ད་ལྟ་བོད་མིའི་དམིགས་བསལ་ཚོགས་ཆེན་ཐེངས་༢ པ་ཚོགས་བཞིན་པ་རེད། ཚོགས་ཞུགས་པ་རྣམས་ཀྱིས་ ༡ བོད་མིའི་སྤྱི་ཚོགས་ནང་ལས་འགུལ་སྤེལ་ཕྱོགས། ༢ རྒྱལ་སྤྱིའི་ནང་ལས་འགུལ་སྤེལ་ཕྱོགས། ༣ རྒྱ་གར་དང་ལྷོ་ཤར་ཨེ་ཤའི་ཡའི་ནང་ལས་འགུལ་སྤེལ་ཕྱོགས་བཅས་གྲོས་གཞི་གསུམ་ལ་གཏན་འཁེལ་ནས་བགྲོ་གླེང་ཚ་ཚ་འུར་འུར་བྱེད་ཀྱི་འདུག་ཟེར།
ཚ་ཚ་འུར་འུར་བགྲོ་གླེང་བྱེད་པ་ལེགས་མོད་ཀྱང་དོན་ཚན་དེ་གསུམ་ལས་ཀྱང་ཆེས་གལ་ཆེ་བའི་དོན་ཚན་གཅིག་ལུས་འདུག་པ་དེ་རྒྱུ་མཚན་ཅིའི་ཕྱིར་ལུས་པ་ནི་བསམ་ཡིད་ལ་འཁོར་དཀའ་བ་ཞིག་རེད། དོན་ཚན་དེ་ནི་རྒྱ་ནག་ནང་དང་རྒྱ་མི་རིགས་ནང་ལས་འགུལ་སྤེལ་ཕྱོགས་དེ་བགྲོ་གླེང་གྲོས་གཞིའི་ནང་བཀོད་མེད་པ་དེ་རེད། དེ་བས་ཁོ་ཚོས་ཚ་ཚ་འུར་འུར་ག་ཚོད་ཀྱིས་བགྲོ་གླེང་བྱས་ནའང་་དེ་ནི་རྩ་བ་བཏང་ནས་ཡལ་ག་ལ་འཇུ་སྟངས་ཀྱི་ཚ་ཚ་འུར་འུར་ཞིག་ལས་མ་མཆིས
གོང་གི་ལས་འགུལ་སྤེལ་ཕྱོགས་ཚང་མའི་མཐའ་གཏུགས་སའི་དམིགས་འབེན་ནི་རྒྱ་ནག་མ་ཡིན་ནམ། མེ་བསྲེག་གཏོང་མཁན་ཚང་མ་བོད་ནང་ན་ཡོད་པ་རེད། མེ་བསྲེག་གཏོང་དགོས་དོན་རྒྱ་མིའི་སྲིད་བྱུས་ལ་ཐུག་པ་རེད། ལས་འགུལ་ག་རེ་སྤེལ་ན་འབེན་འདྲ་བོ་དེ་རྒྱ་ནག་རེད། རྒྱལ་སྤྱིའི་སྟེང་ལས་འགུལ་སྤེལ་བ་དེའང་རྒྱ་ནག་ལ་གནོན་ཤུགས་སྤྲོད་པའི་ཆེད་མ་རེད་དམ། དེས་ན་ང་ཚོས་ཀྱང་རྒྱ་ནག་དམིགས་འབེན་དུ་བཟུང་ནས་ཐད་ཀར་རྒྱ་ནག་མི་མང་ནང་ལས་འགུལ་འདྲ་མིན་སྤེལ་རྒྱུ་དེ་ནི་ཆེས་གལ་ཆེ་ཤོས་སུ་འཛིན་དགོས་པར་མཐོང་བས་གོང་གསུམ་དོན་ཚན་གསུམ་སྐོར་ཅང་ཞུ་རྒྱུ་མིན་པར་རྒྱ་ནག་ནང་ལས་འགུལ་སྤེལ་ཕྱོགས་ལ་ཚིག་རེ་ཟུང་ཞུ་འདོད་བྱུང་།
འགའ་རེས་བསམ་ན། རང་ཉིད་ཕྱི་རུ་བསྡད་ནས་རྒྱ་ནག་ནང་ལ་ལས་འགུལ་ཇི་ལྟར་སྤེལ་དགོས་པ་རེད་བསམ་སྲིད་ཀྱང་དེ་ནི་ཁྱེད་རང་ནོར་བ་རེད། ད་ལྟ་དེང་རབས་ཀྱི་འཕྲུལ་ཐབས་གསར་པ་ལ་བརྟེན་པར་བྱས་ན་ཁྱེད་རང་སྐད་ཅིག་རིང་རྒྱ་ནག་གི་ནང་དུ་སྐྱེལ་ངེས་རེད། རྒྱ་གཞུང་གི་ལས་ཁུངས་གང་ལའང་ཁྱེད་རང་འཛུལ་ཐུབ་པ་རེད། མཐོ་དབུས་གཞུང་ནས་ཞིང་ཆེན། ས་ཁུལ་ནས་རྫོང་གང་དུའང་སོང་ནས་ཁོ་ཚོའི་ལས་ཁུངས་ཀྱི་སྒོ་རྡུང་ཆོག་གི་རེད་ལ་སྒོ་ལ་རྡོག་རྒྱག་གཞུ་དགོས་ན་རྡོག་རྒྱག་གཞུས་ནས་ཁོ་ཚོ་སུན་པོ་བཟོ་ཆོག་གི་རེད། ཡང་གུས་ཞབས་དང་བཅས་སྐད་ཆ་འཇམ་པོའང་བཤད་ཆོག་གི་རེད།
ཁྱེད་རང་གིས་རང་ལ་ཡོད་པའི་དྲ་རྒྱ། ཁ་པར། ཡིག་འབྲེལ། ཨི་མེལ་སོགས་བརྒྱུད་ལམ་དེ་དག་བེད་སྤྱོད་བཏང་ནས་རྒྱ་ནག་ཏུ་རྒྱུག་ཆོག་གི་རེད། ཁྱེད་རང་གང་ལ་རྒྱུག་གི་ཡིན། རྒྱལ་སྲིད་སྤྱི་ཁྱབ་ཁང་ལ་རྒྱུག་གི་ཡིན་ནམ་འཐབ་ཕྱོགས་གཅིག་གྱུར་ཁང་ལ་རྒྱུག་གི་ཡིན། ཡང་ན་མི་མང་ཚོགས་ཁང་ནང་ལ་རྒྱུག་གི་ཡིན། མིན་ན་སྤྱི་བདེ་ལས་ཁུངས་ནང་ལ་རྒྱུག་གི་ཡིན། དེ་མིན་ན་ཞིང་ཆེན་དང་ས་གནས་སྲིད་གཞུང་གི་ལས་ཁུངས་གང་གི་ནང་རྒྱུག་གི་ཡིན། ཁྱེད་རང་དེ་ལ་སླེབས་ཐུབ་ཀྱི་རེད་ལ་སེམས་ནང་གི་བཤད་འདོད་པའི་སྐད་ཆ་ཚང་མ་བཤད་ས་ཞིག་རྙེད་ཀྱི་རེད།
བོད་ནང་དུ་དོན་དག་ཅིག་བྱུང་མ་ཐག་ཏུ། ཕྱི་ལོགས་ནས་བོད་མི་སྟོང་ཕྲག་མང་པོས་ཁ་པར་དང་ཡིག་ལམ་སོགས་བརྒྱུད་ལམ་འདྲ་མིན་བརྒྱུད་ནས་རྒྱ་གཞུང་གི་འབྲེལ་ཡོད་ལས་ཁུངས་ཁག་ལ་དྲི་བ་འདྲ་མིན་བཏོན་པ་ཡིན་ན་དེ་ནི་ལས་འགུལ་ཆུང་ཆུང་ཞིག་ཡིན་རྒྱུ་མ་རེད་འདོད། བོད་ནང་དོན་དག་གང་ཞིག་བྱུང་སྐབས། ང་ཚོས་རྒྱ་ནག་ནང་ལ་སྦྲག་ཡིག་དམར་པོ་ཆར་དུ་འབེབས་ཆོག་གི་རེད། ང་ཚོས་རྒྱ་ནག་གི་ཁ་པར་སྐུད་ལམ་དག་ཚ་བོ་བཟོ་ཆོག་གི་རེད། དབུས་གཞུང་གི་དཔོན་པོ་དག་གི་ཨམ་ཅོག་ཚ་བོ་བཟོ་ཆོག་གི་རེད།
དེ་ཡིན་ནའང་ང་ཚོ་ལ་ཆ་རྐྱེན་སྐྲུན་མཁན་གཅིག་དགོས་པ་ནི། ཕར་ཕྱོགས་སུ་འབྲེལ་ཡོད་དང་གནད་ཡོད་ལས་ཁུངས་ཁག་གི་ཁ་བྱང་དང་ཁ་པར་ཨང་གྲངས་སོགས་དུས་དང་དུས་སུ་མི་མང་ལ་མཁོ་སྤྲོད་ཞུ་མཁན་ཞིག་དགོས་པ་དེ་རེད། དེ་ནི་བོད་གཞུང་ངམ་ཚོགས་པ་བྱེ་བྲག་པ་ཞིག་ནས་ཕྱོགས་བསྒྲིགས་ཀྱིས་མི་མང་ལ་མཁོ་འདོན་བྱེད་ཐུབ་ཀྱི་མ་རེད་དམ། གཞན་ཡང་ལས་འགུལ་སྤེལ་ཐབས་འདྲ་མི་འདྲ་ཡོད་རྒྱུ་རེད། ངས་འདིར་རང་གི་བསམ་ཚུལ་བཀོད་པ་ནི་རྣམ་པ་ཚོའི་དགོངས་ཚུལ་རྩ་ཆེན་རྣམས་འདྲེན་པའི་ཆེད་དུ་ཡིན། ད་བར་དུ། ང་ཚོའི་ནམ་རྒྱུན་ལས་འགུལ་སྤེལ་བའི་ནང་ཆད་སྐྱོན་ཞིག་ཡོད་པ་ནི་རྒྱ་ནག་ཐད་ཀར་དམིགས་འབེན་དུ་བཟུང་ནས་ལས་འགུལ་སྤེལ་གྱི་མེད་པ་དེ་རེད་ལ། དེ་ནི་ད་རེས་དམིགས་བསལ་ཚོགས་ཆེན་གྱི་གྲོས་གཞི་ནང་དུའང་སྔར་བཞིན་ཆད་སྐྱོན་བྱུང་འདུག་པས་ད་རེས་དམིགས་བཀར་རྒྱ་ནག་ནང་ལས་འགུལ་སྤེལ་ཕྱོགས་ལ་ཚིག་འགས་གླེང་སློང་བ་ཙམ་ཡིན།
སྐུ་ཞབས་མདའ་ཚན་པའི་དགོངས་འཆར་ཡག་པོ་འདུག
སེམས་ཚོར་རྣོན་པོའི་བསམ་ཚུལ་བཏོན་ན་དགའ་བསུ་ལོས་ཞུ།
དམིགས་བསལ་ཚོགས་ཆེན་གྱིས་དོན་ཚན་གསུམ་གྱི་ཐོག་ཚ་ཚ་འུར་འུར་གནང་བཞིན་ཡོད་ན། དམིགས་བསལ་དྲ་གྲོགས་ཚོས་དོན་ཚན་བཞི་པའི་ཐོག་ཚ་ཚ་འུར་འུར་གྱིས་དང་། ཚོགས་པ་དང་མ་ཚོགས་པའི་ཕྱི་ནང་གི་བོད་མི་གང་ན་སུ་ཡོད་རྣམས་ཀྱིས་ལག་འགུལ་སྤེལ་ཕྱོགས་ཐད་ལ་རྐང་འཛིན་ཏེ་རྩལ་བཏོན།
དེང་སང་རྒྱ་གཞུང་གི་ཚོགས་རྭ་ལ་ཆབ་སྲིད་ཀྱི་ཐལ་རྡུལ་ལངས་བཞིན་པའི་སྒང་ཡིན་པ་དེ་ཤེས་ན་མི་རིང་བར་རྒྱ་གཞུང་གི་ནམ་མཁའ་ལ་སྤྲིན་ནག་འཐིབས་ངེས་ཡིན་ཙང་ང་ཚོའི་གཞིས་ལུས་མི་མང་གི་མྱོང་བཞིན་པའི་སྐད་ཅིག་ཙམ་ལའང་བཟོད་བརླག་བྲལ་བའི་ཚ་གདུང་གི་སྡུག་བསྔལ་འདི་དག་མྱུལ་དུ་མཇུག་བསྡུ་གྲབས་ཡོད་པའི་སྔ་བལྟས་ཡིན་པ་མ་ཟད།བདེན་པའི་ནམ་མཁའ་འང་མགྱོགས་པོ་གསལ་པའི་གྲོགས་རྐྱེན་རེད།
ང་ཚོས་གྲ་སྒྲིག་བྱེད་དགོས་པ་དེ་མུན་ནག་གི་ནམ་མཁའ་གསལ་རྒྱུ་ཙམ་མ་ཡིན་པར་ནམ་མཁའ་གསལ་རྗེས་ཀྱི་འཛུགས་བསྐྲུན་ལས་ཀ་ཇི་ལྟར་བྱ་རྒྱུ་དེ་རེད། གལ་ཆེན་ནང་གི་དོན་ཆེན་པོ་དོན་དག་འདི་ཡིན། དོན་འདི་ལ་གནད་དུ་འཛིན་རྒྱུ་དེ་ད་རེས་གི་ཚོགས་ཆེན་འཚོགས་དགོས་པའི་གོས་དམིགས་མཐོ་གྲས་སུ་འཇོག་ཐུབ་དགོས། རྒྱ་བཤད་སྟོང་བཤད་ག་ཚད་བཤད་ཀྱང་ས་རུབ་ན་གྲ་སྒྲིག་ཡོད་པ་ཅིག་དང་ནམ་ལངས་ན་གྲ་སྒྲིག་ཡོད་པ་ཅིག་དགོས་གི་རེད།
མདའ་བཙན་པ་ལགས་ཀྱིས་རྒྱ་ནག་ནང་ལས་འགུལ་སྤེལ་ཕྱོགས་ཀྱི་བསམ་འཆར་འགའ་བཏོན་ཡོད་པར་རྒྱབ་སྐྱོར་ཡོད། ཡིན་ནའང་དམིགས་བསལ་ཚོགས་ཆེན་སྟེང་རྒྱ་ནག་ནང་ལས་འགུལ་སྤེལ་ཕྱོགས་མེད་ཚུལ་གྱི་ཟུར་ཟའམ། སྐྱོན་བརྗོད་ཅིག་དྲུད་ཡོད་པ་དེར་མོས་མཐུན་མེད། ལྷོ་ཤར་ཨེ་ཡ་ཡའི་ནང་དུ་རྒྱ་ནག་ཚུད་གི་མ་རེད་དམ།
དགོངས་ཚུལ་ཡག་པོ་འདུག་དེ་འདྲ་བཤད་རོག་གནང།་་་་་་་་་་་་་་་་ཐུགས་རྗེ་ཆེ།
ལྷོ་ཤར་ཨེ་ཤ་ཡའི་ནང་རྒྱ་ནག་དང་འཇའ་པན། ཀོ་རི་ཡ་སོགས་ཚུད་གི་མ་རེད། དེ་ཚོ་ཨེ་ཤ་ཡ་ཤར་མའི་ཁོངས་རེད།
མདའ་ཚན་པས་རྣམ་དཔྱོད་ལྡན་པའི་དགོང་འཆར་ལ་རྒྱབ་སྐྱོར་ཡོད། ང་ཚོའི་དུས་ནས་དུས་སུ་བོད་ནང་གི་ཛ་དྲག་གི་གནས་བབ་དང་དངོས་ཡོད་དཀའ་སྡུག་རྣམས་རྒྱ་མི་རིགས་མང་ཤོས་ཀྱིས་མི་ཤེས་པས་དེ་དག་ལ་དེང་དུས་ཀྱིས་བརྒྱུད་ལམ་འདྲ་མིན་ཁག་ནས་འབྲེལ་བཤད་ཚུལ་མཐུན་རྒྱབ་སྟེ་གཟུ་བོར་གནས་པའི་རྒྱ་མི་རིགས་རྣམས་གྲོགས་སུ་བཀུག་སྟེ་བོད་མིའི་བདེན་རྒྱབ་འཚོལ་དགོས། ལོ་མང་སྔོན་ནས་༧ གོང་ས་ ༧ མཆོག་གིས་རྒྱ་མི་རིགས་རྣམས་དང་འབྲེལ་ལམ་ཤུགས་ཆེར་གནང་འགོ་བཙུགས་པ་འདིའི་གྲུབ་འབྲས་ཀྱང་བརླབས་ཆེན་ཐོན་ཡོད་ལ་ད་དུང་འདིའི་སྟེང་ལས་འགུལ་སྔར་ལྷག་སྤེལ་ཐུབ་ན་དགེ་མཚན་ཆེ་ངེས་མཐོང་། །
འདི་འདྲའི་ཁ་ཚ་དགོས་གཏུགས་ཀྱི་དགོངས་འཆར་གནང་བ་ཕན་ཐོགས་ཆེན་པོ་འདུག།རྩོམ་ཡིག་འདི་འདྲ་ཁ་བརྡ་གཅིག་པོ་མ་ཡིན་པར།གཞན་བོད་ཀྱི་དུས་བབས་་དང་བང་ཆེན་སོགས་ཚགས་པར་ཐོག་བཀོད་ན།གློག་ཀླད་ཡོད་མེད་གཉིས་ཀྱི་བལྟ་ཐུབ་པས་དེ་བས་ཕན།