི་དཀའ་རྙོག་དེ་སེལ་ཐུབ་པ་ཡིན་ན་རྒྱ་དཀར་ནག་གཉིས་ཀྱི་ས་མཚམས་ཀྱི་རྙོག་དྲ་དེ་རང་བཞིན་གྱི་མེད་པ་ཆགས་ཀྱི་རེད། རྒྱ་གར་གཞུང་ཕྱོགས་ངོས་ནས་ངེས་པར་དུ་རྒྱལ་ཁབ་གཞན་དང་ལྷན་དུ་གྲོས་མོལ་གྱིས་བོད་ཀྱི་ཆུའི་ཐོན་ཁུངས་དེ་རྒྱ་ནག་རྒྱལ་ཁབ་གཅིག་པུའི་སྟངས་འཛིན་འོག་མ་ཚུད་པ་བྱེད་རྒྱུ་དེ་ཧ་ཅང་གལ་ཆེན་པོ་ཡིན་པ་རེད།”

དེ་རིང་གི་ལས་འགུལ་དེ་མ་སྤེལ་གོང་གི་ཉིན་གཅིག་གི་སྡ་རོལ་དུ་(Li Premier League)ཅེས་པའི་རྒྱ་ནག་གི་སྲིད་བློན་ཁོང་ལ་འཕྱ་སྨོད་དང་ཟུར་ཟའི་རྣམ་པ་གསལ་པོ་མཚོན་ཐུབ་པའི་བརྙན་པར་ཐུང་ངུ་ཞིག་རྒྱལ་སྤྱིའི་བརྙན་པར་དྲ་གནས་་ཡོ་ཀྲོ་བྷི་དང་། རྒྱ་ནག་གི་བརྙན་པར་དྲ་གནས་ཁྱབ་ཆེ་ཤོས་ཡོ་ཁཱོ་གཉིས་ཀྱི་ནང་ཁྱབ་སྤེལ་བྱས་ཡོད་པ་དང་བརྙན་པར་ཐུང་ངུ་འདི་ནི་དེང་སང་རྒྱ་གར་ན་གྲགས་ཆེ་བའི་དབྱུག་རྕེད་རྩེད་མོའི་མཐུན་ཚོགས་( T20 Indian Premier League)ཀྱི་སྔོན་འགྲོའི་གླུ་དབྱངས་(Dil Jumpin Zapak)ཞེས་པ་དེ་ལས་དབྱངས་རྟ་ཚུར་བླངས་ནས་བེད་སྤྱོད་པ་ཞིག་ཡིན་འདུག བརྙན་པར་ཐུང་ངུ་འདིའི་ནང་སྲིད་བློན་ལི་ཁེ་ཆང་གིས་སོ་སོ་རང་ཉིད་ཉེ་ལམ་རྒྱ་གར་གྱི་ས་མཚམས་ནང་རྒྱ་ནག་དམག་མི་ཆོག་མཆན་མེད་པར་སིམ་འཛུལ་བྱས་པར་འཕྱ་སྨོད་དང་གནོང་འགྱོད་བྱེད་པའི་རྣམ་པ་ཟུར་གཅིག་་བསྟན་ཡོད་ལ། པེ་ཅིན་གཞུང་གིས་བོད་མི་ཚོའི་འགྲོ་བ་མིའི་གཞི་རྩའི་རང་དབང་འཕྲོག་ནས་རྟག་ཏུ་གཉའ་གནོན་བྱེད་བཞིན་པའི་རྣམ་པ་གསལ་བོ་བསྟན་ནས་བོད་དོན་རྒྱབ་སྐྱོར་བ་དང་བོད་མི་གང་མང་ཞིག་གིས་སྲིད་བློན་ཁོ་ལ་ངོ་རྒོལ་སྐད་འབོད་སོགས་ཀྱི་རྡུང་རྡེག་དྲག་པོ་ཕོག་པའི་གནས་སྟངས་མཚོན་ཐུབ་པ་བྱས་ཡོད།
བརྙན་པར་གྱི་འབྲེལ་ཐག http://bit.ly/113iYsf]

རྒྱ་གར་རྒྱལ་ཡོངས་བོད་རང་བཙན་སློབ་ཕྲུག་ཚོགས་པའི་འགན་འཛིན་རྡོ་རྗེ་ཚེ་བརྟན་ལགས་ནས་“རྒྱ་ནག་གིས་བོད་ལ་དབང་བསྒྱུར་བྱས་པ་ནི་རང་དབང་དང་འགྲོ་བ་མིའི་ཐོབ་ཐང་གི་ཆེད་དུ་བོད་དོན་འཐབ་རྩོད་བྱེད་བཞིན་པའི་བོད་མི་ས་ཡ་དྲུག་ཙམ་གྱི་གནད་དོན་ཙམ་ཞིག་མ་ཡིན་པར་རྒྱ་གར་གྱི་མངའ་ཁོངས་བདེ་འཇགས་ཀྱི་གནད་དོན་ཞིག་ཀྱང་ཡིན་ཞིང་ཉེ་སྔོན་རྒྱ་ནག་གི་དམག་མི་གང་མང་ཞིག་རྒྱ་གར་གྱི་མངའ་ཁོངས་ཡིན་པའི་ལ་དྭགས་ཤར་ཕྱོགས་ཁུལ་ལ་སིམ་འཛུལ་བྱས་པ་དེས་དམར་པོའི་སྲིད་གཞུང་གི་བཙན་རྒྱལ་རིང་ལུགས་པའི་འཆར་བཀོད་ཞིག་ཀྱང་གསལ་སྟོན་བྱས་ཡོད་”ཞེས་བརྗོད་སོང་། “ད་ལྟའི་བོད་ནང་གི་ཛ་དྲག་གནས་སྟངས་འདི་ཡིས་བོད་རྒྱའི་དཀའ་རྙོག་སེལ་ཐབས་ལ་རེ་བ་ནན་པོ་བཅངས་ཀྱི་ཡོད་ཅིང་ང་ཚོ་བོད་རིགས་དང་རྒྱ་གར་ཡུལ་མི་སྤུན་ཟླ་རྣམས་ཀྱིས་མཐུན་སྒྲིལ་གྱི་ལག་ཟུང་གཅིག་ཏུ་བསྒྲིལ་ནས་རྒྱ་ནག་གི་གདུག་རྩུབ་སྲིད་དབང་ལ་གདོང་ལེན་བྱ་རྒྱུ་གོམ་པ་མཉམ་སྤོས་དང་རྒྱ་གར་གཞུང་ཕྱོགས་ངོས་ནས་ཀྱང་ད་ལྟའི་སྐབས་བབས་ཀྱི་རྒྱ་དཀར་ནག་གཉིས་ཀྱི་གྲོས་མོལ་སྟེང་དུ་བོད་ཀྱི་གནད་དོན་འདི་གཙིགས་ཆེན་དུ་བཟུང་ནས་རྒྱ་ནག་གི་སྲིད་བློན་གསར་པ་དང་ལྷན་དུ་བོད་དོན་བགྲོ་གླེང་ལྷུག་པོ་བྱེད་པའི་་རེ་བ་བཅངས་བཞིན་ཡོད།”་ཅེས་མུ་མཐུད་ནས་བརྗོད་བྱུང་།

ད་ལན་(Change.org)ཞེས་པའི་དྲ་ལམ་འདིའི་ཐོག་མཚན་རྟགས་བསྡུ་རུབ་ཀྱི་ལས་འགུལ་ཞིག་སྤེལ་ཡོད་པ་དང་། འདི་ནི་རྒྱ་གར་ཀྱི་སྲིད་བློན་མཆོག་ལ་ཉེ་སྔོན་རྒྱ་ནག་གིས་རྒྱ་གར་གྱི་མངའ་ཁོངས་ས་ཆ་གང་མང་ཞིག་ལ་སིམ་འཛུལ་བྱས་ཡོད་པའི་གནས་ཚུལ་འདིར་དགག་བྱ་ཤུགས་ཆེར་གནང་རྒྱུ་དང་རྒྱ་གར་གྱི་ཕྱི་འབྲེལ་སྲིད་བྱུས་ལ་བསམ་ཚུལ་བསྐྱར་གནོན་ཐོག་རྒྱ་དཀར་ནག་གཉིས་ཀྱི་གྲོས་མོལ་ཚོགས་འདུ་གང་འདྲ་ཞིག་ཡིན་ཡང་བོད་ཀྱི་གནད་དོན་ལ་གཙིགས་ཆེན་འཛིན་རྒྱུའི་དྲ་ལམ་གྱི་མཚན་རྟགས་བསྡུ་རུབ་ལས་འགུལ་ལ་མི་མང་ ༥༠༠ ལྷག་ཙམ་གྱི་རྒྱབ་སྐྱོར་ཐོབ་ཡོད་པ་རེད།

དྲ་ལམ་གྱི་མཚན་རྟགས་བསྡུ་རུབ་འབྲེལ་ཐག http://chn.ge/YGx949

དེ་རིང་གི་ལས་འགུལ་ལ་བརྙན་པར་གྱི་ལམ་ནས་གཟིགས་འདོད་ཚེ། རྒྱ་གར་དུས་བབ་ཀྱི་དྲ་ངོས་འདི་ལ་གཟིགས། http://timesofindia.indiatimes.com/videos/news/Li-Keqiangs-visit-Exiled-Tibetans-protest-in-Delhi/videoshow/20148513.cms

20/05/2013