-ཐེ་བོ་སངས་རྒྱས།
གནའ་བོའི་རྒྱ་ནག་གི་གཏམ་དཔེ་དང་། དཔེ་ཆོས། གདམས་ངག སྙན་ཚིག་གྲགས་ཅན། ཡུལ་སྐད། རྒྱུན་སྤྱོད་ཐ་སྙད་སོགས་ཀྱིས་ཕྱུག་པའི་རྒྱ་བོད་ཤན་སྦྱར་ཚིག་མཛོད་གཞིར་བཟུང་སྟེ། རྒྱ་བོད་ཚིག་མཛོད་ཅེས་པའི་མཉེན་ཆས་ཤིག་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་དང་། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པ་གཉིས་མཉམ་འབྲེལ་གྱིས་ན་ནིང་འགྲེམ་སྤེལ་བྱས། དེའི་ནང་ཡི་གེ་མང་པོ་གཏགས་ནོར་ཤོར་བའི་ཐད་སྤྱི་ཚོགས་ཁྲོད་ལབ་གླེང་དང་། ཐ་ན་སྐྱོན་བརྗོད་རྩོམ་ཡིག་སྤེལ་མཁན་ཡང་བྱུང་ཡོད། བདེན་པ་བདེན་ཐུབ་ཀྱིས་ཉེས་པ་ཐེར་འདོན་ནི་བྱ་གཞག་གང་གི་རིགས་ལའང་དགེ་ཕན་ཆེ་ཞིང་། ལྷག་པར་དུ་ཚིག་མཛོད་ཅིག་ལ་ཆ་བཞག་ན་མིང་ཚིག་སོགས་མ་ཤེས་པའམ་ཐེ་ཚོམ་ཟ་དུས་བལྟ་ས་ཉན་དགོས་ཕྱིར་དེ་བས་ཀྱང་ངོ་། སྐྱོན་བརྗོད་ཁག་ཅིག་ནི་མགོ་མ་ཚོས་པ་ཡང་འདུག དཔེར་ན། བོད་ཡིག་གིས་རྒྱ་ཡིག་འཚོལ་ཐུབ་ཀྱི་མི་འདུག་ཟེར་བ་ལྟ་བུ་རེད།
སྤྱིར་བྱ་བ་གང་ཡིན་ཡང་སྒྲུབ་དཀའ་བ་ནང་བཞིན་ཟུར་ནས་སྐྱོན་མཐོང་དཀའ་བ་མིན་པ་ཀུན་གྱིས་ཤེས་དགོས། ཁ་སང་ཁེ་ཉིན་རྒྱ་བོད་ཚིག་མཛོད་ཐོན་རིམ་གཉིས་པ་གསར་སྣོན་Update བྱ་རྒྱུ་དྲ་ཐོག་ཏུ་བཏང་ཟིན་པས་མཁོ་མཁན་ཚོས་གཟིགས་ཐུབ། སྔ་ལོའི་ཕྱི་ཟླ་དགུ་པ་ནས་བློ་བཟང་སྦྱིན་པ་ལགས་དང་། ངེད་གཉིས་ཀྱིས་ཡི་གེ་རེ་རེ་བཞིན་འབྲུ་འདེད་ཀྱིས་ཞུ་དག་བཏང་བའི་ཁུལ་ཡིན།
ད་དུང་འདིར་ངེད་ཅག་གིས་མ་ཤེས་པ་དང་། ཤེས་བཞིན་མིག་འོག་ནས་ཤོར་བའི་སྐྱོན་ཆ་ཅི་རིགས་ཡོད་ངེས་པས་མཁྱེན་ལྡན་དག་ཡོ་བསྲང་མཛུབ་སྟོན་གནང་བར་ནན་གྱིས་ཞུ། ཕྲན་གྱིས་ཞུ་དག་སྐབས་བརྗེད་ཐོ་དུམ་ཚན་སྔ་ཕྱི་གཉིས་བཏབ་པའི་སྔ་མ་གློག་ཀླད་ནས་ཅི་ཞིག་མནན་ནོར་ཤོར་བས་བརླགས། དུམ་ཚན་ཕྱི་མ་ལས་ཇི་ལྟར་བཅོས་སྣོན་བྱས་པའི་དཔེ་མཚོན་འགའ་ཀློག་པ་པོ་རྣམས་ལ་སྤྱན་འབུལ་ཞུ།
1༽ བར་ཆད་གཅོད་པ། -བར་ཆད་ཟློག་པ་ལ་བཅོས་ཡོད།
གད་མོ་ཚལ་ཚལ། -གད་མོ་འཚེར་འཚེར་ལ་བཅོས།
མཐོང་མཆན། -ཐོང་མཆན་ལ་བཅོས།
དངུལ་ཐུམ་དམར་པོ།-ཤོག་ཆག་དམར་པོ་ལ་བཅོས།
གནམ་འཐིབས་ས་མུན།-གནམ་འཐིབས་ས་རུབ་ལ་བཅོས།
རྫུན་དང་ཨ་བྲའི་ཨ་མཆོག་ཐུང་།-རྫུན་དང་ཨ་བྲའི་རྔ་མ་ཐུང་ལ་བཅོས།
ཤེས་རྒྱ་མང་བ།-ཤེས་རྒྱ་ཡངས་པ་ལ་བཅོས།
དགའ་ནས་བློས་མི་ཆོག་པ།-དགའ་ནས་བློས་མི་ཐོང་བ་ལ་བཅོས།
ཤི་གསོན་ཅི་ཡོང་ཆ་མི་རྟོགས་པ།-ཤི་གསོན་ཅི་ཡོང་ཆ་མི་འཚལ་བ་ལ་བཅོས།
མངོན་སུམ་གསོན་རྗེན།- མངོན་སུམ་གསལ་རྗེན་ལ་བཅོས།
ཤིང་ཕྲུག་འཛུགས་པ།- སྡོང་ཕྲུག་འཛུགས་པ་ལ་བཅོས།
དགོད་གནས།- དགོད་བྲོ་བའི་ཡུལ་ལ་བཅོས།
2༽ ཚད་ཡོད་ཀུང་སི།-ཚད་ཡོད་སྤྱི་གཉེེར་ཁང་ལ་བརྗེས།
ཀྲུང་དབྱང་ལས་ཁུངས།-དབུས་གཞུང་ལས་ཁུངས་ལ་བརྗེས།
དམངས་གཙོའི་ཏང་ཤོག- དམངས་གཙོའི་ཤོག་ཁག་ལ་བརྗེས།
3༽ ཕྱི་ལོ།- སྤྱི་ལོ་དང་ནོར་ཉེན་ཆེ་བས་དེའི་ཚབ་ཏུ་ལོ་རྗེས་མ་བཞག
བཟའ་བ་བྱེད་པ།- བཟའ་ཟླ་སྒྲིག་པ་བརྗེས་པའི་ཐོག ཁྲུང་ས་བསྐྱོན་པ་བསྣན་ཡོད།
གོང་ཁོད་མ་ཟིན་འདི་བཞིན་རྒྱ་བོད་ཚིག་མཛོད་ཀྱི་ཡིན་སྟབས་ཀ་མད་གོ་རིམ་ལྟར་ཆགས་མེད་ལ། ཚིག་དོན་གཉིས་ཀ་རྦད་དེ་ནོར་བའི་རིགས་འདིར་ཚུད་མེད།
འདི་རུ་ཕྱོགས་ཙམ་ལས་ཞིབ་ཕྲ་ཚིག་མཛོད་རང་ལ་གསལ།
ཕབ་ལེན་དྲ་ཐག http://www.monlamit.com/node/253/
ཕྱི་ལོ་2017ཟླ་9ཚེས་3ཉིན།
ལགས་སོ།། ཡི་གེ་རེ་རེ་བཞིན་འབྲུ་འདེད་ཀྱིས་ཞུ་དག་བཏང་ཡོད་ན། སྔོན་མའི་ཡིག་ནོར་ཧ་ཅང་མང་པོ་ཅན་དེ་ལས་ལེགས་པ་ཡོད་ངེས། ཐུགས་རྗེ་ཆེ་ཞུ། དག་ཡིག་དང་ཚིག་མཛོད་ཀྱི་རིགས་ནི་ཡིག་ནོར་མེད་པ་ཞིག་དགོས་པ་རེད། དེ་འདྲ་ཞིག་ཡིན་པར་སྙིང་ནས་སྨོན་པ་ཡིན།
ད་མགོ་ཚོས་མ་སོང་བོད་པའི་སྤྱི་ཚོགས་འདི་ག་འདྲ་ཡིན་ནམ་?
བལ་ཚོང་སྒྲིག་འཛུགས་ནས་ལུ་ཐི་ཨ་ན་དང་ལྡི་ལི་ནས་རྒྱ་མིའི་ཅ་དངོས་ཉོ་ཚོང་མི་ཆོག་ཟེར་བ་དང་བོད་པའི་སྤྱི་ཚོགས་ནང་
རྒྱ་མིའི་བཟོས་པའི་ལག་ཁྱེར་སྐད་འཕྲིན་དང་ཁྱིམ་ཚང་སོ་སོའི་ནང་རྒྱ་མིའི་ཇ་དམ་དང་ཇ་དཀར་སོགས་བེད་སྤྱོད་བྱེད་བཞིན་པ་དང་མཐོ་རིམ་མི་སྣ་དང་མཁས་དབང་ཚོའི་རྒྱ་ཡིག་རྒྱ་སྐད་བེད་སྤྱོད་བྱེད་བཞིན་པ་དོན་དངོས་ཐོག་མི་མང་ཉམས་ཆུང་བལ་ཚོང་དང་ཞིང་ལས་བ་ཕྱུགས་གསོ་སྐྱོང་བྱེད་མཁན་དཔལ་འབྱོར་གྲལ་རིམ་གྱི་མཐའ་རུ་ཡོད་མཁན་ཚོར་གྱོང་གུན་སྤྲད་པ་མ་རེད་དམ་?