ཕྱི་ལོ་ ༢༠༡༢ ཟླ་༨ ཚེས་༢༥ ཉིན་གནས་ཚུལ་འབྱོར་གསལ་ལ། འདི་ལོའི་ཕྱི་ཟླ་༣ ཡས་མས་སུ་བལ་བོད་ས་མཚམས་འགྲམ་ནས་འཛིན་བཟུང་བྱས་ཤིང་གཞིས་ཀ་རྩེ་ནས་ཟླ་བ་༤ ལྷག་རིང་བཀག་ཉར་བྱས་པའི་ཨ་མདོ་རྔ་པའི་ཚོང་བ་ཨ་དཀར། རང་ལོ་༥༠ ཙམ་ཡིན་པ་ཁོང་དང་། དེ་མིན་ཀོང་པོ་ནས་ཡིན་པའི་ཚེ་རིང་རྡོ་རྗེ། རང་ལོ་༢༢ ། ཆབ་མདོ་དཔའ་ཤོད་ནས་ཡིན་པའི་དཀོན་མཆོག་ཆོས་འཕེལ། རང་ལོ་༢༧ ། འཇོ་མདའ་ནས་ཡིན་པའི་བསོད་ནམས་བདེ་མཚོ། རང་ལོ་༢༤ ། མགོ་ལོག་ནས་ཡིན་པའི་ཆོས་སྟོབས། རང་ལོ་༣༣ ཡིན་པ་བཅས་སྔ་ཕྱིར་ལྷ་རྩེ་དང་དིང་་རི་སོགས་ནས་རྒྱ་གཞུང་གི་ཉེན་རྟོག་པས་འཛིན་བཟུང་བྱས་ཤིང་ཡུན་རིང་གཞིས་ཀ་རྩེ་ནས་བཀག་ཉར་བྱས་མཐར། འདི་ཟླའི་ཚེས་༢༣ ཉིན་ཁོང་རྣམས་བལ་བོད་ས་མཚམས་འགྲམ་གྱི་ཟམ་པ་བརྒྱུད་བལ་ཡུལ་ཉེན་རྟོག་པར་བརྩིས་སྤྲོད་བྱས་ཡོད་འདུག་ལ། ཕྱི་ཚེས་༢༤ ཉིན་བལ་ཡུལ་རྒྱལ་ས་ཀ་ཏི་མེན་ཀྲོས་ཀྱི་ཕྱི་མི་ཞིབ་བཤེར་ལས་ཁུངས་སུ་འབྱོར་ནས་དེ་གར་བཀག་ཉར་བྱས་ཡོད་འདུག་ཀྱང་། ཁོང་རྣམས་ཀྱིས་ཞིབ་ཕྲའི་གནས་ཚུལ་ཤེས་རྟོགས་མ་བྱུང་བ་བཅས།
བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས། ཕྱི་ལོ་ ༢༠༡༢ ཟླ་ ༨ ཚེས་ ༢༥ ལ།