ཕྱི་ཟླ་༢ ཚེས་༡༣ ཨ་མདོ་རྔ་བ་ནས་རང་ལུས་མེར་སྲེག་གཏོང་བཞིན་རྒྱ་གཞུང་གིས་བོད་ཐོག་འཛིན་པའི་སྲིད་བྱུས་ལ་ངོ་རྒོལ་གནང་མཁན་རྒྱལ་གཅེས་དཔའ་བོ་བློ་བཟང་རྡོ་རྗེ་ལགས་ཕྱི་ ཚེས་༡༦ ཉིན་རྔ་བ་རང་སྐྱོང་ཁུལ་གྱི་ལྟེ་གནས་འབར་ཁམས་སྨན་ཞིག་ཁང་ནང་འདས་གྲོངས་སུ་གྱུར་ཡོད་པ་དང་། ནང་མིས་འབྲེལ་ཡོད་ཚང་མར་སྐུ་ཕུང་ནང་མིར་སྤྲོད་དགོས་པའི་རེ་བ་ནན་གྱིས་བཏོན་ཀྱང་། སྐུ་ཕུང་ནང་མིར་རྩིས་སྤྲོད་བྱས་མེད་པར་རྒྱ་གཞུང་གིས་མེར་སྲེག་བཏང་ནས་རུས་ཐལ་ཡིན་ཟེར་བ་ཞིག་སྤྲད་ཡོད་འདུག
ནང་མི་དང་གཉེན་ཉེ་སོགས་ཀྱིས་དཔའ་བོ་ཁོང་གི་རྗེས་འཇུག་སྒྲུབ་བཞིན་ཡོད་ཅིང་། རྔ་བ་མི་མང་གིས་ཉིན་གསུམ་རིང་ཚོང་ཁང་དང་ཟ་ཁང་སོགས་སྒོ་བརྒྱབ་ནས་དཔའ་བོ་ཁོང་གི་ཆེད་དགོན་པ་ཁག་ལ་བསྔོ་རྟེན་ཕུལ་བ་ནང་མིར་སེམས་གསོའི་ཞལ་འདེབས་ཕུལ་བ་སོགས་དགེ་སྦྱོར་ལ་བརྩོན་བཞིན་གདུང་སེམས་མཉམ་བསྐྱེད་གནང་ཡོད་འདུག
དེང་རྔ་བའི་དགོན་པ་ཁག་གི་ཆོ་འཕྲུལ་སྨོན་ལམ་ཆེན་མོ་འཚོགས་བཞིན་པ་དང་སྐབས་ཁེལ་ཡོད་ཅིང་། ཉེན་རྟོག་པ་མང་པོས་མི་མང་དཀྱུས་མ་ལ་བརྫུས་ཏེ་མི་མང་ཁྲོད་ཉུལ་མ་བྱེད་བཞིན་ཡོད་པ་དང་། དེ་བཞིན་དྲག་ཆས་ཉེན་རྟོག་པ་མང་པོས་རྔ་བའི་སྟོད་སྨད་བར་གསུམ་དུ་མངོན་གསལ་དོད་པོའི་སྒོ་ནས་ཀྱང་དམ་དྲག་བྱེད་བཞིན་ཡོད་པ་བཅས།
བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས། ཕྱི་ལོ་༢༠༡༤ ཟླ་༢ ཚེས་༡༧ ལ།
ཨོཾམཎིཔདམེཧཱུཾཧྲིཿ གུ་རུ་རིན་པོ་ཆེས་རྗེས་སུབཟུངས་བར་ཤོག
དཀོན་ཅོག་མཁྱེན་མཚམས་འཇོག་ཡོང་བར་འབད་པར་ཞུ།
ལས་དམན་བོད་ཀྱི་སྤྱི་དོན་ཆེད།།
གཅེས་པའི་སྐུ་ལུས་མེར་སྲེག་མཐུས།།
རང་རིགས་གཉིད་ལས་སད་པ་དང་།།
བསམ་ངན་དགྱ་འདྲེ་ཚར་གཅོད་ཤོག །
བོད་རང་བཙན་ཆེད་སྐུ་སྲོག་ལོངས་སྤྱོད་དོར་བའི་དཔའ་རྒོད་དག་ལ་གུས་འདུད་ཞུ།