རྒྱ་རྒན་གྱི་སྐད་ཆ་འདིས་ང་ངོ་ཚ་རུ་བཅུག་བྱུང་།

སྣང་རྒྱལ་ཤེས་དགེ།
 

《རང་བཙན་གྱི་ལྟ་བ་འཁྱེར་མཁན་ཚོས་དབུ་མའི་ལམ་པ་ཚོ་ལ་སྙིང་སྟོབས་མི་འདུག་ཟེར་བ་དང་། དབུ་མའི་ལམ་པ་ཚོས་རང་བཙན་རྩོད་མཁན་ཚོས་རྒྱལ་བ་རིན་པོ་ཆེར་ངོ་ལོག་བྱས་པ་རེད་ཟེར་ནས་ནང་ཁུལ་མ་མཐུན་པ་བྱེད་མི་ཉན》

༢༠༡༤ཟླ་བ་༩ཚེས་༦ནིའུ་ཡོག་དང་ནིའུ་འཇར་སི་ས་གནས་བོད་རིགས་སྤྱི་མཐུན་ཚོགས་པས་གོ་སྒྲིག་འོག་བོད་མི་རྣམས་ལ་རྒྱ་རིགས་ཀྱི་སྤྱི་ཚོགས་ནང་བོད་ཀྱི་གནད་དོན་ལ་ལྟ་ཚུལ་ཅི་འདྲ་ཡོད་པའི་སྐོར་ལ་གཏམ་བཤད་ཀྱི་ལས་རིམ་ཞིག་བཀོད་སྒྲིག་བྱས་འདུག་ཅིང་། གཏམ་བཤད་གནང་མཁན་ལ་རྒྱ་རིགས་ཤེས་ཡོན་ཅན་འགའ་ཞིག་གདན་འདྲེན་ཞུས་འདུག
སྤྱིར་བཏང་བྱས་ན་བརྗོད་བྱ་བོད་མིའི་སྤྱི་ཚོགས་ནང་ཁུལ་གྱི་འགལ་ཟླའི་རིགས་མིན་ནའང་། རྒྱ་མི་ཤེས་ཡོན་ཅན་ཞིག་གིས་རྐང་བཙུག་ནས་བོད་མིའི་འགལ་ཟླའི་ཕྱོགས་ནས་གླེང་བ་འདི་ནི་བསམ་གཟིས་ནས་བོད་མི་ཚོར་མཚང་འབྱིན་བྱས་པ་ཞིག་རེད་ཅེས་བཤད་མི་ཐུབ་ནའང་ཉན་མཁན་བོད་པ་ཞིག་ཡིན་པས་ངོས་ནས་གདོང་པ་དམར་པོ་ཆགས་དགོས་པའི་གནས་སྟངས་ཤིག་ཅིས་ཀྱང་རེད་སྙམ།

ང་ཚོས་ཁ་གཏོད་དགོས་ས་དེ་རྒྱ་ནག་དམར་པོའི་སྲིད་གཞུང་དང་དམིགས་ཡུལ་འཛིན་དགོས་པ་ནི་གཞིས་བྱེས་མཉམ་འཛོམས་དང་རང་དབང་གི་དཔལ་ལ་ལོངས་སུ་སྤྱོད་རྒྱུ་དེ་ཡིན་པ་ལས་ཆབ་སྲིད་ཀྱི་ལྟ་བ་མི་འདྲ་བ་ཕན་ཚུལ་ལ་ངན་སྨོད་དང་མཐོང་ཆུང་བྱེད་རྒྱུ་དེ་མིན། འོན་ཀྱང་ད་ལྟའི་ཆར་ཚོགས་ཁག་འགའ་ཞིག་གིས་མདུང་རྩེ་ནང་ལ་གཏོད་པའི་གནས་ཚུལ་ཧ་ཅང་ཤུགས་ཆེན་པོར་གྱུར་འདུག་པར་བརྟེན་བོད་དོན་འཐབ་རྩོད་ཀྱི་བརྒྱུད་རིམ་ཁྲོད་བྱས་རྗེས་དང་དཀའ་ལས་གང་མང་རྒྱག་མྱོང་མཁན་གྱི་ཚོགས་སྡེ་འགའ་རེ་བོད་མིའི་སྤྱི་ཚོགས་ནས་འཕུད་རྒྱུའི་ཉེན་ཁར་ལྷུང་ཡོད།
ཕྱོགས་གཅིག་ནས་ཆབ་སྲིད་ཀྱི་ཚོགས་སྡེ་མང་ཆེ་བའི་སྣེ་ཁྲིད་པ་འགའ་རེ་མ་གཏོགས་བྱིངས་ན་གནས་པའི་ཚོགས་མི་མང་ཆེ་བ་རང་གིས་རྒྱབ་སྐྱོར་བྱེད་སའི་ཆབ་སྲིད་ཀྱི་ལམ་ཕྱོགས་དེའི་ངོ་བོ་ཤེས་ནས་ཚོགས་མིར་ཞུགས་པ་ཞིག་མ་ཡིན་པར་གང་ཟག་བྱེ་བྲག་པ་དང་ཁེ་སྤོགས་ཡན་གར་བ་ཞིག་ལ་དམིགས་ནས་རྨོངས་ཚོད་དང་ཆགས་ཞེན་གྱིས་དབང་གིས་ཞུགས་པ་ཡིན་པའི་རྐྱེན་གྱིས་གནས་སྟངས་འདི་འབྱུང་གིན་ཡོད་པ་རེད།

ནང་འཁྲུག་གི་གནས་སྟངས་འདི་རྣམ་པ་མི་གསལ་བ་ནས་གསལ་བ་དང་ལྐོག་གྱུར་ནས་མངོན་གྱུར་དུ་གནས་འཕོས་ཏེ་ད་ལྟའི་ཆར་ཕྱི་མི་རྒྱ་རྒན་ཚོས་ཀྱང་བསླབ་བྱ་རྒྱག་དགོས་པའི་ཚད་དུ་སླེབས་པ་འདིས། གཅིག་ནས་བོད་ཀྱི་ཆབ་སྲིད་པར་རློམས་པ་རྣམས་ལ་དོན་དངོས་ཐོག་ཆབ་སྲིད་ཀྱི་ཤེས་ཚད་དང་བློ་གཤོག་ཅི་ཙམ་ཡོད་མེད་གསལ་འདོན་བྱས་པ་དང་། གཉིས་ནས་བོད་ཀྱི་མ་འོངས་པ་འདི་བོད་མི་རང་ཉིད་ཀྱི་དངོས་ནས་ཐག་གཅོད་བྱེད་ཐུབ་མིན་གྱི་སྔོན་བརྡ་གསལ་པོ་ཞིག་མངོན་པ་རེད།

ང་ཚོས་རྒྱུན་དུ་ང་ཚོ་ནི་བཙན་བྱོལ་བ་འདྲ་འདྲའི་ནང་ནས་མི་འདྲ་བ་ཞིག་ཡིན་ཟེར་བའི་སྐད་ཆ་འདི་གསོབ་ཤུན་ལ་ཚོན་རྩི་བྱུག་པ་ལྟ་བུའི་ཆེས་སྙིང་པོས་དབེན་ཞིང་རང་མགོ་སྐོར་བའི་འུད་སྟོང་ཞིག་དང་། ལྟག་ཆུ་ཆད་པའི་རྫིང་བུ་དང་ཐན་པ་ཕོག་པའི་སྙེ་མ་བཞིན་དུ་སྲོག་རྒྱུན་ཐུང་ཞིང་རེ་ལྟོས་དབེན་པའི་སྐྱོ་གར་ཞིག་ཡི་པ་ཧ་གོ་དགོས་ཀྱིན་འདུག་སྟེ། མཐར་ཐུག་གི་ཕམ་ཁ་ཤེས་བཞིན་དུ་གནས་སྐབས་ཀྱི་རྒྱལ་ཁ་གཙོ་གནད་དུ་འཛིན་པ་དང་། རང་ཉིད་ཀྱི་ནོར་བ་ཤེས་བཞིན་དུ་ནོར་བ་ཁས་ལེན་པའི་བློ་སྟོབས་མེད་མཁན་ཁྱུ་གཅིག་གིས་སྤྱི་ཚོགས་འདིའི་བཞི་མདོ་མང་པོ་ཞིག་བཀག་ནས་འདུག་པས། དེ་དག་གི་རྗེས་འཇུག་རྨོངས་འཐོམ་པ་དག་ལ་བླངས་དོར་གྱི་ཤེས་རབ་སྤེལ་རྒྱུ་ནི་ཆེས་དཀའ་བ་ཞིག་དང་གང་ཟག་སྒེར་ལ་མཚོན་ན་ཆེས་ཉེན་ཁ་ཅན་ཞིག་ཡིན་པ་ནི་འདས་པའི་མངར་སྐྱུར་ཁ་གསུམ་གྱི་འཚོ་བ་སྐྱེལ་སྟངས་དེས་གསལ་བཤད་བྱས་ཡོད།

ངོ་ལ་ཚོར་བ་ཡོད་མཁན་ཞིག་ཡིན་པའི་ངོས་ནས་རྒྱ་རྒན་གྱི་སྐད་ཆ་འདིས་ངོ་གདོང་ཚ་བེར་བེར་ཞིག་དང་། སེམས་ལ་འདུ་ཤེས་ཡོད་མཁན་ཞིག་ཡིན་པའི་ངོས་ནས་རྒྱ་རྒན་གྱི་སྐད་ཆ་འདི་སེམས་རྩ་གྲང་ཤུར་ཤུར་ཞིག་ཏུ་མི་འགྱུར་བ་ག་ལ་སྲིད།

གང་ལྟར་བོང་བུའི་ནང་ཆ་ཕྱི་ལ་བཀྲམ་ཟིན་པའི་དེ་རིང་གི་ཉིན་མོར། ང་ཚོར་དགོས་པ་ནི་གཅིག་སྒྲིལ་དང་བསམ་ཤེས། སྤོབས་པ་དང་མིག་རྒྱང་བཅས་ཡིན་པས། ཆབ་སྲིད་ཀྱི་ལྟ་བ་འགལ་ཟླར་ལངས་པ་འདི་དམངས་གཙོའི་རྒྱན་དུ་འདོད་མཁན་ཚོས་ཅིས་ཀྱང་རྒྱན་ཆ་འདི་རྒྱན་ཆར་འགྲོ་བ་ཞིག་བྱས་ཏེ། མི་འགྱང་བར་སྡེ་ཁག་ཕན་ཚུན་འཆམ་མཐུན་དང་གུས་ཞབས་ཆེན་པོའི་ངང་གནས་ཐུབ་པ་དང་། དེང་ཕྱིན་ཆད་ཕྱི་མི་ཞིག་དང་ལྷག་པར་དུ་རྒྱ་མི་ཞིག་གི་བསླབ་བྱ་རྒྱག་མི་དགོས་པའི་གནས་སྟངས་བཟང་པོ་ཞིག་ཏུ་འགྱུར་བའི་རེ་འདུན་ཟབ་མོ་དང་བཅས་བྲིས།།